‘ಬೆಂಗಳೂರು ವಿಮಾನ ನಿಲ್ದಾಣ’ ದಾಖಲೆಯ ಲಾಭ, ಜಾಗತಿಕ ಪ್ರಶಸ್ತಿಗಳಿಗೆ ಭಾಜನವಾಗಿರುವುದು ಕರ್ನಾಟಕದ ಹೆಮ್ಮೆ : ಡಾ.ಶಾಲಿನಿ ರಜನೀಶ್

ಬೆಂಗಳೂರು : ಬೆಂಗಳೂರಿನ ಕೆಂಪೇಗೌಡ ಅಂತರ್ ರಾಷ್ಟ್ರೀಯ ವಿಮಾನ ನಿಲ್ದಾಣವು (ಬಿಎಲ್‍ಆರ್ ವಿಮಾನ ನಿಲ್ದಾಣ) ಕಳೆದ ಆರ್ಥಿಕ ವರ್ಷದಲ್ಲಿ ಮೊದಲ ಬಾರಿಗೆ ದಾಖಲೆಯ ಲಾಭವನ್ನು ಗಳಿಸಿರುವುದು ಹಾಗೂ ಹಲವು ಜಾಗತಿಕ ಪ್ರಶಸ್ತಿಗಳಿಗೆ ಭಾಜನವಾಗಿರುವುದು ರಾಜ್ಯದ ಹೆಮ್ಮೆಯ ವಿಷಯ ಎಂದು ರಾಜ್ಯ ಸರಕಾರದ ಮುಖ್ಯ ಕಾರ್ಯದರ್ಶಿ ಡಾ.ಶಾಲಿನಿ ರಜನೀಶ್ ಹರ್ಷ ವ್ಯಕ್ತಪಡಿಸಿದರು.

ಶುಕ್ರವಾರ ನಗರದಲ್ಲಿ ಬೆಂಗಳೂರು ಅಂತರ್‍ರಾಷ್ಟ್ರೀಯ ವಿಮಾನ ನಿಲ್ದಾಣ ಪ್ರಾಧಿಕಾರದ ಮಂಡಳಿ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಅವರು, ಕಳೆದ ಆರ್ಥಿಕ ವರ್ಷ ಬೆಂಗಳೂರು ಅಂತರ್ ರಾಷ್ಟ್ರೀಯ ವಿಮಾನ ನಿಲ್ದಾಣದ ಇತಿಹಾಸದಲ್ಲಿ ಮಹತ್ವದ ಹೆಜ್ಜೆಯಾಗಿದೆ. ಇದು ವಿಮಾನ ನಿಲ್ದಾಣದ ತಂತ್ರಾತ್ಮಕ ಬೆಳವಣಿಗೆ ಹಾಗೂ ಕಾರ್ಯನಿರ್ವಹಣಾ ಶ್ರೇಷ್ಠತೆಯ ಫಲಿತಾಂಶವಾಗಿದೆ ಎಂದು ಹೇಳಿದರು.

ಈ ಸಂದರ್ಭದಲ್ಲಿ ಆಡಳಿತ ಮಂಡಳಿಯ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಒ ಹರಿ ಮರಾರ್ ಮತ್ತು ಅವರ ತಂಡದ ನಿರಂತರ ಮತ್ತು ಅಸಾಧಾರಣ ಕೊಡುಗೆಯನ್ನು ಸ್ಮರಿಸಿದ ಅವರು, ಇಡೀ ತಂಡಕ್ಕೆ ಕೃತಜ್ಞತೆ ಸಲ್ಲಿಸಿದರು. ಇದೇ ಸಂದರ್ಭದಲ್ಲಿ ಕರ್ನಾಟಕ ಸರಕಾರದ ನಿರಂತರ ಬೆಂಬಲ ಮತ್ತು ಮಾರ್ಗದರ್ಶನಕ್ಕಾಗಿ ಮಂಡಳಿಯ ಸದಸ್ಯರು ಕೃತಜ್ಞತೆ ವ್ಯಕ್ತಪಡಿಸಿದರು.

ಆರ್ಥಿಕ ಯಶಸ್ಸಿನೊಂದಿಗೆ, ಬಿಎಲ್‍ಆರ್ ವಿಮಾನ ನಿಲ್ದಾಣವು 2025ರಲ್ಲಿ ಜಾಗತಿಕ ಮಟ್ಟದ ಹಲವಾರು ಪ್ರತಿಷ್ಠಿತ ಪ್ರಶಸ್ತಿಗಳನ್ನು ಪಡೆದುಕೊಂಡಿದೆ. ಇದು ನಮ್ಮ ದೇಶದಲ್ಲಿಯೇ ಭದ್ರತೆ ಮತ್ತು ಶಾಶ್ವತತೆ ಆಧಾರಿತ ವಿಮಾನ ನಿಲ್ದಾಣದ ಮಾದರಿಯಾಗಿದೆ ಎಂದರೆ ಅತಿಶಯೋಕ್ತಿಯಾಗಲಾರದು ಎಂದು ಶಾಲಿನಿ ರಜನೀಶ್ ತಿಳಿಸಿದರು.

ಪ್ರಶಸ್ತಿಗಳು: ಬಿಎಲ್‍ಆರ್ ವಿಮಾನ ನಿಲ್ದಾಣವು ಭದ್ರತೆ, ಭವಿಷ್ಯಕ್ಕೆ ಸಿದ್ಧ ಮತ್ತು ಸುಸ್ಥಿರತೆ-ಚಾಲಿತ ತತ್ವಗಳ ಆಧಾರದ ಮೇಲೆ ವಿಮಾನಯಾನ ವ್ಯವಸ್ಥೆಯ ನಿರ್ಮಾಣಕ್ಕೆ ಬದ್ಧವಾಗಿದೆ. ಪರಿಸರ ಸಂರಕ್ಷಣೆಗೆ ಹಾಗೂ ಕಾರ್ಯನಿರ್ವಹಣಾ ಶ್ರೇಷ್ಠತೆಗೆ ನೀಡಿದ ಬದ್ಧತೆಗಾಗಿ ಹಲವು ಜಾಗತಿಕ ಸಂಸ್ಥೆಗಳಿಂದ ಗುರುತಿಸಿಕೊಂಡಿದ್ದು, ಅಂತರ್‍ರಾಷ್ಟ್ರೀಯ ವಿಮಾನ ನಿಲ್ದಾಣ ಮಂಡಳಿಯಿಂದ (ಏರ್‌ ಪೋರ್ಟ್ಸ್‌ ಕೌನ್ಸಿಲ್ ಇಂಟರ್‌ ನ್ಯಾಷನಲ್) ಹಲವಾರು ಪುರಸ್ಕಾರಗಳನ್ನು ಪಡೆದುಕೊಂಡಿದೆ.

ಮೇ 5 ರಿಂದ ಜಾರಿಗೆ ತರಲಾಗಿರುವ ಅಂತರ್‌ ರಾಷ್ಟ್ರೀಯ ವಿಮಾನ ನಿಲ್ದಾಣ ಮಂಡಳಿಯ ವಿಮಾನ ನಿಲ್ದಾಣ ಕಾರ್ಬನ್ ಮಾನ್ಯತೆ ಕಾರ್ಯಕ್ರಮದಡಿಯಲ್ಲಿ ಲೆವೆಲ್ 5 ಮಾನ್ಯತೆಯನ್ನು ಸಾಧಿಸಿದ ಏಷ್ಯಾದ ಮೊದಲ ವಿಮಾನ ನಿಲ್ದಾಣ ಬಿಎಲ್‍ಆರ್(ಬೆಂಗಳೂರು)ವಿಮಾನ ನಿಲ್ದಾಣವಾಗಿದೆ. ಹೊಸದಿಲ್ಲಿಯಲ್ಲಿ ನಡೆದ ಅಂತರ್‌ ರಾಷ್ಟ್ರೀಯ ವಿಮಾನ ನಿಲ್ದಾಣ ಮಂಡಳಿ ಏಷ್ಯಾ-ಪೆಸಿಫಿಕ್ ಮತ್ತು ಮಧ್ಯಪ್ರಾಚ್ಯ ಪ್ರಾದೇಶಿಕ ಸಭೆಯಲ್ಲಿ ಈ ಪ್ರಶಸ್ತಿಯನ್ನು ಔಪಚಾರಿಕವಾಗಿ ಪ್ರದಾನ ಮಾಡಲಾಯಿತು.

ವಿಮಾನ ನಿಲ್ದಾಣವು ಸ್ಕೋಪ್ 1 ಮತ್ತು ಸ್ಕೋಪ್ 2ರ ಹಸಿರುಮನೆ ಅನಿಲ ಹೊರಸೂಸುವಿಕೆಯಲ್ಲಿ ಅತ್ಯುತ್ತಮವಾದ ಶೇ.95.6ರಷ್ಟು ಕಡಿತವನ್ನು ಆಚರಿಸುತ್ತದೆ. ವಿಮಾನ ನಿಲ್ದಾಣವು ಅದರ 2030 ಗುರಿಗಿಂತ ಪೂರ್ಣ ಏಳು ವರ್ಷಗಳ ಮೊದಲು ನಿವ್ವಳ ಶೂನ್ಯ ಸ್ಥಿತಿಯನ್ನು (ಸ್ಕೋಪ್ 1 ಮತ್ತು ಸ್ಕೋಪ್ 2) ಸಾಧಿಸಿರುವುದು ಹೆಮ್ಮೆಯ ವಿಷಯವಾಗಿದೆ.

ಪರಿಸರ ಸಂರಕ್ಷಣೆಯ ಮತ್ತೊಂದು ವಿಭಾಗದಲ್ಲಿ, 15-38 ದಶಲಕ್ಷ ಪ್ರಯಾಣಿಕರು ವಿಭಾಗದಲ್ಲಿ ‘ವಿಮಾನ ನಿಲ್ದಾಣಗಳಲ್ಲಿ ಸುಸ್ಥಿರ ಇಂಧನ’ ಥೀಮ್ ಅಡಿಯಲ್ಲಿ ಅಂತರ್‌ ರಾಷ್ಟ್ರೀಯ ವಿಮಾನ ನಿಲ್ದಾಣ ಮಂಡಳಿ ಗ್ರೀನ್ ಏರ್ ಪೋರ್ಟ್ ರಿಕಗ್ನಿಷನ್ 2025ರ ಸಿಲ್ವರ್ ಪ್ರಶಸ್ತಿ ಬಿಎಲ್‍ಆರ್ ವಿಮಾನ ನಿಲ್ದಾಣಕ್ಕೆ ಲಭಿಸಿದೆ. ಇದು ನಿರಂತರವಾಗಿ ನಾಲ್ಕನೇ ವರ್ಷದ ಪ್ರಶಸ್ತಿ ಆಗಿದೆ. ಈ ಹಿಂದೆ ಕಾರ್ಬನ್ ನಿರ್ವಹಣೆ (2022) ಹಾಗೂ ಪ್ಲಾಸ್ಟಿಕ್ ಮುಕ್ತ (2023) ವಿಭಾಗಗಳಲ್ಲಿ ಪ್ಲಾಟಿನಮ್ ಪ್ರಶಸ್ತಿ ಗಳಿಸಿತ್ತು.

ತನ್ನ ಕಾರ್ಯಾಚರಣೆಯ ಶ್ರೇಷ್ಠತೆಯನ್ನು ಮತ್ತಷ್ಟು ಬಲಗೊಳಿಸುತ್ತಾ, ಬಿಎಲ್‍ಆರ್ ವಿಮಾನ ನಿಲ್ದಾಣಕ್ಕೆ ಎಸಿಐ ಏಷ್ಯಾ-ಪೆಸಿಫಿಕ್ ಮತ್ತು ಮಧ್ಯಪ್ರಾಚ್ಯ ಸುರಕ್ಷತಾ ಗುರುತಿಸುವಿಕೆ ಪ್ರಶಸ್ತಿ 2025 ರಲ್ಲಿ ಚಿನ್ನದ ಪ್ರಶಸ್ತಿಯನ್ನು ನೀಡಲಾಯಿತು. ವಿಮಾನ ನಿಲ್ದಾಣದ ಬಿಯಾಂಡ್ ಕಂಪ್ಲೇಯನ್ಸ್ ಸಂಬಂಧಿಸಿದಂತೆ ನೀಡಲಾದ ಈ ಪ್ರಶಸ್ತಿಯು ಬಿಐಎಎಲ್‍ನ ಪೂರ್ವಭಾವಿ ಮತ್ತು ನವೀನ ಸುರಕ್ಷತಾ ತಂತ್ರಗಳನ್ನು ಗುರುತಿಸಿತು. ಇದು ಅಳೆಯಬಹುದಾದ ಸುಧಾರಣೆಗಳಿಗೆ ಕಾರಣವಾಯಿತು. ದೇಶದಲ್ಲಿಯೇ ಅತ್ಯಂತ ಸುರಕ್ಷತೆ ಹೊಂದಿದ ಮಾದರಿ ವಿಮಾನ ನಿಲ್ದಾಣಗಳಿಗೆ ಮಾನದಂಡವನ್ನು ಸ್ಥಾಪಿಸಿದೆ.

ಪ್ರಮುಖ ಸುರಕ್ಷತಾ ಸವಾಲುಗಳನ್ನು ಗುರುತಿಸುವ ಮೂಲಕ ಮತ್ತು ನವೀನ ತಂತ್ರಗಳನ್ನು ಅನುಷ್ಠಾನಗೊಳಿಸುವ ಮೂಲಕ, ಬಿಐಎಎಲ್ ತನ್ನ ಸುರಕ್ಷತೆ ಮತ್ತು ಶ್ರೇಷ್ಠತೆಯ ಸಂಸ್ಕೃತಿಯನ್ನು ಬಲಪಡಿಸುವುದನ್ನು ಮುಂದುವರೆಸಿದೆ. ಇತರ ವಿಮಾನ ನಿಲ್ದಾಣಗಳಿಗೆ ಮಾನದಂಡವನ್ನು ಸ್ಥಾಪಿಸುತ್ತದೆ ಎಂದು ಪ್ರಕಟಣೆ ತಿಳಿಸಿದೆ.