ಬೀದರ್ | ಮಾತೆ ಮಹಾದೇವಿ ಅವರ ಸ್ಮರಣೋತ್ಸವ ಪಕ್ಷಾತೀತವಾಗಿ ಆಚರಿಸೋಣ : ಡಾ.ಶೈಲೇಂದ್ರ ಬೆಲ್ದಾಳೆ

ಬೀದರ್ : ಬಸವ ತತ್ವಕ್ಕಾಗಿ ತಮ್ಮ ಇಡೀ ಜೀವನ ಮುಡಿಪಾಗಿಟ್ಟು, ಕರ್ನಾಟಕ ಸೇರಿದಂತೆ ನೆರೆಯ ತೆಲಂಗಾಣ, ಮಹಾರಾಷ್ಟ್ರ, ತಮಿಳುನಾಡು ಹಾಗೂ ದೆಹಲಿಯಲ್ಲಿ ಬಸವ ತತ್ವದ ಕೀರ್ತಿ ಪತಾಕೆ ಹಾರಿಸಿದ ಮಾತೆ ಮಹಾದೇವಿ ಅವರ ಸ್ಮರಣೋತ್ಸವ ಪಕ್ಷಾತೀತವಾಗಿ ಹಾಗೂ ಜಾತಿ, ಮತ, ಪಂಥ ಭೇದವಿಲ್ಲದೆ ಅದ್ಧೂರಿಯಾಗಿ ಆಚರಿಸೋಣ ಎಂದು ಶಾಸಕ ಡಾ. ಶೈಲೇಂದ್ರ ಬೆಲ್ದಾಳೆ ತಿಳಿಸಿದರು.

ಭಾನುವಾರ ನಗರದ ಬಸವ ಮಂಟಪದಲ್ಲಿ ಆಯೋಜಿಸಿದ ವಿವಿಧ ಪದಾಧಿಕಾರಿಗಳ ಸನ್ಮಾನ ಸಭೆಯಲ್ಲಿ ರಾಷ್ಟ್ರೀಯ ಬಸವ ದಳ, ಲಿಂಗಾಯತ ಧರ್ಮ ಮಹಾಸಭಾ, ಕ್ರಾಂತಿ ಗಂಗೋತ್ರಿ ಅಕ್ಕನಾಗಲಾಂಬಿಕಾ ಮಹಿಳಾ ಗಣದ ವತಿಯಿಂದ ಮಾ.22 ಮತ್ತು 23ರಂದು ನಗರದಲ್ಲಿ ಜರುಗಲಿರುವ ಮಹಾ ದಂಡನಾಯಕರ ಸ್ಮರಣೋತ್ಸವ ಕಾರ್ಯಕ್ರಮದ ಬಗ್ಗೆ ಅವರು ಮಾತನಾಡಿದರು.

ವಿಶ್ವ ಶಾಂತಿಗಾಗಿ ಬಸವ ತತ್ವ ಅತ್ಯವಶ್ಯಕ ಎಂದು ಮನಗಂಡ ಮಾತೆ ಮಹಾದೇವಿ ಅವರು ಐವತ್ತು ವರ್ಷಗಳ ಹಿಂದೆಯೇ ಲಿಂಗಾನಂದ ಸ್ವಾಮಿಗಳಿಂದ ಪ್ರೇರೇಪಿತರಾಗಿ ಬಸವ ತತ್ವ ಮನೆಮನಗಳಿಗೆ ತಲುಪಿಸಿದರು. ಬಸವ ಕಲ್ಯಾಣದಲ್ಲಿ 108 ಅಡಿ ಬಸವ ಪುತ್ಥಳಿ ಸ್ಥಾಪಿಸಿ ದೇಶ ವಿದೇಶಗಳ ಜನರು ಕಲ್ಯಾಣದ ಕಡೆಗೆ ಮುಖ ಮಾಡುವಂತೆ ಮಾಡಿದ್ದಾರೆ. ಕೂಡಲ ಸಂಗಮಕ್ಕೆ ಪಾದಾರ್ಪಣೆ ಮಾಡಿ ಶರಣ ಮೇಳ ಆರಂಭಿಸಿ ಲಕ್ಷಾಂತರ ಜನರಿಗೆ ಸಜ್ಜನರಾಗಿ ನಿರ್ಮಿಸಿದ್ದಾರೆ. ಅವರ ಗರಡಿಯಲ್ಲಿ ಪಳಗಿದ ಪೂಜ್ಯರು ಹಾಗೂ ದಳದ ಮುಖಂಡರು ಅವರ ಸಾಧನೆಗಳನ್ನು ಉಳಿಸಿ ಬೆಳೆಸಲು ಸ್ಮರಣೋತ್ಸವ ಮಾಡುತ್ತಿರುವುದು ಶ್ಲಾಘನೀಯ ಕಾರ್ಯವಾಗಿದೆ. ಈ ಕಾರ್ಯಕ್ಕೆ ನಮ್ಮ ಸಂಪೂರ್ಣ ಸಹಕಾರವಿರುತ್ತದೆ ಎಂದು ತಿಳಿಸಿದರು.

ರಾಷ್ಟ್ರೀಯ ಬಸವ ದಳದ ಕೇಂದ್ರ ಸಮಿತಿ ಅಧ್ಯಕ್ಷ ಪೂಜ್ಯ ಜಗದ್ಗುರು ಡಾ.ಚನ್ನಬಸವಾನಂದ ಸ್ವಾಮೀಜಿ ಮಾತನಾಡಿ, ದೇಶ ವಿದೇಶಗಳಲ್ಲಿ ಬಸವ ತತ್ವದ ಪ್ರಚಾರ ಮಾಡಿದ ಬಸವ ಧರ್ಮ ಪೀಠದ ಪರಮೋಚ್ಚ ಪೀಠಾಧ್ಯಕ್ಷರಾದ ಮಾತೆ ಮಹಾದೇವಿಯವರು ತಮ್ಮ ವೈಯಕ್ತಿಕ ಹಿತಾಸಕ್ತಿಗಾಗಿ ದುಡಿಯದೆ ಸಮಷ್ಟಿ ಹಾಗೂ ಬಸವಾದಿ ಶರಣರ ವಚನ ಸಾಹಿತ್ಯಕ್ಕಾಗಿ ಶ್ರಮಿಸಿದರು. ಅವರ ಸಾಧನೆಯನ್ನು ಸಮಾಜಕ್ಕೆ ತಿಳಿಸಲು ಮಹಾದಂಡನಾಯಕರ ಸ್ಮರಣೋತ್ಸವ ಕಾರ್ಯಕ್ರಮ ಆಯೋಜಿಸಲಾಗಿದೆ. ಈ ಕಾರ್ಯಕ್ರಮಕ್ಕೆ ಕರ್ನಾಟಕ, ಮಹಾರಾಷ್ಟ್ರ ಹಾಗೂ ತೆಲಂಗಾಣ ಸೇರಿದಂತೆ ಹಲವು ರಾಜ್ಯಗಳಿಂದ ಸಾವಿರಾರು ಜನ ಪಾಲ್ಗೊಳ್ಳುತ್ತಿದ್ದಾರೆ. ಬರುವ ಭಕ್ತರಿಗಾಗಿ ವಸತಿ ಪ್ರಸಾದ ವ್ಯವಸ್ಥೆ ಮಾಡಲಾಗುತ್ತಿದೆ ಎಂದು ಹೇಳಿದರು.

ಈ ಸಂದರ್ಭದಲ್ಲಿ ಬಸವ ಮಂಟಪದ ಪೂಜ್ಯ ಮಾತೆ ಸತ್ಯಾದೇವಿ, ಸ್ವಾಗತ ಸಮಿತಿ ಕಾರ್ಯಾಧ್ಯಕ್ಷ ಶ್ರೀಕಾಂತ್ ಸ್ವಾಮಿ, ದಾಸೋಹ ಸಮಿತಿ ಅಧ್ಯಕ್ಷ ಮಲ್ಲಿಕಾರ್ಜುನ್ ಜೈಲರ್, ಧರ್ಮೇಂದ್ರ ಪೂಜಾರಿ, ಶಿವಶರಣಪ್ಪ ಪಾಟೀಲ್, ಬಸವಂತರಾವ್ ಬಿರಾದಾರ್, ಮುಖಂಡರಾದ ಕಾಶಿನಾಥ್ ಸೂರ್ಯವಂಶಿ, ಬಸವರಾಜ್, ಮಲ್ಲಿಕಾರ್ಜುನ್, ಮನ್ಮಥಯ್ಯ ಸ್ವಾಮಿ, ವಿಶ್ವನಾಥ್ ಪಾಟೀಲ್, ಶಾಂತಪ್ಪ ಮುಗಳಿ, ಗಣಪತಿ ಬಿರಾದಾರ್, ಮಹಾರುದ್ರ ಡಾಕುಳಗೆ, ಸಿದ್ಧವೀರ್ ಸಂಗಮದ, ಭೀಮಣ್ಣ, ಶಾಂತವೀರ್ ಹಾಗೂ ಶ್ರೀನಾಥ್ ಕೋರೆ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.