‘ಎಳೆ ಮನಸಿನ ಒಡಲಾಳದ ಮಾತುಗಳು’ ವರದಿ ಬಿಡುಗಡೆ
ಏಕಾಂಗಿ ಮಹಿಳೆಯರಿಂದ ನಿರ್ವಹಿಸಲ್ಪಡುವ ಕುಟುಂಬಗಳಿಗೆ ‘ಅಕಾಲಿಕ ಮರಣ ಪರಿಹಾರ’ ಯೋಜನೆ ರೂಪಿಸಲು ಒತ್ತಾಯ
ಬೆಂಗಳೂರು : ಎಳೆ ವಯಸ್ಸಿನಲ್ಲೇ ಪತಿ ಸಾವನ್ನಪ್ಪಿದ ಮಹಿಳೆಯರು ಯಾವುದೇ ಮೂಲಭೂತ ವ್ಯವಸ್ಥೆಗಳಿಲ್ಲದ ಪರಿಸರದಲ್ಲಿ ಬದುಕುತ್ತಿದ್ದಾರೆ. ಏಕಾಂಗಿ ಮಹಿಳೆಯರಿಂದ ನಿರ್ವಹಿಸಲ್ಪಡುವ ಇಂತಹ ಕುಟುಂಬಗಳನ್ನು ಸರಕಾರ ಗುರುತಿಸಿ, ‘ಅಕಾಲಿಕ ಮರಣ ಪರಿಹಾರ’ ಯೋಜನೆಯನ್ನು ರೂಪಿಸಿ, ಜಾರಿಗೊಳಿಸಬೇಕು ಎಂದು ಸ್ಲಂ ಮಹಿಳಾ ಸಂಘಟನೆಯು ಒತ್ತಾಯಿಸಿದೆ.
ಶನಿವಾರ ಇಲ್ಲಿನ ಗಾಂಧಿ ಭವನದಲ್ಲಿ ಸ್ಲಂ ಮಹಿಳಾ ಸಂಘಟನೆಯು ಆಕ್ಷನ್ಏಡ್ ಸಹಯೋಗದೊಂದಿಗೆ ಬಿಬಿಎಂಪಿ ವ್ಯಾಪ್ತಿಯ ಏಳು ವಾರ್ಡ್ಗಳಲ್ಲಿ ವಾಸವಿರುವ ಮಹಿಳೆಯರ ಕುರಿತಾಗಿ ಸಿದ್ಧಪಡಿಸಿದ ‘ಎಳೆ ಮನಸಿನ ಒಡಲಾಳದ ಮಾತುಗಳು’ ವರದಿಯನ್ನು ಬಿಡುಗಡೆ ಮಾಡಲಾಯಿತು.
ಕೌಟುಂಬಿಕ ಹಿಂಸೆಗೆ ಒಳಗಾಗಿ, ಯಾವುದೇ ಆದಾರವಿಲ್ಲದೆ ಮಹಿಳೆಯರೇ ನಿರ್ವಹಿಸುತ್ತಿರುವ ಕುಟುಂಬಗಳನ್ನು ಆದ್ಯತಾ ಗುಂಪೆಂದು ಪರಿಗಣಿಸಿ, ತುರ್ತಾಗಿ ವಸತಿ ಯೋಜನೆ ಮತ್ತು ಕುಟುಂಬಕ್ಕೆ ಬೇಕಾದ ಮೂಲಭೂತ ವ್ಯವಸ್ಥೆಗಳನ್ನೂ ಕಲ್ಪಿಸಬೇಕಾಗಿದೆ ಎಂದು ಒತ್ತಾಯಿಸಿದೆ.
ಸರಕಾರದ ಸೌಲಭ್ಯಗಳನ್ನು ಪಡೆದುಕೊಳ್ಳಲು ಬೇಕಾದ ದಾಖಲೆ ಪತ್ರಗಳು ಸಂಬಂಧಿತ ಕುಟುಂಬಗಳಲ್ಲಿ ಇಲ್ಲದೆ ಇರುವ ಪ್ರಕರಣಗಳಲ್ಲಿ ಸರಕಾರವು ವಿಶೇಷವಾದ ಅದಾಲತ್ತುಗಳನ್ನು ಆಯೋಜಿಸಿ, ಸೌಲಭ್ಯ ಪಡೆದುಕೊಳ್ಳಲು ಬೇಕಾದ ದಾಖಲಾತಿಗಳನ್ನು ಸರಿಪಡಿಸಬೇಕು. ಸೂಕ್ತವಾದ ಯೋಜನೆಗಳನ್ನು ಪಡೆದುಕೊಳ್ಳಲು ಸಂಬಂಧಿತ ಅಧಿಕಾರಿಗಳು ತುರ್ತಾಗಿ ಕಾರ್ಯನಿರ್ವಹಿಸಬೇಕು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ವಿಶ್ಲೇಷಣೆಗೆ ಒಳಗಾಗಿರುವ ಕೇಸ್ ಸ್ಟಡಿಯಲ್ಲಿ ಶೇ.38 ಯುವತಿಯರು ಮೋಸಕ್ಕೆ ಒಳಗಾಗಿ ಗಂಡನಿಂದ ಪ್ರತ್ಯೇಕಗೊಂಡಿದ್ದಾರೆ. ಶೇ.62 ಮಹಿಳೆಯರ ಗಂಡ ತೀರಿಹೋಗಿದ್ದಾರೆ. ಏಕಾಂಗಿಯಾಗಿ ಕುಟುಂಬದ ಭಾರವನ್ನು ಹೊರುತ್ತಿದ್ದಾರೆ. ಆದುದರಿಂದ ಈಗ ಅಸ್ತಿತ್ವದಲ್ಲಿರುವ ಮನಸ್ವಿನಿ ಯೋಜನೆಯನ್ನು ಪುನರ್ ಚಿಂತನೆಗೆ ಒಳಪಡಿಸಿ, ಪ್ರಸ್ತುತವಿರುವ ವಯಸ್ಸನ್ನು 21 ವಯಸ್ಸಿಗೆ ಇಳಿಕೆ ಮಾಡಬೇಕು ಎಂದು ಒತ್ತಾಯಿಸಲಾಗಿದೆ.
ವರದಿಯನ್ನು ಸಿದ್ದಪಡಿಸಲು ಆಯ್ದುಕೊಂಡ 18 ರಿಂದ 30 ವಯಸ್ಸಿನ ಒಳಗಡೆ ಮದುವೆಯಾಗಿರುವ 50 ಯುವತಿಯರಲ್ಲಿ 34 ಜನ(ಶೇ.68) ಬಾಲ್ಯ ವಿವಾಹಕ್ಕೆ ಒಳಗಾಗಿದ್ದಾರೆ. 12(ಶೇ.24) ಯುವತಿಯರು 18 ರಿಂದ 21 ವಯಸ್ಸಿನಲ್ಲಿ ಮದುವೆ ಆಗಿದ್ದಾರೆ ಹಾಗು ಉಳಿದ 4(ಶೇ.8) ಯುವತಿಯರ ಮದುವೆ 21 ರಿಂದ 24 ವಯಸ್ಸಿನಲ್ಲಾಗಿದೆ ಎಂದು ವರದಿ ಸ್ಪಷ್ಟಪಡಿಸಿದೆ.
ಕೇಸ್ ಸ್ಟಡಿಯಲ್ಲಿ 50 ಮಹಿಳೆಯರ ಪೈಕಿ ಶೇ.90 ಮಹಿಳೆಯರು ತಮ್ಮ ಮಕ್ಕಳನ್ನು ಸಲಹುವ ಜವಾಬ್ದಾರಿಯನ್ನು ನಿರ್ವಹಿಸುತ್ತಿದ್ದಾರೆ. ಈ ಜವಾಬ್ದಾರಿ ನಿಭಾಯಿಸಲು ಬೇಕಾದ ಕನಿಷ್ಠ ಆದಾಯವೂ ಇಲ್ಲದೆ ಇರುವುದರಿಂದ ಈಗ ಅಸ್ತಿತ್ವದಲ್ಲಿರುವ ವಿಧವಾ ಪಿಂಚಣಿಯ ಮೊತ್ತವನ್ನು ಕನಿಷ್ಠ 5ಸಾವಿರ ರೂ.ಗೆ ತುರ್ತಾಗಿ ಹೆಚ್ಚಿಸಬೇಕಾಗಿದೆ ಎಂದು ತಿಳಿಸಿದೆ.
ಶೋಷಣೆಗೆ ಒಳಗಾಗಿ ಕುಟುಂಬದ ಆಹಾರ ವ್ಯವಸ್ಥೆಯನ್ನು ನಿಭಾಯಿಸಲು ಬೇಕಾದ ಕನಿಷ್ಠ ಆರ್ಥಿಕ ಮೂಲಗಳಿಲ್ಲದೆ ತೊಳಲಾಡುತ್ತಿರುವ, ಮಹಿಳೆಯರೇ ಜವಾಬ್ದಾರರಾಗಿರುವ ಕುಟುಂಬಗಳಿಗೆ ಪಡಿತರ ಚೀಟಿಯಲ್ಲಿ ಅಕ್ಕಿ ಜೊತೆ ಬೇಳೆಕಾಳುಗಳನ್ನು ಹಾಗೂ ಅಡುಗೆ ಎಣ್ಣೆಯನ್ನು ಒದಗಿಸಲು ಬೇಕಾದ ಸೂಕ್ತ ಕ್ರಮವನ್ನು ತುರ್ತಾಗಿ ಕೈಗೊಳ್ಳಬೇಕು ಎಂದು ಹೇಳಿದೆ.
ಬಡತನ ರೇಖೆಗಿಂತ ಕೆಳಗಿರುವ ಮತ್ತು ಏಕಾಂಗಿಯಾಗಿ ಕುಟುಂಬದ ಹೊಣೆ ಹೊತ್ತಿರುವ ಯುವತಿಯರು ಒಂದು ಹೊತ್ತಿನ ಊಟದ ವ್ಯವಸ್ಥೆಗಾಗಿ ಪಡಿತರ ಚೀಟಿಯಲ್ಲಿ ದೊರೆಯುವ ಅಕ್ಕಿಯನ್ನು ಅವಲಂಬಿಸಿದ್ದಾರೆ. ಹೀಗಾಗಿ ಪಡಿತರ ಚೀಟಿಯನ್ನು ರದ್ದುಗೊಳಿಸುವ, ಅದರ ಅನುಷ್ಠಾನಕ್ಕೆ ಬೇಕಾದ ನಿಯಮಗಳನ್ನು ಪದೇಪದೇ ಬದಲಾಯಿಸುವ ಕ್ರಮಗಳನ್ನು ನಿಲ್ಲಿಸಬೇಕು. ಆಹಾರ ಮತ್ತು ಚಿಕಿತ್ಸೆಗಳ ವ್ಯವಸ್ಥೆಯು ಪಡಿತರ ಚೀಟಿಯನ್ನು ಅವಲಂಬಿಸಿರುವುದರಿಂದ ಹೊಸ ಪಡಿತರ ಚೀಟಿಗೆ ಅರ್ಜಿ ಸಲ್ಲಿಸಲು ಎಲ್ಲ ದಿನಗಳಲ್ಲಿ ಅವಕಾಶವಿರಬೇಕು ಎಂದು ಒತ್ತಾಯಿಸಿದೆ.
2005ರ ಮಹಿಳೆಯರ ಮೇಲಿನ ದೌರ್ಜನ್ಯ ತಡೆ ಕಾಯ್ದೆ, ಬಾಲ್ಯ ವಿವಾಹ ನಿಷೇಧ ಕಾಯ್ದೆ ಪರಿಣಾಮಕಾರಿ ಅನುಷ್ಠಾನಕ್ಕೆ ಬೇಕಾದ ವ್ಯವಸ್ಥೆಗಳನ್ನು ಕಲ್ಪಿಸಬೇಕು. ಇದಕ್ಕಾಗಿ ಜಾಗೃತಿ ಅಭಿಯಾನಗಳನ್ನು ರೂಪಿಸಿ, ಸಮಾಜದಲ್ಲಿ ಅರಿವನ್ನು ಮೂಡಿಸಬೇಕು. ಈ ಕಾಯ್ದೆ ಅನುಷ್ಠಾನದ ಜವಾಬ್ದಾರಿ ಪೊಲೀಸ್ ಇಲಾಖೆಗೂ ಇರುವುದರಿಂದ, ಪೊಲೀಸರು ನ್ಯಾಯ ಹಾಗು ಮಹಿಳಾ ಸ್ನೇಹಿಯಾಗಿ ವರ್ತಿಸಿ, ಕಾರ್ಯೋನ್ಮುಖರಾಗುವಂತೆ ಕಠಿಣ ಕ್ರಮ ಜರಗಿಸಬೇಕು ಎಂದು ಮನವಿ ಮಾಡಿದೆ.
ಅಧ್ಯಯನಕ್ಕೆ ಒಳಪಡಿಸಲಾದ ಬಹುತೇಕ ಮಹಿಳೆಯರು ಪದೇಪದೇ ಹಿಂಸೆಯನ್ನು ಅನುಭವಿಸುತ್ತಿರುವುದು ಕಂಡುಬಂದಿದೆ. ಇಂತಹ ಮಹಿಳೆಯರಿಗೆ ತಾತ್ಕಾಲಿಕ ವಸತಿ ವ್ಯವಸ್ಥೆಯ ಅಗತ್ಯವಿರುವುದರಿಂದ ಸ್ವ-ಆಧಾರ ಕೇಂದ್ರಗಳನ್ನು ಹೆಚ್ಚುವರಿಯಾಗಿ ಸ್ಥಾಪಿಸಬೇಕು. ಈ ಹಿನ್ನೆಲೆಯಲ್ಲಿ ಸಂಬಂಧಿತ ಕಾಯ್ದೆ ಅನುಷ್ಠಾನಕ್ಕೆ ಬೇಕಾದ ಅನುದಾನದ ಮೊತ್ತವನ್ನು ಹೆಚ್ಚಿಸಬೇಕು ಎಂದು ತಿಳಿಸಿದೆ.