ಗ್ಯಾರಂಟಿ ಆಮಿಷದಲ್ಲಿ ಪೋಷಕರನ್ನು ಮುಳುಗಿಸಿ ಮಕ್ಕಳ ಭವಿಷ್ಯ ಸರ್ವನಾಶ ಮಾಡುತ್ತಿರುವ ಸರಕಾರ : ಎಚ್‍ಡಿಕೆ ಆಕ್ರೋಶ
ಬೆಂಗಳೂರು : ‘ಸಮಾಜ ಕಲ್ಯಾಣ ಸಚಿವರು ಹಾಸ್ಟೆಲ್‍ಗಳಲ್ಲಿ ವಾಸ್ತವ್ಯ ಹೂಡಿ, ಅಲ್ಲಿನ ಮಕ್ಕಳೊಂದಿಗೆ ಊಟ ಮಾಡಬೇಕು. ಅವರ ಉತ್ತಮ ಶಿಕ್ಷಣಕ್ಕಾಗಿ ಕಠಿಣ ಕ್ರಮಗಳನ್ನು ವಹಿಸದ ಹೊರತು ಸುಧಾರಣೆ ಸಾಧ್ಯವಿಲ್ಲ’ ಎಂದು ಕೇಂದ್ರ ಸಚಿವ ಎಚ್.ಡಿ.ಕುಮಾರಸ್ವಾಮಿ ಅಭಿಪ್ರಾಯಪಟ್ಟಿದ್ದಾರೆ.
ಶನಿವಾರ ಎಕ್ಸ್ ನಲ್ಲಿ ಪೋಸ್ಟ್ ಹಾಕಿರುವ ಅವರು, ‘ಬಡಮಕ್ಕಳು ಓದುವ ಇಲಾಖೆಯ ಹಾಸ್ಟೆಲ್‍ಗಳ ದುಸ್ಥಿತಿ ನಾಚಿಕೆಗೇಡು. ಅನಾಗರಿಕತೆಯ ಪರಮಾವಧಿ. ಆಡಳಿತ ವ್ಯವಸ್ಥೆ ತಲೆ ತಗ್ಗಿಸಬೇಕಾದ ಸಂಗತಿ. ಕಸಾಯಿಖಾನೆಗಳಿಗಿಂತ ಕಡೆಯಾಗಿರುವ ಇಂತಹ ಜಾಗದಲ್ಲಿ ಮಕ್ಕಳು ಗುಣಾತ್ಮಕ ವಿದ್ಯಾಭ್ಯಾಸ ಮಾಡುವುದಾದರೂ ಹೇಗೆ?’ ಎಂದು ಪ್ರಶ್ನಿಸಿದ್ದಾರೆ.
‘2026-27ನೇ ಸಾಲಿನ ಆಯವ್ಯಯದಲ್ಲಿ ಎಸ್‍ಸಿ-ಎಸ್‍ಟಿ ಅಭಿವೃದ್ಧಿಗಾಗಿ 42,632 ಕೋಟಿ ರೂ. ಅನುದಾನ ಮೀಸಲಿಡಲಾಗಿದೆ. ಇಷ್ಟು ಹಣ ಕಾಗದದ ಮೇಲಷ್ಟೇ ಮೀಸಲು ಇದೆಯೋ? ಅಥವಾ ಆ ಹಣ ಭ್ರಷ್ಟರ ಕಿಸೆಗಳ ಪಾಲಾಗಿದೆಯೋ? ಸರಕಾರವೇ ಹೇಳಬೇಕು. ತಂದೆ-ತಾಯಿಯನ್ನು ಗ್ಯಾರಂಟಿಗಳ ಆಮಿಷದಲ್ಲಿ ಮುಳುಗಿಸಿ ಅವರ ಮಕ್ಕಳ ಭವಿಷ್ಯವನ್ನು ಸರ್ವನಾಶ ಮಾಡುತ್ತಿರುವ ಈ ಕೆಟ್ಟ ವ್ಯವಸ್ಥೆ ಆತಂಕಕಾರಿ’ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.
ಮೂರು ವರ್ಷಗಳಿಂದ ಗ್ಯಾರಂಟಿ ಗ್ಯಾರಂಟಿ ಎಂದು ಜಾಗಟೆ ಹೊಡೆಯುತ್ತಿರುವ ಕಾಂಗ್ರೆಸ್ ಸರಕಾರದ ದೆಸೆಯಿಂದ ಸಮೃದ್ಧ ಕರ್ನಾಟಕ ತನ್ನ ಹೆಮ್ಮೆ, ಹಿರಿಮೆ ಗರಿಮೆಗಳನ್ನು ಕಳೆದುಕೊಂಡು ‘ಜಂಗಲ್ ರಾಜ್ಯ'ವಾಗಿ ಬದಲಾಗುತ್ತಿದೆ. ರೀಲ್ ಸರಕಾರದ ಮುಖಕ್ಕೆ ರಾಚುವಂತಿದೆ. ಹಾಸ್ಟೆಲ್ ಕೊಠಡಿಗಳಲ್ಲಿ ಕುರಿಗಳಂತೆ ಮಕ್ಕಳನ್ನು ತುಂಬಲಾಗಿದೆ. ಶೌಚಾಲಯ, ಸ್ನಾನ ಗೃಹಗಳು ದುರ್ನಾತದಿಂದ ನಾರುತ್ತಿವೆ. ಕಳಪೆ ಆಹಾರ, ಅನ್ನದಲ್ಲಿ ಕಲ್ಲು, ಕೊಳೆತ ತರಕಾರಿ. ಜೈಲುಗಳಿಗಿಂತ ಕೆಟ್ಟ ಸ್ಥಿತಿಯಲ್ಲಿರುವ ಹಾಸ್ಟೆಲ್ ಕೋಣೆಗಳು! ಸ್ವಚ್ಛತೆ ಇಲ್ಲದೆ ಅನಾರೋಗ್ಯಕ್ಕೆ ತುತ್ತಾಗುತ್ತಿರುವ ಮಕ್ಕಳು ಎಂಬ ಮಾಧ್ಯಮದ ಅಂಶಗಳನ್ನು ಉಲ್ಲೇಖಿಸಿದೆ ಎಂದು ಅವರು ತಿಳಿಸಿದ್ದಾರೆ.
‘ಶಿಕ್ಷಣವೇ ಸಮಾಜದ ಅಭಿವೃದ್ಧಿಯ ಅಡಿಪಾಯ. ಜ್ಞಾನವೇ ಎಲ್ಲದರ ತಳಹದಿ’ ಎಂದು ಸಂವಿಧಾನ ಶಿಲ್ಪಿ ಡಾ.ಅಂಬೇಡ್ಕರ್ ಅವರು ಹೇಳಿದ್ದರು. ಆದರೆ ಅವರ ಹೆಸರಿನ ಹಾಸ್ಟೆಲ್‍ಗಳ ದಯನೀಯ ಸ್ಥಿತಿ ಕರ್ನಾಟಕಕ್ಕೆ ಕಳಂಕ’ ಎಂದು ಕುಮಾರಸ್ವಾಮಿ ಬೇಸರ ವ್ಯಕ್ತಪಡಿಸಿದ್ದು, ‘ಕೂಡಲೇ ಹಾಸ್ಟೇಲ್‍ಗಳ ಸುಧಾರಣೆಗೆ ಕ್ರಮ ಕೈಗೊಳ್ಳಬೇಕು’ ಎಂದು ಕೋರಿದ್ದಾರೆ.
