ಬೀದರ್ | ಗೊಂಡ್ ನೌಕರರ ಸಂಘದ ಅದ್ಯಕ್ಷರಾಗಿ ಗಣಪತಿ ಮೇತ್ರೆ ಆಯ್ಕೆ
ಔರಾದ್ : ಗೊಂಡ್ ಸರಕಾರಿ ನೌಕರರ ಸಂಘದ ತಾಲೂಕು ಅಧ್ಯಕ್ಷರಾಗಿ ಜೆಸ್ಕಾಂ ಅಧಿಕಾರಿ ಗಣಪತಿ ಮೇತ್ರೆ ಅವರನ್ನು ಸರ್ವಾನುಮತದಿಂದ ಪುನರಾಯ್ಕೆ ಮಾಡಲಾಯಿತು.
ಪಟ್ಟಣದಲ್ಲಿ ಶನಿವಾರ ಜಿಲ್ಲಾಧ್ಯಕ್ಷ ನಿರಂಜಪ್ಪ ಪಾತ್ರೆ ಅವರ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ ಸರ್ವಾನುಮತದಿಂದ ಗಣಪತಿ ಅವರನ್ನು ಆಯ್ಕೆ ಮಾಡಲಾಯಿತು.
ಈ ವೇಳೆ ಸಂಘದ ಜಿಲ್ಲಾಧ್ಯಕ್ಷ ನಿರಂಜಪ್ಪ ಪಾತ್ರೆ ಅವರು ಮಾತನಾಡಿ, ತಾಲೂಕು ಸಂಘ ಎನ್ನುವುದು ನಮ್ಮ ಜಿಲ್ಲಾ ಸಂಘಟನೆಯ ಭದ್ರ ಬುನಾದಿಯಾಗಿದೆ. ಬೇರು ಗಟ್ಟಿಯಾಗಿದ್ದರೆ ಮಾತ್ರ ಮರ ಬಲಿಷ್ಠವಾಗಿರಲು ಸಾಧ್ಯ. ತಾಲೂಕಿನ ಎಲ್ಲಾ ನೌಕರರು ಗಣಪತಿ ಮೇತ್ರೆ ಅವರ ಮೇಲೆ ಅಪಾರ ನಂಬಿಕೆ ಇಟ್ಟು ಈ ಜವಾಬ್ದಾರಿಯನ್ನು ನೀಡಿದ್ದಾರೆ. ಅಧಿಕಾರ ಎನ್ನುವುದು ಕೇವಲ ಸ್ಥಾನವಲ್ಲ, ಅದು ನೌಕರರ ಹಿತರಕ್ಷಣೆಗಾಗಿ ನಮಗೆ ಸಿಕ್ಕಿರುವ ದೊಡ್ಡ ಜವಾಬ್ದಾರಿಯಾಗಿದೆ. ಸಂಘಟನೆಯಲ್ಲಿ ಪ್ರತಿಯೊಬ್ಬರನ್ನೂ ಒಳಗೊಳ್ಳಿ. ಯಾರನ್ನೂ ದೂರ ಇಡಬೇಡಿ. ಎಲ್ಲ ಇಲಾಖೆಗಳ ನೌಕರರನ್ನು ಒಟ್ಟಾಗಿ ಕರೆದೊಯ್ಯಿರಿ. ನಿಮ್ಮ ಇಡೀ ತಂಡಕ್ಕೆ ಜಿಲ್ಲಾ ಸಂಘದ ಸಂಪೂರ್ಣ ಬೆಂಬಲ ಯಾವಾಗಲೂ ಇರುತ್ತದೆ. ತಾಲ್ಲೂಕಿನಲ್ಲಿ ಸಂಘಟನೆಯನ್ನು ಮತ್ತಷ್ಟು ಬಲಪಡಿಸಿ ಎಂದು ಸಲಹೆ ನೀಡಿದರು.
ನೂತನವಾಗಿ ಆಯ್ಕೆಯಾದ ಅಧ್ಯಕ್ಷ ಗಣಪತಿ ಮೇತ್ರೆ ಅವರು ಮಾತನಾಡಿ, ಸಂಘವು ಮುಂಬರುವ ದಿನಗಳಲ್ಲಿ ಎಲ್ಲಾ ಇಲಾಖೆಗಳ ನೌಕರರನ್ನು ಒಗ್ಗಟ್ಟಾಗಿ ಕರೆದೊಯ್ಯುವ ಮೂಲಕ ತಾಲೂಕು ಸಂಘವನ್ನು ಮತ್ತಷ್ಟು ಬಲಪಡಿಸಲಾಗುವುದು ಎಂದು ತಿಳಿಸಿದರು.
ಈ ಸಂದರ್ಭದಲ್ಲಿ ಸಂಘದ ಹಿರಿಯರಾದ ಪ್ರೇಮಶೇಖರ್ ನಾಗಮೂರ್ತಿ, ಸಹ ಕಾರ್ಯದರ್ಶಿ ಶಿವಕುಮಾರ್‌ ಕುಪ್ಪೆ, ದಿಗಂಬರ್ ಮೇತ್ರೆ, ಪ್ರಭು ಬಾಳೂರೆ, ಬಂಡೆಪ್ಪ ಕೋಟೆ, ಸಂಜಯ್‌ ಮೇತ್ರೆ, ಬಾಲಾಜಿ ಚಂದಾಪೂರೆ, ಸಂದೀಪ್‌ ಮೇತ್ರೆ, ಹಣಮಂತ್‌ ಮೇತ್ರೆ, ಸೂರ್ಯಕಾಂತ್‌ ದೇವಗೊಂಡ್, ರಾಮಗೊಂಡ್ ನಾಗನಪಲ್ಲಿ, ಬಾಲಾಜಿ ಅಮರವಾಡಿ ಹಾಗೂ ದತ್ತು ಬೋರಾಳ್‌ ಸೇರಿದಂತೆ ಇನ್ನಿತರರಿದ್ದರು.
