ಒಳಿತಿನ ಗುಣಗಳ ಜಾಗೃತಿಯೇ ನವರಾತ್ರಿ ಮಹೋತ್ಸವದ ವಿಶೇಷ : ಮಲ್ಲಮ್ಮ ಪಾಟೀಲ್‌
ಭಾಲ್ಕಿ : ನಮ್ಮಲ್ಲಿರುವ ದುರ್ಗುಣಗಳನ್ನು ತೊರೆದು ಸದ್ಗುಣಗಳನ್ನು ಬೆಳೆಸಿಕೊಳ್ಳುವುದೇ ನವರಾತ್ರಿ ಮಹೋತ್ಸವದ ವಿಶೇಷತೆಯಾಗಿದೆ ಎಂದು ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್ತಿನ ತಾಲೂಕು ಘಟಕದ ಅಧ್ಯಕ್ಷೆ ಮಲ್ಲಮ್ಮ ಆರ್. ಪಾಟೀಲ್‌ ಹೇಳಿದರು.
ತಾಲೂಕಿನ ಭಾತಂಬ್ರಾ ಗ್ರಾಮದ ಲಖನಗಾಂವ್‌ ರಸ್ತೆ ಸಮೀಪದ ಭವಾನಿ ಮಂದಿರದಲ್ಲಿ ಬುಧವಾರ ನಡೆದ ನವರಾತ್ರಿ ನಿಮಿತ್ಯ ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್ತಿನ ವತಿಯಿಂದ ಆಯೋಜಿಸಿದ್ದ ದಾನಮ್ಮ ದೇವಿಯ ತತ್ವಚಿಂತನೆ ಕುರಿತ ಮಹಿಳಾ ಗೋಷ್ಠಿಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.
ಗುಡ್ಡಾಪುರದ ದಾನಮ್ಮ ದೇವಿಯ ದಾನಧರ್ಮ ಹಾಗೂ ಬಸವತತ್ವದ ಪಾಲನೆ ಇಂದಿನ ಮಹಿಳೆಯರಿಗೆ ಆದರ್ಶವಾಗಿವೆ. ದೇವಿಯನ್ನು ಭಕ್ತಿಯಿಂದ ಪೂಜಿಸುವುದರ ಜೊತೆಗೆ ಅವರ ತತ್ವಗಳನ್ನು ಜೀವನದಲ್ಲಿ ಅಳವಡಿಸಿಕೊಂಡಾಗ ಉತ್ತಮ ವ್ಯಕ್ತಿತ್ವ ರೂಪಿಸಿಕೊಳ್ಳಲು ಸಾಧ್ಯ ಎಂದು ಹೇಳಿದರು.
ಪದವಿಯಲ್ಲಿ ಹೆಚ್ಚು ಅಂಕ ಪಡೆದ ವಿದ್ಯಾರ್ಥಿನಿಯರಾದ ರಾಜೇಶ್ವರಿ ಮತ್ತು ಸುಪ್ರಿಯಾ ಅವರನ್ನು ಸನ್ಮಾನಿಸಲಾಯಿತು.
ಪತ್ರಕರ್ತ ಜಯರಾಜ್‌ ದಾಬಶೆಟ್ಟಿ ಕಾರ್ಯಕ್ರಮ ಉದ್ಘಾಟಿಸಿದರು. ಬ್ರಹ್ಮಕುಮಾರಿ ಈಶ್ವರೀಯ ವಿಶ್ವವಿದ್ಯಾಲಯದ ಸಂಚಾಲಕಿ ರಾಧಾಜಿ ಸಾನಿಧ್ಯ ವಹಿಸಿದ್ದರು. ಉಪನ್ಯಾಸಕಿ ಗೀತಾ ಪಾಟೀಲ್‌ ವಿಶೇಷ ಉಪನ್ಯಾಸ ನೀಡಿದರು. ಸೂರ್ಯೋದಯ ಪಬ್ಲಿಕ್ ಶಾಲೆಯ ಅಧ್ಯಕ್ಷೆ ಉಷಾ ಖಂಡ್ರೆ ಮುಖ್ಯ ಅತಿಥಿಗಳಾಗಿ ಮಾತನಾಡಿದರು. ಬಸವ ಟಿವಿ ಲಿಪಿ ನಿರ್ದೇಶಕ ಕಿರಣಕುಮಾರ್ ಚಾಕೋತೆ ಪ್ರಾಸ್ತಾವಿಕವಾಗಿ ಮಾತನಾಡಿದರು.
ಈ ಸಂದರ್ಭದಲ್ಲಿ ಶಿವರಾಜ್‌ ಲದ್ದೆ, ಧನರಾಜ್‌ ಕಾಪಸೆ, ಶಿವಾಜಿರಾವ್ ಸಾಗರ್‌ ಹಾಗೂ ಸಿದ್ರಾಮ್‌ ಚಲವಾ ಉಪಸ್ಥಿತರಿದ್ದರು. ಶಿವಾಜಿ ಎಸ್. ನಿರೂಪಿಸಿದರು. ಸಿದ್ರಾಮ ವಂದಿಸಿದರು.
