Hubballi | ಅನೈತಿಕ ಪೊಲೀಸ್ಗಿರಿ ಆರೋಪ: ಯುವಕ, ಯುವತಿಗೆ ಹಲ್ಲೆ; ಆಸ್ಪತ್ರೆಗೆ ದಾಖಲು
ಹುಬ್ಬಳ್ಳಿ: ಹುಬ್ಬಳ್ಳಿ ಹೊರವಲಯದಲ್ಲಿ ಗೆಳತಿಯೊಂದಿಗೆ ಹೋಟೆಲ್ ಗೆ ಊಟಕ್ಕೆ ಹೋದ ಯುವಕನ ಮೇಲೆ ಅನೈತಿಕ ಪೊಲೀಸ್ಗಿರಿ ನಡೆಸಿದ ಆರೋಪ ಕೇಳಿಬಂದಿದ್ದು, ತಾನು ಮುಸ್ಲಿಂ ಎಂದು ಶಂಕಿಸಿ ಅಪಹರಿಸಿ ತನ್ನ ಹಲ್ಲೆ ನಡೆಸಿದ್ದಾರೆ ಎಂದು ಗಾಯಗೊಂಡ ಯುವಕ ಆರೋಪಿಸಿದ್ದಾನೆ.
ಗಾಯಾಳು ಸದ್ಯ ಹುಬ್ಬಳ್ಳಿಯ ಕಿಮ್ಸ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಪ್ರಕರಣದ ಕುರಿತು ಧಾರವಾಡ ಎಸ್ಪಿ ಗುಂಜನ್ ಆರ್ಯ ಮಾಹಿತಿ ಪಡೆದು ತನಿಖೆ ನಡೆಸುತ್ತಿದ್ದಾರೆ.
ಯುವಕ ಶರ್ವಿನ್ (22) ಮಾಧ್ಯಮಗಳಿಗೆ ನೀಡಿದ ಹೇಳಿಕೆಯ ಪ್ರಕಾರ, “ನಾನು ಹಾಗೂ ನನ್ನ ಗೆಳತಿ ಹುಬ್ಬಳ್ಳಿ ಹೊರವಲಯದ ಅಂಚಟಗೇರಿ ರಸ್ತೆಯ ಹೋಟೆಲೊಂದಕ್ಕೆ ಊಟಕ್ಕೆ ತೆರಳಿದ್ದ ವೇಳೆ ಒಬ್ಬ ಮಹಿಳೆ ಸೇರಿ ಆರು ಮಂದಿ ನಮ್ಮ ಬಳಿ ಆಧಾರ್ ಕಾರ್ಡ್ ತೋರಿಸುವಂತೆ ಕೇಳಿದರು. ನಮ್ಮ ಖಾಸಗಿ ದಾಖಲೆಗಳನ್ನು ಯಾಕೆ ತೋರಿಸಬೇಕು ಎಂದು ಪ್ರಶ್ನಿಸಿದಾಗ, ನಿಮ್ಮ ಜೊತೆ ಮಾತನಾಡಬೇಕು ಎಂದು ಹೋಟೆಲ್ ಹೊರಗೆ ಕರೆದುಕೊಂಡು ಬಂದು ನಾಲ್ವರು ನನ್ನ ಮೇಲೆ ಹಲ್ಲೆ ನಡೆಸಿದರು. ಬಳಿಕ ವಾಹನದಲ್ಲಿ ಕರೆದೊಯ್ದು ಕೊಠಡಿಯೊಂದರಲ್ಲಿ ಕೂಡಿ ಹಾಕಿ ಹಲ್ಲೆ ನಡೆಸಿದರು” ಎಂದು ಆರೋಪಿಸಿದ್ದಾರೆ.
“ನನ್ನ ಜೊತೆ ಇದ್ದ ಹುಡುಗಿಯನ್ನು ಬೇರೆಡೆಗೆ ಕರೆದೊಯ್ದು ಆಕೆಗೂ ದೈಹಿಕ ಹಿಂಸೆ ನೀಡಿದ್ದಾರೆ. ಇಷ್ಟಕ್ಕೆ ಬಿಡದೆ ನೀನು ಮುಸ್ಲಿಂ ಸಮುದಾಯದವನೋ ಎಂದು ಪ್ರಶ್ನಿಸಿದರು. ನಾನು ಮುಸ್ಲಿಂ ಅಲ್ಲ, ಕ್ರಿಶ್ಚಿಯನ್ ಎಂದು ಹೇಳಿದರೂ ಮತ್ತಷ್ಟು ಬೈದು ಹಲ್ಲೆ ನಡೆಸಿದರು” ಎಂದು ಶರ್ವಿನ್ ಆರೋಪಿಸಿದ್ದಾರೆ.
“ನನಗೆ ಹೊಡೆದು, ನಾವು ಹೇಳಿದಂತೆ ಮಾತನಾಡು ಎಂದು ಒತ್ತಾಯಿಸಿ ವೀಡಿಯೊ ಚಿತ್ರೀಕರಿಸಿದರು. ಆ ವೀಡಿಯೊದಲ್ಲಿ ನಾನು ಈಕೆಯೊಂದಿಗೆ ಬಲವಂತವಾಗಿ ಪ್ರೀತಿ ಮಾಡಿದ್ದೇನೆ ಹಾಗೂ ಇದೇ ರೀತಿ ಇನ್ನೂ ಮೂವರು ಹುಡುಗಿಯರೊಂದಿಗೆ ಪ್ರೀತಿಸಿದ್ದೇನೆ, ನನ್ನಿಂದ ತಪ್ಪಾಗಿದೆ ಎಂದು ಹೇಳುವಂತೆ ಮಾಡಿದರು. ಅಲ್ಲಿಂದ ಹೊರಬಂದ ಬಳಿಕ ಪೊಲೀಸರಿಗೆ ಅಥವಾ ಇತರರಿಗೆ ವಿಷಯ ತಿಳಿಸಿದರೆ ನಿನ್ನನ್ನು ಹರಿದು ಚೆಲ್ಲುತ್ತೇವೆ ಎಂದು ಪ್ರಾಣ ಬೆದರಿಕೆ ಹಾಕಿದರು. ಈ ಘಟನೆಯಲ್ಲಿ ಒಬ್ಬ ಮಹಿಳೆ ಸೇರಿದಂತೆ ಇಪ್ಪತ್ತಕ್ಕೂ ಹೆಚ್ಚು ಜನರ ತಂಡ ಭಾಗಿಯಾಗಿದ್ದು, ಬಂದು ಹೋಗುತ್ತಾ ಹಲ್ಲೆ ನಡೆಸುತ್ತಿದ್ದರು ” ಎಂದು ಶರ್ವಿನ್ ಆರೋಪಿಸಿದ್ದಾನೆ.
ಸಂತ್ರಸ್ತ ಯುವಕ ಶರ್ವಿನ್ (22) ತಾನು ಕ್ರಿಶ್ಚಿಯನ್ ಸಮುದಾಯದವನು ಎಂದು ತಿಳಿಸಿದರೂ ಆರೋಪಿಗಳು ಅದನ್ನು ಲೆಕ್ಕಿಸದೆ ಕಿರುಕುಳ ಮುಂದುವರಿಸಿದ್ದಾರೆ ಎನ್ನಲಾಗಿದೆ. ಯುವಕ, ಯುವತಿಯನ್ನು ಸುಮಾರು ಆರು ಗಂಟೆಗಳ ಕಾಲ ಪ್ರತ್ಯೇಕ ಸ್ಥಳಗಳಲ್ಲಿ ಇರಿಸಿ ಹಲ್ಲೆ ನಡೆಸಲಾಗಿದೆ ಎಂದು ಆರೋಪಿಸಲಾಗಿದೆ.
ಹಲ್ಲೆಯಿಂದ ಗಂಭೀರವಾಗಿ ಗಾಯಗೊಂಡಿರುವ ಶರ್ವಿನ್ ಅವರನ್ನು ಹುಬ್ಬಳ್ಳಿಯ ಕಿಮ್ಸ್ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಚಿಕಿತ್ಸೆ ಮುಂದುವರಿದಿದೆ. ಘಟನೆ ತಿಳಿದು ಧಾರವಾಡ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಆಸ್ಪತ್ರೆಗೆ ಭೇಟಿ ನೀಡಿ ಸಂತ್ರಸ್ತರಿಂದ ಮಾಹಿತಿ ಪಡೆದಿದ್ದಾರೆ.
ಈ ಘಟನೆ ಹುಬ್ಬಳ್ಳಿ ಗ್ರಾಮೀಣ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದ್ದು, ಪ್ರಕರಣಕ್ಕೆ ಸಂಬಂಧಿಸಿದಂತೆ ತನಿಖೆ ಮುಂದುವರಿದಿದೆ.
