ಪಿಎಸ್ಐ ಹಗರಣದ ಆರೋಪಿಗಳೊಂದಿಗೆ ಬಿಜೆಪಿಯವರು ಸೇರಿ ಸಾಕ್ಷಿ ನಾಶಪಡಿಸುವ ಯತ್ನವೇ: ರಮೇಶ್ ಬಾಬು
ಬೆಂಗಳೂರು: ಪೋಲೀಸ್ ಸಬ್ ಇನ್ಸ್ ಪೆಕ್ಟರ್ ನೇಮಕಾತಿ (ಪಿಎಸ್ಐ) ಹಗರಣದ ಎಲ್ಲ ಆರೋಪಿಗಳ ಜೊತೆ ಸೇರಿಕೊಂಡು ಬಿಜೆಪಿಯವರು ಸಾಕ್ಷ್ಯನಾಶ ಮಾಡುವ ಕೆಲಸ ಮಾಡುತ್ತಿದ್ದಾರೆಯೇ? ಎಂದು ಕೆಪಿಸಿಸಿ ಸಂವಹನ ವಿಭಾಗದ ಅಧ್ಯಕ್ಷ ರಮೇಶ್ ಬಾಬು ಪ್ರಶ್ನಿಸಿದ್ದಾರೆ.
ಗುರುವಾರ ನಗರದ ಕ್ವೀನ್ಸ್ರಸ್ತೆಯ ಕೆಪಿಸಿಸಿ ಕಚೇರಿಯಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು, ಪಿಎಸ್ಐ ಹಗರಣದ ಪ್ರಮುಖ ಆರೋಪಿಗಳ ಜೊತೆ ಬಿಜೆಪಿ ಅಭ್ಯರ್ಥಿ, ಸಂಸದ ಉಮೇಶ್ ಜಾದವ್ ಕಾಣಿಸಿಕೊಂಡಿದ್ದು, ಅವರ ಮನೆಗಳಿಗೆ ತೆರಳಿ ಊಟ ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಫೋಟೋ ಹಂಚಿಕೊಂಡಿದ್ದು, ಇದೆಲ್ಲವೂ ಸಾಕ್ಷ್ಯಾನಾಶ ಪಡಿಸುವ ಯತ್ನವೇ? ಎಂದು ಕೇಳಿದರು.
ಬಿಜೆಪಿಯ ಶಾಸಕರು ಉಭಯ ಸದನಗಳಲ್ಲಿ ಪಿಎಸ್ಐ ಹಗರಣದ ಬಗ್ಗೆ ದನಿ ಎತ್ತಿದ್ದರು. ಅಂದಿನ ಗೃಹ ಸಚಿವರಾದ ಆರಗ ಜ್ಞಾನೇಂದ್ರ ಯಾವುದೇ ಹಗರಣ ನಡೆದಿಲ್ಲ ಎಂದು ಸಮಜಾಯಿಷಿ ನೀಡಿದ್ದರು. ಆದರೆ, ಪ್ರಿಯಾಂಕ್ ಖರ್ಗೆ ಅವರು ದಾಖಲೆಗಳ ಸಮೇತ ಪ್ರಕರಣ ಬಯಲು ಮಾಡಿದರು. ಎಲ್ಲೆಲ್ಲಿ ಯಾವ, ಯಾವ ಪರೀಕ್ಷಾ ಕೇಂದ್ರದಲ್ಲಿ ಅಕ್ರಮ ನಡೆದಿದೆ. ಎಲ್ಲೆಲ್ಲಿ ನಕಲು ಮಾಡಲು ಅವಕಾಶ ನೀಡಲಾಯಿತು ಎಂದು ಬಯಲು ಮಾಡಿದರು. ಆದರೂ ಬಿಜೆಪಿಯವರು ಇದನ್ನು ಅಲ್ಲಗಳೆದರು ಎಂದು ರಮೇಶ್ಬಾಬು ವಿವರ ನೀಡಿದರು.
ಮಾಧ್ಯಮಗಳ ಸಹಕಾರದಿಂದ ಹಗರಣದ ದಾಖಲೆಗಳನ್ನು ನೀಡಿದಾಗ ಪಿಎಸ್ಐ ಪ್ರಕರಣವನ್ನು ಸಿಐಡಿ ತನಿಖೆಗೆ ನೀಡಲಾಯಿತು. ಕಲಬುರ್ಗಿಯ ಸಂಸದ ಉಮೇಶ್ ಜಾದವ್ ಅವರು ನಕಲು ಕೇಂದ್ರಗಳನ್ನು ಸೃಷ್ಟಿ ಮಾಡುವುದರಲ್ಲಿ ಪರಿಣಿತರು. ಅಕ್ರಮ ನಡೆದ ದಿವ್ಯಾ ಹಾಗರಗಿ ಶಾಲೆಯಲ್ಲಿ ಪರೀಕ್ಷಾ ಕೇಂದ್ರ ತೆರೆಯಬಹುದು ಎಂದು ಶಿಫಾರಸ್ಸು ಪತ್ರ ನೀಡಿದ್ದರು ಎಂದು ರಮೇಶ್ಬಾಬು ತಿಳಿಸಿದರು.
ದಿವ್ಯಾ ಹಾಗರಗಿ ಮನೆಯಲ್ಲಿ ಅಂದಿನ ಗೃಹ ಸಚಿವ ಅರಗ ಜ್ಞಾನೇಂದ್ರ ಅವರು ದ್ರಾಕ್ಷಿ, ಗೋಡಂಬಿ ತಿಂದು ಬಂದಿದ್ದರು. ಇದನ್ನು ದಾಖಲೆ ಸಮೇತ ಬಹಿರಂಗ ಮಾಡಿದಾಗ ಅದಕ್ಕೆ ಅವರಿಂದ ಸರಿಯಾದ ಉತ್ತರವೇ ಬರಲಿಲ್ಲ. ಇಡೀ ರಾಜ್ಯದಲ್ಲಿ ಆ ಪ್ರಕರಣದಲ್ಲಿ 110 ಜನ ಬಂಧಿತರಾಗಿದ್ದಾರೆ. ಇದರಲ್ಲಿ ಬಹುತೇಕ ಜನ ಬಿಜೆಪಿಯ ವಿವಿಧ ಘಟಕಗಳ ಪದಾಧಿಕಾರಿಗಳು ಎಂದು ರಮೇಶ್ಬಾಬು ಆರೋಪಿಸಿದರು.
ಕರ್ನಾಟಕ ರಾಜ್ಯದ ಇತಿಹಾಸದಲ್ಲೇ ಒಬ್ಬ ಹಿರಿಯ ಐಪಿಎಸ್ ಅಧಿಕಾರಿಯನ್ನು ಬಂಧಿಸಿ, ಕೆಲಸದಿಂದ ಅಮಾನತು ಮಾಡಲಾಗಿತ್ತು. ಪರೀಕ್ಷೆ ಬರೆದ ಸುಮಾರು 50 ಸಾವಿರ ಯುವಕರಿಗೆ ಮೋಸ ಮಾಡಲಾಗಿತ್ತು. ರಾಜ್ಯಕ್ಕೆ ಕಪ್ಪುಚುಕ್ಕೆ ತಂದವರ ಜೊತೆ ಬಿಜೆಪಿಯವರು ಮೆರವಣೆಗೆ ಮಾಡುವ ಮೂಲಕ ಕಿಂಚಿತ್ತೂ ನೈತಿಕತೆ ಇಲ್ಲದೇ ಓಡಾಡುತ್ತಿದ್ದಾರೆ ಎಂದು ರಮೇಶ್ಬಾಬು ಟೀಕಿಸಿದರು.
ಬಿಜೆಪಿಯವರು ಭ್ರಷ್ಟಾಚಾರವನ್ನು ಒಪ್ಪಿಕೊಂಡಿದ್ದಾರೆ. ಅದರಲ್ಲೂ ಚುನಾವಣಾ ಬಾಂಡ್ ರೀತಿ ನಾಜೂಕಿನಲ್ಲಿ ಭ್ರಷ್ಟಾಚಾರ ಮಾಡುವುದನ್ನು ಚೆನ್ನಾಗಿ ಕಲಿತಿದ್ದಾರೆ. ನಯವಂಚನೆ ಹೇಗೆ ಮಾಡಬಹುದು ಎಂದು ಮೋದಿ ಸರಕಾರ ಮಾದರಿ ಹಾಕಿಕೊಟ್ಟಿದೆ ಎಂದು ರಮೇಶ್ಬಾಬು ದೂರಿದರು.
ಬಿಟ್ ಕಾಯಿನ್ ಹಗರಣದ ಶ್ರೀಕಿಯನ್ನು ಬಸವರಾಜ ಬೊಮ್ಮಾಯಿ ಅವರು ಹಾವೇರಿಗೆ ಚುನಾವಣಾ ಪ್ರಚಾರಕ್ಕೆ ಕರೆದುಕೊಂಡು ಬಂದರೆ ಒಳ್ಳೆಯದು ಎಂಬುದು ನನ್ನ ಸಲಹೆ ಎಂದು ರಮೇಶ್ಬಾಬು ಹೇಳಿದರು.
ಬಿಜೆಪಿ ಈ ರಾಜ್ಯದ ಯುವಕರಿಗೆ ಮೋಸ ಮಾಡಿದೆ. ಪ್ರಬುದ್ಧ ಮತದಾರರು ಇಂತವರನ್ನು ಆಯ್ಕೆ ಮಾಡದೆ ಉತ್ತರ ನೀಡಬೇಕು. ಪಾಠ ಕಲಿಸಬೇಕು. ಲೋಕಸಭೆ ಚುನಾವಣೆಯಲ್ಲಿ ತಿರಸ್ಕಾರ ಮಾಡಬೇಕು ಎಂದು ರಮೇಶ್ಬಾಬು ತಿಳಿಸಿದರು.
ಕೆಪಿಸಿಸಿ ಮುಖ್ಯ ವಕ್ತಾರ ತೇಜಸ್ವಿನಿ ರಮೇಶ್ ಮಾತನಾಡಿ, ‘ಉಮೇಶ್ ಜಾದವ್ ಅವರು ಪಿಎಸ್ಐ ಹಗರಣದ ಆರೋಪಿಗಳಿಂದ ಅಂತರ ಕಾಯ್ದುಕೊಳ್ಳದೆ ಅವರ ಜೊತೆಯೇ ಕೈಜೋಡಿಸಿದ್ದಾರೆ. 58 ಸಾವಿರ ಯುವಕರ ಭವಿಷ್ಯವನ್ನು ಕದ್ದವರು 580 ಸ್ಥಾನಗಳಿಗೆ ಹಗಲು-ರಾತ್ರಿ ಓದಿದ ಯುವಕರ ಭವಿಷ್ಯ ಹಾಳು ಮಾಡಿದವರು. ಬಿಜೆಪಿಯವರ ಅಧರ್ಮದ ಹಗರಣಕ್ಕೆ ಸಿಲುಕಿ ಭವಿಷ್ಯವನ್ನು ಕಳೆದು ಕೊಂಡರು. ಇದು ಅನೀತಿಯ ರಾಜಕಾರಣ ಎಂದು ಟೀಕಿಸಿದರು.
