ಸೌದಿ ಅರೇಬಿಯಾದ ನೂತನ ರಾಯಭಾರಿ ವಿಪುಲ್ ಕುಮಾರ್ ರನ್ನು ಭೇಟಿಯಾದ ಝಕರಿಯಾ ಬಜ್ಪೆ

ಸೌದಿ ಅರೇಬಿಯಾ: ಸೌದಿ ಅರೇಬಿಯಾಕ್ಕೆ ಭಾರತದ ನೂತನ ರಾಯಭಾರಿಯಾಗಿರುವ ವಿಪುಲ್ ಕುಮಾರ್ ಅವರನ್ನು 'ಅಲ್ ಮುಝೈನ್' ಕಂಪೆನಿಯ ಸ್ಥಾಪಕ ಬಜ್ಪೆ ಝಕರಿಯಾ ಹಾಗೂ ಅವರ ಪುತ್ರ 'ಡ್ಯೂನ್ ಆಂಡ್ ಟೈಡ್ಸ್' ಕಂಪೆನಿಯ ವ್ಯವಸ್ಥಾಪಕ ನಿರ್ದೇಶಕ ಝಾಹಿದ್ ಝಕರಿಯಾ ಭೇಟಿ ಮಾಡಿ ಅಭಿನಂದಿಸಿದರು.

ರಿಯಾದ್ ನಲ್ಲಿರುವ ವಿದೇಶಾಂಗ ಇಲಾಖೆಯ ಭಾರತದ ರಾಯಭಾರ ಕಚೇರಿಯಲ್ಲಿ ವಿಪುಲ್ ಕುಮಾರ್ ಅವರನ್ನು ಮಂಗಳವಾರ (ಆ.25) ಭೇಟಿಯಾದ ಝಕರಿಯಾ ಬಜ್ಪೆ, ವ್ಯಾಪಾರ, ಹೂಡಿಕೆ, ಶಿಕ್ಷಣ, ಕೈಗಾರಿಕೆ ಮತ್ತು ಪರಸ್ಪರ ಆಸಕ್ತಿಯ ಇತರ ಕ್ಷೇತ್ರಗಳನ್ನು ಕೇಂದ್ರೀಕರಿಸಿ ಭಾರತ-ಸೌದಿ ಅರೇಬಿಯಾದ ಆರ್ಥಿಕ ಸಂಬಂಧಗಳನ್ನು ಬಲಪಡಿಸುವ ಕುರಿತು ಚರ್ಚೆ ನಡೆಸಿದರು.

ಉಭಯ ದೇಶಗಳ ದೀರ್ಘಕಾಲದ ಪಾಲುದಾರಿಕೆಯನ್ನು ಇನ್ನಷ್ಟು ಗಟ್ಟಿಗೊಳಿಸಲು ಈ ಮಾತುಕತೆ ಪೂರಕ ವಾತಾವರಣ ಒದಗಿಸಿದೆ ಎಂದು ಕರಾವಳಿಯ ಪ್ರಸಿದ್ಧ ಅನಿವಾಸಿ ಉದ್ಯಮಿ ಝಕರಿಯಾ ಬಜ್ಪೆ ಹೇಳಿದ್ದಾರೆ.

ಭಾರತೀಯ ವಿದೇಶಾಂಗ ಸೇವೆ (IFS) ಅಧಿಕಾರಿಯಾಗಿರುವ ವಿಪುಲ್ ಕುಮಾರ್, ಈ ಹಿಂದೆ ಯುಎಇ ಹಾಗೂ ಖತರ್ ರಾಷ್ಟ್ರಗಳಲ್ಲಿ ಭಾರತದ ರಾಯಭಾರಿಯಾಗಿ ಕಾರ್ಯನಿರ್ವಹಿಸಿದ್ದು, ಆ ಸಂದರ್ಭಗಳಲ್ಲೂ ಅವರ ಜೊತೆ ಝಕರಿಯಾ ಬಜ್ಪೆ ಉತ್ತಮ ಬಾಂಧವ್ಯ ಹೊಂದಿದ್ದರು.