ಅತ್ಯಾಚಾರ ಎಸಗಿದ ಯುವಕರನ್ನು ಅಪಹರಿಸಿ ಹಣದ ಬೇಡಿಕೆಯಿಟ್ಟ ಸಂತ್ರಸ್ತೆ: 10 ಆರೋಪಿಗಳ ಬಂಧನ
ಅಪಹರಣಕಾರರಿಂದ ರಕ್ಷಿಸಲ್ಪಟ್ಟ ಇಬ್ಬರು ಅತ್ಯಾಚಾರ ಪ್ರಕರಣದಲ್ಲಿ ಸೆರೆ!
ಬೆಂಗಳೂರು, ಅ.29: ಅತ್ಯಾಚಾರ ಎಸಗಿದ ಇಬ್ಬರು ಆರೋಪಿಗಳನ್ನು ಸಂತ್ರಸ್ತೆಯೇ ಅಪಹರಿಸಿ ಹಣದ ಬೇಡಿಕೆಯಿಟ್ಟ ಪ್ರಕರಣವೊಂದನ್ನು ಮಾರತಹಳ್ಳಿ ಠಾಣೆ ಪೊಲೀಸರು ಭೇದಿಸಿದ್ದು, ಒಟ್ಟು 10 ಮಂದಿ ಆರೋಪಿಗಳನ್ನು ಬಂಧಿಸಿದ್ದಾರೆ ಈ ಮಧ್ಯೆ ಅಪಹರಣಕಾರರಿಂದ ರಕ್ಷಿಸಲ್ಪಟ್ಟ ಇಬ್ಬರ ಮೇಲೆ ಅತ್ಯಾಚಾರ ಪ್ರಕರಣ ದಾಖಲಾಗಿದ್ದು, ಅವರನ್ನೂ ಪೊಲೀಸರು ಬಂಧಿಸಿದ್ದಾರೆ.
ಘಟನೆ ವಿವರ: ಅ.28ರಂದು ತನ್ನ ಮಗ ಬುರ್ಸು ಮಹೇಂದ್ರ(23) ಹಾಗೂ ಆತನ ಸ್ನೇಹಿತ ಯೆರ್ರಿಬೋನಿ ತರುಣ್( 23 ) ಎಂಬವರನ್ನು ಯಾರೋ ಅಪಹರಿಸಿದ್ದು, 10 ಲಕ್ಷ ಹಣಕ್ಕೆ ಬೇಡಿಕೆಯಿಟ್ಟು ಅಪರಿಚಿತರು ಕರೆ ಮಾಡಿದ್ದಾರೆ ಎಂದು ವ್ಯಕ್ತಿಯೋರ್ವ ಮಾರತಹಳ್ಳಿ ಠಾಣೆಗೆ ದೂರು ನೀಡಿದ್ದಾರೆ.
ಈ ಬಗ್ಗೆ ಪ್ರಕರಣ ದಾಖಲಿಸಿಕೊಂಡಿದ್ದ ಮಾರತಹಳ್ಳಿ ಪೊಲೀಸರು ಮಿಂಚಿನ ಕಾರ್ಯಾಚರಣೆ ನಡೆಸಿ ಅಪಹರಣಕ್ಕೆ ಸಂಬಂಧಿಸಿ ಯುವತಿಯೊಬ್ಬಳ ಸಹಿತ 10 ಮಂದಿ ಆರೋಪಿಗಳನ್ನು ಬಂಧಿಸಿದ್ದಾರೆ. ಈ ಮಧ್ಯೆ ಬಂಧಿತರನ್ನು ವಿಚಾರಣೆಗೆ ಒಳಪಡಿಸಿದಾಗ ಅತ್ಯಾಚಾರ ಪ್ರಕರಣ ಬೆಳಕಿಗೆ ಬಂದಿದೆ. ಈ ಹಿನ್ನೆಲೆಯಲ್ಲಿ ಅಪಹರಣಕ್ಕೀಡಾಗಿದ್ದ ಮಹೇಂದ್ರ ಹಾಗೂ ತರುಣ್ ನನ್ನೂ ಪೊಲೀಸರು ಬಂಧಿಸಿದ್ದಾರೆ.
ಅತ್ಯಾಚಾರದ ಪ್ರತೀಕಾರವಾಗಿ ಕಿಡ್ನಾಪ್..!
ಅಂಧ್ರ ಮೂಲದ ಮಹೇಂದ್ರ ಹಾಗೂ ತರುಣ್ ಹಾಗೂ ಮಂಜುನಾಥ್ ಎಂಬವರು ನಗರದಲ್ಲಿ ಮನೆಯೊಂದನ್ನು ಬಾಡಿಗೆ ಪಡೆದು ಸಾಫ್ಟ್ ವೇರ್ ಉದ್ಯೋಗ ಮಾಡುತ್ತಿದ್ದರು. ಕೆಲದಿನಗಳ ಹಿಂದೆ ಈ ಪೈಕಿ ಮಂಜುನಾಥ್ ಊರಿಗೆ ತೆರಳಿದ್ದ ವೇಳೆ ಅವರ ಸ್ನೇಹಿತನಾಗಿರುವ ರಾಜಕುಮಾರ್ ಎಂಬವರು ಕರೆ ಮಾಡಿ ತಾನು ಪ್ರೇಯಸಿ ಜೊತೆ ನಿನ್ನ ಮನೆಗೆ ಬರುತ್ತಿರುವುದಾಗಿ ಹೇಳಿದ್ದಾರೆ. ಅದಕ್ಕೆ ಮಂಜುನಾಥ್ ತಾನೂ ಮನೆಯಲ್ಲಿ ಇಲ್ಲ, ಆದರೆ ತನ್ನ ಸ್ನೇಹಿತರಾದ ಮಹೇಂದ್ರ ಹಾಗೂ ತರುಣ್ ಇರುತ್ತಾರೆ ಹೋಗು ಎಂದಿದ್ದ. ಆದರಂತೆ ರಾಜಕುಮಾರ್ ತನ್ನ ಪ್ರೆಯಸಿಯೊಡನೆ ತೆರಳಿ ಅಲ್ಲಿ ವಾಸ್ತವ್ಯ ಹೂಡಿದ್ದರು. ಮಧ್ಯರಾತ್ರಿ ವೇಳೆ ಮದ್ಯದ ನಶೆಯಲ್ಲಿದ್ದ ಆರೋಪಿ ಮಹೇಂದ್ರನು ರಾಜಕುಮಾರ್ ರನ್ನು ಒಂದು ಕಡೆ ಕೂಡಿಹಾಕಿ ಯುವತಿಯ ಮೇಲೆ ಅತ್ಯಾಚಾರ ಎಸಗಿದ್ದಾನೆ ಎಂದು ಆರೋಪಿಸಲಾಗಿದೆ.
ಈ ಅತ್ಯಾಚಾರಕ್ಕೆ ಪ್ರತೀಕಾರವಾಗಿ ಸಂತ್ರಸ್ತ ಯುವತಿಯು ಪ್ರಿಯಕರ ರಾಜಕುಮಾರ್, ಸ್ನೇಹಿತ ಮಂಜುನಾಥ್ ಸೇರಿ ಒಂದು ತಂಡ ಕಟ್ಟಿಕೊಂಡು ತರುಣ್ ಹಾಗೂ ಮಹೇಂದ್ರನನ್ನು ಅಪಹರಿಸಿ ಹಣಕ್ಕೆ ಬೇಡಿಕೆ ಇಟ್ಟಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಕೊಲೆಗೆ ಸಂಚು ರೂಪಿಸಿದ್ದ ಆರೋಪಿಗಳು:
ತಾವು ಬೇಡಿಕೆಯಿಟ್ಟಿದ್ದ ಹಣ ಬಂದ ಬಳಿಕ ಮಹೇಂದ್ರ ಮತ್ತು ತರುಣ್ ನನ್ನು ಕೊಲೆ ಮಾಡಲು ಅಪಹರಣಕಾರರು ಸಂಚು ರೂಪಿಸಿದ್ದರು . ಆದರೆ ಪ್ರಕರಣ ದಾಖಲಾದ ಆರೇ ಗಂಟೆಯಲ್ಲಿ ಪೊಲೀಸರು ಆರೋಪಿಗಳನ್ನು ಪತ್ತೆ ಹಚ್ಚಿದ್ದರಿಂದ ಪ್ರಕರಣ ಸುಖಾಂತ್ಯ ಕಂಡಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಕಿಡ್ನಾಪ್ ನೊಂದಿಗೆ ಅತ್ಯಾಚಾರ ಪ್ರಕರಣವನ್ನೂ ಭೇದಿಸಿರುವ ಪೊಲೀಸರು ಎರಡೂ ಪ್ರಕರಣಗಳಿಗೆ ಸಂಬಂಧಿಸಿ ಒಟ್ಟು 12 ಮಂದಿ ಆರೋಪಿಗಳನ್ನು ಬಂಧಿಸಿದ್ದಾರೆ.
