ಮನಪಾದಿಂದ 149.68 ಕೋಟಿ ರೂ. ಆಸ್ತಿ ತೆರಿಗೆ ಸಂಗ್ರಹ: ರವಿಚಂದ್ರ ನಾಯ್ಕ್

ಮಂಗಳೂರು, ಎ.10: ಮಂಗಳೂರು ಮಹಾನಗರ ಪಾಲಿಕೆಯು 2025-26ರ ಸಾಲಿನಲ್ಲಿ 149.68 ಕೋಟಿ ರೂ. ದಾಖಲೆಯ ಆಸ್ತಿ ತೆರಿಗೆ ಸಂಗ್ರಹಣೆ ಮಾಡಿದೆ ಎಂದು ಪಾಲಿಕೆ ಆಯುಕ್ತ ರವಿಚಂದ್ರ ನಾಯ್ಕ್ ಹೇಳಿದರು.

ಪಾಲಿಕೆ ಕಚೇರಿಯಲ್ಲಿ ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, 2024-25ರಲ್ಲಿ 137 ಕೋಟಿ ರೂ. ತೆರಿಗೆ ಸಂಗ್ರಹಿಸಲಾಗಿತ್ತು. 2023-24ರಲ್ಲಿ 117 ಕೋ.ರೂ. ಆಸಕ್ತಿ ತೆರಿಗೆ ಸಂಗ್ರಹಿಸಿದ್ದೆವು. ಆಸ್ತಿ ತೆರಿಗೆ ಸಂಗ್ರಹ ವರ್ಷದಿಂದ ವರ್ಷಕ್ಕೆ ಏರಿಕೆ ಕಾಣುತ್ತಿದೆ. ಮುಂದಿನ ವರ್ಷ ಇನ್ನಷ್ಟು ಹೆಚ್ಚಳ ಮಾಡುವ ಮೂಲಕ ಪಾಲಿಕೆ ವ್ಯಾಪ್ತಿ ಅಭಿವೃದ್ಧಿಗೊಳಿಸುವ ಸಂಕಲ್ಪಕೈಗೊಳ್ಳುತ್ತೇವೆ ಎಂದರು.

ಪಾಲಿಕೆಯ 60 ವಾರ್ಡ್‌ಗಳಲ್ಲಿ 1,75,724 ವಸತಿ ಆಸ್ತಿ ಹೊಂದಿದ್ದು, 44,074 ವಾಣಿಜ್ಯ ಆಸ್ತಿ, 1,175 ಕೈಗಾರಿಕಾ ಆಸ್ತಿ, 1283 ವಸತಿ ರಹಿತ-ವಾಣಿಜ್ಯ ರಹಿತ ಆಸ್ತಿ ಸೇರಿ ಒಟ್ಟು 2,22,256 ಆಸ್ತಿಗಳನ್ನು ಹೊಂದಿದ್ದೇವೆ. ಈ ಅಸ್ತಿಗಳ ಮೂಲಕ ತೆರಿಗೆ ಪಾವತಿ ಮಾಡಿಕೊಂಡು 2026ರ ಮಾರ್ಚ್ 31ರವರೆಗೆ 149.68 ಕೋ.ರೂ. ತೆರಿಗೆ ಸಂಗ್ರಹ ಮಾಡಲಾಗಿದೆ ಎಂದರು.

ವ್ಯವಸ್ಥಿತ ಅಸ್ತಿ ತೆರಿಗೆ ಸಂಗ್ರಹ ಮಾಡುವ ಉದ್ದೇಶದಿಂದ ಪಾಲಿಕೆಯ ಅತ್ತಾವರ, ಪದವು, ಹಂಪನಕಟ್ಟೆ ವಾರ್ಡ್‌ ಗಳಲ್ಲಿ ಪೈಲಟ್ ಆಗಿ ಸಮೀಕ್ಷೆ ಕಾರ್ಯ ನಡೆಸಲಾಗಿದೆ. ಅದರಂತೆ ಕಂದಾಯ ಅಧಿಕಾರಿಗಳು, ಕಂದಾಯ ಸಹಾಯಕರು, ಬಿಲ್ ಕಲೆಕಲೆಕ್ಟರ್ಸ್, ಇನ್ನಿತರ ಸಿಬಂದಿ ಈ ಮೂರು ವಾರ್ಡ್‌ಗಳ ಶೇ. 50ರಷ್ಟು ಪ್ರದೇಶದ ಸಮೀಕ್ಷೆ ನಡೆಸಿದ್ದಾರೆ. ಇದರಿಂದಾಗಿ ಈ ವಾರ್ಡ್‌ಗಳಲ್ಲಿ 55.33 ಲಕ್ಷ ರೂ. ಹೆಚ್ಚುವರಿ ತೆರಿಗೆ ಸಂಗ್ರಹ ಆಗಿದೆ. ಶೇ. 100ರಷ್ಟು ಸರ್ವೆ ಆದಲ್ಲಿ 3 ಕೋಟಿ ರು. ವರೆಗೆ ಹೆಚ್ಚುವರಿ ತೆರಿಗೆ ಸಂಗ್ರಹವಾಗಬಹುದು. ಪೈಲಟ್ ಯೋಜನೆಯನ್ನು ಮುಂದೆ ಪಾಲಿಕೆಯ ಎಲ್ಲಾ ವಾರ್ಡ್‌ಗಳಿಗೂ ವಿಸ್ತರಿಸುವ ಉದ್ದೇಶದಿಂದ ಬಜೆಟ್‌ನಲ್ಲಿ ಅನುದಾನ ಕಾಯ್ದಿರಿಸಲಾಗಿದೆ ಎಂದು ಹೇಳಿದರು.

ಎಪ್ರಿಲ್ ಅಂತ್ಯದೊಳಗೆ ಆಸ್ತಿ ತೆರಿಗೆ ಪಾವತಿಸಿದರೆ ಶೇ.5 ರಿಯಾಯಿತಿ:

ಸಾರ್ವಜನಿಕರು ಮುಂದಿನ ಸಾಲಿನ ಆಸ್ತಿ ತೆರಿಗೆಯನ್ನು ಎಪ್ರಿಲ್ ಅಂತ್ಯದೊಳಗೆ ಪಾವತಿಸಿದರೆ ಶೇ.5 ರಿಯಾಯಿತಿ ನೀಡಲಾಗುವುದು. ಪ್ರತಿ ವರ್ಷ ಆಸ್ತಿ ತೆರಿಗೆಯನ್ನು ಮುಂಗಡವಾಗಿ ಪಾವತಿಸಿದರೆ ಶೇ.5ರ

ರಿಯಾಯ್ತಿ ನೀಡಲಾಗುತ್ತಿದೆ. ಪಾಲಿಕೆವಾಸಿಗಳು ಇದರ ಪ್ರಯೋಜನ ಪಡೆದುಕೊಳ್ಳಬೇಕು ಎಂದು ರವಿಚಂದ್ರ ನಾಯ್ಕ್ ಹೇಳಿದರು.

ಗೋಷ್ಟಿಯಲ್ಲಿ ಪಾಲಿಕೆಯ ಉಪ ಆಯುಕ್ತೆ (ಕಂದಾಯ) ಅಕ್ಷತಾ ಉಪಸ್ಥಿತರಿದ್ದರು.

ನೀರಿನ ಅಭಾವ ಇಲ್ಲ

ನಗರದಲ್ಲಿ ಸದ್ಯಕ್ಕೆ ಕುಡಿಯುವ ನೀರಿನ ಅಭಾವವಿಲ್ಲ. ತುಂಬೆಯಲ್ಲಿ ಶೇಖರಣೆಗೊಂಡ ನೀರಿನಿಂದ ನಗರಕ್ಕೆ 30 ದಿನಗಳಿಗೆ ನೀರುಣಿಸಬಹುದು. ಮತ್ತೆಯೂ ಅಭಾವ ಬಂದರೆ ಹರೇಕಳ ಡ್ಯಾಂನಿಂದ ನೀರನ್ನು ಪಂಪಿಂಗ್ ಮೂಲಕ ಮೇಲೆತ್ತುವ ಕಾರ್ಯ ನಡೆಯಲಿದೆ. ಇದರಿಂದ 110 ದಿನಗಳವರೆಗೆ ಈಗಿರುವ ನೀರನ್ನು ಪಾಲಿಕೆಯ ಜನರಿಗೆ ಪೂರೈಕೆ ಮಾಡಲು ಸಾಧ್ಯವಾಗಲಿದೆ ಎಂದು ಆಯುಕ್ತರಾ ರವಿಚಂದ್ರ ನಾಯ್ಕ್ ತಿಳಿಸಿದರು.

ಲಾಲ್‌ಬಾಗ್‌ನಲ್ಲಿರುವ ಮಂಗಳೂರು ಮಹಾನಗರ ಪಾಲಿಕೆಯ ವಾಣಿಜ್ಯ ಸಂಕೀರ್ಣವನ್ನು 24 ವರ್ಷದ ಬಳಿಕ ಹೊಸದಾಗಿ ಏಲಂ ನಡೆಸಲಾಗಿದೆ. ಈ ಹಿಂದೆ ಒಂದು ವರ್ಷಕ್ಕೆ 17,93,256 ರೂ. ಅದಾಯ ಬರುತ್ತಿತ್ತು. ಸದ್ಯ ಹೊಸ ಏಲಂನಿಂದಾಗಿದ್ದು, 71.43 ಲಕ್ಷ ರೂ. ಹೆಚ್ಚುವರಿ ಆದಾಯ ಗಳಿಸಲು ಸಾಧ್ಯವಾಗಿದೆ. ಪಾಲಿಕೆ ಆದಾಯ ವನ್ನು ವೃದ್ಧಿಸುವ ನಿಟ್ಟಿನಲ್ಲಿ ಪಾಲಿಕೆ ಅಧೀನದದ ಎಲ್ಲಾ ಮಾರುಕಟ್ಟೆ, ವಾಣಿಜ್ಯ ಸಂಕೀರ್ಣಗಳಿಗೆ ಟೆಂಡರ್ ಕರೆಯಲು ಕ್ರಮ ಕೈಗೊಳ್ಳಲಾಗುತ್ತಿದೆ. ಜಾಹೀರಾತು ಹೋರ್ಡಿಂಗ್‌ಗಳ ಆದಾಯವನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ತಂತ್ರಾಂಶವನ್ನು ಅಭಿವೃದ್ಧಿಗೊಳಿಸಲಾಗಿದ್ದು, ಕ್ಯುಆರ್ ಕೋಡ್ ಮೂಲಕ ಫಲಕಗಳ ಗುರುತಿಸುವಿಕೆ ಖಚಿತ ಪಡಿಸುವ ತಂತ್ರಜ್ಞಾನ ವನ್ನು ಬಳಸಿಕೊಳ್ಳಲಾಗುವುದು ಎಂದು ಪಾಲಿಕೆ ಆಯುಕ್ತ ರವಿಚಂದ್ರ ನಾಯ್ಕ್ ಹೇಳಿದರು.

ಆರ್ಥಿಕ ವರ್ಷ ಗುರಿ (ಕೋಟಿ) ತೆರಿಗೆ ಸಂಗ್ರಹ (ಕೋಟಿ)

2022-23 88.45 94.59

2023-24 99.84 117.03

2024-25 108.00 137.03

2025-26 112.00 149.68