NEET–UG ಪರೀಕ್ಷೆಯಲ್ಲಿ ವಿದೇಶಿ ಅಭ್ಯರ್ಥಿಗಳ ವಿಭಾಗದಲ್ಲಿ ಅಯಾನ್ ಯೂಸುಫ್ ಕೊಳ್ನಾಡುಗೆ ಮೊದಲ ರ‍್ಯಾಂಕ್

ಜುಬೈಲ್, ಜು.18: ಸೌದಿ ಅರೇಬಿಯಾದ ಜುಬೈಲ್ ನಲ್ಲಿ ವ್ಯಾಸಂಗ ಮಾಡುತ್ತಿರುವ, ದಕ್ಷಿಣ ಕನ್ನಡ ಜಿಲ್ಲೆಯ ವಿಟ್ಲದ ವಿದ್ಯಾರ್ಥಿ ಮುಹಮ್ಮದ್ ಅಯಾನ್ ಯೂಸುಫ್ ಕೊಳ್ನಾಡು ಅವರು NEET–UG 2026 ಪರೀಕ್ಷೆಯಲ್ಲಿ ವಿದೇಶಿ ಅಭ್ಯರ್ಥಿಗಳ ವಿಭಾಗದಲ್ಲಿ ಮೊದಲ ರ‍್ಯಾಂಕ್ ಪಡೆದಿದ್ದಾರೆ.

ಅಬ್ದುಲ್ ಸಮದ್ ಕೊಳ್ನಾಡು ಮತ್ತು ನುಸೈಬಾ ಚೂರಿ ಅಬ್ದುಲ್ಲಾ ದಂಪತಿಯ ಪುತ್ರರಾಗಿರುವ ಅಯಾನ್, ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (NTA) ಜುಲೈ 16ರಂದು ಪ್ರಕಟಿಸಿದ NEET–UG 2026 ಮರುಪರೀಕ್ಷೆಯಲ್ಲಿ ಶೇ. 99.9253 ಫಲಿತಾಂಶ ಗಳಿಸಿದ್ದಾರೆ. ಇದರೊಂದಿಗೆ ವಿದೇಶಿ ಅಭ್ಯರ್ಥಿಗಳ ಪೈಕಿ ಅತ್ಯುನ್ನತ ಸಾಧನೆ ಮಾಡಿದ ಅಭ್ಯರ್ಥಿಗಳಲ್ಲಿ ಒಬ್ಬರಾಗಿ ಗುರುತಿಸಿಕೊಂಡಿದ್ದಾರೆ.

ಅಯಾನ್ ಈ ಹಿಂದೆಯೂ ಶೈಕ್ಷಣಿಕ ಸಾಧನೆಗಳಿಂದ ಗಮನ ಸೆಳೆದಿದ್ದರು. ಈ ವರ್ಷದ ಆರಂಭದಲ್ಲಿ ಜುಬೈಲ್ ನ ಇಂಟರ್ನ್ಯಾಷನಲ್ ಇಂಡಿಯನ್ ಸ್ಕೂಲ್ (IISJ)ನ CBSE 12ನೇ ತರಗತಿ ವಿಜ್ಞಾನ ವಿಭಾಗದ ಪರೀಕ್ಷೆಯಲ್ಲಿ 500 ಅಂಕಗಳಿಗೆ 485 ಅಂಕ (ಶೇ.97) ಗಳಿಸಿ ಶಾಲೆಯ ಟಾಪರ್ ಆಗಿದ್ದರು. CBSE 10ನೇ ತರಗತಿಯಲ್ಲೂ ಶೇ.98 ಅಂಕ ಗಳಿಸಿದ್ದರು.

ಸ್ಪರ್ಧಾತ್ಮಕ ಪರೀಕ್ಷೆಗಳಲ್ಲೂ ಅವರು ನಿರಂತರ ಸಾಧನೆ ಮಾಡಿದ್ದಾರೆ. 2025ರಲ್ಲಿ ನಡೆದ ALLEN Overseas Talentex ಪ್ರತಿಭಾ ಶೋಧ ಪರೀಕ್ಷೆಯಲ್ಲಿ ಅಯಾನ್ ಸೌದಿ ಅರೇಬಿಯಾ ಮಟ್ಟದಲ್ಲಿ ಪ್ರಥಮ ರ‍್ಯಾಂಕ್ ಗಳಿಸಿ ಗಮನ ಸೆಳೆದಿದ್ದರು

ಪುತ್ತೂರಿನ ಸುದಾನ ವಸತಿ ಶಾಲೆಯಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದ ಸಂದರ್ಭದಲ್ಲಿ, 2019ರಲ್ಲಿ ನಡೆದ ಭಾರತೀಯ ರಾಷ್ಟ್ರೀಯ ಸ್ಪೆಲ್ ಬಿ ಸ್ಪರ್ಧೆಯಲ್ಲಿ ಅಯಾನ್ ಆರನೇ ರ‍್ಯಾಂಕ್ ಗಳಿಸಿದ್ದರು. ಅವರ ಪ್ರತಿಭೆ ಬಾಲ್ಯದಲ್ಲಿಯೇ ಗಮನಸೆಳೆದಿತ್ತು.

ಅಯಾನ್ ತಮ್ಮ ಪ್ರಾಥಮಿಕ ಶಿಕ್ಷಣವನ್ನು ಕರ್ನಾಟಕದ ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರಿನ Sudana Residential Schoolನಲ್ಲಿ ಪಡೆದಿದ್ದಾರೆ. ನಂತರ ಸೌದಿ ಅರೇಬಿಯಾದ ಅಲ್ ಜುಬೈಲ್ ನ International Indian School, Jubail (IISJ)ನಲ್ಲಿ ಪ್ರೌಢಶಾಲೆ ಹಾಗೂ 11 ಮತ್ತು 12ನೇ ತರಗತಿ ಶಿಕ್ಷಣ ಪೂರ್ಣಗೊಳಿಸಿದ್ದಾರೆ.