ಹುಮನಾಬಾದ್ | ಮಕ್ಕಳ ದಿನಾಚರಣೆ: ಅಲೆಮಾರಿ ಮಕ್ಕಳಿಗೆ ವಕೀಲರ ತಂಡದಿಂದ ಬಟ್ಟೆ ವಿತರಣೆ

ಹುಮನಾಬಾದ್: ಮಕ್ಕಳ ದಿನಾಚರಣೆಯ ಅಂಗವಾಗಿ ಹುಮನಾಬಾದ್ ಪಟ್ಟಣದ ಅಲೆಮಾರಿ ಜನಾಂಗದ ಮಕ್ಕಳಿಗೆ ವಕೀಲರ ತಂಡದ ವತಿಯಿಂದ ಬಟ್ಟೆ ವಿತರಿಸಿ, ಸಿಹಿ ಹಂಚಲಾಯಿತು.

ಶಿಕ್ಷಣದಿಂದ ವಂಚಿತರಾಗಿ ಬಡತನದಲ್ಲಿ ಜೀವನ ಸಾಗಿಸುತ್ತಿರುವ ಅಲೆಮಾರಿ ಮಕ್ಕಳನ್ನು ಗುರುತಿಸಿ, ವೈಯಕ್ತಿಕವಾಗಿ ಬಟ್ಟೆ ವಿತರಣೆ ಮಾಡುತ್ತಿರುವುದಾಗಿ ವಕೀಲ ವಿಜಯಕುಮಾರ್ ನಾತೆ ತಿಳಿಸಿದರು.

ಈ ಮಕ್ಕಳು ಶಿಕ್ಷಣದಿಂದ ವಂಚಿತರಾಗಬಾರದು. ಜಿಲ್ಲಾ ಮಕ್ಕಳ ರಕ್ಷಣಾ ಘಟಕದ ಅಧಿಕಾರಿಗಳು ಇಂತಹ ಮಕ್ಕಳನ್ನು ಗುರುತಿಸಿ ಉಚಿತ ಶಿಕ್ಷಣ, ಆಧಾರ್ ಕಾರ್ಡ್ ಸೇರಿದಂತೆ ವಿವಿಧ ಸರ್ಕಾರಿ ಸೌಲಭ್ಯಗಳನ್ನು ಕಲ್ಪಿಸಬೇಕು. ಬಟ್ಟೆ ನೀಡಿದರೆ ಎರಡು ತಿಂಗಳಲ್ಲಿ ಹರಿದುಹೋಗಬಹುದು. ಆದರೆ ಮಕ್ಕಳಿಗೆ ಶಾಶ್ವತವಾಗಿ ಉಳಿಯುವಂತಹ ಶಿಕ್ಷಣ ನೀಡುವ ಕೆಲಸವಾಗಬೇಕು ಎಂದು ಮನವಿ ಮಾಡಿದರು.

ಬಟ್ಟೆಯಿಲ್ಲದೆ ಸಂಕಷ್ಟದಲ್ಲಿರುವ ಮಕ್ಕಳಿಗೆ ನೆರವಾಗುವುದರ ಜೊತೆಗೆ, ಇಡೀ ತಾಲೂಕು ಹಾಗೂ ಜಿಲ್ಲೆಯಲ್ಲಿ ಇಂತಹ ಮಕ್ಕಳನ್ನು ಗುರುತಿಸಿ ಎಲ್ಲರೂ ಅವರ ಪೋಷಣೆ ಮತ್ತು ಶಿಕ್ಷಣಕ್ಕೆ ಸಹಕಾರ ನೀಡಬೇಕು ಎಂದು ಕರೆ ನೀಡಿದರು.

ಈ ಸಂದರ್ಭದಲ್ಲಿ ಪ್ರಭಾಕರ್ ನಾಗರಾಳೆ, ಅಶೋಕ್ ವರ್ಮಾ, ಮಂಜುನಾಥ್ ಮರುರ್ಕರ್, ಕೃಷ್ಣ ಮುಗುಳಿ, ಪ್ರಕಾಶ್ ನಾಗರಕಟ್ಟೆ, ಸಿದ್ದಲಿಂಗಯ್ಯ ಸ್ವಾಮಿ, ದೈವಾನ್ ಸ್ವಾಮಿ, ಈಶ್ವರ್ ಕಾಂಬಳೆ ಹಾಗೂ ಆದಮ ಪಟೇಲ್ ಓತಗಿ ಸೇರಿದಂತೆ ಇತರರು ಉಪಸ್ಥಿತರಿದ್ದರು.