ಉಮ್ರಾ ಯಾತ್ರಿಗಳಿಗೆ ಮೆನಿಂಜೈಟಿಸ್ ಲಸಿಕೆ ರದ್ದುಗೊಳಿಸಿದ ಸೌದಿ ಅರೇಬಿಯಾ

ರಿಯಾದ್: ಉಮ್ರಾ ಕೈಗೊಳ್ಳಲು ಸೌದಿ ಅರೇಬಿಯಾಗೆ ಪ್ರಯಾಣಿಸುವವರು ಇನ್ನು ಮುಂದೆ ನೈಸೆರಿಯ ಮೆನಿಂಜೈಟಿಸ್ ವಿರುದ್ಧ ಲಸಿಕೆ ತೆಗೆದುಕೊಳ್ಳಬೇಕಾದ ಅಗತ್ಯವಿಲ್ಲ ಎಂದು ಗುರುವಾರ ತನ್ನ ನೂತನ ಸುತ್ತೋಲೆಯಲ್ಲಿ ಸೌದಿ ಅರೇಬಿಯಾದ ಪ್ರಧಾನ ನಾಗರಿಕ ವಿಮಾನ ಯಾನ ಪ್ರಾಧಿಕಾರ ಮಾಹಿತಿ ನೀಡಿದೆ.

ಕಳೆದ ತಿಂಗಳು ಮೆನಿಂಜೈಟಿಸ್ ಲಸಿಕೆಯನ್ನು ಕಡ್ಡಾಯಗೊಳಿಸಿ ಹೊರಡಿಸಲಾಗಿದ್ದ ಹಿಂದಿನ ಸುತ್ತೋಲೆಯನ್ನು ರದ್ದುಗೊಳಿಸಿರುವ ಈ ಮಾರ್ಗಸೂಚಿಯ ಪಾಲನೆಗಾಗಿ ಸೌದಿ ಅರೇಬಿಯ ವಿಮಾನ ನಿಲ್ದಾಣಗಳಲ್ಲಿ ಕಾರ್ಯಾಚರಿಸುವ ಖಾಸಗಿ ವಿಮಾನ ಯಾನ ಸಂಸ್ಥೆಗಳು ಸೇರಿದಂತೆ ಎಲ್ಲ ವಿಮಾನ ಯಾನ ಸಂಸ್ಥೆಗಳಿಗೂ ರವಾನಿಸಲಾಗಿದೆ.

ಹಾಲಿ ಪ್ರಕಟಣೆಗೂ ಮುನ್ನ, ತಮ್ಮ ವೀಸಾ ಸ್ವರೂಪದ ಹೊರತಾಗಿಯೂ, ಉಮ್ರಾ ಯಾತ್ರಾರ್ಥಿಗಳು ಮೆನಿಂಜೈಟಿಸ್ ಲಸಿಕೆ ಪಡೆಯುವುದನ್ನು ಸೌದಿ ಅರೇಬಿಯಾದ ಅರೋಗ್ಯ ಸಚಿವಾಲಯ ಕಡ್ಡಾಯಗೊಳಿಸಿತ್ತು. ಈ ಲಸಿಕೆಯನ್ನು ಸೌದಿ ಅರೇಬಿಯಾಗೆ ಆಗಮಿಸುವುದಕ್ಕೂ ಮುನ್ನ ಪಡೆಯಬೇಕಾಗಿತ್ತು.

ತಮ್ಮ ಪ್ರವಾಸಕ್ಕೂ ಮುನ್ನ, ಹಜ್ ಹಾಗೂ ಉಮ್ರಾ ಯಾತ್ರಾರ್ಥಿಗಳು ಈ ಲಸಿಕೆ ಪಡೆಯವುದನ್ನು ಸೌದಿ ಅರೇಬಿಯಾದ ಪ್ರಾಧಿಕಾರಗಳು ಕಳೆದ ವರ್ಷದ ಮಾರ್ಚ್ ತಿಂಗಳಲ್ಲಿ ಕಡ್ಡಾಯಗೊಳಿಸಿದ್ದವು.

ವಾರ್ತಾ ಭಾರತಿಯ ವಾಟ್ಸ್ ಆ್ಯಪ್ ಚಾನಲ್ ಗೆ ಸೇರಲು ಕ್ಲಿಕ್‌ ಮಾಡಿ
https://whatsapp.com/channel/0029VaA8ju86LwHn9OQpEq28