Bengaluru | ಮಾದಕ ವಸ್ತು ಮಾರಾಟ ಮಾಡುತ್ತಿದ್ದ ಬೃಹತ್ ಜಾಲ ಪತ್ತೆ; ಮೂವರು ವಿದೇಶಿ ಡ್ರಗ್ಸ್ ಪೆಡ್ಲರ್ ಸೇರಿ 17 ಆರೋಪಿಗಳ ಬಂಧನ
ಬೆಂಗಳೂರು : ನಗರದಲ್ಲಿ ನಿಷೇಧಿತ ಮಾದಕ ವಸ್ತು ಮತ್ತು ಇ-ಸಿಗರೇಟ್ ಮಾರಾಟ ಮಾಡುತ್ತಿದ್ದ ಬೃಹತ್ ಜಾಲ ಪತ್ತೆಯಾಗಿದ್ದು, ಕೇಂದ್ರ ಅಪರಾಧ ವಿಭಾಗ(ಸಿಸಿಬಿ)ಹಾಗೂ ನಗರ ಪೊಲೀಸರು, ಮೂವರು ವಿದೇಶಿ ಡ್ರಗ್ಸ್ ಪೆಡ್ಲರ್, ಎಂಟು ಹೊರ ರಾಜ್ಯದವರು ಸೇರಿ 17 ಮಂದಿ ಆರೋಪಿಗಳನ್ನು ಬಂಧಿಸಿದ್ದಾರೆ. ನಗರದದ್ಯಾಂತ ಒಟ್ಟು 25.23 ಕೋಟಿ ರೂ. ಮೌಲ್ಯದ ಮಾದಕ ವಸ್ತುವನ್ನು ಜಪ್ತಿ ಮಾಡಲಾಗಿದೆ.
ಸಿಸಿಬಿ ಮಾದಕ ದ್ರವ್ಯ ನಿಗ್ರಹ ದಳದ ಪೊಲೀಸರು ಆಫ್ರೀಕಾ ಮೂಲದ ಅಂಬೊಮೊ ಜಾನ್ (37), ನೈಜೀರಿಯಾದ ಚೈಮ್ ಮೋಸೆಸ್ (36) ಮತ್ತು ಕಾರಿಕ್ರಿ ಎಮೋಸ್ (33) ಎಂಬುವವರನ್ನು ಬಂಧಿಸಲಾಗಿದ್ದು, 23 ಕೋಟಿ ಮೌಲ್ಯದ 10.27 ಕೆ.ಜಿ ಎಂಡಿಎಂಎ ಸೇರಿ ವಿವಿಧ ಬಗೆಯ ಮಾದಕ ವಸ್ತುಗಳನ್ನು ಜಪ್ತಿ ಮಾಡಿದ್ದಾರೆ.
ವಿದೇಶಿ ಮೂಲದ ಆರೋಪಿಗಳು ಮೆಡಿಕಲ್ ವೀಸಾ ಹಾಗೂ ಟೂರಿಸ್ಟ್ ವೀಸಾ ಪಡೆದು ಭಾರತಕ್ಕೆ ಬಂದಿದ್ದರು. ವೀಸಾ ಅವಧಿ ಮುಗಿದಿದ್ದರೂ, ನಗರದಲ್ಲಿ ಅನಧಿಕೃತವಾಗಿ ವಾಸವಾಗಿದ್ದರು. ದಿಲ್ಲಿಯಿಂದ ಕಡಿಮೆ ಬೆಲೆಗೆ ಮಾದಕ ವಸ್ತುಗಳನ್ನು ಖರೀದಿಸಿ, ಪರಿಚಯಸ್ಥರ ಮುಖೇನ ಕಾಲೇಜು ವಿದ್ಯಾರ್ಥಿಗಳು ಸೇರಿ ಸಾರ್ವಜನಿಕರಿಗೆ ಮಾರಾಟ ಮಾಡುತ್ತಿದ್ದರು ಎನ್ನಲಾಗಿದೆ.
ಆಂದ್ರಪ್ರದೇಶದಲ್ಲಿ ಕಡಿಮೆ ಬೆಲೆಗೆ ಡ್ರಗ್ಸ್ ಖರೀದಿಸಿ ಟ್ರೈನ್ ಮೂಲಕ ನಗರಕ್ಕೆ ತಂದು ದುಬಾರಿ ಬೆಲೆಗೆ ಮಾರಾಟ ಮಾಡುತ್ತಿದ್ದ ಪೆಡ್ಲರ್ ಒಬ್ಬನನ್ನು ಸುಬ್ರಮಣ್ಯನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ಕೆ. ಪ್ರಸಾದ್ (25) ಬಂಧಿತನಾಗಿದ್ದು, ಆರೋಪಿಯಿಂದ ಒಟ್ಟು 73.98 ಲಕ್ಷ ರೂ. ಮೌಲ್ಯದ 45.85 ಕೆ.ಜಿ ಗಾಂಜಾ, 237 ಗ್ರಾಂ ಹೈಡ್ರೋ ಗಾಂಜಾ, 36 ಗ್ರಾಂ ಎಂಡಿಎಂಎ ಅನ್ನು ವಶಕ್ಕೆ ಪಡೆಯಲಾಗಿದೆ.
ಕೆ. ಪ್ರಸಾದ್ ತನ್ನ ಸಹಚರ ಕದಿರನ್ ಎಂಬಾತನ ಸಹಾಯದಿಂದ ಬಾಡಿಗೆ ಮನೆ ಪಡೆದಿದ್ದ. ಹೊರರಾಜ್ಯದಿಂದ ಡ್ರಗ್ಸ್ ತಂದು ಬಾಡಿಗೆ ಮನೆಯಲ್ಲಿ ಚಿಕ್ಕ-ಚಿಕ್ಕ ಪ್ಯಾಕೇಟ್ ತಯಾರಿಸಿ, ಮಿಲ್ಕ್ ಕಾಲನಿಯ ಅಪಾರ್ಟ್ಮೆಂಟ್ ಸಮೀಪ ಮಾರಾಟ ಮಾಡುತ್ತಿದ್ದ ವೇಳೆ ಪೊಲೀಸರು ದಾಳಿ ನಡೆಸಿ ಆರೋಪಿಯನ್ನು ಬಂಧಿಸಿದ್ದಾರೆ.
ಇನ್ನುಳಿದಂತೆ ಆರ್ ಎಂಸಿ ಯಾರ್ಡ್, ಮಡಿವಾಳ, ರಾಜಾಜಿನಗರ, ತಿಲಕನಗರ, ವೈಟ್ ಫೀಲ್ಡ್, ಯಶವಂತಪುರ ಹಾಗೂ ಇಂದಿರಾನಗರ ಪೊಲೀಸರು ಪ್ರತ್ಯೇಕ ಪ್ರಕರಣಗಳಲ್ಲಿ ಕಾರ್ಯಾಚರಣೆ ನಡೆಸಿ ಲಕ್ಷಾಂತರ ಮೌಲ್ಯದ ಡ್ರಗ್ಸ್ ವಶಕ್ಕೆ ಪಡೆದಿದ್ದು, ಆರೋಪಿಗಳನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಬಂಧಿತರಿಂದ 127.30 ಕೆ.ಜಿ ಗಾಂಜಾ, 3.31 ಕೆ.ಜಿ ಹೈಡ್ರೋಗಾಂಜಾ, 10.30 ಕೆ.ಜಿ ಎಂಡಿಎಂಎ, 300 ಇ-ಸಿಗರೇಟ್ಗಳು, 90 ಹುಕ್ಕಾ ಪ್ಲೇವರ್ಗಳು, 30 ಹುಕ್ಕಾ ಪಾಟ್, ಸ್ಟಾಂಡ್, ಹುಕ್ಕಾ ಪಿಂಗಾಣಿಗಳು ಮತ್ತು ವಿದೇಶಿ ಸಿಗರೇಟ್ ಪ್ಯಾಕ್ಗಳು, ವಿವಿಧ ಕಂಪನಿಯ ತಂಬಾಕು ಉತ್ಪನ್ನ ಸೇರಿ ಒಟ್ಟು 25.23 ಕೋಟಿ ರೂ. ಮೌಲ್ಯದ ವಸ್ತುಗಳನ್ನು ವಶಕ್ಕೆ ಪಡೆಯಲಾಗಿದೆ. ಈ ಕುರಿತು ನಗರದ ವಿವಿಧ ಪೊಲೀಸ್ ಠಾಣೆಯಲ್ಲಿ ಪ್ರತ್ಯೇಕ ಪ್ರಕರಣಗಳನ್ನು ದಾಖಲಾಗಿದ್ದು, ಬಂಧಿತ 17 ಆರೋಪಿಗಳನ್ನು ನಿಗಧಿತ ದಿನಾಂಕಗಳಂದು ನ್ಯಾಯಾಲಯಕ್ಕೆ ಒಪ್ಪಿಸಿ, ನ್ಯಾಯಾಂಗ ಬಂಧನಕ್ಕೆ ಒಳಪಡಿಸಲಾಗಿದೆ. ನಗರದಲ್ಲಿ ಮಾದಕ ವಸ್ತುಗಳನ್ನು ಸರಬರಾಜು ಮಾಡುತ್ತಿದ್ದ ಅಪರಿಚಿತ ವ್ಯಕ್ತಿಗಳ ಪತ್ತೆ ಕಾರ್ಯ ಮುಂದುವರೆದಿದೆ.
-ಸೀಮಂತ್ ಕುಮಾರ್ ಸಿಂಗ್, ಬೆಂಗಳೂರು ನಗರ ಪೊಲೀಸ್ ಆಯುಕ್ತ
ಪೊಲೀಸ್ ಠಾಣಾವಾರು ವಿವರ: ಸಿಸಿಬಿ ಮಾದಕ ದ್ರವ್ಯ ನಿಗ್ರಹ ದಳವು 23 ಕೋಟಿ ರೂ. ಮೌಲ್ಯದ 10 ಕೆ.ಜಿ 270 ಗ್ರಾಂ MDMA, 2 ಕೆ.ಜಿ 44 ಗ್ರಾಂ ಹೈಡ್ರೋ ಗಾಂಜಾವನ್ನು, ಆರ್ ಎಂಸಿ ಯಾರ್ಡ್ ಠಾಣಾ ಪೊಲೀಸರು 72.30 ಲಕ್ಷ ರೂ. ಮೌಲ್ಯದ 1 ಕೆ.ಜಿ 33 ಗ್ರಾಂ ಹೈಡ್ರೋ ಗಾಂಜಾವನ್ನು, ಸುಬ್ರಹ್ಮಣ್ಯನಗರ ಠಾಣಾ ಪೊಲೀಸರು 69 ಲಕ್ಷ ರೂ. ಮೌಲ್ಯದ 45.85 ಕೆ.ಜಿ ಗಾಂಜಾ, 237 ಗ್ರಾಂ ಹೈಡ್ರೋ ಗಾಂಜಾ ಮತ್ತು 36 ಗ್ರಾಂ ಎಂಡಿಎಂ ಅನ್ನು, ಮಡಿವಾಳ ಠಾಣೆ 36 ಲಕ್ಷ ರೂ. ಮೌಲ್ಯದ 36 ಕೆ.ಜಿ ಗಾಂಜಾ ಮತ್ತು ಒಂದು ಕಾರನ್ನು, ತಿಲಕನಗರ ಠಾಣೆ 20.20 ಲಕ್ಷ ರೂ. ಮೌಲ್ಯದ 20 ಕೆ.ಜಿ 200 ಗ್ರಾಂ ಗಾಂಜಾವನ್ನು ವೈಟ್ಫೀಲ್ಡ್ ಠಾಣೆ 22 ಲಕ್ಷ ರೂ. ಮೌಲ್ಯದ 22 ಕೆ.ಜಿ ಗಾಂಜಾ, ಯಶವಂತಪುರ ಠಾಣೆ 8 ಲಕ್ಷ ರೂ. ಮೌಲ್ಯದ 300 ಇ-ಸಿಗರೇಟ್ಗಳು ಮತ್ತು 90 ಹುಕ್ಕಾ ಫ್ಲೇವರ್ಗಳು, 30 ಹುಕ್ಕಾ ಪಾಟ್, ರಾಜಾಜಿನಗರ ಠಾಣೆ 15.84 ಲಕ್ಷ ರೂ. ಮೌಲ್ಯದ ವಿವಿಧ ಕಂಪೆನಿಗಳ ತಂಬಾಕು ಉತ್ಪನ್ನ, ಇಂದಿರಾನಗರ ಠಾಣೆ ಪೊಲೀಸರು 3.24 ಲಕ್ಷ ರೂ. ಮೌಲ್ಯದ 3 ಕೆ.ಜಿ 247 ಗ್ರಾಂ ಗಾಂಜಾ ಹಾಗೂ ಮೊಬೈಲ್ ಫೋನ್ ಮತ್ತು ಒಂದು ದ್ವಿಚಕ್ರ ವಾಹನವನ್ನು ಜಪ್ತಿ ಮಾಡಿದ್ದಾರೆ.
