ಮಹಿಳಾ ದಿನವು ಮಹಿಳೆಯರ ಮೇಲಿನ ಹಿಂಸಾಚಾರದ ಕಠಿಣ ವಾಸ್ತವತೆಯನ್ನು ಎದುರಿಸಬೇಕು: ಶಾಹಿದಾ ತಸ್ನೀಮ್

ಮಂಗಳೂರು: ಅಂತರಾಷ್ಟ್ರೀಯ ಮಹಿಳಾ ದಿನದ ಸಂದರ್ಭದಲ್ಲಿ, ದೇಶವು ಕೇವಲ ಪ್ರಾತಿನಿಧಿಕ ಆಚರಣೆಗಳಿಗಿಂತ ಮುಂದೆ ಹೋಗಿ ಭಾರತದೆಲ್ಲೆಡೆ ಮಹಿಳೆಯರು ಎದುರಿಸುತ್ತಿರುವ ಕಠಿಣ ವಾಸ್ತವತೆಯನ್ನು ಎದುರಿಸಬೇಕು. ಈ ದಿನವನ್ನು ಕೇವಲ ವಿಧಿವಿಧಾನಗಳ ಕಾರ್ಯಕ್ರಮಗಳಿಗೂ ಅಥವಾ ಹೂಗುಚ್ಛಗಳ ವಿನಿಮಯಕ್ಕೂ ಮಾತ್ರ ಸೀಮಿತಗೊಳಿಸುವುದಕ್ಕಿಂತ, ಮಹಿಳೆಯರ ಸುರಕ್ಷತೆ ಮತ್ತು ಗೌರವದ ಹದಗೆಟ್ಟಿರುವ ಪರಿಸ್ಥಿತಿಯ ಬಗ್ಗೆ ಗಂಭೀರವಾಗಿ ಚಿಂತಿಸುವ ಕ್ಷಣವಾಗಬೇಕು ಎಂದು ವಿಮೆನ್ ಇಂಡಿಯಾ ಮೂವ್ಮೆಂಟ್ ರಾಷ್ಟ್ರೀಯ ಪ್ರದಾನ ಕಾರ್ಯದರ್ಶಿ ಶಾಹಿದಾ ತಸ್ನೀಮ್ ಹೇಳಿದರು.

ಪ್ರತಿ ದಿನವೂ ದೇಶದ ವಿವಿಧ ರಾಜ್ಯಗಳಿಂದ ಕಳವಳಕಾರಿ ಘಟನೆಗಳು ಹೊರಬರುತ್ತಲೇ ಇವೆ. ಬಿಹಾರದಲ್ಲಿ ನಡೆದ ಇತ್ತೀಚಿನ ದುರಂತವು ಮಹಿಳೆಯರು ಎದುರಿಸುತ್ತಿರುವ ಅಸುರಕ್ಷಿತ ಪರಿಸ್ಥಿತಿಗೆ ಮತ್ತೊಂದು ಸ್ಪಷ್ಟ ಉದಾಹರಣೆ ಯಾಗಿದೆ. ಮಧುಬನಿ ಜಿಲ್ಲೆಯಲ್ಲೊಂದು ಉಪವಾಸದಲ್ಲಿದ್ದ ಮುಸ್ಲಿಂ ಮಹಿಳೆ ರೋಷನ್ ಖಾತೂನ್ ಅವರು ಗ್ರಾಮದಲ್ಲಿನ ಒಂದು ವಿವಾದವನ್ನು ಪರಿಹರಿಸಲು ಸಹಾಯ ಕೇಳಲು ಗ್ರಾಮ ಮುಖ್ಯಸ್ಥರ ಬಳಿ ತೆರಳಿದ ವೇಳೆ, ಅವರನ್ನು ಕಂಬಕ್ಕೆ ಕಟ್ಟಿ ಕ್ರೂರವಾಗಿ ಹೊಡೆದು ಕೊಲ್ಲಲಾಯಿತು. ಹಲ್ಲೆಯ ನಡುವೆ ಅವರು ಒಂದು ಹನಿ ನೀರು ಕೇಳಿದಾಗ ಅದನ್ನು ನಿರಾಕರಿಸಲಾಯಿತು ಮತ್ತು ಬದಲಾಗಿ ಅವರಿಗೆ ಮೂತ್ರವನ್ನು ಕುಡಿಯಲು ಬಲವಂತ ಮಾಡಲಾಯಿತು. ನಂತರವೂ ಕ್ರೂರ ಹಲ್ಲೆ ಮುಂದುವರಿಯಿತು. ಈ ರೀತಿಯ ಭಯಾನಕ ಘಟನೆ ಮಹಿಳೆಯರು ಬದುಕಲು ಬಾಧ್ಯರಾಗಿರುವ ಸಾಮಾಜಿಕ ಪರಿಸ್ಥಿತಿಯ ಗಂಭೀರತೆಯನ್ನು ಬಯಲಿಗೆಳೆಯುತ್ತದೆ. ಇಂತಹ ಕ್ರೌರ್ಯವು ಸಮಾಜದ ಮನಸ್ಸನ್ನು ಕದಡಲು ವಿಫಲವಾದರೆ, ಅದು ನೈತಿಕ ಮೌಲ್ಯಗಳ ಅಪಾಯಕಾರಿ ಕುಸಿತವನ್ನು ಸೂಚಿಸುತ್ತದೆ.

ಆದ್ದರಿಂದ ಅಂತರಾಷ್ಟ್ರೀಯ ಮಹಿಳಾ ದಿನವು ನ್ಯಾಯ ಮತ್ತು ಹೊಣೆಗಾರಿಕೆಗೆ ಧ್ವನಿ ಎತ್ತುವ ದಿನವಾಗಬೇಕು. ಮಹಿಳೆಯರು ತಮ್ಮ ಹಕ್ಕುಗಳು, ಸುರಕ್ಷತೆ ಮತ್ತು ಗೌರವವನ್ನು ನಿಜವಾಗಿಯೂ ಪಡೆಯುವಾಗ ಮತ್ತು ರಾಜ್ಯ ಹಾಗೂ ಸಮಾಜ ಒಟ್ಟಾಗಿ ಪ್ರತಿಯೊಬ್ಬ ಮಹಿಳೆಗೆ ರಕ್ಷಣೆ ಮತ್ತು ನ್ಯಾಯವನ್ನು ಖಚಿತಪಡಿಸಿದಾಗ ಮಾತ್ರ ಈ ದಿನಕ್ಕೆ ನಿಜವಾದ ಅರ್ಥ ಸಿಗುತ್ತದೆ ಎಂದು ಶಾಹಿದಾ ತಸ್ನೀಮ್ ಪ್ರಕಟನೆಯಲ್ಲಿ ತಿಳಿಸಿದ್ದಾರೆ.