ಭಾಷೆ ನಶಿಸಿದರೆ ಸಂಸ್ಕೃತಿ ನಾಶವಾದಂತೆ : ಯು.ಟಿ.ಖಾದರ್
ತುಮಕೂರು : ಒಂದು ಭಾಷೆ ಎಂದರೆ ಜನರ ನಡುವೆ ಮಾತನಾಡುವಂತಹದ್ದಲ್ಲ.ಅದರ ಹಿಂದೆ ಒಂದು ಇತಿಹಾಸ,ಸಂಸ್ಕೃತಿ, ಪರಂಪರೆ ಅಡಕವಾಗಿದೆ.ಒಂದು ಭಾಷೆ ನಶಿಸಿದರೆ ಆ ಭಾಗದ ಸಂಸ್ಕೃತಿ, ಪರಂಪರೆಯೇ ನಾಶವಾದಂತೆ ಎಂದು ರಾಜ್ಯ ಸರಕಾರದ ಆರೋಗ್ಯ, ವಕ್ಫ್, ಹಜ್ ಮತ್ತು ಅಲ್ಪಸಂಖ್ಯಾತರ ಕಲ್ಯಾಣ ಇಲಾಖೆ ಸಚಿವ ಯು.ಟಿ.ಖಾದರ್ ಅಭಿಪ್ರಾಯಪಟ್ಟಿದ್ದಾರೆ.
ನಗರದ ಮೆಳೆಕೋಟೆಯ ಧ್ಹಾನ ಪಾಲೇಸ್‌ನಲ್ಲಿ ಕರ್ನಾಟಕ ಉರ್ದು ಅಕಾಡಮಿ, ತೆಹರೀಕ್ ಎ ಉರ್ದು ಆದಬ್ ವತಿಯಿಂದ ಹಮ್ಮಿಕೊಂಡಿದ್ದ ರಾಷ್ಟ್ರೀಯ ಶಿಕ್ಷಣ ದಿವಸ್ ಮತ್ತು ಉರ್ದು ಹಬ್ಬ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡುತಿದ್ದ ಅವರು, ಯುವ ಜನಾಂಗ ಜಾಗತಿಕವಾಗಿ ವ್ಯವಹಾರಿಕ ಭಾಷೆಯಾಗಿರುವ ಇಂಗ್ಲಿಷ್‌ನ ಜೊತೆ, ಸ್ಥಳೀಯವಾಗಿರುವ ಎಲ್ಲಾ ಭಾಷೆಗಳನ್ನು ಕಲಿಯುವ ಪ್ರಯತ್ನ ಮಾಡಬೇಕು. ಹೆಚ್ಚು ಭಾಷೆಗಳನ್ನು ಕಲಿಯುವುದರಿಂದ ಜ್ಞಾನ ಸಂಪಾದನೆಗೆ ಸಹಾಯವಾಗಲಿದೆ.ಅಲ್ಲದೆ ಜಾಗತಿಕ ಮಟ್ಟದಲ್ಲಿ ನೀವು ಉಳಿಯಲು ಸಹಕಾರಿಯಾಗಲಿದೆ.ಅಲ್ಲದೆ ನಿಮ್ಮ ಆತ್ಮವಿಶ್ವಾಸವನ್ನು ಹೆಚ್ಚಿಸಲಿದೆ. ನೀವು ಎಷ್ಟು ಭಾಷೆ ಕಲಿಯುತ್ತೀರೋ, ಅಷ್ಟು ಅವಕಾಶಗಳು ನಿಮ್ಮನ್ನು ಅರಸಿ ಬರಲಿವೆ ಎಂದು ಸಚಿವ ಯು.ಟಿ.ಖಾದರ್ ನುಡಿದರು.
ಕನ್ನಡ ಅಭಿವೃದ್ದಿ ಪ್ರಾಧಿಕಾರದ ಅಧ್ಯಕ್ಷ ಪ್ರೊ.ಪುರುಷೋತ್ತಮ ಬಿಳಿಮಲೆ ಮಾತನಾಡಿ, ರಾಷ್ಟ್ರೀಯ ಶಿಕ್ಷಣ ನೀತಿ ಮತ್ತು ಉರ್ದು ಹಬ್ಬ ಎರಡು ಒಂದೇ ದಿನ ನಡೆಯುತ್ತಿರುವ ಸಂತೋಷದ ವಿಚಾರ. 2011ರ ಸಮೀಕ್ಷೆಯ ಪ್ರಕಾರ ಭಾರತದಲ್ಲಿ 19568 ಭಾಷೆಗಳಿವೆ.ಅವುಗಳಲ್ಲಿ ಕೇವಲ 22 ಭಾಷೆಗಳಿಗೆ ಮಾತ್ರ ಸಾಂವಿಧಾನಿಕ ಮಾನ್ಯತೆ ದೊರೆತಿದೆ.ಅವುಗಳಲ್ಲಿ ಉರ್ದು ಮತ್ತು ಕನ್ನಡ ಸೇರಿರುವುದು ಶ್ಲಾಘನೀಯ. ಜಾತೀಕರಣದ ಫಲವಾಗಿ ವಿಶ್ವ ಮಟ್ಟದಲ್ಲಿ ಇಂಗ್ಲಿಷ್, ಭಾರತದ ಮಟ್ಟಿಗೆ ಹಿಂದಿ ವ್ಯವಹಾರಿಕ ಭಾಷೆಯಾದ ಪರಿಣಾಮ ಇತರ ಭಾಷೆಗಳಿಗೆ ಹಿನ್ನೆಡೆಯಾಯಿತು.ಕನ್ನಡ ಅಭಿವೃದ್ದಿ ಪ್ರಾಧಿಕಾರಿ ಕರ್ನಾಟಕ ಭಾಷಾ ನೀತಿಯನ್ನು ಸರಕಾರದ ಮುಂದಿಟ್ಟಿದೆ.ಅದು ಕಾಯ್ದೆಯಾಗಿ ಬಂದರೆ ಕನ್ನಡ ಸೇರಿದಂತೆ ಕರ್ನಾಟಕದ ಎಲ್ಲಾ ಪ್ರಾದೇಶಿಕ ಭಾಷೆಗಳು ಉಳಿಯಲಿವೆ ಎಂದರು.
ವಿಧಾನಪರಿಷತ್ ಸದಸ್ಯೆ ಬಲ್ಕೀಸ್ ಭಾನು, ಮಾಜಿ ಶಾಸಕ ಡಾ.ಎಸ್.ಷಪಿ ಅಹ್ಮದ್ ಡಿಸಿಸಿ ಪ್ರಚಾರ ಸಮಿತಿ ಅಧ್ಯಕ್ಷ ಇಕ್ಬಾಲ್ ಅಹ್ಮದ್, ಅಂಜುಮಾನ್ ಇ ತಹರಿಕ್ ಉರ್ದು ಹಿಂದ್‌ನ ಅಧ್ಯಕ್ಷ ಉಬೆದುಲ್ಲಾ ಷರಿಫ್ ಮಾತನಾಡಿದರು.ತಹರೀಕ್ ಉರ್ದು ಆದಬ್‌ನ ತುಮಕೂರು ಅಧ್ಯಕ್ಷ ತಾಜುದ್ದೀನ್ ಷರೀಫ್, ಕಾರ್ಯದರ್ಶಿ ಅಫ್ಹಲ್ ಖಾನ್, ಅಂಜುಮಾನ್ ಇ ತೆಹರಿಕ್ ಉರ್ದು ಹಿಂದ್‌ನ ಕಾರ್ಯದರ್ಶಿ ಅಬ್ದುಲ್ ಹಲೀಮ್ ಮನ್ಸೂರ್ ಸೇರಿದಂತೆ ಹಲವರು ಉಪಸ್ಥಿತರಿದ್ದರು. ಇದೇ ವೇಳೆ ಹಿರಿಯ ಪತ್ರಕರ್ತರಾದ ಮುನೀರ್ ಅಹಮದ್ ಮತ್ತು ಆರೀಫ್ ಮತೀನ್ ಅವರುಗಳನ್ನು,ನಿವೃತ್ತ ಶಿಕ್ಷಕರನ್ನು ಸನ್ಮಾನಿಸಲಾಯಿತು.
