ಬ್ರಿಮ್ಸ್ ಗೆ ರಾಜ್ಯ ಮಹಿಳಾ ಆಯೋಗದ ಅಧ್ಯಕ್ಷೆ ಡಾ.ನಾಗಲಕ್ಷ್ಮೀ ಚೌಧರಿ ಭೇಟಿ, ಪರಿಶೀಲನೆ

ಬೀದರ್ : ರಾಜ್ಯ ಮಹಿಳಾ ಆಯೋಗದ ಅಧ್ಯಕ್ಷೆ ಡಾ.ನಾಗಲಕ್ಷ್ಮೀ ಚೌಧರಿ ಅವರು ನಗರದ ಬ್ರಿಮ್ಸ್ ಆಸ್ಪತ್ರೆಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ಇಂದು ನಗರದ ಜಿಲ್ಲಾ ಆಸ್ಪತ್ರೆಗೆ ಭೇಟಿ ನೀಡಿದ ಅವರು, ಆಸ್ಪತ್ರೆಯ ಎಲ್ಲ ವಾರ್ಡ್ ಗಳಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಆಸ್ಪತ್ರೆಯಲ್ಲಿನ ಕೆಲ ಮೂಲಭೂತ ಸೌಕರ್ಯಗಳ ಕೊರತೆಯಿಂದ ಸಿಟ್ಟಾದ ಅವರು, ಅದರ ಬಗ್ಗೆ ಅಧಿಕಾರಿಗಳಿಗೆ ತರಾಟೆಗೆ ತೆಗೆದುಕೊಂಡರು.

ಆಸ್ಪತ್ರೆಯ ಮೇಲಿನ ಮಹಡಿಯಲ್ಲಿ ಕುಡಿಯುವ ನೀರಿನ ವ್ಯವಸ್ಥೆ ಇಲ್ಲ. ಶೌಚಾಲಯದಲ್ಲಿ ಮಲ, ಮೂತ್ರ ಹೊರಗಡೆ ಬಂದು ಗಬ್ಬೆಂದು ನಾರುತ್ತಿದೆ. ಇದರಲ್ಲಿ ರೋಗಿಗಳಿಗೆ ಹೇಗೆ ಮಲಗಿಸಲು ಸಾಧ್ಯ ಎಂದು ಕಳವಳ ವ್ಯಕ್ತಪಡಿಸಿ, ಆದಷ್ಟು ಬೇಗ ಶೌಚಾಲಯದ ಸಮಸ್ಯೆಯನ್ನು ಶಾಶ್ವತವಾಗಿ ಪರಿಹಾರ ಮಾಡಬೇಕು ಎಂದು ಸ್ಥಳದಲ್ಲಿಯೇ ಇದ್ದ ಜಿಲ್ಲಾಧಿಕಾರಿ ಶಿಲ್ಪಾ ಶರ್ಮಾ ಅವರಿಗೆ ಸೂಚಿಸಿದರು.

ಸರಕಾರ ಆಸ್ಪತ್ರೆಗೆ ಎಂದು ಸಾವಿರಾರು ಕೋಟಿ ರೂ. ವಿನಿಮಯ ಮಾಡುತ್ತದೆ. ಆದರೆ ಅದರ ಉಪಯೋಗ ಚೆನ್ನಾಗಿ ಮಾಡಿಕೊಳ್ಳಬೇಕು. ಇಲ್ಲಿ ಆ ಕೆಲಸ ಆಗುತ್ತಿಲ್ಲ. ಅದು ಇಲ್ಲಿನವರು ಮಾಡಬೇಕಿದೆ. ಸರಕಾರ ದುಡ್ಡು ಎಲ್ಲ ತೆಗೆದುಕೊಂಡಿದ್ದಾರೆ ಆದರೆ ಅದರ ಉಪಯೋಗ ನನಗೆ ಕಾಣಲಿಲ್ಲ ಎಂದು ಆಕ್ರೋಶವ್ಯಕ್ತಪಡಿಸಿ, ಇದಕ್ಕೆಲ್ಲ ಕಾರಣ ಯಾರು ಇದ್ದಾರೆ ಎಂಬುವ ವರದಿ ನನಗೆ ನೀಡಬೇಕು ಎಂದು ಹೇಳಿದರು.

ತಾಯಿ ಮಗುವಿನ ಕೊಠಡಿಗೆ ಹೋದಾಗ ಇಬ್ಬರು ತಾಯಂದಿರು ಕಣ್ಣೀರು ಹಾಕುತ್ತಾ, ಮಗುವನ್ನು ಎತ್ತಿಕೊಂಡು ಬಂದು ಹೆರಿಗೆ ಸಮಯದಲ್ಲಿಯೇ ತಮ್ಮ ಮಕ್ಕಳ ಕಾಲು ಮುರಿದ ಬಗ್ಗೆ ತಿಳಿಸಿದರು. ಹಾಗೆ ಮಾಡಿದವರನ್ನು ತೆಗೆದು ಹಾಕಿದ್ದೇವೆ ಎಂದು ಆಸ್ಪತ್ರೆ ಸಿಬ್ಬಂದಿ ಹೇಳುತ್ತಿದ್ದಾರೆ. ಆದರೆ ಇಂತಹ ಘಟನೆಗಳು ಮಾಡಿದವರಿಗೆ ಕ್ಷಮೆ ಇಲ್ಲ. ಈ ಘಟನೆ ನಂತರ ಕೂಡ ಅವರಿಗೆ ಸರಿಯಾಗಿ ಚಿಕಿತ್ಸೆ ನೀಡದೆ ಇರುವುದು ನನಗೆ ತುಂಬಾ ನೋವು ತಂದಿತ್ತು ಎಂದು ಬೇಸರ ವ್ಯಕ್ತಪಡಿಸಿದರು.

ಈ ಸಂದರ್ಭದಲ್ಲಿ ಜಿಲ್ಲಾಧಿಕಾರಿ ಶಿಲ್ಪಾ ಶರ್ಮಾ, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಪ್ರದೀಪ್ ಗುಂಟಿ, ಬ್ರಿಮ್ಸ್ ನಿರ್ದೇಶಕ ಡಾ.ಶಿವುಕುಮಾರ್ ಶೆಟಕಾರ್, ಬ್ರಿಮ್ಸ್ ಡೀನ್ ಶಾಂತಲಾ ಕೌಜಲ್ಗಿ ಸೇರಿದಂತೆ ಇತರೆ ಅಧಿಕಾರಿಗಳು ಉಪಸ್ಥಿತರಿದ್ದರು.