‘‘ವಿಭಿನ್ನ ಪಾತ್ರಗಳ ನಟನೆಗೆ ನಾನು ಸದಾ ಸಿದ್ಧ’’-ಇಳಾ ವಿಟ್ಲ

ದಶಕದ ಹಿಂದೆ ಕಿರುತೆರೆಯಲ್ಲಿ ಜನಪ್ರಿಯ ಖಳನಟಿ. ಈಗ ನೋಡಿದರೆ ‘ಪ್ರೇಮದ ಊರಲಿ’ ಚಿತ್ರದಲ್ಲಿ ಪ್ರೀತಿ ಜೊತೆ ನೀತಿ ಕಥೆ ಹೇಳುವ ಅಜ್ಜಿ! ಮಾಡುವ ಪ್ರತೀ ಪಾತ್ರದಲ್ಲೂ ವಿಭಿನ್ನತೆಗಾಗಿ ಶ್ರಮಿಸುವವರು ಇಳಾ ವಿಟ್ಲ. ಸ್ವತಃ ನಿರ್ಮಿಸುತ್ತಿರುವ ಚಿತ್ರದಲ್ಲಿ ಬೋಲ್ಡ್ ನಾಯಕಿ. ಆದರೆ ಪ್ರಯೋಗ ಎಂದು ಬಂದರೆ ಯಾವುದನ್ನೂ ಯೋಚಿಸದ ಈ ಇಳಾರಿಗೆ ಈಗ ಇಂಡಸ್ಟ್ರಿ ಹಿಟ್‌ನ ಭಾಗವಾದ ಸಂಭ್ರಮ.

‘ಪ್ರೇಮದ ಊರಲಿ’ ಚಿತ್ರದ ಅದ್ಭುತ ಯಶಸ್ಸನ್ನು ಅದರಲ್ಲೊಬ್ಬ ಕಲಾವಿದೆಯಾದ ನೀವು ಹೇಗೆ ನೋಡುತ್ತೀರಿ?

ಇಳಾ ವಿಟ್ಲ: ಈ ಗೆಲುವು ಭ್ರಮೆ ಎಂಬಂತಿದೆ! ದಶಕದ ಹಿಂದೆ ‘ಕಾದಂಬರಿ’ಯ ಖಳನಟಿಯಾಗಿ ‘ತಾರಾ’ ಪಾತ್ರದಲ್ಲಿ ಸಿಕ್ಕ ಜನಪ್ರಿಯತೆಯ ಖುಷಿ ಆನಂತರ ನನಗೆ ಸಿಕ್ಕಿದ್ದು ಈಗಲೇ. ಈ ಭೂಮಿಗೆ ಬಂದಾಗಿನಿಂದ ನನಗೆ ಪ್ರೋತ್ಸಾಹ ನೀಡಿದ ಪ್ರತಿಯೊಬ್ಬರಿಗೂ ಕೃತಜ್ಞಳಾಗಿದ್ದೇನೆ.

ನಿಮ್ಮ ಪಾತ್ರದ ಬಗ್ಗೆ ಎಷ್ಟು ಸಂತೃಪ್ತಿ ಇದೆ?

ಇಳಾ ವಿಟ್ಲ: ನನಗೆ ನೂರಕ್ಕೆ ಇನ್ನೂರರಷ್ಟು ತೃಪ್ತಿ ಇದೆ. ಯಾಕೆಂದರೆ ಎಂತಹ ಪಾತ್ರ ಕೊಟ್ಟರೂ ನಿಭಾಯಿಸಬಲ್ಲೆ ಎನ್ನುವ ನನ್ನ ನಂಬಿಕೆ ಸಾಕಾರವಾಯಿತು. ನಿರ್ದೇಶಕರಿಂದ ಹಿಡಿದು ಪ್ರೇಕ್ಷಕರ ತನಕ ಎಲ್ಲರೂ ನನ್ನ ನಟನೆಗೆ ಮೆಚ್ಚುಗೆಯ ಮಾತಾಡಿದ್ದಾರೆ. ಮೇಕಪ್ ಬಗ್ಗೆ ಸಹಜ ಅಸಮಾಧಾನ ತೋರಿದವರೂ ಇದ್ದಾರೆ. ಅಂತಿಮವಾಗಿ ನಟಿಯಾಗಿ ಜನರ ಪ್ರೀತಿ ಸಿಕ್ಕಿರುವುದಂತೂ ಸತ್ಯ.

ಒಂದಷ್ಟು ಮಂದಿ ನಿಮ್ಮ ಪಾತ್ರ ಉಮಾಶ್ರೀಯವರು ಮಾಡಬೇಕಿತ್ತು ಅಂತಿದ್ದಾರಲ್ಲ?

ಇಳಾ ವಿಟ್ಲ: ಅವರಿಗೆ ಉಮಾಶ್ರೀಯವರು ನೆನಪಾಗಲು ಕಾರಣ ‘ಪುಟ್ನಂಜ’ದಲ್ಲಿನ ಅವರ ಅಜ್ಜಿ ಪಾತ್ರ. ಅಜ್ಜಿ ಪಾತ್ರ ಹೇಗಾದರೂ ಮಾಡಬಹುದು. ಆದರೆ ಅಷ್ಟೊಂದು ವಯಸ್ಸಾದ ಗಟ್ಟಿಗಿತ್ತಿ ಅಜ್ಜಿ ಅಂದರೆ ಆಗ ಉಮಾಶ್ರೀ ಅವರ ಶೈಲಿಯೇ ಸರಿ. ಯಾಕೆಂದರೆ ಅದು ಸಹಜತೆಯನ್ನು ಅರೆದು ತಯಾರು ಮಾಡಿದ ‘ಒಡಲಾಳ’ ನಾಟಕದ ಪಾತ್ರ. ಹಾಗಾಗಿ ನಾನೇ ಅಜ್ಜಿಯ ನೈಜತೆ ಮೂಡಿಸಿದರೂ ತಿರುಗಿ ಅವರ ಪಾತ್ರದ ಹೋಲಿಕೆ ಸಹಜ. ಆದರೆ ನಾನೇ ಸ್ವಂತ ಶ್ರಮ ಹಾಕಿ ಸೊಂಟ ಬಗ್ಗಿಸಿ, ಕಂಠ ಬದಲಾಯಿಸಿ ಮಾಡಿದಂಥ ಪಾತ್ರ ಇದು! ಒಂದು ವೇಳೆ ಮಂಗಳೂರು ಕಡೆಯ ಅಜ್ಜಿಯಾಗಿದ್ದರೆ ಭಾಷೆಯಲ್ಲಾದರೂ ಬದಲಾವಣೆ ತೋರಿಸುತ್ತಿದ್ದೆ!

ನೀವು ಮಂಗಳೂರು ಭಾಗದವರಾಗಿ ಕೂಡ ಮಂಗಳೂರು ತಂಡದವರ ಸಿನೆಮಾಗಳಲ್ಲಿ ಯಾಕೆ ನಟಿಸಿಲ್ಲ?

ಇಳಾ ವಿಟ್ಲ: ನೀವು ಸರಿಯಾಗಿ ಅವರ ಸಿನೆಮಾಗಳನ್ನು ಗಮನಿಸಿದರೆ ಅವರ ಚಿತ್ರಗಳ ಸಾರಥ್ಯ ಮಾತ್ರ ಮಂಗಳೂರಿಗರ ಕೈಯಲ್ಲಿರುತ್ತದೆ. ಉಳಿದಂತೆ ಎಲ್ಲ ಕಡೆಯ ಪ್ರತಿಭಾವಂತ ಕಲಾವಿದರನ್ನು ಬಳಸುತ್ತಾರೆ. ಉದಾಹರಣೆಗೆ ‘ಸು ಫ್ರಮ್ ಸೋ’ನಲ್ಲಿ ನಟಿಸಿದ ಸಂಧ್ಯಾ ಅರಕೆರೆ ಅವರನ್ನೇ ನೆನಪಿಸಬಹುದು. ಅಂಥ ಪಾತ್ರಗಳನ್ನು ನನಗೂ ಕೊಟ್ಟರೆ ಖಂಡಿತಾ ನಾನು ಅದೃಷ್ಟವಂತೆ ಎಂದೇ ಹೇಳಬಹುದು. ನನಗೆ ಇದುವರೆಗೂ ಮಂಗಳೂರಿನ ಯಾವ ತಂಡದ ಭೇಟಿಗೂ ಅವಕಾಶ ಸಿಕ್ಕಿಲ್ಲ. ನಿಮ್ಮ ಈ ಸಂದರ್ಶನ ನೋಡಿದ ರಿಷಬ್ ಸರ್, ರಕ್ಷಿತ್ ಸರ್, ರಾಜ್ ಬಿ. ಶೆಟ್ಟಿ ಸರ್, ಕಿರಣ್ ರಾಜ್ ಸರ್, ಜೆ.ಪಿ. ತೂಮಿನಾಡು ಸರ್ ಮೊದಲಾದವರು ಕರೆದರೆ ಖಂಡಿತಾ ಓಡೋಡಿ ಹೋಗಿ ನಟಿಸುತ್ತೇನೆ!

ನಿಮಗೆ ಸದಾ ವಿಭಿನ್ನ ಪಾತ್ರಗಳಲ್ಲೇ ಆಸಕ್ತಿ ಮೂಡಲು ಕಾರಣವೇನು?

ಇಳಾ ವಿಟ್ಲ: ಜನರ ಮಧ್ಯೆ ನಟಿಯಾಗಿ ಹೆಸರಾದ ಬಳಿಕ ಪ್ರತೀ ಕಲಾವಿದೆಗೂ ಪಾತ್ರಗಳಾಗಿ ಜನರಿಂದ ಗುರುತಿಸಿಕೊಳ್ಳುವುದೇ ದೊಡ್ಡ ಸಾಧನೆ. ಇಳಾ ವಿಟ್ಲ ಅಂದ ತಕ್ಷಣ ಒಂದೆರಡು ವಿಭಿನ್ನ ಪಾತ್ರಗಳು ನೆನಪಾದರೆ ಅದರಷ್ಟು ಸಾರ್ಥಕತೆ ಬೇರೇನಿದೆ? ನನ್ನ ಇಂಥ ಮೆಂಟಾಲಿಟಿಗೆ ಹೊಂದುವಂತೆ ಸಿಕ್ಕವರೇ ನಿರ್ದೇಶಕ ಮನೋಜ್ ಕುಮಾರ್. ಅವರ ಈ ಹಿಂದಿನ ರಾಷ್ಟ್ರ ಪ್ರಶಸ್ತಿ ವಿಜೇತ ಚಿತ್ರ ‘ಅಕ್ಷಿ’ಯಲ್ಲೂ ನನಗೆ ವಿಭಿನ್ನ ಪಾತ್ರ ನೀಡಿದ್ದರು. ಅದರಲ್ಲಿ ಹಳ್ಳಿಯ ಬಡ, ಮುಗ್ಧ ಹೆಣ್ಣು ಮಗಳಾಗಿ ನಟಿಸಿದ್ದೆ. ಈ ಬಾರಿಯೂ ಅಜ್ಜಿಯಾಗಿ ದೊಡ್ಡ ಪಾತ್ರವನ್ನೇ ನೀಡಿದ್ದರು. ಆದರೆ ಮೇಕಪ್ ಸೇರಿದಂತೆ ಕೆಲವು ಕಾರಣಗಳಿಂದಾಗಿ ನಾನಿದ್ದ ಏಳೆಂಟು ದೃಶ್ಯಗಳನ್ನು ಕತ್ತರಿಸಬೇಕಾಗಿ ಬಂದಿತ್ತು.

(ಅಂಕಣಕಾರರು: ಪತ್ರಕರ್ತರು ಮತ್ತು ಸಿನೆಮಾ ವಿಮರ್ಶಕರು)