ಆಲ್ ಇಂಡಿಯಾ ಮಿಲ್ಲಿ ಕೌನ್ಸಿಲ್ ಕರ್ನಾಟಕ | ಒಂದು ವರ್ಷದ ಸಮಗ್ರ ಸೇವಾ ಕ್ರಿಯಾ ಯೋಜನೆ ಸಿದ್ಧ: ಸುಲೇಮಾನ್ ಖಾನ್

ಬೆಂಗಳೂರು : ಆಲ್ ಇಂಡಿಯಾ ಮಿಲ್ಲಿ ಕೌನ್ಸಿಲ್ ಕರ್ನಾಟಕ ಘಟಕಕ್ಕೆ ಮುಫ್ತಿ ಅಹ್ಮದ್ ಸಿಮಾಲ್ ರಶಾದಿ ಅಧ್ಯಕ್ಷತೆಯಲ್ಲಿ ರಚಿಸಲಾಗಿರುವ ಹೊಸ ತಂಡವು 2026-27ನೆ ಸಾಲಿನ ಸಮಗ್ರ ಕ್ರಿಯಾ ಯೋಜನೆ ಮತ್ತು ಆದ್ಯತೆಗಳನ್ನು ಸಿದ್ಧಪಡಿಸಿದೆ ಎಂದು ಆಲ್ ಇಂಡಿಯಾ ಮಿಲ್ಲಿ ಕೌನ್ಸಿಲ್ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸುಲೇಮಾನ್ ಖಾನ್ ತಿಳಿಸಿದರು.

ಶನಿವಾರ ನಗರದ ದಾರುಲ್ ಉಲೂಮ್ ಸಬಿಲುರ್ರಶಾದ್(ಅರೆಬಿಕ್ ಕಾಲೇಜು)ನಲ್ಲಿ ಆಯೋಜಿಸಲಾಗಿದ್ದ ಪತ್ರಿಕಾಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಅವರು, ರಾಜ್ಯದಲ್ಲಿ ಮಿಲ್ಲಿ ಕೌನ್ಸಿಲ್‍ನ ಚಟುವಟಿಕೆಗಳನ್ನು ಹೆಚ್ಚು ಸಂಘಟಿತ, ಸಕ್ರಿಯ ಮತ್ತು ಸಾರ್ವಜನಿಕರ ಅಗತ್ಯಗಳಿಗೆ ಪೂರಕವಾಗಿ ಮಾಡುವುದು ಹೊಸ ತಂಡದ ಮುಖ್ಯ ಉದ್ದೇಶವಾಗಿದೆ ಎಂದರು.

ಈ ನಿಟ್ಟಿನಲ್ಲಿ, ಸಾಂಸ್ಥಿಕ ರಚನೆಯನ್ನು ಬಲಪಡಿಸುವುದು, ಜಿಲ್ಲಾ ಮಟ್ಟದಲ್ಲಿ ಕೆಲಸವನ್ನು ವಿಸ್ತರಿಸುವುದು, ಸರಕಾರದೊಂದಿಗೆ ಪರಿಣಾಮಕಾರಿ ಸಮನ್ವಯವನ್ನು ಸ್ಥಾಪಿಸಲು ವಿಶೇಷ ಗಮನ ಹರಿಸಲಾಗುವುದು ಎಂದು ಸುಲೇಮಾನ್ ಖಾನ್ ಹೇಳಿದರು.

ಆಲ್ ಇಂಡಿಯಾ ಮಿಲ್ಲಿ ಕೌನ್ಸಿಲ್ ನೂತನ ರಾಜ್ಯಾಧ್ಯಕ್ಷ ಮುಫ್ತಿ ಅಹ್ಮದ್ ಸಿಮಾಲ್ ರಶಾದಿ ಮಾತನಾಡಿ, ನಮ್ಮ ತಂಡದ ಉದ್ದೇಶ ಕೇವಲ ಸಭೆಗಳು, ವಿಚಾರ ಸಂಕಿರಣಗಳು ಮತ್ತು ಕಾರ್ಯಕ್ರಮಗಳನ್ನು ನಡೆಸುವುದಲ್ಲ, ಬದಲಾಗಿ ದೇಶದ ನಿಜವಾದ ಸಮಸ್ಯೆಗಳನ್ನು ಗುರುತಿಸುವುದು, ಪ್ರಾಯೋಗಿಕ ಸೇವೆ, ಶೈಕ್ಷಣಿಕ ಅಭಿವೃದ್ಧಿ, ಯುವಕರಿಗೆ ಸಕಾರಾತ್ಮಕ ಮಾರ್ಗದರ್ಶನ, ರಾಜಕೀಯ ಮತ್ತು ನಾಗರಿಕ ಪ್ರಜ್ಞೆಯ ಅರಿವು ಮತ್ತು ವ್ಯವಸ್ಥಿತ ಪ್ರಕ್ರಿಯೆಯಾಗಿ ಸಾಮಾಜಿಕ ಕಲ್ಯಾಣಕ್ಕೆ ಆಕಾರ ನೀಡುವುದಾಗಿದೆ ಎಂದು ತಿಳಿಸಿದರು.

12 ತಿಂಗಳು-12 ಆದ್ಯತೆಗಳು: ಮುಂದಿನ ಒಂದು ವರ್ಷದ ಚಟುವಟಿಕೆಗಳನ್ನು ನಮ್ಮ ತಂಡವು ಹನ್ನೆರಡು ಪ್ರಮುಖ ಆದ್ಯತೆಗಳಾಗಿ ವಿಂಗಡಿಸಿದೆ. ಅದರಂತೆ, ಅಕ್ಟೋಬರ್‍ನಲ್ಲಿ ಸಂಘಟನೆ, ನವೆಂಬರ್-ರಾಷ್ಟ್ರವ್ಯಾಪಿ ಸಂಪರ್ಕ, ಡಿಸೆಂಬರ್-ತರಬೇತಿ, ಜನವರಿ-ಯುವ ಮಾಸ, ಫೆಬ್ರವರಿ-ಶಿಕ್ಷಣ, ಮಾರ್ಚ್-ಉದ್ಯೋಗ ಮತ್ತು ಕೌಶಲ್ಯ, ಎಪ್ರಿಲ್-ಜನರಿಗೆ ಸೇವೆ, ಮೇ-ಆರೋಗ್ಯ, ಜೂನ್-ಮಹಿಳೆಯರು, ಜುಲೈ-ವಕ್ಫ್ ಮತ್ತು ಕಾನೂನು ಜಾಗೃತಿ, ಆಗಸ್ಟ್-ನಾಗರಿಕ, ರಾಜಕೀಯ ಮತ್ತು ಸರಕಾರಿ ಸಂಪರ್ಕ, ಸೆಪ್ಟೆಂಬರ್ ತಿಂಗಳಲಿನಲ್ಲಿ ವಾರ್ಷಿಕ ವಿಮರ್ಶೆ ಸಭೆಗಳನ್ನು ನಡೆಸಲಾಗುವುದು ಎಂದು ಅವರು ಮಾಹಿತಿ ನೀಡಿದರು.

ಆಲ್ ಇಂಡಿಯಾ ಮಿಲ್ಲಿ ಕೌನ್ಸಿಲ್ ಪ್ರಧಾನ ಕಾರ್ಯದರ್ಶಿ ಮುಹಮ್ಮದ್ ಫಯಾಝ್ ಶರೀಫ್ ಮಾತನಾಡಿ, ರಾಜ್ಯ ಸರಕಾರ, ಸಂಬಂಧಪಟ್ಟ ಇಲಾಖೆಗಳು, ಜನ ಪ್ರತಿನಿಧಿಗಳು ಮತ್ತು ಕಾನೂನು ತಜ್ಞರೊಂದಿಗೆ ಸಮನ್ವಯ ಸ್ಥಾಪಿಸಲು ಮಿಲ್ಲಿ ಕೌನ್ಸಿಲ್ ಪ್ರಯತ್ನಿಸುತ್ತದೆ. ಶಿಕ್ಷಣ, ವಿದ್ಯಾರ್ಥಿವೇತನ, ಉದ್ಯೋಗ, ವಕ್ಫ್, ಅಲ್ಪಸಂಖ್ಯಾತ ಕಲ್ಯಾಣ, ಸರಕಾರಿ ಯೋಜನೆಗಳು, ಕಾನೂನು ರಕ್ಷಣೆ, ನಾಗರಿಕ ಸೌಲಭ್ಯಗಳು ಮತ್ತು ಇತರ ಪ್ರಮುಖ ವಿಷಯಗಳಿಗೆ ಸಂಬಂಧಿಸಿದ ಸಮಸ್ಯೆಗಳನ್ನು ಆದ್ಯತೆಯ ಆಧಾರದ ಮೇಲೆ ಗಮನಹರಿಸಲಾಗುವುದು ಎಂದು ಹೇಳಿದರು.

ಹೊಸ ತಂಡದ ಕ್ರಿಯಾ ಯೋಜನೆಯು ಯುವಕರಿಗೆ ವಿಶೇಷ ಪ್ರಾಮುಖ್ಯತೆಯನ್ನು ನೀಡಿದೆ. ಟೀಮ್ ಖಿದ್ಮತ್ ಬಾಯ್ಸ್ ಅನ್ನು ನಿಯಮಿತ ಸ್ವಯಂಸೇವಕರ ಜಾಲದೊಂದಿಗೆ ಸಂಪರ್ಕಿಸುವ ಯೋಜನೆ ಇದೆ. ಇದರ ಅಡಿಯಲ್ಲಿ, ರಕ್ತದಾನ, ಸ್ವಚ್ಛತಾ ಅಭಿಯಾನ, ತೋಟಗಾರಿಕೆ, ರೋಗಿಗಳ ನೆರವು, ಶೈಕ್ಷಣಿಕ ಸೇವೆ, ತುರ್ತು ಸಂದರ್ಭಗಳಲ್ಲಿ ಸ್ವಯಂಸೇವಕ ಸೇವೆಗಳು, ವೃತ್ತಿ ಮಾರ್ಗದರ್ಶನ, ಕೌಶಲ್ಯ ಅಭಿವೃದ್ಧಿ, ನಾಗರಿಕ ಮತ್ತು ರಾಜಕೀಯ ಜಾಗೃತಿ ಮುಂತಾದ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುವುದು ಅವರು ಹೇಳಿದರು.

ಶೈಕ್ಷಣಿಕ, ಸಾಮಾಜಿಕ ಮತ್ತು ಕಲ್ಯಾಣ ಚಟುವಟಿಕೆಗಳಲ್ಲಿ ಮಹಿಳೆಯರ ಭಾಗವಹಿಸುವಿಕೆಗೆ ಆದ್ಯತೆ ನೀಡಲು ಮಹಿಳೆಯರು ಮತ್ತು ಹುಡುಗಿಯರಿಗಾಗಿ ವೃತ್ತಿ ಮಾರ್ಗದರ್ಶನ, ಕೌಶಲ್ಯ ಅಭಿವೃದ್ಧಿ, ಶೈಕ್ಷಣಿಕ ಜಾಗೃತಿ ಮತ್ತು ಸಾಮಾಜಿಕ ಸೇವಾ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುವುದು ಮತ್ತು ವಿವಿಧ ಜಿಲ್ಲೆಗಳಲ್ಲಿ ಮಹಿಳಾ ಸ್ವಯಂಸೇವಕರ ತಂಡಗಳನ್ನು ರಚಿಸಲು ಪ್ರಯತ್ನಿಸಲಾಗುವುದು ಎಂದು ಫಯಾಝ್ ಶರೀಫ್ ತಿಳಿಸಿದರು. ಪತ್ರಿಕಾಗೋಷ್ಠಿಯಲ್ಲಿ ಆಲ್ ಇಂಡಿಯಾ ಮಿಲ್ಲಿ ಕೌನ್ಸಿಲ್‍ನ ಇತರ ಪದಾಧಿಕಾರಿಗಳು ಉಪಸ್ಥಿತರಿದ್ದರು.