ನಾಳೆಯಿಂದ ‘ಎಂಬ್ರೇಸಿಂಗ್ ಫೆಮಿನಿನಿಟಿ’ ಅಭಿಯಾನ: ಸುಮಯ್ಯಾ ರೋಷನ್
ಬೆಂಗಳೂರು : ನ್ಯಾಷನಲ್ ಫೆಡರೇಷನ್ ಆಫ್ ಗರ್ಲ್ಸ್ ಇಸ್ಲಾಮಿಕ್ ಆರ್ಗನೈಜೇಷನ್ (ಎನ್ಎಫ್ಜಿಐಒ) ವತಿಯಿಂದ ಆ.2ರಿಂದ ಒಂದು ತಿಂಗಳು ಕಾಲ ‘ಎಂಬ್ರೇಸಿಂಗ್ ಫೆಮಿನಿನಿಟಿ’ ರಾಷ್ಟ್ರವ್ಯಾಪಿ ಅಭಿಯಾನ ನಡೆಯಲಿದೆ ಎಂದು ಸಂಘಟನೆಯ ರಾಷ್ಟ್ರೀಯಾಧ್ಯಕ್ಷೆ ಸುಮಯ್ಯಾ ರೋಷನ್ ತಿಳಿಸಿದ್ದಾರೆ.
ಶನಿವಾರ ನಗರದ ಕ್ವೀನ್ಸ್ ರಸ್ತೆಯಲ್ಲಿರುವ ಬಿಫ್ಟ್ ಸಭಾಂಗಣದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಆ.2ರ ಮಧ್ಯಾಹ್ನ 3ಗಂಟೆಯಿಂದ ಕೃಷಿ ತಂತ್ರಜ್ಞರ ಸಂಸ್ಥೆ(ಐಎಟಿ)ಯಲ್ಲಿ ಅಭಿಯಾನದ ಉದ್ಘಾಟನೆ ಕಾರ್ಯಕ್ರಮ ನಡೆಯಲಿದೆ ಎಂದು ತಿಳಿಸಿದರು. ಆಗಸ್ಟ್ ತಿಂಗಳು ಪೂರ್ತಿ ದೇಶಾದ್ಯಂತ ಎನ್ಎಫ್ಜಿಐಒ ಘಟಕಗಳಿಂದ ಅಭಿಯಾನ ನಡೆಯಲಿದೆ. ಎಂಬ್ರೇಸಿಂಗ್ ಫೆಮಿನಿನಿಟಿ ಅಭಿಯಾನ ಇಂದಿನ ಯುವತಿಯರು ಎದುರಿಸುತ್ತಿರುವ, ಹೆಚ್ಚುತ್ತಿರುವ ಒತ್ತಡಗಳ ನಡುವೆ ಘನತೆ, ಸಮತೋಲನ ಮತ್ತು ಆತ್ಮಗೌರವದೊಂದಿಗೆ ಸ್ತ್ರೀತ್ವವನ್ನು ಮರು ಅನ್ವೇಷಿಸಿಕೊಳ್ಳುವ ಒಂದು ಕರೆ ಎಂದು ಅವರು ತಿಳಿಸಿದರು.
ಎನ್ಎಫ್ಜಿಐಒ ಕರ್ನಾಟಕ ವಲಯದ ಸಲಹಾ ಸಮಿತಿ ಸದಸ್ಯೆ ಬಶೀರಾ ಬಾನು ಮಾತನಾಡಿ, ಮಹಿಳೆಯರ ವಿಶಿಷ್ಟ ಸಾಮರ್ಥ್ಯಗಳನ್ನು ದೃಢೀಕರಿಸಿ, ಜೀವನದ ಎಲ್ಲ ಕ್ಷೇತ್ರಗಳಲ್ಲಿ ಹಾಗೂ ಸಮಾಜದಲ್ಲಿ ಅವರಿಗೆ ಸಲ್ಲಬೇಕಾದ ಗೌರವಯುತ ಸ್ಥಾನವನ್ನು ಸ್ಪಷ್ಟಪಡಿಸುವುದು. ಭಾವನಾತ್ಮಕ ದೃಢತೆ, ಪರಸ್ಪರ ಬೆಂಬಲ ಮತ್ತು ಸಾಮೂಹಿಕ ಬೆಳವಣಿಗೆಯನ್ನು ಉತ್ತೇಜಿಸುವ ಸಹಾಯಕ ಜಾಲ ಹಾಗೂ ಅಗತ್ಯ ಸಂಪನ್ಮೂಲ ಕೇಂದ್ರಗಳನ್ನು ನಿರ್ಮಿಸುವುದು ಈ ಅಭಿಯಾನದ ಉದ್ದೇಶವಾಗಿದೆ ಎಂದು ತಿಳಿಸಿದರು. ಈ ಸಂದರ್ಭದಲ್ಲಿ ಎನ್ಎಫ್ಜಿಐಒ ಉಪಾಧ್ಯಕ್ಷೆ ಅಫೀಫಾ ತಹ್ನಿಯತ್, ‘ಎಂಬ್ರೇಸಿಂಗ್ ಫೆಮಿನಿನಿಟಿ’ ಅಭಿಯಾನದ ರಾಷ್ಟ್ರೀಯ ಸಂಯೋಜಕಿ ಸಮೀನ್ ಮೊಮಿನ್ ಮತ್ತಿತರರು ಹಾಜರಿದ್ದರು.
