ನಿಯಮಬಾಹಿರವಾಗಿ ‘ಇ-ಖಾತಾ’ ನೀಡಿದ್ದ ಆರೋಪ: ಇಬ್ಬರು ಜಿಬಿಎ ಅಧಿಕಾರಿಗಳು ಅಮಾನತು

ಬೆಂಗಳೂರು : ಬೆಂಗಳೂರಿನ 100ಕ್ಕೂ ಹೆಚ್ಚು ಫ್ಲಾಟ್‍ಗಳಿಗೆ ನ ನಿಯಮಬಾಹಿರವಾಗಿ ‘ಇ-ಖಾತಾ’ ನೀಡಿದ್ದ ಆರೋಪದಡಿ ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ ಇಬ್ಬರು ಹಿರಿಯ ಕಂದಾಯ ಅಧಿಕಾರಿಗಳನ್ನು ಅಮಾನತುಗೊಳಿಸಲಾಗಿದೆ.

ಅಮಾನತುಗೊಂಡ ಅಧಿಕಾರಿಗಳನ್ನು ಬೆಂಗಳೂರು ಪೂರ್ವ ನಗರ ಪಾಲಿಕೆಯ ಪ್ರಭಾರ ಕಂದಾಯ ಅಧಿಕಾರಿ ಬಸವರಾಜ್ ಮಗಿ ಹಾಗೂ ಬೆಂಗಳೂರು ಪಶ್ಚಿಮ ನಗರ ಪಾಲಿಕೆಯ ಪ್ರಭಾರ ಕಂದಾಯ ಅಧಿಕಾರಿ ಲೋಕಮಾತಾ ಡಿ.ಎಸ್. ಎಂದು ಗುರುತಿಸಲಾಗಿದೆ. ಅಧಿಕಾರಿಗಳ ಈ ಕೃತ್ಯವನ್ನು ‘ಗಂಭೀರ ದುರ್ನಡತೆ, ಅಪರಾಧಿಕ ಅಕ್ರಮ ಹಾಗೂ ಸಂಪೂರ್ಣ ಸ್ವೀಕಾರಾರ್ಹವಲ್ಲದ್ದು’ ಎಂದು ಜಿಬಿಎ ತನ್ನ ಅಮಾನತು ಆದೇಶದಲ್ಲಿ ತಿಳಿಸಿದೆ.

ಕೆ.ಆರ್.ಪುರ ಮತ್ತು ಕೆಂಗೇರಿ ವಲಯಗಳ ಆಸ್ತಿ ದಾಖಲೆಗಳನ್ನು ಕೂಲಂಕಶವಾಗಿ ಪರಿಶೀಲಿಸಿದಾಗ ಈ ಅಕ್ರಮ ಬೆಳಕಿಗೆ ಬಂದಿದೆ. ಬ್ಯಾಂಕ್‍ಗಳಲ್ಲಿ ಸಾಲ ತೀರಿಸದ ಸುಸ್ತಿದಾರರ ಆಸ್ತಿಗಳನ್ನು ಸರ್ಫೇಸಿ ಕಾಯ್ದೆ ಅಡಿಯಲ್ಲಿ ವಶಪಡಿಸಿಕೊಂಡು ಹರಾಜು ಹಾಕಿದಾಗ ಆಸ್ತಿ ದಾಖಲೆಗಳನ್ನು ವರ್ಗಾಯಿಸಲು ಜಿಬಿಎ ‘ಇ-ಆಸ್ತಿ’ ತಂತ್ರಾಂಶದಲ್ಲಿ ವಿಶೇಷ ಹಿಂಬಾಗಿಲ ಸೌಲಭ್ಯ ಕಲ್ಪಿಸಿತ್ತು.

ಆದರೆ, ಅಮಾನತುಗೊಂಡ ಇಬ್ಬರೂ ಅಧಿಕಾರಿಗಳು ಇವು ಸರ್ಫೇಸಿ ಮಾರಾಟ ಪ್ರಮಾಣಪತ್ರಗಳು ಅಲ್ಲದಿದ್ದರೂ ಸಹ, ಸಾಮಾನ್ಯ ಕ್ರಯಪತ್ರಗಳು ಮತ್ತು ಇತರ ದಾಖಲೆಗಳನ್ನು ಬಳಸಿಕೊಂಡು ಸಾಫ್ಟ್‌ ವೇರ್ ದುರ್ಬಳಕೆ ಮೂಲಕ ಅಕ್ರಮವಾಗಿ ಇ-ಖಾತಾ ಮಂಜೂರು ಮಾಡಿದ್ದಾರೆ.

ಬಸವರಾಜ್ ಮಗಿ ಸುಮಾರು 98 ಅರ್ಜಿದಾರರಿಗೆ ಹಾಗೂ ಲೋಕಮಾತಾ ಸುಮಾರು 6 ಪ್ರಕರಣಗಳಿಗೆ ಅಕ್ರಮವಾಗಿ ಇ-ಖಾತಾ ಅನುಮೋದಿಸಿದ್ದಾರೆ. ಕಂದಾಯ ನಿರೀಕ್ಷಕರು ನಕಾರಾತ್ಮಕ ವರದಿ ನೀಡಿದ್ದಾಗ್ಯೂ ಅಧಿಕಾರಿಗಳು ಈ ಅರ್ಜಿಗಳನ್ನು ಪುರಸ್ಕರಿಸಿರುವುದು ಕಂಡುಬಂದಿದೆ ಎಂದು ಆದೇಶದಲ್ಲಿ ಉಲ್ಲೇಖಿಸಲಾಗಿದೆ.

ಅಧಿಕಾರಿಗಳು ಜಿಬಿಎ ನಿಯಮಗಳು 2024ರ ಅಡಿಯಲ್ಲಿ ಹೊರಡಿಸಲಾದ ಕನಿಷ್ಠ 3 ಸುತ್ತೋಲೆಗಳನ್ನು ಹಾಗೂ ಪ್ರಮಾಣಿತ ಕಾರ್ಯಾಚರಣೆ ವಿಧಾನವನ್ನು ಸಂಪೂರ್ಣವಾಗಿ ಉಲ್ಲಂಘಿಸಿದ್ದಾರೆ. ಈ ಪ್ರಕರಣದ ಕುರಿತು ಸ್ಪಷ್ಟನೆ ನೀಡಿರುವ ಜಿಬಿಎ, ನಾವು ಯಾವುದೇ ರೀತಿಯ ವಂಚನೆಯನ್ನು ಸಹಿಸುವುದಿಲ್ಲ ಮತ್ತು ಸಾರ್ವಜನಿಕ ನಂಬಿಕೆಯನ್ನು ಕಳೆದುಕೊಳ್ಳಲು ಬಿಡುವುದಿಲ್ಲ ಎಂದು ಎಚ್ಚರಿಸಿದೆ.