ಬೀದರ್ | ಅಪರಿಚಿತ ಹೆಣ್ಣು ಮಗುವಿನ ವಾರಸುದಾರರ ಪತ್ತೆಗಾಗಿ ಮನವಿ

ಬೀದರ್ : ನಗರದ ರೈಲ್ವೆ ನಿಲ್ದಾಣದ ವೇದಿಕೆ ಸಂಖ್ಯೆ 2 ರಲ್ಲಿ ಜು.13 ರಂದು ಒಂದೂವರೆ ವರ್ಷದ ಹೆಣ್ಣು ಮಗು ಒಂಟಿಯಾಗಿ ಪತ್ತೆಯಾಗಿದ್ದು, ಈವರೆಗೆ ಮಗುವಿನ ವಾರಸುದಾರರು ಪತ್ತೆಯಾಗಿಲ್ಲ. ಈ ಅಪರಿಚಿತ ಹೆಣ್ಣು ಮಗುವಿನ ವಾರಸುದಾರರು ಪತ್ತೆಯಾದಲ್ಲಿ ಸಂಪರ್ಕಿಸಬೇಕು ಎಂದು ಬೀದರ್ ರೈಲ್ವೆ ಪೊಲೀಸ್ ಠಾಣೆಯ ಸಬ್ ಇನ್ಸಪೇಕ್ಟರ್ ಅವರು ಪತ್ರಿಕಾ ಪ್ರಕಟಣೆ ಮೂಲಕ ಕೋರಿದ್ದಾರೆ.

ಅಪರಿಚಿತ ಹೆಣ್ಣು ಮಗು 2.3 ಅಡಿ ಎತ್ತರ ಇದ್ದು, ಚಿಕ್ಕ ಹಣೆ, ತಲೆಯಲ್ಲಿ ಕಪ್ಪು ಕೂದಲು, ದಪ್ಪ ಮೂಗು, ಗುಂಡು ಮುಖ, ಸಣ್ಣ ಕಿವಿಗಳು, ಗೋದಿ ಮೈಬಣ್ಣ ಇದೆ. ಮೈಮೇಲೆ ಒಂದು ಆಕಾಶ ನೀಲಿ ಬಣ್ಣದ ಬಟ್ಟೆ, ಒಂದು ಬಿಳಿ, ಹಳದಿ ಹಾಗೂ ಹಸಿರು ಬಣ್ಣದ ಚೌಕಡಿ ಗೆರೆಯುಳ್ಳ ಟಿ ಶರ್ಟ್, ಒಂದು ಬಿಳಿ, ಹಳದಿ ಹಾಗೂ ಹಸಿರು ಬಣ್ಣದ ಚೌಕಡಿ ಗೆರೆಯುಳ್ಳ ಹಾಫ್ ಚಡ್ಡಿ ಧರಿಸಲಾಗಿದೆ ಎಂದು ಅವರು ಮಾಹಿತಿ ನೀಡಿದ್ದಾರೆ.

ಬೀದರ್ ರೈಲ್ವೆ ನಿಲ್ದಾಣ ಮಕ್ಕಳ ಸಹಾಯವಾಣಿ ಕೇಂದ್ರದವರ ದೂರಿನನ್ವಯ ಬೀದರ್ ರೈಲ್ವೆ ಪೊಲೀಸ್ ಠಾಣೆಯ ಪ್ರಕರಣ ದಾಖಲಿಸಿ ತನಿಖೆ ಕೈಗೊಳ್ಳಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಈ ಅಪರಿಚಿತ ಹೆಣ್ಣು ಮಗುವಿನ ವಾರಸುದಾರರು ಬಗ್ಗೆ ಯಾರಿಗಾದರೂ ಮಾಹಿತಿ ಸಿಕ್ಕಲ್ಲಿ ಪೊಲೀಸ್ ಉಪ ನಿರೀಕ್ಷಕರು, ಬೀದರ್ ನ ರೈಲ್ವೆ ಪೊಲೀಸ್ ಠಾಣೆ ಅಥವಾ ದೂರವಾಣಿ ಸಂಖ್ಯೆ: 08482-226389, ಮೊಬೈಲ್ ಸಂಖ್ಯೆ: 94808 02133, 74830 95508ಗೆ ಸಂಪರ್ಕಿಸುವಂತೆ ಅವರು ತಿಳಿಸಿದ್ದಾರೆ.