ಬೆಂಗಳೂರಿನಲ್ಲಿ ಸೂಪರ್ನೋವಾ ಫುಟ್ಬಾಲ್ ಚಾಂಪಿಯನ್ ಶಿಪ್ಗೆ ತೆರೆ: ಗ್ರೀನ್ವುಡ್ ಹೈ, ಹೆಡ್ಸ್ಟಾರ್ಟ್ ಅಕಾಡೆಮಿಗೆ ಪ್ರಶಸ್ತಿ ಗರಿ
ಬೆಂಗಳೂರು: ಬಾಲಕಿಯರ ಫುಟ್ಬಾಲ್ ಪ್ರತಿಭೆಗಳಿಗೆ ವೃತ್ತಿಪರ ವೇದಿಕೆ ಕಲ್ಪಿಸುವ ಉದ್ದೇಶದಿಂದ ನಗರದ ಡಿಪೋ 18 ಮೈದಾನದಲ್ಲಿ ಆಯೋಜಿಸಲಾಗಿದ್ದ ಪ್ರಥಮ ಆವೃತ್ತಿಯ 'ಸೂಪರ್ನೋವಾ ಫುಟ್ಬಾಲ್ ಚಾಂಪಿಯನ್ ಶಿಪ್ (SNFC)' ರವಿವಾರ ಯಶಸ್ವಿಯಾಗಿ ಮುಕ್ತಾಯಗೊಂಡಿತು. ಕ್ಯಾಪ್ರಿ ಸ್ಪೋರ್ಟ್ಸ್ನ 'ನೋವಾ ಸ್ಪೋರ್ಟ್ಸ್' ಉಪಕ್ರಮದಡಿ ಎರಡು ದಿನಗಳ ಕಾಲ ನಡೆದ ಈ ಪಂದ್ಯಾವಳಿಯಲ್ಲಿ ಅಂಡರ್-13, 15 ಮತ್ತು 17 ವಯೋಮಾನದ ಬಾಲಕಿಯರ ತಂಡಗಳು ಪ್ರಶಸ್ತಿಗಾಗಿ ಕಾದಾಡಿದವು.
ಶಾಲಾ ಮಟ್ಟದ ಬಾಲಕಿಯರ ಫುಟ್ಬಾಲ್ನಲ್ಲಿ ಹೊಸ ಮಾನದಂಡ ಸ್ಥಾಪಿಸಿದ ಈ ಕೂಟದಲ್ಲಿ ಒಟ್ಟು 69 ಪಂದ್ಯಗಳು ಜರುಗಿದ್ದು, 222 ಗೋಲುಗಳು ದಾಖಲಾದವು.
13 ವರ್ಷದೊಳಗಿನವರ ವಿಭಾಗದಲ್ಲಿ ಸರ್ವಾಂಗೀಣ ಪ್ರದರ್ಶನ ನೀಡಿದ ಗ್ರೀನ್ವುಡ್ ಹೈ ಶಾಲೆ ಚಾಂಪಿಯನ್ ಪಟ್ಟ ಅಲಂಕರಿಸಿತು. ಇದೇ ಶಾಲೆಯ ಅನ್ವೇಷಾ ಪಾಂಡೆ (20 ಗೋಲು) ಗರಿಷ್ಠ ಗೋಲ್ ಸ್ಕೋರರ್ ಹಾಗೂ ಎ.ಎಸ್. ಮಿಥ್ರಾ ಹಯಾತಿ 'ಮೋಸ್ಟ್ ವ್ಯಾಲ್ಯುಯೆಬಲ್ ಪ್ಲೇಯರ್' (MVP) ಪ್ರಶಸ್ತಿಗೆ ಭಾಜನರಾದರು. ಹೆಡ್ಸ್ಟಾರ್ಟ್ ಅಕಾಡೆಮಿಯ ತನ್ವಿ ಮಹೇಶ್ವರಿ ಅತ್ಯುತ್ತಮ ಗೋಲ್ಕೀಪರ್ ಗೌರವ ಪಡೆದರು.
15 ವರ್ಷದೊಳಗಿನವರ ವಿಭಾಗದಲ್ಲೂ ಪಾರಮ್ಯ ಮೆರೆದ ಗ್ರೀನ್ವುಡ್ ಹೈ ಶಾಲೆ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿತು. ತಂಡದ ಆಯುಷಿ ಕಾರಂತ್ (16 ಗೋಲು) ಟಾಪ್ ಸ್ಕೋರರ್ ಹಾಗೂ ರಿಚಾ ಭಟ್ಟಾ ಎಂವಿಪಿ ಪ್ರಶಸ್ತಿ ಪಡೆದರೆ, ಹೆಡ್ಸ್ಟಾರ್ಟ್ ಅಕಾಡೆಮಿಯ ಅನೈಶಾ ಗುಪ್ತಾ ಅತ್ಯುತ್ತಮ ಗೋಲ್ಕೀಪರ್ ಆಗಿ ಹೊರಹೊಮ್ಮಿದರು.
17 ವರ್ಷದೊಳಗಿನವರ ಬಾಲಕಿಯರ ವಿಭಾಗದ ಫೈನಲ್ನಲ್ಲಿ ಭರ್ಜರಿ ಜಯ ದಾಖಲಿಸಿದ ಹೆಡ್ಸ್ಟಾರ್ಟ್ ಅಕಾಡೆಮಿ ಟ್ರೋಫಿ ಎತ್ತಿಹಿಡಿಯಿತು. ಡಿಪಿಎಸ್ ಬೆಂಗಳೂರು ಈಸ್ಟ್ ಶಾಲೆಯ ಕಕುಲವೇರಪು ಕೃಷ್ಣ ಮನೋಗ್ಯಾ (10 ಗೋಲು) ಟಾಪ್ ಸ್ಕೋರರ್ ಮತ್ತು ಪ್ರೇಕ್ಷಾ ಅತ್ಯುತ್ತಮ ಗೋಲ್ಕೀಪರ್ ಪ್ರಶಸ್ತಿ ಪಡೆದರು. ಹೊಸೂರಿನ ಎಂ.ಎಸ್. ಧೋನಿ ಶಾಲೆಯ ವೈಷ್ಣವಿ ಎಂ. ಅತ್ಯಂತ ಮೌಲ್ಯಯುತ ಆಟಗಾರ್ತಿ (MVP) ಗೌರವಕ್ಕೆ ಪಾತ್ರರಾದರು.
