ಡಬಲ್ ಕ್ಲೆನ್ಸಿಂಗ್ ಬೇಸಿಗೆಗೆ ಅಗತ್ಯವಿರುವ ಚರ್ಮ ರಕ್ಷಣೆಯೆ? ವೈದ್ಯರು ಹೇಳುವುದೇನು?

ಡಬಲ್ ಕ್ಲೆನ್ಸಿಂಗ್ ಪ್ರಚಾರವೆ? ನಿಜವಾಗಿಯೂ ಅಗತ್ಯವಿರುವ ಚರ್ಮದ ರಕ್ಷಣೆಯೆ? ವೈದ್ಯರು ಹೇಳುವುದೇನು?

ಹವಾಮಾನವು ಚರ್ಮಕ್ಕೆ ಒಡ್ಡುವ ಸವಾಲುಗಳನ್ನು ನಿಭಾಯಿಸಲು ಚರ್ಮದ ಆರೈಕೆಯನ್ನು ಋತುವಿಗೆ ಅನುಗುಣವಾಗಿ ಮಾಡಿಕೊಳ್ಳಬೇಕು. ಬೇಸಿಗೆಯಲ್ಲಿ ಅಂದರೆ ಅತಿ ಶಾಖ, ಅತಿ ಬೆವರು ಮತ್ತು ನಿಮ್ಮ ಚರ್ಮದ ಸಮತೊಲನ ಸುಲಭವಾಗಿ ತೊಂದರೆಗೊಳಿಸುವ ಒಟ್ಟು ಕಠಿಣ ಪರಿಸ್ಥಿತಿಗಳನ್ನು ನಿಭಾಯಿಸಬೇಕಾಗುತ್ತದೆ. ಅದಕ್ಕಾಗಿ ನಿಮ್ಮ ದಿನಚರಿಯನ್ನು ಋತುವಿನ ಅಗತ್ಯಗಳಿಗೆ ತಕ್ಕಂತೆ ಹೊಂದಿಸಿಕೊಳ್ಳಬೇಕಾಗುತ್ತದೆ.

ಗಮನಸೆಳೆದಿರುವ ಚರ್ಮದ ಆರೈಕೆ ಎಂದರೆ ಡಬಲ್ ಕ್ಲಿನ್ಸಿಂಗ್. ಇದು ಚರ್ಮವನ್ನು ಸಂಪೂರ್ಣ ಸ್ವಚ್ಛಗೊಳಿಸಲು ವಿನ್ಯಾಸಗೊಳಿಸಲಾದ ಎರಡು ಹಂತದ ವಿಧಾನವಾಗಿದೆ. ಆದರೆ ಇದು ಪ್ರಚಾರವೆ? ಅಥವಾ ನಿಜವಾಗಿಯೂ ಅಗತ್ಯವಿರುವ ಚರ್ಮದ ರಕ್ಷಣೆಯೆ? ಚರ್ಮ ವೈದ್ಯರು ಹೇಳುವುದೇನು?

ಡಬಲ್ ಕ್ಲೆನ್ಸಿಂಗ್ ಎಂದರೇನು?

ಮೊದಲಿಗೆ ಡಬಲ್ ಕ್ಲೆನ್ಸಿಂಗ್ ಎಂದರೆ ಏನೆಂದು ಅರ್ಥಮಾಡಿಕೊಳ್ಳಬೇಕು. ಯಾವುದೇ ಚರ್ಮದ ಆರೈಕೆಯಲ್ಲಿ ದಿನಚರಿಯಲ್ಲಿ ಕ್ಲೆನ್ಸಿಂಗ್ ಮೂಲಭೂತವಾಗಿ ಮೊದಲ ಹೆಜ್ಜೆಯಾಗಿದೆ. ಕ್ಲೆನ್ಸಿಂಗ್ ಹಂತದಲ್ಲಿ ಕಲ್ಮಶಗಳನ್ನು ತೆಗೆಯಲು ಮುಖವನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಲಾಗುತ್ತದೆ. ಡಬಲ್ ಕ್ಲೆನ್ಸಿಂಗ್ ಮುಖ್ಯವಾಗಿ ಗಮನ ಸೆಳೆಯಲು ಕಾರಣ ಬೇಸಿಗೆಯಲ್ಲಿ ಶಾಖ, ಬೆವರು ಮತ್ತು ಹೆಚ್ಚುವರಿ ಎಣ್ಣೆಯನ್ನು ತರುತ್ತದೆ. ಇದು ಕಲ್ಮಶಗಳನ್ನು ಹಿಡಿದಿಡಬಹುದು. ಹೀಗಾಗಿ ಸಂಪೂರ್ಣ ಶುದ್ಧೀಕರಣದ ಅಗತ್ಯವಿರುತ್ತದೆ.

ಸೋಲ್ ಡರ್ಮಾ ಕ್ಲಿನಿಕ್‌ ಚರ್ಮವೈದ್ಯರಾದ ಡಾ ಅನಿಕಾ ಗೋಯೆಲ್ ಹೇಳುವ ಪ್ರಕಾರ, ಡಬಲ್ ಕ್ಲೆನ್ಸಿಂಗ್ ಎಂದರೆ ಮೊದಲ ಹಂತದಲ್ಲಿ ಎಣ್ಣೆ ಆಧರಿತ ಕ್ಲೆನ್ಸರ್ ಬಳಸಲಾಗುತ್ತದೆ. ಸೆಬಮ್ ಮತ್ತು ಎಸ್ಪಿಎಫ್ನಂತಹ ಎಣ್ಣೆ ಆಧರಿತ ಕಲ್ಮಶಗಳನ್ನು ಕರಗಿಸಲು ನೆರವಾಗುತ್ತದೆ. ನಂತರ ಎರಡನೇ ಹಂತದಲ್ಲಿ ಬೆವರು, ಕೊಳಕು ಮತ್ತು ಉಳಿದಿರುವ ಯಾವುದೇ ಶೇಷ ತೆಗೆದು ಹಾಕುವ ನೀರು ಆಧರಿತ ಕ್ಲೆನ್ಸರ್ ಅನ್ನು ಬಳಸಲಾಗುತ್ತದೆ.

ಆದರೆ ಡಬಲ್ ಕ್ಲೆನ್ಸರ್ಗೆ ಸೂಕ್ತವಾದ ಉತ್ಪನ್ನಗಳನ್ನು ಆರಿಸುವುದು ಅಗತ್ಯ ಎನ್ನುತ್ತಾರೆ ವೈದ್ಯರು. ಹಗುರವಾದ ಎಣ್ಣೆಗಳು ಅಥವಾ ಬಾಮ್‌ಗಳನ್ನು ಬಳಸಬಹುದು. ಚರ್ಮದ ಪ್ರಕಾರಕ್ಕೆ ಸೂಕ್ತವಾದ ಸೌಮ್ಯವಾದ ಫೇಸ್ ವಾಶ್, ಎಣ್ಣೆಯುಕ್ತ ಚರ್ಮಕ್ಕಾಗಿ ಜೆಲ್ ಆಧರಿತ ಅಥವಾ ಶುಷ್ಕ ಮತ್ತು ಸೂಕ್ಷ್ಮ ಚರ್ಮಕ್ಕಾಗಿ ಹೈಡ್ರೇಟಿಂಗ್ ಸೂತ್ರಗಳನ್ನು ಬಳಸಬಹುದು.

ಬೇಸಗೆಯಲ್ಲಿ ಡಬಲ್ ಕ್ಲೆನ್ಸಿಂಗ್ ಅಗತ್ಯವೆ?

ಮತ್ತೊಬ್ಬ ಚರ್ಮ ವೈದ್ಯರಾದ ಡಾ ಆಕ್ಷಿತಾ ಭಾನ್ ಅವರ ಪ್ರಕಾರ ಬೇಸಗೆಯ ತಿಂಗಳುಗಳಲ್ಲಿ ಡಬಲ್ ಕ್ಲೆನ್ಸಿಂಗ್ ನಿಜವಾಗಿಯೂ ಉಪಯುಕ್ತವಾಗಬಹುದು. “ಹೆಚ್ಚಿದ ಬೆವರು, ಎಣ್ಣೆ ಉತ್ಪಾದನೆ ಮತ್ತು ಸನ್ಸ್ಕ್ರೀನ್ನ ನಿಯಮಿತ ಬಳಕೆಯಿಂದ ಚರ್ಮವನ್ನು ಸರಿಯಾಗಿ ಸ್ವಚ್ಛಗೊಳಿಸದೆ ಇದ್ದರೆ ರಂಧ್ರಗಳ ದಟ್ಟಣೆಗೆ ಹೆಚ್ಚಿನ ಅವಕಾಶವಿದೆ. ಆದರೆ ಎಲ್ಲರಿಗೂ ಡಬಲ್ ಕ್ಲೆನ್ಸಿಂಗ್ ಸೂಕ್ತವಲ್ಲ” ಎಂದು ಅವರು ಹೇಳಿದ್ದಾರೆ.

“ಒಣ ಅಥವಾ ಸೂಕ್ಷ್ಮ ಚರ್ಮ ಹೊಂದಿರುವ ಮಂದಿ ಅಥವಾ ಅತಿಯಾಗಿ ಮೇಕಪ್ ಉತ್ಪನ್ನಗಳನ್ನು ಬಳಸದವರು ಪ್ರತಿದಿನ ಡಬಲ್ ಕ್ಲೆನ್ಸಿಂಗ್ ಮಾಡುವ ಅಗತ್ಯವಿರುವುದಿಲ್ಲ. ಅತಿ ಶುದ್ಧೀಕರಣದಿಂದ ಚರ್ಮದ ತಡೆಗೋಡೆಗೆ ಸಮಸ್ಯೆಯಾಗಬಹುದು. ಕಿರಿಕಿರಿ ಅಥವಾ ನಿರ್ಜಲೀಕರಣಕ್ಕೆ (ಡಿಹೈಡ್ರೇಶನ್) ಕಾರಣವಾಗಬಹುದು” ಎನ್ನುತ್ತಾರೆ.

ಚರ್ಮದ ಆರೈಕೆಯನ್ನು ಮಾಡುವುದು ಹೇಗೆ?

ಒಂದು ವೇಳೆ ಡಬಲ್ ಕ್ಲೆನ್ಸಿಂಗ್ ಅನ್ನು ರಾತ್ರಿಯ ದಿನಚರಿಯಲ್ಲಿ ಸೇರಿಸಿದರೆ ಸೌಮ್ಯವಾದ, ಕಾಮೆಡೋಜೆನಿಕ್ ಅಲ್ಲದ ಉತ್ಪನ್ನಗಳನ್ನು ಬಳಸಬೇಕು. ನಿಯಾಸಿನಮೈಡ್, ಸೆರಾಮೈಡ್ಗಳು ಮತ್ತು ಹೈಲುರಾನಿಕ್ ಆಮ್ಲದಂತಹ ವಸ್ತುಗಳು ಹೈಡ್ರೇಶನ್ ಕಾಪಾಡಲು ಮತ್ತು ಚರ್ಮದ ತಡೆಗೋಡೆಗಳನ್ನು ಬೆಂಬಲಿಸಲು ಸಹಾಯ ಮಾಡುತ್ತದೆ.

ಅಂತಿಮವಾಗಿ ಡಬಲ್ ಕ್ಲೆನ್ಸಿಂಗ್ ನಿರ್ಧಾರವು ಚರ್ಮದ ಪ್ರಕಾರ, ಜೀವನಶೈಲಿ ಮತ್ತು ದೈನಂದಿನ ಮಾನ್ಯತೆಯನ್ನು ಅವಲಂಬಿಸಿರುತ್ತದೆ.

ಸೂಚನೆ: ಲೇಖನವನ್ನು ಮಾಹಿತಿಯ ಉದ್ದೇಶಕ್ಕಾಗಿ ಮಾತ್ರ ನೀಡಲಾಗಿದ್ದು, ವೃತ್ತಿಪರ ವೈದ್ಯಕೀಯ ಸಲಹೆಗೆ ಪರ್ಯಾಯವಲ್ಲ. ವೈದ್ಯಕೀಯ ಸ್ಥಿತಿಗೆ ಸಂಬಂಧಿಸಿದ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ವೈದ್ಯರ ಸಲಹೆಯನ್ನು ಅನುಸರಿಸಿ.