Bengaluru | ಎಸ್‍ಐಆರ್ ವಿರೋಧಿಸಿ ಹೋರಾಟ; ಬಂಧಿತರನ್ನು ಬೇಷರತ್ ಬಿಡುಗಡೆಗೆ ಆಗ್ರಹ
ಬೆಂಗಳೂರು : ದಿಲ್ಲಿ ಸೇರಿದಂತೆ ವಿವಿಧ ಭಾಗಗಳಲ್ಲಿ ಎಸ್‍ಐಆರ್ ವಿರೋಧಿಸಿ ಶಾಂತಿಯುತ ಹೋರಾಟ ನಡೆಸುತ್ತಿದ್ದ ಹೋರಾಟಗಾರರನ್ನು ಪೊಲೀಸರು ವಶಕ್ಕೆ ಪಡೆದಿರುವುದು ಖಂಡನೀಯ. ಬಂಧಿತ ಎಲ್ಲ ಹೋರಾಟಗಾರರನ್ನು ಕೂಡಲೇ ಬಿಡುಗಡೆ ಮಾಡಬೇಕು ಎಂದು ಆಗ್ರಹಿಸಿ ರವಿವಾರ ನಗರದ ಫ್ರೀಡಂ ಪಾರ್ಕ್‍ನಲ್ಲಿ ಎಐಡಿಎಸ್‍ಒ, ಎಐಡಿವೈಒ, ಎಐಎಸ್‍ಎಫ್ ಹಾಗೂ ಎಐವೈಎಫ್ ಸೇರಿದಂತೆ ಎಡ ವಿದ್ಯಾರ್ಥಿ ಸಂಘಟನೆಗಳಿಂದ ಹೋರಾಟವನ್ನು ಹಮ್ಮಿಕೊಳ್ಳಲಾಗಿತ್ತು.
ಹೋರಾಟದಲ್ಲಿ ಭಾಗವಹಿಸಿ ಮಾತನಾಡಿದ ಎಐಡಿಎಸ್‍ಒ ಪದಾಧಿಕಾರಿ ಮಹಾಂತೇಶ್ ಬೇಳೂರು, ಎಸ್‍ಐಆರ್ ಪ್ರಜಾಪ್ರಭುತ್ವ ವಿರೋಧಿಯಾಗಿದ್ದು, ಇದನ್ನು ಜನಸಾಮಾನ್ಯರ ಮೇಲೆ ಹೇರಿರುವುದು ಖಂಡನೀಯ. ಜಂತರ್ ಮಂತರ್ ಪ್ರದೇಶವನ್ನು ಓಪನ್ ಜೈಲಾಗಿ ಪರಿವರ್ತಿಸಿ, ರೈಲು ಮತ್ತು ಬಸ್ ಸಂಚಾರಗಳನ್ನು ಕಡಿತಗೊಳಿಸಿ, ಸಾರ್ವಜನಿಕರ ಧ್ವನಿಯನ್ನು ಅಡಗಿಸಲು ಯತ್ನಿಸುತ್ತಿರುವುದು ಒಪ್ಪಲು ಸಾಧ್ಯವಿಲ್ಲ ಎಂದರು.
ಪ್ರತಿಭಟನೆಯಲ್ಲಿ ಮುಂಚೂಣಿಯಲ್ಲಿದ್ದ ಅಭಿಜಿತ್ ದೀಪ್ಕೆ, ಸೌರವ್ ದಾಸ್ ಮತ್ತು ಅಶುತೋಷ್‌ ರಂಕಾ ಬಂಧನದ ಬಳಿಕ ಅವರ ಇರುವಿಕೆಯ ಬಗ್ಗೆಯೂ ಯಾವುದೇ ಸ್ಪಷ್ಟತೆಯಿಲ್ಲದಿರುವುದು ಆತಂಕಕಾರಿ. ಅದರಲ್ಲೂ ಅಭಿಜಿತ್‍ರ ಅಜ್ಜಿ ನಿಧನರಾಗಿದ್ದರೂ, ಸಂಕಷ್ಟದ ಈ ಸಮಯದಲ್ಲಿ ಸರಕಾರದಿಂದ ಯಾವುದೇ ಸ್ಪಂದನೆ ಸಿಗದಿರುವುದು ಸರಕಾರದ ಅಮಾನವೀಯತೆಗೆ ಹಿಡಿದ ಕನ್ನಡಿಯಾಗಿದೆ. ದೇಶದ ರಾಜಧಾನಿಯಲ್ಲಿ ಮೋದಿ ಮತ್ತು ಅಮಿತ್ ಶಾ ವಿದ್ಯಾರ್ಥಿಗಳು ಹಾಗೂ ಯುವಕರ ಪ್ರಶ್ನೆಗಳಿಗೆ ಅಂಜುತ್ತಿದ್ದು, ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ಹತ್ತಿಕ್ಕಲು ಯತ್ನಿಸುತ್ತಿದ್ದಾರೆ ಎಂದು ಮಹಾಂತೇಶ್ ಆಕ್ರೋಶ ವ್ಯಕ್ತಪಡಿಸಿದರು.
ಎಐಎಸ್‍ಎಫ್ ಕಾರ್ಯದರ್ಶಿ ದೊಡ್ಡಬಸವ ಮಾತನಾಡಿ, ದೇಶದಲ್ಲಿ ಯುವಜನತೆ ನಡೆಸುತ್ತಿರುವ ಪ್ರತಿಭಟನೆಯೇ ಪ್ರಜಾಪ್ರಭುತ್ವದ ಆಶಾಕಿರಣವಾಗಿದೆ. ಚುನಾವಣಾ ಆಯೋಗವು ಮತದಾರರ ಪಟ್ಟಿಯಿಂದ ಸುಮಾರು 13 ಕೋಟಿ ಮತಗಳನ್ನು ಅಳಿಸಿಹಾಕಿರುವುದು ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್‌ ರನ್ನೇ ಪ್ರಶ್ನಿಸುತ್ತಿರುವ ಯುವಸಮುದಾಯ, ಸಂವಿಧಾನ ನಮಗೆ ನೀಡಿರುವ ಪ್ರತಿಭಟನೆಯ ಮೂಲಭೂತ ಹಕ್ಕನ್ನು ಕಸಿಯಲು ಯತ್ನಿಸುತ್ತಿರುವ ಸರಕಾರಿಗಳಿಗೆ ಧಿಕ್ಕಾರ ಎಂದು ಹೇಳಿದರು.
ಎಐಡಿವೈಒ ಬೆಂಗಳೂರು ಜಿಲ್ಲಾಧ್ಯಕ್ಷ ವಿನಯ್ ಸಾರಥಿ ಮಾತನಾಡಿದರು.
ಹೋರಾಟದಲ್ಲಿ ಎಐವೈಎಫ್ ರಾಜ್ಯ ಸಂಚಾಲಕ ಸಂತೋಷ್, ಎಐಡಿವೈಒ ಉಪಾಧ್ಯಕ್ಷ ಡಿ.ಡಿ. ರಾಜಶೇಖರ್, ವಿದ್ಯಾರ್ಥಿ ಮುಖಂಡರಾದ ಅಪೂರ್ವ, ಸುಭಾಷ್‌ ಬೆಟ್ಟದಕೊಪ್ಪ, ವಿನಯ್ ಚಂದ್ರ, ಕೃಷ್ಣ ಸೇರಿದಂತೆ ಹಲವರು ಭಾಗವಹಿಸಿದ್ದರು.
