Bhalki | ಶರಣ ಕಮ್ಮಟ, ಅನುಭವ ಮಂಟಪ ಉತ್ಸವಕ್ಕೆ ಆಹ್ವಾನ

ಭಾಲ್ಕಿ: ಬಸವಕಲ್ಯಾಣದ ಅನುಭವ ಮಂಟಪದಲ್ಲಿ ನ.28 ಮತ್ತು 29ರಂದು ನಡೆಯಲಿರುವ 47ನೇ ಶರಣ ಕಮ್ಮಟ ಹಾಗೂ ಅನುಭವ ಮಂಟಪ ಉತ್ಸವ–2026ಕ್ಕೆ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿ, ಉತ್ಸವದಲ್ಲಿ ಭಾಗವಹಿಸಬೇಕು ಎಂದು ಪೂಜ್ಯ ಗುರುಬಸವ ಪಟ್ಟದೇವರು ಆಹ್ವಾನಿಸಿದರು.

ತಳವಾಡ ಗ್ರಾಮದ ನೂರಂದಪ್ಪ ಬಾಳೂರೆ ಹಾಗೂ ಹಣಮಂತರಾಯ್ ಬಾಳೂರೆ ಅವರ ತೋಟದಲ್ಲಿ ಬುಧವಾರ ಬಸವಭಕ್ತರನ್ನು ಉತ್ಸವಕ್ಕೆ ಆಹ್ವಾನಿಸಿ ಅವರು ಮಾತನಾಡಿದರು.

ಬಸವಣ್ಣನವರು ಸ್ಥಾಪಿಸಿದ ಅನುಭವ ಮಂಟಪವು ಜಾತಿ, ಧರ್ಮ, ಲಿಂಗ ಹಾಗೂ ವರ್ಗಭೇದವಿಲ್ಲದೆ ಸಮಾನತೆಯನ್ನು ಸಾರಿದ ಮಹತ್ವದ ವೇದಿಕೆಯಾಗಿದೆ. ಶರಣರ ವಚನಗಳು ಸತ್ಯ, ಕರುಣೆ ಮತ್ತು ಅಹಿಂಸೆಯ ತತ್ವಗಳನ್ನು ಸಾರುತ್ತವೆ. ಅನುಭವ ಮಂಟಪದ ವಿಚಾರಧಾರೆ ಇಂದಿಗೂ ಪ್ರಜಾಪ್ರಭುತ್ವ ಹಾಗೂ ಮಾನವ ಹಕ್ಕುಗಳಿಗೆ ಪ್ರೇರಣೆಯಾಗಿದೆ ಎಂದು ಅವರು ತಿಳಿಸಿದರು.

ಅನುಭವ ಮಂಟಪದ ಅಧ್ಯಕ್ಷ ನಾಡೋಜ ಡಾ. ಬಸವಲಿಂಗ ಪಟ್ಟದೇವರ ಸಾನ್ನಿಧ್ಯ ಹಾಗೂ ಮಾರ್ಗದರ್ಶನದಲ್ಲಿ ಈ ಉತ್ಸವ ನಡೆಯಲಿದೆ ಎಂದು ಹೇಳಿದರು.

ಈ ಸಂದರ್ಭದಲ್ಲಿ ನೂರಂದಪ್ಪ ಬಾಳೂರೆ, ಹಣಮಂತರಾಯ್ ಬಾಳೂರೆ, ಮಲ್ಲಿಕಾರ್ಜುನ್ ರಾಚಣ್ಣ, ಸುನೀತಾ ಬಾಳೂರೆ, ವಿಮಲಾಬಾಯಿ ಬಾಳೂರೆ, ಶಿವಕುಮಾರ್ ಕಮಠಾಣೆ, ಗಲಂಗಲೆಪ್ಪ ಬಾಳೂರೆ, ನಾಗಶೆಟ್ಟಿ ಪಾಟೀಲ್ ಹಾಗೂ ಶಿವಪ್ರಕಾಶ್ ಕುಂಬಾರ್ ಸೇರಿದಂತೆ ಬಾಳೂರೆ ಕುಟುಂಬದವರು ಮತ್ತು ತಳವಾಡ ಗ್ರಾಮಸ್ಥರು ಉಪಸ್ಥಿತರಿದ್ದರು.