ಕೆಪಿಎಸ್‍ಸಿ ಪ್ರಕರಣ | ಅಧಿಕಾರಿ ಬರೆದಿದ್ದ ಪತ್ರ ಮಾಧ್ಯಮಗಳಿಗೆ ಸಿಕ್ಕಿದ್ದು ಹೇಗೆ?: ರಮೇಶ್‍ಬಾಬು
ಬೆಂಗಳೂರು : ‘ಕೆಪಿಎಸ್‍ಸಿ ನೇಮಕ ಪ್ರಕರಣ ಕುರಿತು ವಿಶೇಷ ತನಿಖಾ ತಂಡ(ಎಸ್‍ಐಟಿ)ದ ಸಂಬಂಧದ ವಿಚಾರಣೆಯಲ್ಲಿ ರಾಜ್ಯ ಸರಕಾರ, ಸುಪ್ರೀಂ ಕೋರ್ಟ್‍ಗೆ ಸಲ್ಲಿಸಿದ್ದ ವಾದವನ್ನು ಪ್ರಶ್ನಿಸಿ ಐಪಿಎಸ್ ಅಧಿಕಾರಿ ಬರೆದಿದ್ದ ಪತ್ರ, ಮಾಧ್ಯಮಗಳಿಗೆ ತಲುಪಿದ್ದು ಹೇಗೆ? ಎಂಬುದರ ಕುರಿತು ವರದಿ ಪಡೆದುಕೊಳ್ಳಬೇಕು’ ಎಂದು ಕೋರಿ, ವಿಧಾನ ಪರಿಷತ್ ಮಾಜಿ ಸದಸ್ಯ ರಮೇಶ್ ಬಾಬು, ಸರಕಾರದ ಮುಖ್ಯ ಕಾರ್ಯದರ್ಶಿಗೆ ಪತ್ರ ಬರೆದಿದ್ದಾರೆ.
ಶನಿವಾರ ಈ ಸಂಬಂಧ ಮುಖ್ಯ ಕಾರ್ಯದರ್ಶಿ ಶಾಲಿನಿ ರಜನೀಶ್ ಅವರಿಗೆ ಪತ್ರ ಬರೆದಿರುವ ರಮೇಶ್‍ಬಾಬು, ಐಪಿಎಸ್ ಅಧಿಕಾರಿ ಅಲೋಕ್ ಕುಮಾರ್ ಸುಪ್ರೀಂ ಕೋರ್ಟ್‍ನಲ್ಲಿ ವಾದಗಳನ್ನು ಪ್ರಶ್ನಿಸಿ ತಮಗೆ, ಪತ್ರ ಬರೆದಿದ್ದಾರೆ ಎಂದು ವರದಿಯಾಗಿದೆ. ಈ ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್ ಹೈಕೋರ್ಟ್ ಆದೇಶಕ್ಕೆ ತಡೆಯಾಜ್ಞೆ ನೀಡಿದೆ.
ಹೀಗಾಗಿ ಪತ್ರ ಬರೆದಿರುವ ಅಧಿಕಾರಿಗೆ ಅಗತ್ಯವಿದ್ದಲ್ಲಿ ಕಾರಣ ಕೇಳುವ ನೋಟಿಸ್ ಜಾರಿಗೊಳಿಸುವುದರೊಂದಿಗೆ, ಸಂಬಂಧಪಟ್ಟ ಅಧಿಕಾರಿಯಿಂದ ವಿವರಣೆಯನ್ನು ಪಡೆಯಬೇಕು. ಸರಕಾರದ ನಿಯಮಗಳ ಉಲ್ಲಂಘನೆ ಕಂಡುಬಂದಲ್ಲಿ, ಅಖಿಲ ಭಾರತ ಸೇವೆಗಳು(ಶಿಸ್ತು ಮತ್ತು ಮೇಲ್ಮನವಿ)ನಿಯಮಗಳು, 1969ರ ಅಡಿಯಲ್ಲಿ ಕ್ರಮ ಕೈಗೊಳ್ಳುವುದು ಹಾಗೂ ನಿಯಮಗಳ ಪ್ರಕಾರ ಅಗತ್ಯವಿದ್ದಲ್ಲಿ ಈ ವಿಷಯವನ್ನು ಸಕ್ಷಮ ಪ್ರಾಧಿಕಾರಕ್ಕೆ ವಹಿಸುವುದು. ಕೋರ್ಟ್‍ನ ಮುಂದೆ ರಾಜ್ಯ ಸರಕಾರವು ಮಂಡಿಸಿರುವ ನಿಲುವಿಗೆ ಪೂರ್ವಾಗ್ರಹ ಉಂಟಾಗದಂತೆ ಪರಿಶೀಲಿಸಬೇಕೆಂದು ರಮೇಶ್‍ಬಾಬು ಕೋರಿದ್ದಾರೆ.
