ಬಾಲಿವುಡ್‌ ನಿರ್ದೇಶಕ ಸಂಜಯ್ ಗುಪ್ತಾ ನಿಧನ: ಅಸಹಜ ಸಾವಿನ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು

ಮುಂಬೈ: ‘ಕಾಂಟೆ’, ‘ಶೂಟೌಟ್ ಅಟ್ ವಡಾಲಾ’ ಸೇರಿದಂತೆ ಅಪರಾಧ ಕಥಾಹಂದರದ ಚಿತ್ರಗಳ ಮೂಲಕ ಬಾಲಿವುಡ್‌ ನಲ್ಲಿ ತಮ್ಮದೇ ಛಾಪು ಮೂಡಿಸಿದ್ದ ಖ್ಯಾತ ನಿರ್ದೇಶಕ ಸಂಜಯ್ ಗುಪ್ತಾ (59) ಅವರು ಶುಕ್ರವಾರ ರಾತ್ರಿ ಮುಂಬೈನ ತಮ್ಮ ನಿವಾಸದಲ್ಲಿ ನಿಧನರಾದರು.

‘ಜಂಗ್’, ‘ಕಾಂಟೆ’, ‘ಶೂಟೌಟ್ ಅಟ್ ವಡಾಲಾ’ ಮತ್ತು ‘ಕಾಬಿಲ್’ ಚಿತ್ರಗಳ ಮೂಲಕ ಗುರುತಿಸಿಕೊಂಡಿದ್ದ ಗುಪ್ತಾ, ಅಪರಾಧ ಕಥಾಹಂದರದ ಚಿತ್ರಗಳು ಹಾಗೂ ಆಕ್ಷನ್ ಥ್ರಿಲ್ಲರ್‌ ಗಳ ನಿರ್ದೇಶನದಲ್ಲಿ ಹೆಸರು ಗಳಿಸಿದ್ದರು.

ಗುಪ್ತಾ ಅವರ ಸಾವಿನ ಕುರಿತು ವರ್ಸೋವಾ ಪೊಲೀಸರು ಅಸಹಜ ಸಾವಿನ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಸಾವಿಗೆ ಕಾರಣವಾದ ಸನ್ನಿವೇಶಗಳ ಬಗ್ಗೆ ತನಿಖೆ ನಡೆಸುತ್ತಿದ್ದಾರೆ. ಸದ್ಯಕ್ಕೆ ಯಾವುದೇ ಅನುಮಾನಾಸ್ಪದ ಅಂಶಗಳು ಕಂಡುಬಂದಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.

ಚಲನಚಿತ್ರ ನಿರ್ಮಾಪಕ ಅಶೋಕ್ ಪಂಡಿತ್ ಅವರು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಹಂಚಿಕೊಂಡು ಗುಪ್ತಾ ಅವರ ನಿಧನಕ್ಕೆ ತೀವ್ರ ಆಘಾತ ವ್ಯಕ್ತಪಡಿಸಿದ್ದಾರೆ. ಮನೆಯಲ್ಲಿ ತಲೆಗೆ ಗಾಯವಾದ ಬಳಿಕ ಗುಪ್ತಾ ಮೃತಪಟ್ಟಿದ್ದಾರೆ ಎಂದು ತಿಳಿಸಿದ್ದಾರೆ.

‘ಇದು ನಿಜಕ್ಕೂ ಆಘಾತಕಾರಿ ಮತ್ತು ದುಃಖಕರ ಸುದ್ದಿ. ನಮ್ಮ ಆತ್ಮೀಯ ಸ್ನೇಹಿತ ಹಾಗೂ ಪ್ರತಿಭಾವಂತ ನಿರ್ದೇಶಕ ಸಂಜಯ್ ಗುಪ್ತಾ ಇನ್ನು ನಮ್ಮೊಂದಿಗಿಲ್ಲ ಎಂಬುದನ್ನು ನಂಬಲು ಸಾಧ್ಯವಾಗುತ್ತಿಲ್ಲ. ಮನೆಯಲ್ಲಿ ತಲೆಗೆ ಗಾಯವಾದ ಬಳಿಕ ಅವರು ಮೃತಪಟ್ಟಿದ್ದಾರೆ. ಮತ್ತೊಬ್ಬ ಪ್ರತಿಭಾವಂತ ವ್ಯಕ್ತಿ ಅಕಾಲಿಕವಾಗಿ ನಮ್ಮನ್ನು ಅಗಲಿದ್ದಾರೆ. ಅವರು ಅದ್ಭುತ ಕಥೆಗಾರರಾಗಿದ್ದರು. ಜೀವನೋತ್ಸಾಹದಿಂದ ತುಂಬಿದ್ದ ಅವರು, ಚಲನಚಿತ್ರ ನಿರ್ಮಾಣದ ಬಗ್ಗೆ ಅಪಾರ ಒಲವು ಹೊಂದಿದ್ದರು. ಅವರ ನಿಧನ ಚಿತ್ರರಂಗಕ್ಕೆ ತುಂಬಲಾರದ ನಷ್ಟ. ಸ್ನೇಹಿತನೇ, ನಿನ್ನನ್ನು ತುಂಬಾ ನೆನಪಿಸಿಕೊಳ್ಳುತ್ತೇನೆ. ಅವರ ಕುಟುಂಬ ಮತ್ತು ಆಪ್ತರಿಗೆ ನನ್ನ ಸಂತಾಪಗಳು. ಅವರ ಆತ್ಮಕ್ಕೆ ಶಾಂತಿ ಸಿಗಲಿ’ ಎಂದು ಪಂಡಿತ್ ಬರೆದುಕೊಂಡಿದ್ದಾರೆ.

ಗುಪ್ತಾ ಅವರು ಅನು ಲೇಖಿ ಅವರನ್ನು ವಿವಾಹವಾಗಿದ್ದರು. ಬಳಿಕ ದಂಪತಿ ವಿಚ್ಛೇದನ ಪಡೆದಿದ್ದರೂ, ನಂತರ ಮತ್ತೆ ಮದುವೆಯಾಗಿದ್ದರು.

ಏಳುಬೀಳು ಕಂಡ 25 ವರ್ಷಗಳ ಪಯಣ

ತಮ್ಮ 25 ವರ್ಷಗಳ ವೃತ್ತಿಜೀವನವನ್ನು ಗುಪ್ತಾ ಅವರು ಯಶಸ್ಸು ಮತ್ತು ವೈಫಲ್ಯಗಳ ಸಮ್ಮಿಶ್ರಣ ಎಂದು ಹೇಳಿದ್ದರು. ವೃತ್ತಿಜೀವನದಲ್ಲಿ ಎದುರಾದ ಕಠಿಣ ಸವಾಲುಗಳನ್ನು ಮೆಟ್ಟಿ ನಿಂತು, ಮತ್ತೆ ತಮ್ಮ ಸ್ಥಾನವನ್ನು ಕಂಡುಕೊಳ್ಳಲು ಸಾಧ್ಯವಾಗಿದ್ದಕ್ಕೆ ಸಂತೋಷವಿದೆ ಎಂದು ಹೇಳಿದ್ದರು.

1994ರಲ್ಲಿ ಬಿಡುಗಡೆಯಾದ ‘ಆತಿಶ್: ಫೀಲ್ ದಿ ಫೈರ್’ ಚಿತ್ರದ ಮೂಲಕ ನಿರ್ದೇಶಕರಾಗಿ ಚಿತ್ರರಂಗ ಪ್ರವೇಶಿಸಿದ್ದರು.

2002ರಲ್ಲಿ ತೆರೆಕಂಡ ‘ಕಾಂಟೆ’ ಚಿತ್ರದಲ್ಲಿ ಅಮಿತಾಭ್ ಬಚ್ಚನ್, ಸಂಜಯ್ ದತ್, ಸುನೀಲ್ ಶೆಟ್ಟಿ, ಲಕ್ಕಿ ಅಲಿ ಮತ್ತು ಮಹೇಶ್ ಮಂಜ್ರೇಕರ್ ಸೇರಿದಂತೆ ಪ್ರಮುಖ ನಟರು ಅಭಿನಯಿಸಿದ್ದರು. ಈ ಚಿತ್ರವು ಗ್ಯಾಂಗ್‌ ಸ್ಟರ್-ಥ್ರಿಲ್ಲರ್ ಪ್ರಕಾರದ ಚಿತ್ರಗಳ ನಿರ್ದೇಶಕರಾಗಿ ಗುಪ್ತಾ ಅವರಿಗೆ ಚಿತ್ರರಂಗದಲ್ಲಿ ಭದ್ರವಾದ ನೆಲೆ ಕಲ್ಪಿಸಿತ್ತು.

‘ಕಾಂಟೆ’ ಬಳಿಕ ‘ಶೂಟೌಟ್ ಅಟ್ ವಡಾಲಾ’ ನಿರ್ದೇಶಿಸುವವರೆಗೆ ಸುಮಾರು ನಾಲ್ಕು ವರ್ಷಗಳ ಅಂತರವಿತ್ತು. ಈ ಅವಧಿಯನ್ನು ಹೊರತುಪಡಿಸಿದರೆ, ‘ಕಾಂಟೆ’ ಚಿತ್ರದ ನಂತರ ತಮ್ಮ ವೃತ್ತಿಜೀವನದಲ್ಲಿ ಮತ್ತೆ ಹಿಂತಿರುಗಿ ನೋಡುವ ಅಗತ್ಯ ಎದುರಾಗಿರಲಿಲ್ಲ ಎಂದು ಗುಪ್ತಾ ಹೇಳಿಕೊಂಡಿದ್ದರು.

ಆದರೆ, ನಟ ಸಂಜಯ್ ದತ್ ಅವರೊಂದಿಗಿನ ಮನಸ್ತಾಪದ ಬಳಿಕ ಚಿತ್ರರಂಗದ ಶೇಕಡ 90ರಷ್ಟು ಮಂದಿ ತಮ್ಮೊಂದಿಗೆ ಕೆಲಸ ಮಾಡಲು ಇಷ್ಟಪಡುತ್ತಿರಲಿಲ್ಲ ಎಂದು ಅವರು ಹೇಳಿದ್ದರು.