ಪುರೋಹಿತರು ದೇಶವನ್ನು ದುರ್ಬಲಗೊಳಿಸಲು ಹೊರಟಿದ್ದಾರೆ : ಪ್ರೊ.ಮುಕುಂದರಾಜ್

ಬೆಂಗಳೂರು : ಪುರೋಹಿತರು ದೇಶವನ್ನು ತಮ್ಮ ನಿಯಂತ್ರಣಕ್ಕೆ ತೆಗೆದುಕೊಳ್ಳಬೇಕೆಂಬ ಉದ್ದೇಶದಿಂದ ದೇವರು, ಧರ್ಮ, ಸಂಪ್ರದಾಯ, ಜಾತಿ, ಮತ, ಕೋಮುವಾದ ಹಿನ್ನಲೆಯಲ್ಲಿ ರಾಜಕೀಯವನ್ನು ಮಾಡುತ್ತಾ, ದೇಶವನ್ನು ದುರ್ಬಲಗೊಳಿಸುವುದಕ್ಕೆ ಹೊರಟಿದ್ದಾರೆ ಎಂದು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಪ್ರೊ.ಎಲ್.ಎನ್.ಮುಕುಂದರಾಜ್ ಅಭಿಪ್ರಾಯಪಟ್ಟಿದ್ದಾರೆ.

ಸೋಮವಾರ ನಗರದ ಸೆಂಟ್ ಜೋಸೆಫ್ ವಿವಿಯಲ್ಲಿ ಕರ್ನಾಟಕ ಸಾಹಿತ್ಯ ಅಕಾಡೆಮಿ, ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಸಹುಯೋಗದಲ್ಲಿ ಆಯೋಜಿಸಿದ್ದ ‘ಭಾರತೀಯ ಸಾಹಿತ್ಯ: ಬಹುತ್ವ ನೆಲೆಗಳು’ ವಿಚಾರ ಸಂಕಿರಣವನ್ನು ಉದ್ಘಾಟಿಸಿ ಮಾತನಾಡಿದ ಅವರು, ರಾಮಯಾಣ ಮತ್ತು ಮಹಾಭಾರತ ಮಹಾಕಾವ್ಯಗಳ ಸೂಕ್ಷ್ಮವನ್ನು ನಾವು ಅರ್ಥ ಮಾಡಿಕೊಂಡಿಲ್ಲ. ಈಗಲಾದರೂ ನಮ್ಮ ಸಾಹಿತ್ಯ ಕೃತಿಗಳನ್ನು ಸರಿಯಾದ ನೆಲೆಯಲ್ಲಿ ಅರ್ಥ ಮಾಡಿಕೊಂಡು, ದೇಶದ ಪ್ರಜಾಪ್ರಭುತ್ವ ಸಂವಿಧಾನವನ್ನು ಉಳಿಸುವುದಕ್ಕೆ ಪ್ರಯತ್ನ ಮಾಡಬೇಕು ಎಂದು ಹೇಳಿದರು.

70 ವರ್ಷಗಳಿಂದ ದೇಶದ ಜನ ನಿಧಾನವಾಗಿ ನೆಮ್ಮದಿಯತ್ತ ಬರುತ್ತಿದ್ದರು. ಸ್ವಾತಂತ್ರ್ಯ, ಸಮಾನತೆ, ಸಂವಿಧಾನದಿಂದ ಅಸಂಖ್ಯಾತ ಶೂದ್ರರು, ದಲಿತರು, ಮಹಿಳೆಯರು ವಿದ್ಯೆ, ಉದ್ಯೋಗದಿಂದ ಒಳ್ಳೆಯ ಸ್ಥಾನ ಮಾನಕ್ಕೆ ಬಂದರು. ಆಸ್ತಿ-ಪಾಸ್ತಿ, ಅಂತಸ್ತು-ಐಶ್ವರ್ಯಗಳನ್ನು ಗಳಿಸಿಕೊಂಡು 70 ವರ್ಷಗಳಿಂದೀಚಿಗೆ ಪ್ರಗತಿಯ ಕಡೆಗೆ ಹೋಗುತ್ತಿರುವ ಸಮಯದಲ್ಲಿ, ರಾಮಯಾಣ, ಮಹಾಭಾರತ ಕಾಲದಲ್ಲಿ ಇದ್ದಂತ ಪುರೋಹಿತರು ದೇಶವನ್ನು ತಮ್ಮ ನಿಯಂತ್ರಣಕ್ಕೆ ತೆಗೆದುಕೊಳ್ಳಬೇಕೆಂಬ ಉದ್ದೇಶದಿಂದ ದೇಶವನ್ನು ದುರ್ಬಲಗೊಳಿಸುತ್ತಿರುವ ಸೂಕ್ಷ್ಮವನ್ನು ಅರ್ಥ ಮಾಡಿಕೊಳ್ಳಬೇಕು ಎಂದು ಮುಕುಂದರಾಜ್ ತಿಳಿಸಿದರು.

ಕನ್ನಡ ಸಾಹಿತ್ಯ, ಭಾರತೀಯ ಸಾಹಿತ್ಯ ಮತ್ತು ಜಗತ್ತಿನ ಸಾಹಿತ್ಯವೇ ಬಹುತ್ವದ ನೆಲೆಯಲ್ಲಿ ಮನುಷ್ಯನ ವಿವೇಕವನ್ನು ಕಟ್ಟಿಕೊಡುತ್ತಾ, ಮಾನವೀಯ ಮೌಲ್ಯಗಳನ್ನು ಬಿತ್ತುತ್ತಾ ಹೋಗುತ್ತದೆ. ಸಾಹಿತ್ಯ ಎಂದಿಗೂ ಮನುಷ್ಯನ ವಿರೋಧಿಯಾಗಿಲ್ಲ. ಸಾವಿರಾರು ವರ್ಷಗಳಿಂದ ಮನುಷ್ಯರ ಪರವಾಗಿ ಮಾತನಾಡಿಕೊಂಡು ಬಂದಿದೆ. ಭಾರತೀಯ ಸಾಹಿತ್ಯದ ರಾಮಾಯಣ ಮತ್ತು ಮಹಾಭಾರತ ದೇಶದ ಎರಡು ಮಹಾಕಾವ್ಯಗಳು. ಇವು ಜಗತ್ತಿನಲ್ಲಿಯೇ ಶ್ರೇಷ್ಠ ಕಾವ್ಯಗಳಾಗಿವೆ. ಅಂತಹ ಕಾವ್ಯಗಳನ್ನುಕೊಟ್ಟಿದ್ದು ಭಾರತ. ಇದನ್ನು ಯಾರೂ ಅಲ್ಲಗೆಳೆಯುವದಕ್ಕೆ ಸಾಧ್ಯವಿಲ್ಲ ಎಂದರು.

ರಾಮಯಣ, ಮಹಾಭಾರತಗಳಲ್ಲಿ ಕವಿಗಳು ತುಂಬಾ ಮಾನವೀಯವಾದ ಸೂಕ್ಷ್ಮಗಳನ್ನು ಅಡಗಿಸಿಟ್ಟಿರುತ್ತಾರೆ. ನಾವು ಅದನ್ನ ಶೋದಿಸಿ ಅರ್ಥೈಸಿಕೊಂಡು, ಬೇರೆಯವರಿಗೂ ಅರ್ಥ ಪಡಿಸುವುದು ಬಹಳ ಮುಖ್ಯ. ಕವಿ ಲಕ್ಷ್ಮೀಶ ‘ಜೈಮಿನಿ ಭಾರತ’ದಲ್ಲಿ ಯಜ್ಞಯಾಗಗಳಿಂದ ಆಗುವ ಆಪತ್ತುಗಳನ್ನು ಬರೆಯುತ್ತಾನೆ. ರಾಮಾಶ್ವಮೇಧ ಉದ್ದೇಶ, ಎಲ್ಲರನ್ನೂ ಗೆಲ್ಲಬೇಕು ಎಂಬುದು. ಎಲ್ಲರನ್ನೂ ಗೆಲ್ಲಬೇಕೆನ್ನುವುದೇ ತಪ್ಪು. ಶ್ರೀರಾಮಚಂದ್ರನ ಆಡಳಿತ ಎಂದರೆ ಶ್ರೇಷ್ಠ ಆಡಳಿತ ಎಂಬುದು ಜನರ ಕಲ್ಪನೆ. ಅಂತಹ ಆಡಳಿತ ವ್ಯವಸ್ಥೆಯಲ್ಲಿ ಪ್ರಜೆಗಳೆಲ್ಲರೂ ನೆಮ್ಮದಿಯಾಗಿ ಇರುತ್ತಾರೆ. ಅದನ್ನೇ ಗಾಂಧೀಜಿ ರಾಮರಾಜ್ಯ ಎಂದು ಹೇಳಿದ್ದು ಎಂದು ಮುಕುಂದರಾಜ್ ನುಡಿದರು.

ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಪುರುಷೋತ್ತಮ ಬಿಳಿಮಲೆ ಮಾತನಾಡಿ, ಇಂದು ಎಲ್ಲ ಭಾಷೆಗಳು ಸಾಯುತ್ತಿವೆ. 2011ರ ಜನಗಣತಿಯ ಅವಧಿಯಲ್ಲಿ ಅಸ್ತಿತ್ವದಲ್ಲಿದ್ದ ಭಾಷೆಗಳು ಈಗ ಅಸ್ತಿತ್ವದಲ್ಲಿ ಇಲ್ಲವಾಗಿವೆ. ಎಷ್ಟೋ ಭಾಷೆಗಳು ನಶಿಸಿಹೋಗುವ ಕೊನೆಯ ಹಂತದಲ್ಲಿವೆ. ಅಂತಹ ಪರಿಸ್ಥಿತಿ ಕನ್ನಡಕ್ಕೆ ಬರಬಾರದು. ನಾವೆಲ್ಲರೂ ಕನ್ನಡವನ್ನು ಸರಿಯಾದ ರೀತಿಯಲ್ಲಿ ಕಾಪಾಡಬೇಕಾದ ಅವಶ್ಯಕತೆ ಇದೆ ಎಂದು ಕರೆ ನಿಡಿದರು.

ಕಾರ್ಯಕ್ರಮದಲ್ಲಿ ಅನುವಾದಕ ಪ್ರೊ.ಶ್ರೀಧರ್ ಅಘಲಯ, ಸೆಂಟ್ ಜೋಸೆಫ್ ವಿವಿ ಕುಲಪತಿ ರೆ.ಡಾ.ವಿಕ್ಟರ್ ಲೋಬೊ ಎಸ್.ಜೆ., ಸಹ ಕುಲಪತಿ ರೆ.ಡಾ.ರೋನಾಲ್ಡ್ ಮಸ್ಕರೇನಸ್, ಪ್ರಾಧ್ಯಾಪಕರಾದ ಡಾ.ಅರುಲ್ ಮಣಿ, ಡಾ.ಕುಮಾರಸ್ವಾಮಿ, ಡಾ.ಈಶ್ವರಯ್ಯ ಹಂಪಾಪುರ ಸೇರಿದಂತೆ ಹಲವರು ಭಾಗವಹಿಸಿದ್ದರು.