ಶಿಥಿಲಾವಸ್ಥೆಯಲ್ಲಿ ಮಹಾಕಾಳಿಪಡ್ಪು ಪೌರ ಕಾರ್ಮಿಕರ ಹಳೆ ಕಟ್ಟಡ: ಕುಟುಂಬಗಳ ಸ್ಥಳಾಂತರಕ್ಕೆ ಮನಪಾದಿಂದ ಮನವೊಲಿಕೆ

ಮಂಗಳೂರು: ಮಹಾಕಾಳಿಪಡ್ಪುವಿನ ಪೌರ ಕಾರ್ಮಿಕರ ವಸತಿ ನಿಲಯದ ಹಳೆ ಕಟ್ಟಡ ಶಿಥಿಲಾವಸ್ಥೆಯಲ್ಲಿದ್ದು, ಅಲ್ಲಿರುವ 24 ಕುಟುಂಬಗಳನ್ನು ಸ್ಥಳಾಂತರಿಸಲು ಮಂಗಳೂರು ಮಹಾನಗರ ಪಾಲಿಕೆ ಮುಂದಾಗಿದೆ. ಈ ನಡುವೆ, ಅಧಿಕಾರಿಗಳು ಬ್ಯಾನರ್ ಅಳವಡಿಸಿ, ಸೂಕ್ತ ಪರ್ಯಾಯ ವ್ಯವಸ್ಥೆ ಮಾಡದೆ ಮನೆ ಖಾಲಿ ಮಾಡುವಂತೆ ಸೂಚಿಸಿದ್ದಾರೆಂದು ದಲಿತ ಸಂಘರ್ಷ ಸಮಿತಿ (ಅಂಬೇಡ್ಕರ್ವಾದ) ಆರೋಪಿಸಿದೆ.

ಮಹಾಕಾಳಿಪಡ್ಪುವಿನ ಶಿಥಿಲಾವಸ್ಥೆಯಲ್ಲಿರುವ ಕಟ್ಟಡದಲ್ಲಿ ವಾಸವಿರುವ 24 ಕುಟುಂಬಗಳಲ್ಲಿ 10 ನಿವೃತ್ತ ನೌಕರರ ಕುಟುಂಬಗಳು. ಈ ಹಿಂದೆ ಕಟ್ಟಡದಲ್ಲಿ ಬಹಳಷ್ಟು ಕುಟುಂಬಗಳು ವಾಸವಾಗಿದ್ದರು. ಕೆಲ ಪೌರ ಕಾರ್ಮಿಕ ಕುಟುಂಬಗಳನ್ನು ಹೊಸತಾಗಿ ನಿರ್ಮಿಸಲಾದ ಕ್ವಾರ್ಟಸ್ಗೆ ಸ್ಥಳಾಂತರ ಮಾಡಿದ್ದರೆ, ನಿವೃತ್ತರಾದ ಕೆಲವು ಕುಟುಂಬಗಳ ಸಹಿತ ಕೆಲ ಪೌರ ಕಾರ್ಮಿಕರ ಕುಟುಂಬ ಹಳೆ ಕಟ್ಟಡದಲ್ಲಿಯೇ ವಾಸವಿದ್ದಾರೆ.

ಪಾಲಿಕೆಯು ಕಟ್ಟಡದಲ್ಲಿ ಬ್ಯಾನರ್ ಅಳವಡಿಸಿದ್ದು, ‘ಈ ಕಟ್ಟಡ ಶಿಥಿಲಾವಸ್ಥೆಯಲ್ಲಿದ್ದು, ವಾಸ್ತವ್ಯಕ್ಕೆ ಯೋಗ್ಯವಾಗಿಲ್ಲ. ಯಾರು ಕೂಡಾ ಈ ಕಟ್ಟಡದ ಒಳಗೆ ಅಥವಾ ಸುತ್ತ ಓಡಾಡದಂತೆ ಈ ಮೂಲಕ ಎಚ್ಚರಿಕೆ ನೀಡಲಾಗಿದೆ’ ಎಂದು ಬರೆಯಲಾಗಿದೆ.

‘ಕಳೆದ ಸುಮಾರು ಮೂರು ವರ್ಷಗಳಿಂದಲೂ ಹಿಂದಿನ ಆಯುಕ್ತರಿಂದಲೂ ಆ ಕುಟುಂಬಗಳಿಗೆ ಮನೆ ಖಾಲಿ ಮಾಡುವಂತೆ ಮನವೊಲಿಸಲಾಗಿತ್ತು. ಕೆಲ ಕುಟುಂಬಗಳು ಸ್ಥಳಾಂತರವಾಗಿವೆ. ಕೆಲವರು ನಾಲ್ಕೈದು ತಿಂಗಳ ಕಾಲಾವಕಾಶ ಕೋರುತ್ತಾ ಅಲ್ಲೇ ವಾಸವಾಗಿದ್ದಾರೆ. ಆದರೆ ಆ ಕಟ್ಟಡ ಜನ ವಾಸಕ್ಕೆ ಅಯೋಗ್ಯವಾಗಿದೆ. ಮಳೆಗಾಲವೂ ಆಗಿರುವುದರಿಂದ ಅಪಾಯದಿಂದ ಪ್ರಾಣಾಪಾಯ ಸಂಭವಿಸುವ ಸಾದ್ಯತೆಯ ಹಿನ್ನೆಲೆಯಲ್ಲಿ ಅವರನ್ನು ಸ್ಥಳಾಂತ ರಕ್ಕೆ ಕ್ರಮ ವಹಿಸಲಾಗುತ್ತಿದೆ’ಎಂದು ಪಾಲಿಕೆ ಆಯುಕ್ತ ಆನಂದ್ ಅವರು ಪ್ರತಿಕ್ರಿಯಿಸಿದ್ದಾರೆ.

ಕಾನೂನಿನ ಪ್ರಕಾರ ನಿವೃತ್ತರಾದವರಿಗೆ ವಸತಿ ನಿಲಯದಲ್ಲಿ ವಾಸಿಸಲು ಅವಕಾಶ ಇರುವುದಿಲ್ಲ. ಹಾಗಿದ್ದರೂ ಮಾನವೀಯತೆಯ ನೆಲೆಯಿಂದ ಅವ ರನ್ನು ಮನವೊಲಿಕೆ ಮೂಲಕ ಮನೆ ಖಾಲಿ ಮಾಡುವ ಪ್ರಯತ್ನ ಅಧಿಕಾರಿ ವರ್ಗದಿಂದ ನಡೆಯುತ್ತಾ ಬಂದಿದೆ. ಹಿಂದಿನ ಆಯುಕ್ತರೂ ಈ ಬಗ್ಗೆ ಮನವರಿಕೆ ಮಾಡಿದ್ದು, ನಾನು ಆಯುಕ್ತನಾಗಿ ಬಂದ ನಾಲ್ಕು ದಿನದಲ್ಲೇ ಅಲ್ಲಿ ಭೇಟಿ ನೀಡಿ ಪರಿಶೀಲಿಸಿ, ಮನವೊಲಿಸಲು ಯತ್ನಿಸಿದ್ದೇನೆ. ಬಳಿಕ ಎರಡು ಕುಟುಂಬ ಸ್ಥಳಾಂತರವಾಗಿದ್ದರು. ನಿನ್ನೆ ನಡೆದ ಪಾಲಿಕೆ ಸಭೆಯಲ್ಲಿ ಸ್ಥಳೀಯ ಪಾಲಿಕೆ ಸದಸ್ಯರು ಆ ಕಟ್ಟಡ ಅಪಾಯದಲ್ಲಿರುವುದರಿಂದ ಅಲ್ಲಿನ ಕುಟುಂಬ ಗಳಿಗೆ ಸೂಕ್ತ ವ್ಯವಸ್ಥೆ ಕಲ್ಪಿಸಬೇಕೆಂದು ಆಗ್ರಹಿಸಿದ್ದರು. ಹಾಗಾಗಿ ಅಧಿಕಾರಿ ವರ್ಗದಿಂದ ಮನವೊಲಿಕೆ ಕಾರ್ಯ ನಡೆಯುತ್ತಿದ್ದು, ಬಹುತೇಕರು ಒಪ್ಪಿಕೊಂಡಿದ್ದಾರೆ. ಆರಂಭದಲ್ಲಿ ಅವರಿಗೆ ಗಂಜಿಕೇಂದ್ರಗಳಲ್ಲಿ ವ್ಯವಸ್ಥೆಗೆ ತಿಳಿಸಲಾಗಿತ್ತು. ಆದರೆ ಅದಕ್ಕೆ ಸ್ಪಂದನೆ ದೊರಕದ ಕಾರಣ ಇದೀಗ ಪರ್ಯಾಯ ವ್ಯವಸ್ಥೆಯನ್ನು ಮಾಡಲಾಗುತ್ತಿದೆ. ದಲಿತ ಸಂಘಟನೆಯ ಮುಖಂಡರ ಜತೆಗೂ ಮಾತುಕತೆ ನಡೆಸಲಾಗಿದೆ. ಅವರಿಗೂ ಮನವರಿಕೆ ಯಾಗಿದೆ ಎಂದು ಆಯುಕ್ತ ಆನಂದ್ ತಿಳಿಸಿದ್ದಾರೆ. ಹಲವು ವರ್ಷಗಳಿಂದ ಸಂಘಟನೆ ವತಿಯಿಂದ ಅಲ್ಲಿರುವ ನಿವೃತ್ತ ಪೌರ ಕಾರ್ಮಿಕ ಕುಟುಂಬ ಸೇರಿದಂತೆ ಇತರರಿಗೂ ಪರ್ಯಾಯ ವ್ಯವಸ್ಥೆ, ಒದಗಿಸುವಂತೆ ಹಿಂದಿನ ಸರಕಾರಗಳು, ಜಿಲ್ಲಾಧಿಕಾರಿ ಹಾಗೂ ಪಾಲಿಕೆ ಆಡಳಿತ, ಆಯುಕ್ತರಿಗೆ ಮನವಿ ಸಲ್ಲಿಸುತ್ತಾ ಬಂದಿದ್ದೇವೆ. ಹಿಂದೆ ರೋಶನ್ ಬೇಗ್ ಅವರು ನಗರಾಭಿವೃದ್ಧಿ ಸಚಿವರಾಗಿದ್ದ ಸಂದರ್ಭದಲ್ಲಿಯೂ ಮಾನವೀಯತೆಯ ನೆಲಯಲ್ಲಿ ಅಲ್ಲಿರುವ ನಿವೃತ್ತ ಪೌರ ಕಾರ್ಮಿಕರಿಗೂ, ಹೊಸತಾಗಿ ನಿರ್ಮಾಣವಾಗುವ ಕ್ವಾರ್ಟಸ್ಗಳಲ್ಲಿ ಅವಕಾಶ ಕಲ್ಪಿಸುವುದಾಗಿ ಭರವಸೆ ನೀಡಿದ್ದರು. ಆದರೆ ಸರಕಾರ ಬದಲಾಗಿ ಹೊಸ ಕ್ವಾರ್ಟಸ್ ಉದ್ಘಾಟನೆಗೊಂಡರೂ ಈ ನಿವೃತ್ತರಿಗೆ ಅವಕಾಶ ನೀಡಲಾಗಿಲ್ಲ. ಇದೀಗ ಎರಡನೆ ಹಂತದಲ್ಲಿ ನಿರ್ಮಿಸಲಾಗುವ ಕ್ವಾರ್ಟಸ್ನಲ್ಲಿ ವಸತಿ ವ್ಯವಸ್ಥೆ ಮಾಡುವುದಾಗಿ ಹೇಳಲಾಗಿದೆ ಎಂದು ದಲಿತ ಸಂಘಟನೆಯ ಮುಖಂಡ ಜಗದೀಶ್ ಪಾಂಡೇಶ್ವರ ತಿಳಿಸಿದ್ದಾರೆ.

‘ತಮ್ಮ ಜೀವನ ಪೂರ್ತಿ ಪೌರ ಕಾರ್ಮಿಕರಾಗಿ ನಗರ ಸ್ವಚ್ಛತೆ ನಡೆಸಿದ್ದ ಅವರನ್ನು ನಿವೃತ್ತರಾಗಿದ್ದಾರೆ ಎಂಬ ಕಾರಣಕ್ಕೆ ಆ ನಿರ್ಗತಿಕ ಕುಟುಂಬಗಳನ್ನು ಏಕಾಏಕಿ ಮನೆ ಖಾಲಿ ಮಾಡಲು ಹೇಳುವುದು ಸರಿಯಲ್ಲ. ಅವರಿಗೆ ಪರ್ಯಾಯ ವ್ಯವಸ್ಥೆ ಅಗತ್ಯವಾಗಿದೆ. ಈ ಬಗ್ಗೆ ಪಾಲಿಕೆಯ ನೂತನ ಆಯುಕ್ತರ ಗಮನಕ್ಕೆ ತಂದ ಹಿನ್ನೆಲೆಯಲ್ಲಿ ಇದೀಗ ಅವರು ಪಾಂಡೇಶ್ವರ ಹಾಗೂ ಅಳಕೆಯಲ್ಲಿನ ಕ್ವಾಟ್ರಸ್ ದುರಸ್ಥಿಗೊಳಿಸಿ ಕುಟುಂಬಗಳನ್ನು ಅಲ್ಲಿಗೆ ಸ್ಥಳಾಂತರಿ ಸಲು ಮುಂದಾಗಿದ್ದಾರೆ. ಈ ಕಾರ್ಯವನ್ನು ಅಧಿಕಾರಿ ವರ್ಗ ಈ ಹಿಂದೆಯೇ ಮಾಡಿದ್ದರೆ ಉತ್ತಮವಾಗಿರುತ್ತಿತ್ತು’. ಸೋಮವಾರ ಸಂಘಟನೆ ನಿಯೋಗ ಮನಪಾ ಆಯುಕ್ತರನ್ನು ಭೇಟಿ ಮಾಡಲಿದ್ದೇವೆ ಎಂದು ದಲಿತ ಸಂಘರ್ಷ ಸಮಿತಿಯ ಮುಖಂಡ ಜಗದೀಶ್ ಪಾಂಡೇಶ್ವರ ಅವರು ‘ವಾರ್ತಾಭಾರತಿ’ಗೆ ಪ್ರತಿಕ್ರಿಯಿಸಿದ್ದಾರೆ.