ಕೂದಲು ಸ್ವಚ್ಛವಾಗಿರಬಹುದು, ನೆತ್ತಿ ಆರೋಗ್ಯಕರವಾಗಿದೆಯೆ?: ಚರ್ಮತಜ್ಞರು ಎಚ್ಚರಿಸಿರುವುದೇನು?

ಕೂದಲು ಮೃದು ಮತ್ತು ಹೊಳಪಿನಿಂದ ಕೂಡಿದೆ ಎಂಬುದರ ಆಧಾರದ ಮೇಲೆ ಜನರು ಅದರ ಆರೋಗ್ಯವನ್ನು ನಿರ್ಣಯಿಸುತ್ತಾರೆ. ಆದರೆ ಆರೋಗ್ಯಕರ ಕೂದಲಿಗೆ ನೆತ್ತಿಯ ಆರೋಗ್ಯ ಮತ್ತು ಆರೈಕೆ ಮುಖ್ಯ ಎನ್ನುವುದು ನಿಮಗೆ ತಿಳಿದಿದೆಯೆ?

ಕೇಶ ರಕ್ಷಣೆಯ ವಿಷಯಕ್ಕೆ ಬಂದಾಗ ಹೆಚ್ಚಿನ ಗಮನವು ಆಕರ್ಷಕವಾದ ಮತ್ತು ದಟ್ಟವಾದ ಕೂದಲಿನ ಮೇಲೆಯೇ ಇರುತ್ತದೆ. ಕೂದಲು ಹೊರಗೆ ಎದ್ದು ಕಾಣುವ ಭಾಗವಾಗಿರುವುದರಿಂದ ಅದು ಎಷ್ಟು ಮೃದು ಮತ್ತು ಹೊಳಪಿನಿಂದ ಕೂಡಿದೆ ಎಂಬುದರ ಆಧಾರದ ಮೇಲೆ ಜನರು ಅದರ ಆರೋಗ್ಯವನ್ನು ನಿರ್ಣಯಿಸುತ್ತಾರೆ. ಆದರೆ ಆರೋಗ್ಯಕರ ಕೂದಲಿಗೆ ನೆತ್ತಿಯ (scalp) ಆರೋಗ್ಯ ಮತ್ತು ಆರೈಕೆ ಮುಖ್ಯ ಎನ್ನುವುದು ನಿಮಗೆ ತಿಳಿದಿದೆಯೆ?

ಹಾಗಾದರೆ ನೆತ್ತಿಯು ಆರೋಗ್ಯಕರವಾಗಿದೆಯೇ ಎಂದು ತಿಳಿಯುವುದು ಹೇಗೆ? Dermis Oracle ನ ಚರ್ಮರೋಗ ತಜ್ಞರಾದ ಡಾ. ಅಶ್ವಿನಿ ಕಂಡಿಕಟ್ಲ ಅವರು ನಿಮ್ಮ ಕೇಶ ರಕ್ಷಣೆಯ ದಿನಚರಿಯಲ್ಲಿ ನೆತ್ತಿಯ ಅಗತ್ಯಗಳನ್ನು ನಿರ್ಲಕ್ಷಿಸಲಾಗುತ್ತಿದೆ ಎಂಬುದನ್ನು ಸೂಚಿಸುವ ಐದು ಲಕ್ಷಣಗಳನ್ನು ಹಂಚಿಕೊಂಡಿದ್ದಾರೆ. “ಕೂದಲಿಗೆ ಶಾಂಪೂ, ಕಂಡಿಷನರ್, ಸೀರಂ ಮತ್ತು ಎಣ್ಣೆ ಹಚ್ಚಲಾಗುತ್ತದೆ. ಆದರೆ ನೆತ್ತಿಯ ಬಗ್ಗೆ ಗಮನಹರಿಸುವುದು ಸಮಸ್ಯೆ ಕಾಣಿಸಿಕೊಂಡಾಗ ಮಾತ್ರ” ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಆದ್ದರಿಂದ ಕೇಶ ರಕ್ಷಣೆಯ ದಿನಚರಿಯಲ್ಲಿ ಅನೇಕ ಉತ್ಪನ್ನ ಒಳಗೊಂಡಿರಬಹುದು. ಆದರೆ ಅದರಿಂದಲೇ ನೆತ್ತಿಗೆ ಸೂಕ್ತ ಪೋಷಣೆ ಸಿಗುತ್ತಿದೆ ಎಂದರ್ಥವಲ್ಲ. ತಲೆಹೊಟ್ಟು ಅಥವಾ ತುರಿಕೆ ಕಾಣಿಸಿಕೊಳ್ಳುವವರೆಗೆ ಕಾಯುವ ಬದಲು ಕೇಶ ರಕ್ಷಣೆಯ ದಿನಚರಿಯಲ್ಲಿ ನೆತ್ತಿಯ ಆರೈಕೆ ಸೇರಿಸಿಕೊಳ್ಳುವುದು ಅಗತ್ಯ.

ಕೂದಲಿಗೆ ನೆತ್ತಿಯ ಆರೋಗ್ಯ ಏಕೆ ಮುಖ್ಯ?

ಒಟ್ಟು ಕೂದಲಿನ ಗುಣಮಟ್ಟದಲ್ಲಿ ನೆತ್ತಿಯ ಆರೋಗ್ಯವು ಪ್ರಮುಖ ಪಾತ್ರವಹಿಸುತ್ತದೆ. ನೆತ್ತಿ ತನ್ನದೇ ಆದ ರಕ್ಷಣಾತ್ಮಕ ಪದರ, ಎಣ್ಣೆಯ ಉತ್ಪಾದನೆ ಮತ್ತು ಸೂಕ್ಷ್ಮ ಜೀವಿಗಳ ಪರಿಸರ ಹೊಂದಿದ್ದು, ಸಮತೋಲನ ಕಾಪಾಡಿಕೊಂಡಿರುತ್ತದೆ. ಈ ಸಮತೋಲನ ಹದಗೆಟ್ಟಾಗ ತಲೆಹೊಟ್ಟು ಅಥವಾ ಕೂದಲು ಉದುರುವಿಕೆಯಲ್ಲಿ ಬದಲಾವಣೆಗಳಂತಹ ಸಮಸ್ಯೆಗಳು ಉಂಟಾಗಬಹುದು.

ನೆತ್ತಿಯ ಆರೋಗ್ಯವು ಕೂದಲಿಗೆ ಬೆಳವಣಿಗೆ ಮತ್ತು ಗುಣಮಟ್ಟವನ್ನು ಹೇಗೆ ನಿರ್ಧರಿಸುತ್ತದೆ ಎಂದು ಅವರು ತಿಳಿಸಿದ್ದಾರೆ. “ಸಮತೋಲನ ಹದಗೆಟ್ಟಾಗ ರಕ್ಷಣಾತ್ಮಕ ಪದರದ ಕಾರ್ಯನಿರ್ವಹಣೆ, ಸೀಬಮ್ (ಎಣ್ಣೆ) ನಿಯಂತ್ರಣ ಮತ್ತು ನೆತ್ತಿಯ ಉರಿಯೂತದ ಪರಿಸರದ ಮೇಲೆ ಪರಿಣಾಮ ಬೀರಬಹುದು. ಇದರ ಲಕ್ಷಣಗಳಲ್ಲಿ ನಿರಂತರ ಸೂಕ್ಷ್ಮತೆ, ಪದೇಪದೆ ಕಾಣಿಸಿಕೊಳ್ಳುವ ತಲೆಹೊಟ್ಟು ಅಥವಾ ಕೂದಲು ಬೇರುಗಳ ರಂಧ್ರಗಳ ಸುತ್ತಲೂ ಬದಲಾವಣೆಗಳು ಸೇರಿರಬಹುದು. ಕೆಲವು ಸಂದರ್ಭಗಳಲ್ಲಿ ಈ ಬದಲಾವಣೆಗಳು ಕೂದಲು ಹೆಚ್ಚು ಉದುರುವಿಕೆ ಅಥವಾ ಹೊಸದಾಗಿ ಬೆಳೆಯುವ ಕೂದಲಿನ ಗುಣಮಟ್ಟ ಮತ್ತು ದಪ್ಪದಲ್ಲಿನ ಬದಲಾವಣೆಗಳೊಂದಿಗೆ ಸಂಬಂಧ ಹೊಂದಿರಬಹುದು” ಎಂದು ಅವರು ವಿವರಿಸಿದ್ದಾರೆ.

ಅನಾರೋಗ್ಯಕರ ನೆತ್ತಿ ಹೇಗಿರುತ್ತದೆ?

ತಲೆ ತೊಳೆದ ಮೇಲೆ ಕೂದಲು ಸ್ವಚ್ಛವಾಗಿರಬಹುದು. ಆದರೆ ನೆತ್ತಿ ಅನಾರೋಗ್ಯದ ಸ್ಥಿತಿಯ ಸಂಕೇತಗಳನ್ನು ನೀಡುತ್ತಿರಬಹುದು. ಚರ್ಮ ರೋಗ ತಜ್ಞರ ಪ್ರಕಾರ ಈ ಕೆಳಗಿನ ಚಿಹ್ನೆಗಳನ್ನು ಅಲಕ್ಷಿಸಬಾರದು.

• ತೊಳೆದ ನಂತರ ಬಿಗಿತ ಅಥವಾ ಕುಟುಕುವಿಕೆ

ತಲೆಯನ್ನು ಸ್ವಚ್ಛಗೊಳಿಸಿದ ನಂತರ ಪದೇಪದೆ ಬಿಗಿತ, ಸೂಕ್ಷ್ಮತೆ ಅಥವಾ ಕುಟುಕುವ ರೀತಿಯ ಅನುಭವವು ನೆತ್ತಿಯ ತಡೆಗೋಡೆಯ ಕಾರ್ಯವನ್ನು ದುರ್ಬಲಗೊಳಿಸಬಹುದು.

• ಪುನರಾವರ್ತಿತ ಸಿಪ್ಪೆ ಹೋಗುವುದು

ಸಿಪ್ಪೆ ಸುಲಿಯುವಿಕೆ ಎಂದರೆ ನೀವು ನಿಮ್ಮ ನೆತ್ತಿಯನ್ನು ಸರಿಯಾಗಿ ಸ್ವಚ್ಛಗೊಳಿಸುತ್ತಿಲ್ಲ ಎಂದಲ್ಲ. ನೈಸರ್ಗಿಕ ಎಣ್ಣೆ ಉತ್ಪಾದನೆ ಮತ್ತು ನೆತ್ತಿಯ ಸೂಕ್ಷ್ಮ ಜೀವಿಯ ಸಮತೋಲನದಲ್ಲಿನ ಬದಲಾವಣೆಗಳಿಂದಾಗಿ ಉರಿಯೂತ ಮತ್ತು ನಿರಂತರ ಸಿಪ್ಪೆ ಸುಲಿಯುವಿಕೆಗೆ ಕಾರಣವಾಗಬಹುದು.

• ತೊಳೆದ ತಕ್ಷಣ ಎಣ್ಣೆಮಯ

ಬೇರುಗಳು ತೊಳೆದ ತಕ್ಷಣ ಎಣ್ಣೆಯುಕ್ತವಾಗಿದ್ದರೆ ನಿಮ್ಮ ನೆತ್ತಿಯ ಬಗ್ಗೆ ಗಮನ ನೀಡಬೇಕಾಗಿ ಬರಬಹುದು. ನೈಸರ್ಗಿಕ ಎಣ್ಣೆ ಉತ್ಪಾದನೆ ಮತ್ತು ಸ್ವಚ್ಛಗೊಳಿಸುವ ಅಭ್ಯಾಸಗಳು ಎಣ್ಣೆ ಎಷ್ಟು ಬೇಗನೆ ಮತ್ತೆ ನಿರ್ಮಾಣವಾಗುತ್ತದೆ ಎಂಬುದರ ಮೇಲೆ ಪರಿಣಾಮ ಬೀರುತ್ತವೆ.

• ಬೇರುಗಳ ಸುತ್ತಲೂ ಲೇಪಿತ ಭಾವನೆ

ನೈಸರ್ಗಿಕ ಎಣ್ಣೆಗಳು, ಸತ್ತ ಚರ್ಮದ ಕೋಶಗಳು ಮತ್ತು ಸ್ಟೈಲಿಂಗ್ ಉತ್ಪನ್ನದ ಅವಶೇಷಗಳು ಕೂದಲು ಕೋಶಕ (hair follicle) ತೆರೆಯುವಿಕೆಯ ಸುತ್ತಲೂ ಸಂಗ್ರಹವಾಗಬಹುದು. ಇದರಿಂದ ಕೂದಲು ಸ್ವಚ್ಛವಾಗಿದ್ದರೂ ಬೇರುಗಳ ಸುತ್ತ ಲೇಪಿತ ಭಾವನೆ ಬರಬಹುದು.

• ಕೂದಲು ಉದುರುವಿಕೆಯಲ್ಲಿನ ಬದಲಾವಣೆಗಳು

ಉದುರುವಿಕೆಯಲ್ಲಿನ ಗಮನಾರ್ಹ ಬದಲಾವಣೆಯು ಗೋಚರಿಸುವ ಕೂದಲಿನ ಎಳೆಗಳಿಗಿಂತ ಹೆಚ್ಚಿನದನ್ನು ಒಳಗೊಂಡಿರಬಹುದು. ನೆತ್ತಿಯ ವಾತಾವರಣದಲ್ಲಿನ ಬದಲಾವಣೆಗಳು hair follicle ಸುತ್ತಲಿನ ಸ್ಥಿತಿಗಳ ಮೇಲೆ ಪರಿಣಾಮ ಬೀರಬಹುದು ಮತ್ತು ಕೂದಲು ಬೆಳವಣಿಗೆಯ ಚಕ್ರದಲ್ಲಿ ಬದಲಾವಣೆಗಳಿಗೆ ಕಾರಣವಾಗಬಹುದು.