ದೇಶ ಆಳಬೇಕಿದ್ದವರು ಕೂಲಿಕಾರರಾಗಿದ್ದಾರೆ : ಸತೀಶ್ ಜಾರಕಿಹೊಳಿ

ಬೆಂಗಳೂರು : ಯಾರು ಈ ದೇಶವನ್ನು ಆಳಬೇಕಾಗಿತ್ತೋ, ಅವರು ಇವತ್ತು ಕೂಲಿಕಾರರಾಗಿದ್ದಾರೆ. ಯಾರು ಇಲ್ಲಿಗೆ ಕೆಲಸ ಹುಡುಕಿಕೊಂಡು ಬಂದಿದ್ದರೋ, ಅವರು ದೇಶ ಆಳುತ್ತಿದ್ದಾರೆ ಎಂದು ಲೋಕೋಪಯೋಗಿ ಸಚಿವ ಸತೀಶ್ ಜಾರಕಿಹೊಳಿ ತಿಳಿಸಿದ್ದಾರೆ.

ಬುಧವಾರ ನಗರದ ಡಾ.ಮನಮೋಹನ್ ಸಿಂಗ್ ಬೆಂಗಳೂರು ಕೇಂದ್ರ ವಿವಿಯ ಜ್ಞಾನಜ್ಯೋತಿ ಸಭಾಂಗಣದಲ್ಲಿ ನಡೆದ ಡಾ.ಚಂದ್ರಶೇಖರ್ ಆರ್.ವಿ. ಅವರ ‘ರಾಮೇನಹಳ್ಳಿ ಟು ವಿಶ್ವಸಂಸ್ಥೆ’ ಪುಸ್ತಕ ಬಿಡುಗಡೆ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.

ಈ ದೇಶವನ್ನು ಆಳಬೇಕಾದಂತಹ ದಲಿತರು ಕೂಲಿಕಾರರಾಗಿರುವುದು ದುರಂತ. ಭಾರತದ ಮೂಲ ನಿವಾಸಿಗಳಾಗಿರುವ ದಲಿತರ ಪರಿಸ್ಥಿತಿ ಇಂದು ಏನಾಗಿದೆ? ನಾಲ್ಕನೇ ದರ್ಜೆ ನೌಕರಿ ಸಿಕ್ಕರೆ ಸಾಕು ಎಂಬ ಮನಸ್ಥಿತಿ ದಲಿತರಿಗಿದೆ. ಡ್ರೈವರ್‌ಗಳು, ಕಸ ಹೊಡೆಯುವವರು, ಶೌಚಾಲಯ ಸ್ವಚ್ಛಗೊಳಿಸುವ ಕೆಲಸಗಳಲ್ಲಿ ದೇಶದ ಮೂಲ ನಿವಾಸಿಗಳು ಕಾಣಿಸಿಕೊಳ್ಳುತ್ತಾರೆ ಎಂದು ಸತೀಶ್ ಜಾರಕಿಹೊಳಿ ಬೇಸರ ವ್ಯಕ್ತಪಡಿಸಿದರು.

ಹಿರಿಯ ವಕೀಲ ಪ್ರೊ.ರವಿವರ್ಮ ಕುಮಾರ್ ಮಾತನಾಡಿ, ಡಾ.ಚಂದ್ರಶೇಖರ್ ಅವರು ನಾನು ಕಂಡಂತಹ ಅತ್ಯಂತ ಅಪರೂಪದ ಸಂಶೋಧಕ. ಎಲ್ಲಕ್ಕಿಂತಲೂ ಮುಖ್ಯವಾಗಿ ಬಹಳ ಒಳ್ಳೆಯ ಆ್ಯಕ್ಟಿವಿಸ್ಟ್. ಜನರ ಜೊತೆಗೆ ಬೆರೆತು, ಜನರ ನೋವನ್ನು ಪ್ರತ್ಯಕ್ಷವಾಗಿ ಅರಿತು, ಅವರ ಕಷ್ಟ-ಕಾರ್ಪಣ್ಯಗಳ ಬಗ್ಗೆ, ವಿಶೇಷವಾಗಿ ಜಾತಿಯಿಂದ ಬಂದಿರುವಂತಹ ಎಲ್ಲ ಸಂಕೋಲೆ, ತಾರತಮ್ಯಗಳ ಬಗ್ಗೆ ಅವಿರತವಾಗಿ ಹೋರಾಟ ಮಾಡುತ್ತಿರುವ ಡಾ.ಚಂದ್ರಶೇಖರ್ ಅವರು ವಿಶ್ವಸಂಸ್ಥೆಗೆ ಹೋಗಿ ಬಂದದ್ದು ನಮ್ಮೆಲ್ಲರಿಗೂ ಸಂತಸದ ವಿಚಾರ ಎಂದರು.

ಕಾರ್ಯಕ್ರಮದಲ್ಲಿ ಕುವೆಂಪು ವಿವಿ ನಿಕಟಪೂರ್ವ ಕುಲಪತಿ ಪ್ರೊ.ಜೋಗನ್ ಶಂಕರ್, ಸಖಿ ಸಂಸ್ಥೆಯ ನಿರ್ದೇಶಕಿ ಡಾ.ಭಾಗ್ಯಲಕ್ಷ್ಮೀ, ಸಮಾಜಶಾಸ್ತ್ರಜ್ಞ ಡಾ.ಸಿ.ಜಿ.ಲಕ್ಷ್ಮೀಪತಿ ಮಾತನಾಡಿದರು. ಹಿರಿಯ ಪತ್ರಕರ್ತ ಸುಬ್ರಹ್ಮಣ್ಯ ಎಚ್.ಎಂ., ತಮಟೆ ಸಂಸ್ಥೆ ನಿರ್ದೇಶಕ ಡಾ.ಕೆ.ಬಿ.ಓಬಳೇಶ್ ಉಪಸ್ಥಿತರಿದ್ದರು.