ಬೇಲೂರಲ್ಲಿ ವ್ಯಾಪಾರಿ ಆತ್ಮಹತ್ಯೆ; ಶಾಸಕರ ವಿರುದ್ಧ ಎಫ್‌ಐಆರ್
ಬೇಲೂರು : ಪಟ್ಟಣದಲ್ಲಿ ಹಲವು ವರ್ಷಗಳಿಂದ ವ್ಯಾಪಾರ ಮಾಡಿಕೊಂಡಿದ್ದ ನಾಗೇಶ್ ಎ.ಆರ್. ಎಂಬವರು ಡೆತ್ ನೋಟ್ ಬರೆದಿಟ್ಟು ಆತ್ಮಹತ್ಯೆ ಮಾಡಿಕೊಂಡಿರುವುದು ವರದಿಯಾಗಿದೆ.
ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸ್ಥಳೀಯ ಶಾಸಕ ಎಚ್.ಕೆ. ಸುರೇಶ್ ಸೇರಿದಂತೆ ಪುರಸಭೆಯ ಅಧಿಕಾರಿಗಳು ಹಾಗೂ ಸಿಬ್ಬಂದಿ ವಿರುದ್ದ ಪೊಲೀಸರು ಎಫ್‌ಐಆರ್ ದಾಖಲಿಸಿದ್ದಾರೆ.
ಬೇಲೂರು ಪುರಸಭೆಗೆ ಸೇರಿದ ಮಳಿಗೆ ಸಂಖ್ಯೆ3ನ್ನು ಉಮಾ ಎಂಬವರು ಬಿಡ್‌ನಲ್ಲಿ ಪಡೆದಿದ್ದರು. ಆದರೆ ಕೆಲ ವರ್ಷಗಳ ಹಿಂದೆ ಉಮಾ ಪತಿ ನಿಧನರಾಗಿದ್ದಾರೆ. ನಂತರ ಅನಾರೋಗ್ಯ ಹಿನ್ನೆಲೆಯಲ್ಲಿ ಉಮಾ ಬೆಂಗಳೂರಿನಲ್ಲಿ ನೆಲೆಸಿದ್ದರು. ದಿನಸಿ ಅಂಗಡಿಯನ್ನು ತಮ್ಮ ಕುಟುಂಬದ ಆತ್ಮೀಯರಾಗಿದ್ದ ನಾಗೇಶ್ ಅವರಿಗೆ ಉಮಾ ವಹಿಸಿಕೊಟ್ಟಿದ್ದರು. ಬಳಿಕ ಸುಮಾರು 10 ಲಕ್ಷ ರೂ.ಗೂ ಅಧಿಕ ಬಂಡವಾಳ ಹೂಡಿ ನಾಗೇಶ್ ವ್ಯಾಪಾರ ನಡೆಸುತ್ತಾ, ನಿಗದಿತ ಹಣವನ್ನು ಉಮಾ ಅವರಿಗೆ ಕಳುಹಿಸುತ್ತಿದ್ದರು.
ಈ ನಡುವೆ ಮಳಿಗೆಗಳ ಹೊಸ ಹರಾಜಿಗೆ ಪುರಸಭೆ ಮುಂದಾಗಿತ್ತು. ಇದರ ವಿರುದ್ಧ ವ್ಯಾಪಾರಿಗಳು ಹೈಕೋರ್ಟ್ ಮೆಟ್ಟಿಲೇರಿದ್ದರು.
ವಿಚಾರಣೆ ನಡೆಸಿದ ನ್ಯಾಯಾಲಯ, ಮುಂದಿನ ಆದೇಶ ಮತ್ತು ಸಾರ್ವಜನಿಕ ಬಹಿರಂಗ ಹರಾಜು ಪೂರ್ಣವಾಗುವವರೆಗೆ ಸದರಿ ಮಳಿಗೆ ಖಾಲಿ ಮಾಡದಂತೆ ಆದೇಶಿಸಿತ್ತು.
ಈ ನಡುವೆ ಜು.7 ರಂದು ಮಳಿಗೆ ಖಾಲಿ ಮಾಡುವಂತೆ ಹೇಳಿ ಪುರಸಭೆ ಅಧಿಕಾರಿಗಳು ಮತ್ತು ಸಿಬ್ಬಂದಿ ಏಕಾಏಕಿ ಬೀಗ ಜಡಿದಿದ್ದರು. ನಂತರ ಹಲವು ಬಾರಿ ಪುರಸಭೆ ಅಧಿಕಾರಿಗಳು ಶಾಸಕ ಸುರೇಶ್ ಅವರು ಬಾಗಿಲು ತೆರೆಯದಂತೆ ಹೇಳಿದ್ದಾರೆ. ಹಾಗಾಗಿ ತೆರೆಯಲ್ಲ, ಬೇಕಿದ್ದರೆ ಶಾಸಕರ ಬಳಿಯೇ ಹೋಗಿ ಮಾತನಾಡಿ ಎಂದು ಹೇಳಿದ್ದರು.
ಮೊದಲೇ ಕೃಷಿಗೆ, ಕುರಿಫಾರಂ, ಕಾರು ಖರೀದಿಗಾಗಿ ಸಾಕಷ್ಟು ಸಾಲ ಮಾಡಿದ್ದ ನಾಗೇಶ್, ಮಳಿಗೆ ವ್ಯಾಪಾರವೂ ಇಲ್ಲದ ಕಾರಣ ಮನ ನೊಂದಿದ್ದರು. ಅ.12 ರಂದು ಮನೆಯಲ್ಲಿ ಒಬ್ಬರೇ ಇದ್ದವೇಳೆ ಡೆತ್ ನೋಟ್ ಬರೆದಿಟ್ಟು ಆತ್ಮಹತ್ಯೆ ಮಾಡಿಕೊಂಡಿದ್ದರು. ಅದರಲ್ಲಿ ಶಾಸಕ ಸುರೇಶ್ ಅವರು, ಮಳಿಗೆ ಕೀ ಕೊಡಿಸಲು ರಾಜಕೀಯ ಮಾಡಿದರು. ಇದರಿಂದ ಮನನೊಂದು ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವುದಾಗಿ ನಾಗೇಶ್ ಡೆತ್‌ನೋಟ್‌ನಲ್ಲಿ ಬರೆದಿದ್ದಾರೆ ಎನ್ನಲಾಗಿದೆ.
ತಮ್ಮ ಸಾವಿನ ಬಳಿಕವಾದರೂ ರಾಜಕೀಯ ಮಾಡದೆ ಮಳಿಗೆ ಕೀಯನ್ನು ಮಕ್ಕಳಿಗೆ ಕೊಡಿಸುವಂತೆ ಮನವಿ ಮಾಡಿದ್ದರು ಎಂದು ತಿಳಿದುಬಂದಿದೆ.
ಡೆತ್‌ನೋಟ್ ಆಧರಿಸಿ ಪುರಸಭೆ ಆರ್‌ಐ, ಆರ್‌ಒ, ಆರೋಗ್ಯ ನಿರೀಕ್ಷಕ ಲೋಹಿತ್, ಬಿಲ್ ಕಲೆಕ್ಟರ್, ಇತರೆ ಸಿಬ್ಬಂದಿ, ಪುರಸಭೆ ಸಿಇಒ ಹಾಗೂ ಶಾಸಕ ಎಚ್.ಕೆ.ಸುರೇಶ್ ವಿರುದ್ಧ ಎಫ್‌ಐಆರ್ ದಾಖಲಾಗಿದೆ. ಪ್ರಕರಣದಲ್ಲಿ ಶಾಸಕರು ಏಳನೇ ಆರೋಪಿಯಾಗಿದ್ದಾರೆ. ಈ ಸಂಬಂಧ ಸ್ಥಳೀಯ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.
