ಹವಾಮಾನ ವೈಪರಿತ್ಯ : ರೈತರು ಸೂಕ್ತ ತಂತ್ರಜ್ಞಾನ ಅಳವಡಿಸಿಕೊಳ್ಳಲು ಕೃಷಿ ವಿಜ್ಞಾನ ಕೇಂದ್ರ ಸಲಹೆ
ಬೀದರ್ : ಪ್ರಸ್ತುತ ದಿನಗಳಲ್ಲಿ ಹವಾಮಾನ ವೈಪರೀತ್ಯ, ಮಳೆಯ ಅಭಾವ ಮತ್ತು ಬಿತ್ತನೆ ಸಮಯದಲ್ಲಿ ಮಣ್ಣಿನಲ್ಲಿ ತೇವಾಂಶದ ಕೊರತೆ ಎದುರಾಗುತ್ತಿದ್ದು, ಇದು ಕೃಷಿ ವಲಯದಲ್ಲಿ ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಇಂತಹ ಕಠಿಣ ಪರಿಸ್ಥಿತಿಯಲ್ಲಿ ಬೆಳೆಗಳು ಆರೋಗ್ಯವಾಗಿ ಬೆಳೆಯಲು ರೈತರು ಸೂಕ್ತ ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳಬೇಕಾಗಿದೆ. ಬೀಜೋಪಚಾರ ಮತ್ತು ಬೀಜ ಕಠಿಣಗೊಳಿಸುವಿಕೆ ಅತ್ಯಂತ ಸರಳ ಹಾಗೂ ಕಡಿಮೆ ವೆಚ್ಚದ ತಂತ್ರಜ್ಞಾನವಾಗಿದ್ದು, ಜಿಲ್ಲೆಯ ಪ್ರಮುಖ ಬೆಳೆಗಳಾದ ಹೆಸರು, ಉದ್ದು ಮತ್ತು ತೊಗರಿ ಬೆಳೆಯುವ ರೈತರಿಗೆ ಈ ಪದ್ಧತಿ ವರದಾನವಾಗಬಹುದು ಎಂದು ಬೀದರ್ನ ಕೃಷಿ ವಿಜ್ಞಾನ ಕೇಂದ್ರದ ಹಿರಿಯ ವಿಜ್ಞಾನಿ ಡಾ. ರಾಜಶೇಖರ್ ಬಸನಾಯಕ ಅವರು ರೈತರಿಗೆ ಸಲಹೆ ನೀಡಿದ್ದಾರೆ.
ಬೀಜ ಕಠಿಣಗೊಳಿಸುವಿಕೆ ಹಾಗೂ ಬೀಜೋಪಚಾರದ ಹಂತಗಳು : ಬೀಜಗಳನ್ನು ಬಿತ್ತನೆ ಮಾಡುವ ಮುನ್ನ ನಿರ್ದಿಷ್ಟ ಪ್ರಮಾಣದ ರಾಸಾಯನಿಕ ಅಥವಾ ಪೋಷಕಾಂಶಗಳ ದ್ರಾವಣದಲ್ಲಿ ನಿಗದಿತ ಅವಧಿಯವರೆಗೆ ನೆನೆಸಿಟ್ಟು, ನಂತರ ನೆರಳಿನಲ್ಲಿ ಒಣಗಿಸಿ ಬಿತ್ತನೆ ಮಾಡುವ ಪ್ರಕ್ರಿಯೆಗೆ ಬೀಜ ಕಠಿಣಗೊಳಿಸುವಿಕೆ ಎನ್ನಲಾಗುತ್ತದೆ.
ದ್ರಾವಣದ ತಯಾರಿ : ಮೊದಲಿಗೆ ಶೇ.2 ರಷ್ಟು ಕ್ಯಾಲ್ಸಿಯಂ ಕ್ಲೋರೈಡ್ ದ್ರಾವಣವನ್ನು ಸಿದ್ಧಪಡಿಸಿಕೊಳ್ಳಬೇಕು. (ಅಂದರೆ 1 ಲೀಟರ್ ನೀರಿಗೆ 20 ಗ್ರಾಂ ಕ್ಯಾಲ್ಸಿಯಂ ಕ್ಲೋರೈಡ್ ಪುಡಿಯನ್ನು ಬೆರೆಸಬೇಕು). ಸಿದ್ಧಪಡಿಸಿದ ದ್ರಾವಣದಲ್ಲಿ ಬೀಜಗಳನ್ನು ಅವುಗಳ ತಳಿಗೆ ಅನುಗುಣವಾಗಿ 30 ನಿಮಿಷಗಳಿಂದ 1 ಗಂಟೆವರೆಗೆ ನೆನೆಸಬೇಕು. ನೆನೆಸಿದ ಬೀಜಗಳನ್ನು ದ್ರಾವಣದಿಂದ ಹೊರ ತೆಗೆದು, ಸ್ವಚ್ಛವಾದ ಚೀಲ ಅಥವಾ ಪೇಪರ್ ಮೇಲೆ ಹರಡಿ ನೆರಳಿನಲ್ಲಿ 6 ಗಂಟೆಗಳ ಕಾಲ ಚೆನ್ನಾಗಿ ಒಣಗಿಸಬೇಕು.
ಬೀಜಗಳು ಸಂಪೂರ್ಣವಾಗಿ ಒಣಗಿದ ನಂತರ ಅವುಗಳಿಗೆ ರೋಗ ನಿರೋಧಕ ಶಕ್ತಿ ಮತ್ತು ಪೋಷಕಾಂಶಗಳ ವೃದ್ಧಿಗಾಗಿ ಜೈವಿಕ ಬೀಜೋಪಚಾರ ಮಾಡುವುದು ಅತ್ಯಗತ್ಯವಾಗಿದೆ. ಮೊದಲಿಗೆ, ಬೇರುಕೊಳೆ ಹಾಗೂ ಸೊರಗು ರೋಗಗಳಂತಹ ಶಿಲೀಂಧ್ರ ಬಾಧೆಯನ್ನು ತಡೆಗಟ್ಟಲು ಜೈವಿಕ ಶಿಲೀಂಧ್ರನಾಶಕವಾದ ಟ್ರೈಕೋಡರ್ಮಾ ವಿರುಡಿಯನ್ನು (ಒಂದು ಕೆಜಿ ಬೀಜಕ್ಕೆ 10 ಗ್ರಾಂ) ಒಣ ರೂಪದಲ್ಲಿ ಹಗುರವಾಗಿ ಬೆರೆಸಬೇಕು. ಇದರ ಬೆನ್ನಲ್ಲೇ ಮಣ್ಣಿನಲ್ಲಿರುವ ರಂಜಕವನ್ನು ಕರಗಿಸಿ ಗಿಡಕ್ಕೆ ಒದಗಿಸಲು ಪಿಎಸ್ಬಿ ಮತ್ತು ಕಲ್ಚರ್ಗಳನ್ನು (ಐದು ಕೆಜಿ ಬೀಜಕ್ಕೆ ತಲಾ 200 ಗ್ರಾಂ) ಬಳಸಬೇಕು ಎಂದು ಅವರು ಹೇಳಿದ್ದಾರೆ.
ಈ ಜೈವಿಕ ಗೊಬ್ಬರಗಳು ಬೀಜಕ್ಕೆ ಚೆನ್ನಾಗಿ ಅಂಟಿಕೊಳ್ಳುವ ಮೊದಲು ಸ್ವಲ್ಪ ಬೆಲ್ಲದ ದ್ರಾವಣ ಸಿದ್ಧಪಡಿಸಿಕೊಳ್ಳಬೇಕು. (ಬೆಲ್ಲದ ದ್ರಾವಣವನ್ನು ತಣ್ಣಗಾದ ನಂತರವೇ ಬಳಸಬೇಕು) ರೈಜೋಬಿಯಂ ಮತ್ತು ಪಿಎಸ್ಬಿ ಪುಡಿಯನ್ನು ಮಿಶ್ರಣ ಮಾಡಿ, ಈಗಾಗಲೇ ಟ್ರೈಕೋಡರ್ಮಾ ಹಚ್ಚಿದ ಬೀಜಗಳ ಮೇಲೆ ಚಿಮುಕಿಸಿ ಸಿಪ್ಪೆಗೆ ಹಾನಿಯಾಗದಂತೆ ನಯವಾಗಿ ಕೈಯಿಂದ ಸವರಬೇಕು. ನಂತರ ಬೀಜಗಳನ್ನು 4ರಿಂದ5 ಗಂಟೆಗಳ ಕಾಲ ನೆರಳಿನಲ್ಲಿ ಒಣಗಿಸಿ ಬಿತ್ತನೆ ಮಾಡಬೇಕು ಎಂದು ಅವರು ಸಲಹೆ ನೀಡಿದ್ದಾರೆ.
