ಮನ್ಹಾಜ್ ಅಲ್-ಅಂಬಿಯಾ ಕುವೈತ್ ಫುಟ್ಬಾಲ್ ಚಾಂಪಿಯನ್ಶಿಪ್: ರೈಸಿಂಗ್ ಸ್ಟಾರ್ಸ್ ಗೆ ಪ್ರಶಸ್ತಿ
ಕುವೈತ್ ಸಿಟಿ, ಜೂ. 28: ಮರ್ಹೂಂ ಶರೀಫ್ ಬೊಪ್ಪಳಿಗೆ ಅವರ ಸ್ಮರಣಾರ್ಥ ಆಯೋಜಿಸಲಾಗಿದ್ದ ಮನ್ಹಾಜ್ ಅಲ್-ಅಂಬಿಯಾ ಕುವೈತ್ ಫುಟ್ಬಾಲ್ ಚಾಂಪಿಯನ್ಶಿಪ್–2026ರ ಪ್ರಶಸ್ತಿಯನ್ನು ರೈಸಿಂಗ್ ಸ್ಟಾರ್ಸ್ ತಂಡ ಮುಡಿಗೇರಿಸಿಕೊಂಡಿತು.
ಮಗಾಫ್ ಎಸ್ಆರ್ಎಫ್ ಮೈದಾನದಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ರೈಸಿಂಗ್ ಸ್ಟಾರ್ಸ್ ತಂಡವು ಫ್ಯೂಚರ್ ಲೆಜೆಂಡ್ಸ್ ತಂಡವನ್ನು 5–1 ಗೋಲುಗಳಿಂದ ಮಣಿಸಿ ಚಾಂಪಿಯನ್ ಪಟ್ಟ ಅಲಂಕರಿಸಿತು. ಕುವೈತ್ನ ಯುವ ಫುಟ್ಬಾಲ್ ಆಟಗಾರರ ಪ್ರತಿಭೆಗೆ ವೇದಿಕೆಯಾಗಿದ್ದ ಈ ಪಂದ್ಯಾವಳಿಯು ರೋಚಕ ಹಾಗೂ ಮನರಂಜನಾತ್ಮಕ ಫೈನಲ್ ಪಂದ್ಯದೊಂದಿಗೆ ತೆರೆ ಕಂಡಿತು.
ರೈಸಿಂಗ್ ಸ್ಟಾರ್ಸ್ ತಂಡದ ಪರ ಸಾದ್ ಫಿರೋಝ್ ಹ್ಯಾಟ್ರಿಕ್ ಗೋಲು ದಾಖಲಿಸಿ ಮಿಂಚಿದರು. ಅವರ ಅದ್ಭುತ ಪ್ರದರ್ಶನಕ್ಕೆ ಪಂದ್ಯಶ್ರೇಷ್ಠ ಪ್ರಶಸ್ತಿ ಲಭಿಸಿತು. ತಂಡದ ನಾಯಕ ಹಂಝತ್ ಖಾದರ್ ಹಾಗೂ ಅಹ್ಮದ್ ರಫಾನ್ ರಶೀದ್ ತಲಾ ಒಂದು ಗೋಲು ಗಳಿಸಿ ತಂಡದ ಭರ್ಜರಿ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.
ತಂಡದ ಉಪನಾಯಕ ಜಯಾನ್ ಬಶೀರ್ ರಕ್ಷಣಾ ವಿಭಾಗದಲ್ಲಿ ಮಹತ್ವದ ಕೊಡುಗೆ ನೀಡಿದರು. ಗೋಲ್ಕೀಪರ್ ಅದ್ನಾನ್ ಖಾದರ್ ಫೈನಲ್ ಪಂದ್ಯದಲ್ಲಿ ಪೆನಾಲ್ಟಿ ತಡೆದು ಗಮನ ಸೆಳೆದರು. ಪಂದ್ಯಾವಳಿಯುದ್ದಕ್ಕೂ ತೋರಿದ ಸ್ಥಿರ ಪ್ರದರ್ಶನಕ್ಕಾಗಿ ಅವರಿಗೆ ಅತ್ಯುತ್ತಮ ಗೋಲ್ಕೀಪರ್ ಪ್ರಶಸ್ತಿ ಪ್ರದಾನ ಮಾಡಲಾಯಿತು.
ಫ್ಯೂಚರ್ ಲೆಜೆಂಡ್ಸ್ ತಂಡದ ಪರ ಸೈಹಾನ್ ಸತ್ತಾರ್ ಏಕೈಕ ಗೋಲು ದಾಖಲಿಸಿದರು. ರೈಸಿಂಗ್ ಸ್ಟಾರ್ಸ್ ತಂಡಕ್ಕೆ ರಶೀದ್ ಬೋಳಾರ್ ತರಬೇತಿ ನೀಡಿದ್ದರೆ, ಫ್ಯೂಚರ್ ಲೆಜೆಂಡ್ಸ್ ತಂಡಕ್ಕೆ ಬಶೀರ್ ಅರ್ಕುಳ ಮಾರ್ಗದರ್ಶನ ನೀಡಿದರು.
ಪಂದ್ಯಾವಳಿಯನ್ನು ಯಶಸ್ವಿಯಾಗಿ ಆಯೋಜಿಸಿದ್ದಕ್ಕಾಗಿ ಮುಖ್ಯ ಸಂಘಟಕ ಹನೀಫ್ ಮೂಡಿಗೆರೆ ಅವರಿಗೆ ಸಂಘಟಕರು ಕೃತಜ್ಞತೆ ಸಲ್ಲಿಸಿದರು. ಮನ್ಹಾಜ್ ಅಲ್-ಅಂಬಿಯಾ ಕುವೈತ್ ಅಧ್ಯಕ್ಷ ಮೊಹಮ್ಮದ್ ನೂರುದ್ದೀನ್, ಕೆಕೆಎಂಎ ಫಹಾಹೀಲ್ ಅಧ್ಯಕ್ಷ ಖಾದರ್ ಬೊಪ್ಪಳಿಗೆ ಹಾಗೂ ಸತಾರ್ ಸಿಟಿ ಕ್ಲಿನಿಕ್ ನೀಡಿದ ಬೆಂಬಲವನ್ನು ಅವರು ಸ್ಮರಿಸಿದರು.
ಫೈನಲ್ ಪಂದ್ಯವನ್ನು ಯಶಸ್ವಿಯಾಗಿ ನಿರ್ವಹಿಸಿದ ರೆಫರಿ ಈಸಾ ಬದ್ರು ಮುನೀರ್ ಅವರಿಗೆ ವಿಶೇಷ ಅಭಿನಂದನೆ ಸಲ್ಲಿಸಲಾಯಿತು. ಕುವೈತ್ ನಲ್ಲಿ ಯುವ ಆಟಗಾರರಲ್ಲಿ ಫುಟ್ಬಾಲ್ ಕ್ರೀಡೆಗೆ ಉತ್ತೇಜನ ನೀಡುವ ಮತ್ತು ಸಮುದಾಯ ಸಾಮರಸ್ಯವನ್ನು ಬೆಳೆಸುವ ಉದ್ದೇಶದಿಂದ ಆಯೋಜಿಸಲಾದ ಈ ಚಾಂಪಿಯನ್ಶಿಪ್, ಮರ್ಹೂಂ ಶರೀಫ್ ಬೊಪ್ಪಳಿಗೆ ಅವರ ಸ್ಮರಣೆಗೆ ಗೌರವ ಸಲ್ಲಿಸುತ್ತಾ ಕ್ರೀಡಾಸ್ಫೂರ್ತಿ ಮತ್ತು ಏಕತೆಯ ಸಂದೇಶದೊಂದಿಗೆ ಮುಕ್ತಾಯಗೊಂಡಿತು.
