COP-28: ಹವಾಮಾನ ಬದಲಾವಣೆ ವಿರುದ್ಧ ಹೋರಾಟದಲ್ಲಿ ತುರ್ತುಕ್ರಮ ಕುರಿತು ಚರ್ಚೆ

ದುಬೈ: ಇಲ್ಲಿ ಆಯೋಜಿಸಲಾದ COP-28 ವಾರ್ಷಿಕ ಸಮಾವೇಶ (ವಿಶ್ವಸಂಸ್ಥೆಯ ಹವಾಮಾನ ಬದಲಾವಣೆ ಸಮಾವೇಶ)ದಲ್ಲಿ ಸೋಮವಾರ ದಕ್ಷಿಣ ಏಶ್ಯಾದಲ್ಲಿ ನ್ಯಾಯಯುತ ಪರಿವರ್ತನೆ ಕುರಿತು ನಡೆದ ಸುದ್ದಿಗೋಷ್ಠಿಯು ಎದುರಾಗಲಿರುವ ಹವಾಮಾನ ಬಿಕ್ಕಟ್ಟನ್ನು ಎದುರಿಸಲು ತಕ್ಷಣದ ಕ್ರಮದ ಅಗತ್ಯವನ್ನು ಎತ್ತಿ ತೋರಿಸಿದೆ. ದಕ್ಷಿಣ ಏಶ್ಯಾದಲ್ಲಿ ಸಮಾನ ಮತ್ತು ನ್ಯಾಯಯುತ ಪರಿವರ್ತನೆಯನ್ನು ಖಚಿತಪಡಿಸಲು ಪ್ರಮುಖ ದೇಶಗಳಿಂದ ನಿರ್ಣಾಯಕ ನಿರ್ಧಾರಗಳು ಮತ್ತು ಸಹಭಾಗಿತ್ವದ ಪ್ರಯತ್ನಗಳಿಗೆ ಅದು ಕರೆ ನೀಡಿದೆ.

ಅತಿಯಾದ ಇಂಗಾಲ ಹೊರಸೂಸುವಿಕೆಯನ್ನು ನಿಗ್ರಹಿಸಲು ಮತ್ತು ಪ್ಯಾರಿಸ್ ಒಪ್ಪಂದದಲ್ಲಿ ಹೇಳಿರುವಂತೆ 2050ರ ವೇಳೆಗೆ ತಾಪಮಾನ ಏರಿಕೆಯನ್ನು 1.5 ಡಿ.ಸೆಲ್ಶಿಯಸ್ಗೆ ಸೀಮಿತಗೊಳಿಸುವ ಗುರಿಯನ್ನು ಸಾಧಿಸಲು ದೃಢವಾದ ನಿರ್ಧಾರಗಳಿಗೆ ಒತ್ತು ನೀಡಿ ತುರ್ತು ಕ್ರಮಕ್ಕಾಗಿ ಅಭಿವೃದ್ಧಿಶೀಲ ದೇಶಗಳ ಕರೆಯು ಸಮಾವೇಶದ ಪ್ರಮುಖ ಒಳನೋಟಗಳಲ್ಲಿ ಸೇರಿದೆ. ಕಾರ್ಬನ್ ಬಜೆಟ್ ನ ಶೇ.83ರಷ್ಟು ಈಗಾಗಲೇ ಮುಗಿದಿದ್ದು, 2030ರ ವೇಳೆಗೆ ಪ್ಯಾರಿಸ್ ಒಪ್ಪಂದದ ಗುರಿಗಳನ್ನು ಸಾಧಿಸಲು 50:50 ಅನಿಶ್ಚಿತ ಅವಕಾಶ ಉಳಿದುಕೊಂಡಿದೆ ಎಂದು ಸಮಾವೇಶವು ಒತ್ತಿ ಹೇಳಿದೆ.

ಇದಲ್ಲದೆ ಬಾಂಗ್ಲಾದೇಶ, ಭಾರತ, ನೇಪಾಳ, ಪಾಕಿಸ್ತಾನ ಮತ್ತು ಶ್ರೀಲಂಕಾ ಸೇರಿದಂತೆ ದಕ್ಷಿಣ ಏಶ್ಯಾದ ಆರು ದೇಶಗಳು ಹವಾಮಾನ ಬದಲಾವಣೆಯ ಪರಿಣಾಮಕ್ಕೊಳಗಾಗಿರುವ ಅಗ್ರ ಅತ್ಯಂತ ದುರ್ಬಲ ರಾಷ್ಟ್ರಗಳಲ್ಲಿ ಸೇರಿವೆ ಎನ್ನುವುದನ್ನು ಹವಾಮಾನ ಅಪಾಯ ಸೂಚ್ಯಂಕವು ಬಹಿರಂಗಗೊಳಿಸಿದೆ. ಈ ಪ್ರದೇಶವು 2023ರಲ್ಲೊಂದರಲ್ಲೇ ಏಳು ವಿನಾಶಕಾರಿ ಚಂಡಮಾರುತಗಳಿಗೆ ಸಾಕ್ಷಿಯಾಗಿದ್ದು, ಇವು ಜೀವಹಾನಿ, ಮನೆಗಳ ನಾಶ ಮತ್ತು ಗಂಭೀರ ಆರ್ಥಿಕ ಪರಿಣಾಮಗಳಿಗೆ ಕಾರಣವಾಗಿವೆ.

‘ದಕ್ಷಿಣ ಏಶ್ಯಾದ ಜನರು ಹವಾಮಾನ ಬದಲಾವಣೆ ಪರಿಣಾಮಗಳ ಸಂಕಷ್ಟಗಳನ್ನು ಅನುಭವಿಸುತ್ತಿದ್ದಾರೆ ಮತ್ತು ತುರ್ತು ಕ್ರಮಕ್ಕಾಗಿ ಅವರ ಮನವಿಯು ಜಾಗತಿಕ ಸಮುದಾಯಕ್ಕೆ ಕರೆಯಾಗಿದೆ. ನಾವು ಇಂದು ತೆಗೆದುಕೊಳ್ಳುವ ನಿರ್ಧಾರಗಳು ದುರ್ಬಲ ಸಮುದಾಯಗಳ ಭವಿಷ್ಯ ಮತ್ತು ನಮ್ಮ ಗ್ರಹದ ಸುಸ್ಥಿರತೆಯನ್ನು ನಿರ್ಣಯಿಸುತ್ತವೆ’ ಎಂದು ಬಾಂಗ್ಲಾದೇಶದ ಕ್ಲೀನ್ (ಕೋಸ್ಟಲ್ ಲೈವ್ಲಿಹುಡ್ ಆ್ಯಂಡ್ ಎನ್ವಿರಾನ್ಮೆಂಟಲ್ ಆ್ಯಕ್ಷನ್ ನೆಟ್ವರ್ಕ್)ನ ಸಿಇಒ ಹಸನ್ ಮೆಹೆದಿ ಹೇಳಿದ್ದಾರೆ.

ಗ್ರೋಥ್‌ ವಾಚ್‌ ಇಂಡಿಯಾದ ವಿದ್ಯಾ ದಿನಕರ್‌ ಅವರು ಮಾತನಾಡಿ, "ನಿರ್ದಿಷ್ಟ ದೇಶಗಳಲ್ಲಿ ನವೀಕರಿಸಬಹುದಾದ ಇಂಧನ ತಂತ್ರಜ್ಞಾನಗಳು ಕೇಂದ್ರೀಕೃತಗೊಂಡಿರುವುದು ‘ಹವಾಮಾನ ವಸಾಹತುಶಾಹಿ’ಯ ಒಂದು ರೂಪವಾಗಿದೆ. ಪರಿಸರ ಸುಸ್ಥಿರತೆಯನ್ನು ಖಚಿತಪಡಿಸಿಕೊಳ್ಳಲು ಮಾತ್ರವಲ್ಲ,ಸ್ಥಳೀಯ ಸಮುದಾಯಗಳ ಹಕ್ಕುಗಳನ್ನು ಎತ್ತಿಹಿಡಿಯಲೂ ನಾವು ನಾವು ಸಮುದಾಯ ಒಡೆತನದ ವಿಕೇಂದ್ರೀಕೃತ ವ್ಯವಸ್ಥೆಗಳತ್ತ ಗಮನ ಹರಿಸಲೇಬೇಕು" ಎಂದು ಹೇಳಿದ್ದಾರೆ.

ಜಾಗತಿಕ ಜನಸಂಖ್ಯೆಯ ಕಾಲು ಭಾಗವನ್ನು ಮತ್ತು ವಿಶ್ವದಲ್ಲಿಯ ಮೂರನೇ ಒಂದರಷ್ಟು ಬಡವರನ್ನು ಪ್ರತಿನಿಧಿಸುವ ದಕ್ಷಿಣ ಏಶ್ಯಾದೇಶಗಳು ಎದುರಿಸುತ್ತಿರುವ ಸಮಸ್ಯೆಗಳನ್ನು ಗುರುತಿಸಿರುವ ಸಮಾವೇಶವು ಇಂಧನ ಕೊರತೆಯ ಜಟಿಲತೆಗಳ ಮೇಲೆ ಬೆಳಕು ಚೆಲ್ಲಿದೆ. ಇಂಧನ ವಲಯವನ್ನು ಇಂಗಾಲ ಮುಕ್ತವನ್ನಾಗಿಸುವ ಅನಿವಾರ್ಯತೆಯನ್ನು ಒಪ್ಪಿಕೊಳ್ಳಲಾಗಿದೆ. ಆದರೂ ದಕ್ಷಿಣ ಏಶ್ಯಾ ದೇಶಗಳಲ್ಲಿ,ವಿಶೇಷವಾಗಿ ಶ್ರೀಲಂಕಾ,ಪಾಕಿಸ್ತಾನ ಮತ್ತು ಬಾಂಗ್ಲಾದೇಶಗಳಲ್ಲಿ ಮೂಲಭೂತ ವಿದ್ಯುತ್ ಅಗತ್ಯಗಳನ್ನು ಪೂರೈಸುವಲ್ಲಿ ಮತ್ತು ಆರ್ಥಿಕ ಬಿಕ್ಕಟ್ಟುಗಳನ್ನು ಎದುರಿಸುವಲ್ಲಿ ಸವಾಲುಗಳು ಮುಂದುವರಿಯಲಿವೆ ಎಂದು ತಜ್ಞರು ಬೆಟ್ಟು ಮಾಡಿದ್ದಾರೆ.