ಸಿರುಗುಪ್ಪ | ತುಂಗಭದ್ರಾ ಕಾಲುವೆಗಳಿಗೆ ನಿರಂತರ ನೀರು ಹರಿಸಲು ಆಗ್ರಹಿಸಿ ರೈತರಿಂದ ಹೆದ್ದಾರಿ ತಡೆ

ಸಿರುಗುಪ್ಪ: ತುಂಗಭದ್ರಾ ಜಲಾಶಯದಿಂದ ಮೇಲ್ಮಟ್ಟದ (ಎಚ್ಎಲ್ಸಿ) ಹಾಗೂ ಕೆಳಮಟ್ಟದ (ಎಲ್ಎಲ್ಸಿ) ಕಾಲುವೆಗಳಿಗೆ ನಿರಂತರವಾಗಿ ನೀರು ಹರಿಸುವಂತೆ ಆಗ್ರಹಿಸಿ, ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ ನೇತೃತ್ವದಲ್ಲಿ ರೈತರು ಗುರುವಾರ ರಾಷ್ಟ್ರೀಯ ಹೆದ್ದಾರಿ 150ಎನಲ್ಲಿ ರಸ್ತೆ ತಡೆ ಚಳವಳಿ ನಡೆಸಿದರು.
ತಾಲೂಕಿನ ಸಿರಿಗೇರಿ ಕ್ರಾಸ್ನಿಂದ ಲಕ್ಷ್ಮೀನಗರ ಕ್ಯಾಂಪ್ವರೆಗೆ, ಬೈಲೂರು ಹಾಗೂ ಕೋಳೂರು ಕ್ರಾಸ್ ಬಳಿ ಸಾವಿರಾರು ರೈತರು ಟ್ರ್ಯಾಕ್ಟರ್ ಮತ್ತು ಎತ್ತಿನ ಬಂಡಿಗಳೊಂದಿಗೆ ಜಮಾಯಿಸಿ ಹೆದ್ದಾರಿ ತಡೆದು ಆಕ್ರೋಶ ವ್ಯಕ್ತಪಡಿಸಿದರು.
ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ ಅಧ್ಯಕ್ಷ ಕರೂರು ಮಾಧವರೆಡ್ಡಿ ಮಾತನಾಡಿ, ಎಲ್ಎಲ್ಸಿ ಕಾಲುವೆ ವ್ಯಾಪ್ತಿಯ ಸುಮಾರು 96 ಸಾವಿರ ಎಕರೆ ಪ್ರದೇಶದಲ್ಲಿ ಬೆಳೆಗಳು ಒಣಗುವ ಹಂತಕ್ಕೆ ತಲುಪಿವೆ. ಐಸಿಸಿ ಸಭೆಯಲ್ಲಿ ಕರ್ನಾಟಕದ ಪಾಲಿನ 550 ಕ್ಯೂಸೆಕ್ ನೀರು ಹರಿಸಲು ಮಾತ್ರ ನಿರ್ಧರಿಸಲಾಗಿದೆ. ಆದರೆ, ಇದರಿಂದ ಕೇವಲ 550 ಎಕರೆ ಪ್ರದೇಶಕ್ಕೆ ಮಾತ್ರ ನೀರು ತಲುಪಲು ಸಾಧ್ಯವಾಗುತ್ತದೆ. ಆಂಧ್ರಪ್ರದೇಶದ ಪಾಲಿನ ನೀರನ್ನೂ ಪಡೆದು ಹರಿಸಿದರೆ ಮಾತ್ರ ರೈತರ ಜಮೀನುಗಳಿಗೆ ಸಮರ್ಪಕವಾಗಿ ನೀರು ಸಿಗಲಿದೆ ಎಂದು ತಿಳಿಸಿದರು.
ಬೆಳೆಗಳಿಗೆ ಬಿಡಬೇಕಾದ ನೀರನ್ನು ಕುಡಿಯುವ ನೀರಿನ ನೆಪದಲ್ಲಿ ಕೆರೆಗಳಿಗೆ ತುಂಬಿಸಲಾಗುತ್ತಿದ್ದು, ಇದರಿಂದ ಕೃಷಿ ಚಟುವಟಿಕೆಗಳಿಗೆ ತೀವ್ರ ತೊಂದರೆಯಾಗಿದೆ. ಐಸಿಸಿ ಸಭೆಯ ತೀರ್ಮಾನದಂತೆ ಡಿ. 21ರಿಂದ 28ರವರೆಗೆ ಎಲ್ಎಲ್ಸಿಗೆ 550 ಕ್ಯೂಸೆಕ್ ಹಾಗೂ ಎಚ್ಎಲ್ಸಿಗೆ 1,000 ಕ್ಯೂಸೆಕ್ ನೀರು ಹರಿಸಿದರೆ ಸಾಲದು. ಬದಲಾಗಿ, ಎಲ್ಎಲ್ಸಿಗೆ 1,100 ಕ್ಯೂಸೆಕ್ ಮತ್ತು ಎಚ್ಎಲ್ಸಿಗೆ 2,800 ಕ್ಯೂಸೆಕ್ ನೀರು ಹರಿಸಬೇಕು. ಎಲ್ಎಲ್ಸಿಗೆ ಡಿ. 15ರವರೆಗೆ ಹಾಗೂ ಎಚ್ಎಲ್ಸಿಗೆ ಡಿ. 10ರವರೆಗೆ ನಿರಂತರವಾಗಿ ನೀರು ಹರಿಸಲು ಸರ್ಕಾರ ಕ್ರಮ ಕೈಗೊಳ್ಳಬೇಕು. ಇಲ್ಲದಿದ್ದರೆ ಹೋರಾಟ ತೀವ್ರಗೊಳಿಸಲಾಗುವುದು ಎಂದು ಎಚ್ಚರಿಸಿದರು.
ಅಧಿಕಾರಿಗಳ ಭರವಸೆ: ಸ್ಥಳಕ್ಕೆ ಭೇಟಿ ನೀಡಿ ರೈತರಿಂದ ಮನವಿ ಸ್ವೀಕರಿಸಿದ ಸಹಾಯಕ ಆಯುಕ್ತ ಎಚ್.ಡಿ. ರಾಜೇಶ್ ಮಾತನಾಡಿ, ರೈತರ ಬೇಡಿಕೆಯಂತೆ ನ. 28ರಿಂದ ಡಿ. 10ರವರೆಗೆ ಕರ್ನಾಟಕ ಮತ್ತು ಆಂಧ್ರಪ್ರದೇಶದ ಪಾಲಿನ ನೀರನ್ನು ನಿರಂತರವಾಗಿ ಹರಿಸಲು ಕ್ರಮ ಕೈಗೊಳ್ಳುವಂತೆ ಜಿಲ್ಲಾಧಿಕಾರಿಗಳ ಮೂಲಕ ಸರ್ಕಾರದ ಗಮನಕ್ಕೆ ತರಲಾಗುವುದು ಎಂದು ಭರವಸೆ ನೀಡಿದರು.
ತಹಶೀಲ್ದಾರ್ ಗೌಸಿಯಾ ಬೇಗಂ, ನೀರಾವರಿ ಇಲಾಖೆಯ ಎಇಇ ಮುನೀರ್, ಡಿವೈಎಸ್ಪಿ ಮಾಲತೇಶ ಕೊನಬೇವು ಸ್ಥಳದಲ್ಲಿದ್ದರು. ರೈತ ಮುಖಂಡರಾದ ರಾಮನಗೌಡ, ಸಲ್ಲಾ ತಿಮ್ಮಾರೆಡ್ಡಿ, ವಿರೂಪಾಕ್ಷಿ ರೆಡ್ಡಿ, ಓಂಕಾರಿ, ಖಾದರ್ ಸಾಬ್, ದೊಡ್ಡ ಬಸಪ್ಪ, ಕೆ. ಶಿವಾರೆಡ್ಡಿ, ಹಂಪನಗೌಡ, ಜೆ. ಪಂಪನಗೌಡ, ಬಿ. ನೀಲಕಂಠಗೌಡ, ಜಗದೀಶ, ಬಿ. ನಾರಾಯಣರೆಡ್ಡಿ, ಪಕ್ಕೀರಪ್ಪ, ಪೋಶರಾವು, ಕೆ. ಮಲ್ಲಿಕಾರ್ಜುನ ಸೇರಿದಂತೆ ವಿವಿಧ ಗ್ರಾಮಗಳ ರೈತರು ಪಾಲ್ಗೊಂಡಿದ್ದರು.






