ರಸ್ತೆ ಬದಿ ಮಲಗಿದ್ದ ಸವಾರನ ಸ್ಕೂಟರ್, ಮೊಬೈಲ್ ಕಳವು

ಕಾಪು, ಫೆ.13: ರಸ್ತೆ ಬದಿ ನಿಲ್ಲಿಸಿ ಸ್ಕೂಟರ್‌ನಲ್ಲಿ ಮಲಗಿದ್ದ ಸವಾರನನ್ನು ಬದಿಗೆ ಮಲಗಿಸಿ, ಸ್ಕೂಟರ್, ಪರ್ಸ್, ಮೊಬೈಲ್ ಕಳವು ಮಾಡಿರುವ ಘಟನೆ ಫೆ.12ರಂದು ನಸುಕಿನ ವೇಳೆ ಕಾಪು ಕೊಪ್ಪಲಂಗಡಿ ಎಂಬಲ್ಲಿ ನಡೆದಿದೆ.

ಮುಡಾರು ಗ್ರಾಮದ ಚೇತನ್ (34) ಎಂಬವರು ರಾತ್ರಿ ಸುರತ್ಕಲ್‌ಗೆ ಸ್ಕೂಟರ್‌ನಲ್ಲಿ ಹೊರಟಿದ್ದು, ದಾರಿ ಮಧ್ಯೆ ಸ್ಕೂಟರ್ ಸವಾರಿ ಮಾಡಲು ಕಷ್ಟವಾಗಿದ್ದುದರಿಂದ ಅವರು ತನ್ನ ಸ್ಕೂಟರನ್ನು ರಸ್ತೆ ಬದಿಯಲ್ಲಿ ನಿಲ್ಲಿಸಿ ಸ್ಕೂಟರಿ ನಲ್ಲಿ ತಲೆ ಇಟ್ಟು ಮಲಗಿದ್ದರು ಎನ್ನಲಾಗಿದೆ.

ಬಳಿಕ ಇವರು ಎಚ್ಚರಗೊಂಡಾಗ ಇವರು ಹೆಲ್ಮೆಟ್ ಸಮೇತ ರಸ್ತೆ ಬದಿ ಮಲಗಿದ್ದು, ಸ್ಕೂಟರ್, ಮೊಬೈಲ್, ಪರ್ಸ್‌ ಗಳನ್ನು ಕಳವು ಮಾಡಿ ಕೊಂಡು ಹೋಗಿರುವುದು ಕಂಡುಬಂದಿದೆ. ಸ್ಕೂಟರ್ ಮೌಲ್ಯ 30,000 ರೂ. ಎಂದು ಅಂದಾಜಿಸಲಾಗಿದೆ.

ಈ ಬಗ್ಗೆ ಕಾಪು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.