KIAಗೆ MRPLನ ಏವಿಯೇಷನ್ ಟರ್ಬೈನ್ ಇಂಧನ ಪೈಪ್ಲೈನ್ ಗೆ ಅನುಮೋದನೆ
ಹೊಸದಿಲ್ಲಿ: ಬೆಂಗಳೂರಿನ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ (ಕೆಐಎ) ಏವಿಯೇಷನ್ ಟರ್ಬೈನ್ ಇಂಧನ (ಎಟಿಎಫ್) ಪೂರೈಕೆಯನ್ನು ಮತ್ತಷ್ಟು ಬಲಪಡಿಸಲು ಮಂಗಳೂರು ರಿಫೈನರಿ ಮತ್ತು ಪೆಟ್ರೋಕೆಮಿಕಲ್ಸ್ ಲಿಮಿಟೆಡ್ (ಎಂಆರ್ಪಿಎಲ್) ಕೈಗೊಂಡಿರುವ 2.5 ಎಂಎಂಟಿಪಿಎ ಸಾಮರ್ಥ್ಯದ ಪೈಪ್ಲೈನ್ ಯೋಜನೆಗೆ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ನಿಯಂತ್ರಣ ಮಂಡಳಿ (ಪಿಎನ್ಜಿಆರ್ಬಿ) ಅನುಮೋದನೆ ನೀಡಿದೆ.
ONGCಯ ಅಂಗಸಂಸ್ಥೆಯೂ ಆಗಿರುವ ಎಂಆರ್ಪಿಎಲ್ಗೆ ದೇವನಗೊಂತಿಯಿಂದ ಕೆಐಎವರೆಗೆ ಪೆಟ್ರೋಲಿಯಂ ಮತ್ತು ಪೆಟ್ರೋಲಿಯಂ ಉತ್ಪನ್ನ ಪೈಪ್ಲೈನ್ ನಿರ್ಮಿಸಲು, ನಿರ್ವಹಿಸಲು ಹಾಗೂ ಅಗತ್ಯವಿದ್ದರೆ ವಿಸ್ತರಿಸಲು ಅಧಿಕಾರ ನೀಡಲಾಗಿದೆ.
ಈ ಯೋಜನೆಯಡಿ ದೇವನಗೊಂತಿಯ ಎಂಆರ್ಪಿಎಲ್ ಮಾರ್ಕೆಟಿಂಗ್ ಟರ್ಮಿನಲ್ನಿಂದ ಕೆಐಎದಲ್ಲಿರುವ ಅಸ್ತಿತ್ವದಲ್ಲಿನ ಸಾಮಾನ್ಯ ಬಳಕೆದಾರ ಇಂಧನ ಸಂಗ್ರಹ ಕೇಂದ್ರ ಹಾಗೂ ನಿರ್ಮಾಣ ಹಂತದಲ್ಲಿರುವ ಉಪಗ್ರಹ ಇಂಧನ ಸಂಗ್ರಹ ಕೇಂದ್ರಕ್ಕೆ ಎಟಿಎಫ್ ಪೈಪ್ಲೈನ್ ಸಂಪರ್ಕ ಕಲ್ಪಿಸಲಾಗುತ್ತದೆ.
ಪೈಪ್ಲೈನ್ ವ್ಯವಸ್ಥೆಯ ಸಾಮರ್ಥ್ಯ 2.5 ಎಂಎಂಟಿಪಿಎ ಆಗಿದ್ದು, 36 ತಿಂಗಳೊಳಗೆ ಕಾಮಗಾರಿ ಪೂರ್ಣಗೊಳಿಸುವ ಗುರಿ ಹೊಂದಲಾಗಿದೆ.
ಈ ಯೋಜನೆಯಿಂದ ದೇವನಗೊಂತಿ ಮತ್ತು ಕೆಐಎ ನಡುವೆ ನೇರ ಹಾಗೂ ಪರಿಣಾಮಕಾರಿ ಎಟಿಎಫ್ ಸಾಗಣೆ ವ್ಯವಸ್ಥೆ ರೂಪುಗೊಳ್ಳಲಿದ್ದು, ವಿಮಾನ ಇಂಧನ ಪೂರೈಕೆ ಇನ್ನಷ್ಟು ಸುಗಮವಾಗಲಿದೆ ಎಂದು ಸಂಸ್ಥೆ ತಿಳಿಸಿದೆ.
ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ಪ್ರಯಾಣಿಕ ಹಾಗೂ ಸರಕು ಸಾಗಣೆ ಪ್ರಮಾಣ ನಿರಂತರ ಏರಿಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಈ ಯೋಜನೆಗೆ ಹೆಚ್ಚಿನ ಮಹತ್ವ ದೊರೆತಿದೆ. ಬೆಂಗಳೂರು ದೇಶದ ಪ್ರಮುಖ ವಾಯುಯಾನ ಮತ್ತು ತಂತ್ರಜ್ಞಾನ ಕೇಂದ್ರವಾಗಿ ಬೆಳೆಯುತ್ತಿರುವುದರಿಂದ ಎಟಿಎಫ್ ಬೇಡಿಕೆಯೂ ಹೆಚ್ಚುತ್ತಿದೆ.
ದೊಡ್ಡದಾಸರಹಳ್ಳಿಯಲ್ಲಿರುವ ಎಂಆರ್ಪಿಎಲ್ನ ದೇವನಗೊಂತಿ ಮಾರ್ಕೆಟಿಂಗ್ ಟರ್ಮಿನಲ್ನಿಂದ ಈಗಾಗಲೇ ಮೋಟಾರ್ ಸ್ಪಿರಿಟ್, ಹೈ ಸ್ಪೀಡ್ ಡೀಸೆಲ್ ಹಾಗೂ ಏವಿಯೇಷನ್ ಟರ್ಬೈನ್ ಇಂಧನ ವಿತರಣೆ ನಡೆಯುತ್ತಿದೆ. ಮಂಗಳೂರಿನ ಎಂಆರ್ಪಿಎಲ್ನಿಂದ ಪಿಎಂಎಚ್ಬಿಎಲ್ ಪೈಪ್ಲೈನ್ ಮೂಲಕ ಪೆಟ್ರೋಲಿಯಂ ಉತ್ಪನ್ನಗಳನ್ನು ಈ ಟರ್ಮಿನಲ್ಗೆ ಪೂರೈಸಲಾಗುತ್ತಿದೆ.
‘ಪ್ರಸ್ತಾವಿತ ಎಟಿಎಫ್ ಪೈಪ್ಲೈನ್ ಯೋಜನೆ ಬೆಂಗಳೂರು ವಿಮಾನ ನಿಲ್ದಾಣದ ಹೆಚ್ಚುತ್ತಿರುವ ಎಟಿಎಫ್ ಅಗತ್ಯವನ್ನು ಪೂರೈಸಲು ನೆರವಾಗಲಿದೆ. ಜೊತೆಗೆ ಬೆಂಗಳೂರಿನಲ್ಲಿ ಎಂಆರ್ಪಿಎಲ್ನ ಹೈಡ್ರೋಕಾರ್ಬನ್ ವ್ಯಾಪ್ತಿಯನ್ನು ವಿಸ್ತರಿಸಲು ಸಹಕಾರಿಯಾಗಲಿದೆ’ ಎಂದು ಎಂಆರ್ಪಿಎಲ್ನ ಯೋಜನೆಗಳ ಕಾರ್ಯನಿರ್ವಾಹಕ ನಿರ್ದೇಶಕ ಬಿ.ಎಚ್.ವಿ. ಪ್ರಸಾದ್ ತಿಳಿಸಿದ್ದಾರೆ.
