ಹುಲಸೂರು | ಅಳವಾಯಿ ಗ್ರಾಮದಲ್ಲಿ ಬಾವಿಗೆ ಬಿದ್ದ ಕೃಷ್ಣಮೃಗದ ರಕ್ಷಣೆ

ಹುಲಸೂರು: ಅಳವಾಯಿ ಗ್ರಾಮದ ಪ್ರತೀಕ ಮಧುಕರ್ ಗಂದಗೆ ಅವರ ಹೊಲದಲ್ಲಿರುವ ತೆರೆದ ಬಾವಿಗೆ ಬಿದ್ದಿದ್ದ ಕೃಷ್ಣಮೃಗವನ್ನು ಭಾಲ್ಕಿ ಅಗ್ನಿಶಾಮಕ ದಳದ ಸಿಬ್ಬಂದಿ ರವಿವಾರ ಮಧ್ಯಾಹ್ನ ಸುರಕ್ಷಿತವಾಗಿ ರಕ್ಷಿಸಿದರು.

ಸಮೀಪದ ಅರಣ್ಯ ಪ್ರದೇಶದಿಂದ ಬಂದಿದ್ದ ಕೃಷ್ಣಮೃಗ ಸುಮಾರು 40 ಅಡಿ ಆಳದ ಬಾವಿಗೆ ಬಿದ್ದಿತ್ತು. ಬಾವಿಯಲ್ಲಿ ಸುಮಾರು ಎರಡು ಅಡಿಯಷ್ಟು ನೀರಿತ್ತು. ಇದನ್ನು ಗಮನಿಸಿದ ರಾಜಕುಮಾರ್ ಗಂದಗೆ ಅವರು ತಕ್ಷಣ ಸಂಬಂಧಪಟ್ಟ ಅಧಿಕಾರಿಗಳಿಗೆ ಮಾಹಿತಿ ನೀಡಿದರು.

ಸ್ಥಳಕ್ಕೆ ಆಗಮಿಸಿದ ಭಾಲ್ಕಿ ಅಗ್ನಿಶಾಮಕ ಠಾಣೆಯ ಸಹಾಯಕ ಅಗ್ನಿಶಾಮಕ ಅಧಿಕಾರಿ ಅಶೋಕ್ ಹಾಗೂ ವಲಯ ಅರಣ್ಯಾಧಿಕಾರಿ (ಆರ್‌ಎಫ್‌ಒ) ಶಾಂತಕುಮಾರ್ ಅವರ ನೇತೃತ್ವದಲ್ಲಿ ಕಾರ್ಯಾಚರಣೆ ನಡೆಸಿ ಕೃಷ್ಣಮೃಗವನ್ನು ಸುರಕ್ಷಿತವಾಗಿ ಮೇಲಕ್ಕೆತ್ತಲಾಯಿತು.

ಕಾರ್ಯಾಚರಣೆಯಲ್ಲಿ ಅಗ್ನಿಶಾಮಕ ಸಿಬ್ಬಂದಿಗಳಾದ ವಿಷ್ಣುಕುಮಾರ್, ದೀಪಕ್, ರಾಜು ಚವ್ಹಾಣ, ಹನುಮೇಶ್ ಹಾಗೂ ಶ್ರೀಧರ್ ಪಾಲ್ಗೊಂಡಿದ್ದರು. ಈ ಸಂದರ್ಭದಲ್ಲಿ ಶಿವಶಂಕರ್ ಗಂದಗೆ, ಪರಮೇಶ್ವರ್ ಗಂದಗೆ, ಸೌದಾಗರ್ ಗಾಜರೆ, ಧನರಾಜ್ ಗಂದಗೆ, ಸೋಮನಾಥ್ ಗಂದಗೆ ಹಾಗೂ ಮಾಧವ್ ಮಾನೆ ಉಪಸ್ಥಿತರಿದ್ದರು.