ಬಹ್ರೇನ್ ಕ್ರಿಕೆಟ್ ಫೆಡರೇಷನ್‌ ನ CEO ಆಗಿ ದಿನೇಶ್ ಮುತ್ತುರಾಮನ್ ನೇಮಕ

ಮನಾಮ: ಬಹ್ರೇನ್ ಅನ್ನು ಗಲ್ಫ್ ಮತ್ತು ಏಷ್ಯಾ ಪ್ರದೇಶದ ಪ್ರಮುಖ ಕ್ರಿಕೆಟ್ ಕೇಂದ್ರವಾಗಿ ರೂಪಿಸುವ ಗುರಿಯೊಂದಿಗೆ ಬಹ್ರೇನ್ ಕ್ರಿಕೆಟ್ ಫೆಡರೇಷನ್ (BCF), ದಿನೇಶ್ ಮುತ್ತುರಾಮನ್ ಅವರನ್ನು ನೂತನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (ಸಿಇಒ) ಆಗಿ ನೇಮಕ ಮಾಡಿದೆ.

ಅಂತರರಾಷ್ಟ್ರೀಯ ಕ್ರಿಕೆಟ್‌ ನಲ್ಲಿ ಬಹ್ರೇನ್‌ನ ಸ್ಥಾನ ಬಲಪಡಿಸುವುದು, ಸ್ಥಳೀಯ ಪ್ರತಿಭೆಗಳನ್ನು ಗುರುತಿಸಿ ಬೆಳೆಸುವುದು, ರಾಷ್ಟ್ರೀಯ ತಂಡಗಳ ಪ್ರದರ್ಶನ ಸುಧಾರಿಸುವುದು ಹಾಗೂ ಅಂತರರಾಷ್ಟ್ರೀಯ ಪಂದ್ಯಾವಳಿಗಳ ಆಯೋಜನೆಗೆ ದೇಶವನ್ನು ಪ್ರಮುಖ ತಾಣವಾಗಿ ರೂಪಿಸುವುದು ಈ ನೇಮಕದ ಪ್ರಮುಖ ಉದ್ದೇಶಗಳಾಗಿವೆ.

ಅಕ್ಟೋಬರ್ 13ರಂದು ನೇಮಕವನ್ನು ಪ್ರಕಟಿಸಿದ ಫೆಡರೇಷನ್, ವೃತ್ತಿಪರ ಆಡಳಿತ, ಗುಣಮಟ್ಟದ ತರಬೇತಿ ವ್ಯವಸ್ಥೆ, ಆಧುನಿಕ ಕ್ರೀಡಾ ಮೂಲಸೌಕರ್ಯ ಮತ್ತು ಸುಸ್ಥಿರ ವಾಣಿಜ್ಯ ಪಾಲುದಾರಿಕೆಗಳ ಮೂಲಕ ಬಹ್ರೇನ್ ಕ್ರಿಕೆಟ್ ಅನ್ನು ಹೊಸ ಎತ್ತರಕ್ಕೆ ಕೊಂಡೊಯ್ಯುವ ಗುರಿ ಹೊಂದಿದೆ.

ಮಲೇಷ್ಯಾ ಕ್ರಿಕೆಟ್‌ ನಲ್ಲಿ 18 ವರ್ಷಗಳ ಅನುಭವ

ದಿನೇಶ್ ಮುತ್ತುರಾಮನ್ ಅವರು ಮಲೇಷ್ಯಾ ಕ್ರಿಕೆಟ್ ಅಸೋಸಿಯೇಷನ್‌ನಲ್ಲಿ (MCA) 18 ವರ್ಷಗಳ ಅನುಭವ ಹೊಂದಿದ್ದಾರೆ. ಅಭಿವೃದ್ಧಿ ಅಧಿಕಾರಿಯಾಗಿ ವೃತ್ತಿಜೀವನ ಆರಂಭಿಸಿದ ಅವರು, ವಿವಿಧ ನಾಯಕತ್ವದ ಹುದ್ದೆಗಳನ್ನು ನಿರ್ವಹಿಸಿ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ ಸೇವೆ ಸಲ್ಲಿಸಿದ್ದಾರೆ.

2004ರಿಂದ 2011ರವರೆಗೆ ಮಲೇಷ್ಯಾ ರಾಷ್ಟ್ರೀಯ ತಂಡವನ್ನು ಪ್ರತಿನಿಧಿಸಿದ್ದ ಅವರು, ಆಟಗಾರನಾಗಿ ಹಾಗೂ ಕ್ರಿಕೆಟ್ ಆಡಳಿತಗಾರನಾಗಿ ಅನುಭವ ಗಳಿಸಿದ್ದಾರೆ.

ತಳಮಟ್ಟದ ಮತ್ತು ಯುವ ಕ್ರಿಕೆಟ್ ಅಭಿವೃದ್ಧಿ, ರಾಷ್ಟ್ರೀಯ ತಂಡಗಳಿಗೆ ಆಟಗಾರರನ್ನು ಸಜ್ಜುಗೊಳಿಸುವುದು, ಉನ್ನತ ಮಟ್ಟದ ತರಬೇತಿ ಕಾರ್ಯಕ್ರಮಗಳು, ಅಂತರರಾಷ್ಟ್ರೀಯ ಪಂದ್ಯಾವಳಿಗಳ ನಿರ್ವಹಣೆ, ವಾಣಿಜ್ಯ ಅಭಿವೃದ್ಧಿ ಹಾಗೂ ಕ್ರೀಡಾ ಆಡಳಿತದಲ್ಲಿ ಅವರು ಪರಿಣತಿ ಹೊಂದಿದ್ದಾರೆ.

ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ICC), ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ (ACC) ಮತ್ತು ವಿವಿಧ ದೇಶಗಳ ಕ್ರಿಕೆಟ್ ಮಂಡಳಿಗಳೊಂದಿಗೆ ಕಾರ್ಯನಿರ್ವಹಿಸಿರುವ ಅನುಭವವೂ ಅವರಿಗಿದೆ.

ಮಲೇಷ್ಯಾದಲ್ಲಿ ನಡೆದ ICC ಮಹಿಳಾ ಅಂಡರ್‌-19 ಟಿ20 ವಿಶ್ವಕಪ್‌ ನ ಟೂರ್ನಮೆಂಟ್ ನಿರ್ದೇಶಕರಾಗಿ, ಚೀನಾದಲ್ಲಿ ನಡೆದ 2023ರ ಏಷ್ಯನ್ ಕ್ರೀಡಾಕೂಟದ ಕ್ರಿಕೆಟ್ ವಿಭಾಗದ ಟೂರ್ನಮೆಂಟ್ ನಿರ್ದೇಶಕರಾಗಿ ಅವರು ಕಾರ್ಯನಿರ್ವಹಿಸಿದ್ದರು. 2017ರಲ್ಲಿ ಮಲೇಷ್ಯಾದಲ್ಲಿ ನಡೆದ ಆಗ್ನೇಯ ಏಷ್ಯಾ ಕ್ರೀಡಾಕೂಟದಲ್ಲಿ (SEA Games) ಕ್ರಿಕೆಟ್ ವಿಭಾಗದ ತಾಂತ್ರಿಕ ಪ್ರತಿನಿಧಿಗಳ ಮುಖ್ಯಸ್ಥರಾಗಿಯೂ ಸೇವೆ ಸಲ್ಲಿಸಿದ್ದರು. ಹಲವು ICC ಮತ್ತು ACC ಪಂದ್ಯಾವಳಿಗಳ ಆಯೋಜನೆಯಲ್ಲೂ ಪಾಲ್ಗೊಂಡಿದ್ದರು.

ಸರ್ಕಾರಿ ಶಾಲೆಗಳಿಂದ ಕ್ರಿಕೆಟ್ ಪ್ರತಿಭೆ ಗುರುತಿಸುವ ಯೋಜನೆ

ಬಹ್ರೇನ್‌ ನಲ್ಲಿ ಕ್ರಿಕೆಟ್‌ನ ಭವಿಷ್ಯವನ್ನು ಶಾಲಾ ಹಂತದಿಂದಲೇ ರೂಪಿಸುವುದು ಫೆಡರೇಷನ್‌ ನ ಪ್ರಮುಖ ಆದ್ಯತೆಯಾಗಿದೆ. ವಿಶೇಷವಾಗಿ ಸರ್ಕಾರಿ ಶಾಲೆಗಳ ಬಾಲಕ ಮತ್ತು ಬಾಲಕಿಯರಿಗೆ ಕ್ರಿಕೆಟ್ ತರಬೇತಿ ನೀಡುವ ಮೂಲಕ ಸ್ಥಳೀಯ ಪ್ರತಿಭೆಗಳನ್ನು ಗುರುತಿಸಿ ಬೆಳೆಸಲು ಉದ್ದೇಶಿಸಲಾಗಿದೆ.

ಶಾಲೆಗಳಲ್ಲಿ ಆರಂಭವಾಗುವ ತರಬೇತಿ ಕಾರ್ಯಕ್ರಮಗಳ ಮೂಲಕ ಪ್ರತಿಭಾವಂತ ಆಟಗಾರರನ್ನು ಗುರುತಿಸಿ, ಅಕಾಡೆಮಿಗಳು, ದೇಶೀಯ ಸ್ಪರ್ಧೆಗಳು ಮತ್ತು ರಾಷ್ಟ್ರೀಯ ತಂಡಗಳನ್ನು ತಲುಪಲು ಸ್ಪಷ್ಟ ಮಾರ್ಗಗಳನ್ನು ರೂಪಿಸುವ ಯೋಜನೆಯನ್ನು ಫೆಡರೇಷನ್ ಹೊಂದಿದೆ.

ಯುವಜನ ಮತ್ತು ಕ್ರೀಡಾ ಅಭಿವೃದ್ಧಿಗೆ ಸಂಬಂಧಿಸಿದ ಶೇಖ್ ಖಾಲಿದ್ ಬಿನ್ ಹಮದ್ ಅಲ್ ಖಲೀಫಾ ಅವರ ದೂರದೃಷ್ಟಿಗೆ ಅನುಗುಣವಾಗಿ ಈ ಯೋಜನೆಯನ್ನು ಅನುಷ್ಠಾನಗೊಳಿಸಲಾಗುವುದು ಎಂದು BCFನ ಸಲಹಾ ಮಂಡಳಿ ಅಧ್ಯಕ್ಷ ಹಾಗೂ ಏಷ್ಯನ್ ಕ್ರಿಕೆಟ್ ಕೌನ್ಸಿಲ್‌ ನ ಕಾರ್ಯಕಾರಿ ಮಂಡಳಿ ಸದಸ್ಯ ಮುಹಮ್ಮದ್ ಮನ್ಸೂರ್ ತಿಳಿಸಿದ್ದಾರೆ.

ಮಹಿಳಾ ಕ್ರಿಕೆಟ್‌ ಗೆ ಹೆಚ್ಚಿನ ಅವಕಾಶ ಕಲ್ಪಿಸುವುದು, ತರಬೇತುದಾರರು ಮತ್ತು ಅಧಿಕಾರಿಗಳ ಕೌಶಲ ವೃದ್ಧಿಸುವುದು ಹಾಗೂ ಕ್ರಿಕೆಟ್‌ನ ಪ್ರಯೋಜನಗಳನ್ನು ವಿಶಾಲ ಸಮುದಾಯಕ್ಕೆ ತಲುಪಿಸುವುದಕ್ಕೂ ಆದ್ಯತೆ ನೀಡಲಾಗುವುದು. ಈ ಯೋಜನೆಗಳ ಅನುಷ್ಠಾನಕ್ಕಾಗಿ ಸರ್ಕಾರಿ ಇಲಾಖೆಗಳು, ಶಿಕ್ಷಣ ಸಂಸ್ಥೆಗಳು, ಶಾಲೆಗಳು ಮತ್ತು ಸಮುದಾಯದ ಪಾಲುದಾರರೊಂದಿಗೆ ಫೆಡರೇಷನ್ ಕಾರ್ಯನಿರ್ವಹಿಸಲಿದೆ.

ಅಂತರರಾಷ್ಟ್ರೀಯ ಪಂದ್ಯಾವಳಿಗಳ ಆತಿಥ್ಯಕ್ಕೆ ಸಿದ್ಧತೆ

ಬಹ್ರೇನ್‌ ನ ಪುರುಷರ, ಮಹಿಳೆಯರ ಮತ್ತು ಯುವ ರಾಷ್ಟ್ರೀಯ ತಂಡಗಳ ಪ್ರದರ್ಶನ ಸುಧಾರಿಸಲು ಸಮಗ್ರ ತರಬೇತಿ ಕಾರ್ಯತಂತ್ರ ರೂಪಿಸುವುದು ಫೆಡರೇಷನ್‌ ನ ಮತ್ತೊಂದು ಪ್ರಮುಖ ಗುರಿಯಾಗಿದೆ.

ತರಬೇತಿ ವ್ಯವಸ್ಥೆಯನ್ನು ಬಲಪಡಿಸುವುದು, ಆಟಗಾರರಿಗೆ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಹೆಚ್ಚಿನ ಅವಕಾಶ ಕಲ್ಪಿಸುವುದು, ಪ್ರತಿಭೆ ಗುರುತಿಸುವ ವ್ಯವಸ್ಥೆ ಅಭಿವೃದ್ಧಿಪಡಿಸುವುದು ಹಾಗೂ ಪ್ರಮುಖ ಕ್ರಿಕೆಟ್ ರಾಷ್ಟ್ರಗಳೊಂದಿಗೆ ಸಂಬಂಧ ವೃದ್ಧಿಸುವುದು ಈ ಕಾರ್ಯತಂತ್ರದ ಭಾಗವಾಗಿವೆ.

ದ್ವಿಪಕ್ಷೀಯ ಸರಣಿಗಳು, ತರಬೇತಿ ಶಿಬಿರಗಳು ಮತ್ತು ಪಂದ್ಯಾವಳಿಗಳಿಗಾಗಿ ಅಂತರರಾಷ್ಟ್ರೀಯ ತಂಡಗಳನ್ನು ಬಹ್ರೇನ್‌ ಗೆ ಆಹ್ವಾನಿಸುವ ಸಾಧ್ಯತೆಗಳನ್ನೂ ಪರಿಶೀಲಿಸಲಾಗುವುದು.

ಆಧುನಿಕ ಕ್ರೀಡಾ ಸೌಲಭ್ಯಗಳು, ವೃತ್ತಿಪರ ಪಂದ್ಯಾವಳಿ ನಿರ್ವಹಣೆ ಮತ್ತು ಉತ್ತಮ ಪ್ರಾದೇಶಿಕ ಸಂಪರ್ಕವನ್ನು ಬಳಸಿಕೊಂಡು ಬಹ್ರೇನ್ ಅನ್ನು ಅಂತರರಾಷ್ಟ್ರೀಯ ಕ್ರಿಕೆಟ್‌ ನ ಆಕರ್ಷಕ ತಾಣವಾಗಿ ರೂಪಿಸಲು ಫೆಡರೇಷನ್ ಉದ್ದೇಶಿಸಿದೆ.

ಕಾರ್ಪೊರೇಟ್ ಪ್ರಾಯೋಜಕತ್ವಗಳು, ಕಾರ್ಯತಂತ್ರದ ಪಾಲುದಾರಿಕೆಗಳು ಮತ್ತು ಪಂದ್ಯಾವಳಿಗಳ ಆಯೋಜನೆಯ ಮೂಲಕ ಆದಾಯದ ಮೂಲಗಳನ್ನು ವಿಸ್ತರಿಸಿ, ಸಂಸ್ಥೆಯ ಆರ್ಥಿಕ ಸುಸ್ಥಿರತೆಯನ್ನು ಬಲಪಡಿಸುವ ಯೋಜನೆಯೂ ಇದೆ.

ಬಹ್ರೇನ್‌ ಗೆ ಭೌಗೋಳಿಕ ಅನುಕೂಲ, ಅಂತರರಾಷ್ಟ್ರೀಯ ಸಂಪರ್ಕ, ಕ್ರೀಡಾ ಮಹತ್ವಾಕಾಂಕ್ಷೆ ಮತ್ತು ಸಾಂಸ್ಥಿಕ ಬೆಂಬಲವಿದೆ. ಈ ಸಾಮರ್ಥ್ಯವನ್ನು ಬಳಸಿಕೊಳ್ಳಲು ಅಗತ್ಯವಾದ ಮೂಲಸೌಕರ್ಯ, ವೃತ್ತಿಪರ ವ್ಯವಸ್ಥೆಗಳು ಮತ್ತು ಅಂತರರಾಷ್ಟ್ರೀಯ ಪಾಲುದಾರಿಕೆಗಳನ್ನು ಅಭಿವೃದ್ಧಿಪಡಿಸುವುದು ಮುಖ್ಯವಾಗಿದೆ ಎಂದು ಮನ್ಸೂರ್ ಹೇಳಿದ್ದಾರೆ.

ಬಹ್ರೇನ್ ತಂಡಗಳು ಕ್ರಿಕೆಟ್‌ನಲ್ಲಿ ಉತ್ತಮ ಪ್ರದರ್ಶನ ನೀಡುವುದಷ್ಟೇ ಅಲ್ಲದೆ, ಕ್ರಿಕೆಟ್ ಆಡಳಿತ ಮತ್ತು ಪಂದ್ಯಾವಳಿಗಳ ಆಯೋಜನೆಯಲ್ಲೂ ಉತ್ತಮ ಗುಣಮಟ್ಟ ಕಾಯ್ದುಕೊಳ್ಳಬೇಕು. ಎಲ್ಲರಿಗೂ ಕ್ರಿಕೆಟ್‌ನಲ್ಲಿ ಪಾಲ್ಗೊಳ್ಳಲು ಅವಕಾಶ ಕಲ್ಪಿಸುವುದರ ಜತೆಗೆ, ಅಂತರರಾಷ್ಟ್ರೀಯ ಕ್ರಿಕೆಟ್‌ನ ಬೆಳವಣಿಗೆಗೂ ಕೊಡುಗೆ ನೀಡಬೇಕು ಎಂಬುದು ಫೆಡರೇಷನ್‌ ನ ಉದ್ದೇಶವಾಗಿದೆ ಎಂದು ಅವರು ತಿಳಿಸಿದ್ದಾರೆ.

ರಾಷ್ಟ್ರೀಯ ತಂಡಗಳ ಪ್ರದರ್ಶನ ಸುಧಾರಿಸುವ ವಿಶ್ವಾಸ

BCF ಅಧ್ಯಕ್ಷ ಸಮಿ ಮೊಹಮ್ಮದ್ ಅಲಿ ಅವರು ದಿನೇಶ್ ಮುತ್ತುರಾಮನ್ ಅವರನ್ನು ಸ್ವಾಗತಿಸಿದ್ದು, ಅವರ ಅಂತರರಾಷ್ಟ್ರೀಯ ಅನುಭವ ಮತ್ತು ಕ್ರಿಕೆಟ್ ಆಡಳಿತದಲ್ಲಿನ ಪರಿಣತಿಯು ಸಂಸ್ಥೆಯ ಬೆಳವಣಿಗೆಗೆ ನೆರವಾಗಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ದೇಶೀಯ ಕ್ರಿಕೆಟ್ ವ್ಯವಸ್ಥೆಯನ್ನು ಬಲಪಡಿಸುವುದು, ರಾಷ್ಟ್ರೀಯ ತಂಡಗಳ ಪ್ರದರ್ಶನ ಸುಧಾರಿಸುವುದು, ತಳಮಟ್ಟದ ಮತ್ತು ಮಹಿಳಾ ಕ್ರಿಕೆಟ್ ವಿಸ್ತರಿಸುವುದು ಹಾಗೂ ಅಂತರರಾಷ್ಟ್ರೀಯ ಸ್ಪರ್ಧೆಗಳನ್ನು ಆಯೋಜಿಸುವ ಸಾಮರ್ಥ್ಯ ಬೆಳೆಸುವುದು ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ಅವರೊಂದಿಗೆ ಕಾರ್ಯನಿರ್ವಹಿಸುವುದಾಗಿ ತಿಳಿಸಿದ್ದಾರೆ.

ನೂತನ ಸಿಇಒ ಆಗಿ ದಿನೇಶ್ ಅವರು ಫೆಡರೇಷನ್‌ನ ಆಡಳಿತ ಮಂಡಳಿ, ಸಲಹಾ ಮಂಡಳಿ, ನಿರ್ವಹಣಾ ವಿಭಾಗ, ತಾಂತ್ರಿಕ ತಂಡಗಳು ಮತ್ತು ಪಾಲುದಾರರೊಂದಿಗೆ ಸಮನ್ವಯ ಸಾಧಿಸಿ ಕಾರ್ಯತಂತ್ರದ ಯೋಜನೆಗಳನ್ನು ಜಾರಿಗೊಳಿಸಲಿದ್ದಾರೆ.

ಆಡಳಿತ ವ್ಯವಸ್ಥೆಯ ಬಲವರ್ಧನೆ, ಶಾಲಾ ಕ್ರಿಕೆಟ್ ಅಭಿವೃದ್ಧಿ, ರಾಷ್ಟ್ರೀಯ ತಂಡಗಳ ಪ್ರದರ್ಶನ ಸುಧಾರಣೆ, ದೇಶೀಯ ಸ್ಪರ್ಧೆಗಳ ವಿಸ್ತರಣೆ, ಮಹಿಳಾ ಕ್ರಿಕೆಟ್‌ ಗೆ ಉತ್ತೇಜನ ಮತ್ತು ಅಂತರರಾಷ್ಟ್ರೀಯ ಪಾಲುದಾರಿಕೆಗಳ ಸ್ಥಾಪನೆ ಅವರ ತಕ್ಷಣದ ಆದ್ಯತೆಗಳಾಗಿವೆ.

ಸ್ಥಳೀಯ ಪ್ರತಿಭೆಗಳ ಅಭಿವೃದ್ಧಿ, ಬಲಿಷ್ಠ ರಾಷ್ಟ್ರೀಯ ತಂಡಗಳ ನಿರ್ಮಾಣ ಮತ್ತು ಅಂತರರಾಷ್ಟ್ರೀಯ ಪಂದ್ಯಾವಳಿಗಳ ಆಯೋಜನೆಯ ಮೂಲಕ ಬಹ್ರೇನ್ ಅನ್ನು ಪ್ರಮುಖ ಪ್ರಾದೇಶಿಕ ಕ್ರಿಕೆಟ್ ಕೇಂದ್ರವಾಗಿ ಬೆಳೆಸಲು BCF ಮುಂದಾಗಿದೆ.