ಇಸ್ರೇಲಿ ವಸತಿ ನೆಲೆಗಳೊಂದಿಗೆ ವ್ಯಾಪಾರಕ್ಕೆ ಬ್ರಿಟನ್, ಕೆನಡಾ ಮತ್ತು ಫ್ರಾನ್ಸ್ ಸೇರಿದಂತೆ 12 ದೇಶಗಳ ನಿರ್ಬಂಧ

ಲಂಡನ್: ಪಶ್ಚಿಮ ದಂಡೆಯಲ್ಲಿ ಇಸ್ರೇಲಿ ವಸಾಹತುಗಾರರು ಫೆಲೆಸ್ತೀನಿನ ಜನರ ಮೇಲೆ ನಡೆಸುತ್ತಿರುವ ದಾಳಿಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ಬ್ರಿಟನ್, ಕೆನಡಾ ಮತ್ತು ಫ್ರಾನ್ಸ್ ಸೇರಿದಂತೆ 12 ದೇಶಗಳು ಇಸ್ರೇಲ್ ನಿರ್ಮಿಸಿರುವ ವಸತಿ ನೆಲೆಗಳೊಂದಿಗೆ ವ್ಯಾಪಾರವನ್ನು ನಿಷೇಧಿಸುವುದಾಗಿ ಮಂಗಳವಾರ ಘೋಷಿಸಿವೆ.

ಡೆನ್ಮಾರ್ಕ್, ಫಿನ್ಲೆಂಡ್, ಐಸ್ಲ್ಯಾಂಡ್, ಐರ್ಲೆಂಡ್, ನಾರ್ವೆ, ಪೋಲೆಂಡ್, ಪೋರ್ಚುಗಲ್, ಸ್ಪೇನ್ ಮತ್ತು ಸ್ವೀಡನ್ ಕೂಡ ಇಸ್ರೇಲಿ ವಸತಿ ನೆಲೆಗಳೊಂದಿಗೆ ವ್ಯಾಪಾರದ ಮೇಲೆ ನಿರ್ಬಂಧ ವಿಧಿಸುವುದಾಗಿ ಈ ದೇಶಗಳ ವಿದೇಶಾಂಗ ಸಚಿವರು ಜಂಟಿ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಆಕ್ರಮಿತ ಪಶ್ಚಿಮ ದಂಡೆಯಲ್ಲಿರುವ ಫೆಲೆಸ್ತೀನಿನ ಗ್ರಾಮಗಳ ಮೇಲೆ ಇಸ್ರೇಲಿ ವಸಾಹತುಗಾರರು ಹಲವು ವಾರಗಳಿಂದ ದಾಳಿ ನಡೆಸುತ್ತಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಈ ದಾಳಿಗಳು ಮತ್ತಷ್ಟು ಹೆಚ್ಚಾಗಿವೆ. ಇದಕ್ಕೆ ಅಂತರರಾಷ್ಟ್ರೀಯ ಸಮುದಾಯದಿಂದ ವ್ಯಾಪಕ ಖಂಡನೆ ವ್ಯಕ್ತವಾಗಿದೆ.

ಪಶ್ಚಿಮ ದಂಡೆಯಲ್ಲಿ ಇಸ್ರೇಲ್ ಕೈಗೊಳ್ಳುತ್ತಿರುವ ಕ್ರಮಗಳು ಇಸ್ರೇಲ್ ಮತ್ತು ಫೆಲೆಸ್ತೀನ್ ಎಂಬ ಎರಡು ಪ್ರತ್ಯೇಕ ರಾಷ್ಟ್ರಗಳು ಶಾಂತಿಯುತವಾಗಿ ಅಕ್ಕಪಕ್ಕದಲ್ಲಿ ಇರುವ ‘ಎರಡು–ರಾಜ್ಯ ಪರಿಹಾರ’ದ ಸಾಧ್ಯತೆಯನ್ನು ದುರ್ಬಲಗೊಳಿಸುತ್ತಿವೆ ಎಂದು 12 ದೇಶಗಳ ಸಚಿವರು ಹೇಳಿದ್ದಾರೆ.

‘ವಸಾಹತುಗಾರರ ಹಿಂಸಾಚಾರ ಮತ್ತು ಹೊಸ ವಸತಿ ನೆಲೆಗಳ ವಿಸ್ತರಣೆ ಹಿಂದೆಂದಿಗಿಂತಲೂ ಹೆಚ್ಚಾಗಿದೆ. ಇದರಿಂದ ಪರಿಸ್ಥಿತಿ ವೇಗವಾಗಿ ಹದಗೆಡುತ್ತಿದೆ’ ಎಂದು ಅವರು ಎಚ್ಚರಿಸಿದ್ದಾರೆ.

ಐರ್ಲೆಂಡ್ ಮತ್ತು ಸ್ಪೇನ್ ಈಗಾಗಲೇ ಇಸ್ರೇಲಿ ವಸತಿ ನೆಲೆಗಳೊಂದಿಗೆ ವ್ಯಾಪಾರದ ವಿರುದ್ಧ ಕ್ರಮ ಕೈಗೊಂಡಿವೆ. ಇಸ್ರೇಲ್ ನ ಪ್ರಮುಖ ವ್ಯಾಪಾರ ಪಾಲುದಾರನಾಗಿರುವ ಯುರೋಪಿಯನ್ ಒಕ್ಕೂಟವೂ ಇದೇ ರೀತಿಯ ಕ್ರಮ ಕೈಗೊಳ್ಳಬೇಕು ಎಂದು ಫ್ರಾನ್ಸ್ ಹಲವು ವಾರಗಳಿಂದ ಒತ್ತಾಯಿಸುತ್ತಿದೆ. ಆದರೆ ಕೆಲವು ಯುರೋಪಿಯನ್ ಒಕ್ಕೂಟದ ಸದಸ್ಯ ರಾಷ್ಟ್ರಗಳು ಅದಕ್ಕೆ ವಿರೋಧ ವ್ಯಕ್ತಪಡಿಸಿವೆ.

►ಬ್ರಿಟನ್ ನ ಕ್ರಮ

ಬ್ರಿಟನ್ ಇಸ್ರೇಲ್ನೊಂದಿಗೆ ನಡೆಸುತ್ತಿದ್ದ ಮುಕ್ತ ವ್ಯಾಪಾರ ಮಾತುಕತೆಗಳನ್ನು ಸ್ಥಗಿತಗೊಳಿಸಿದೆ. ಜತೆಗೆ, ಪಶ್ಚಿಮ ದಂಡೆಯ ಇಸ್ರೇಲಿ ವಸಾಹತುಗಾರರ ವಿರುದ್ಧ ನಿರ್ಬಂಧಗಳನ್ನೂ ಘೋಷಿಸಿದೆ.

ಬ್ರಿಟನ್ ವಿದೇಶಾಂಗ ಕಾರ್ಯದರ್ಶಿ ಎಡ್ ಮಿಲಿಬ್ಯಾಂಡ್ ಸಂಸತ್ತಿನಲ್ಲಿ ಮಾತನಾಡಿ, ಇಸ್ರೇಲಿ ವಸಾಹತುಗಾರರು ನಡೆಸುತ್ತಿರುವ ‘ಜನಾಂಗೀಯ ಶುದ್ಧೀಕರಣ’ವನ್ನು ಇಸ್ರೇಲ್ ಸರ್ಕಾರ ನಿರ್ಲಕ್ಷಿಸುತ್ತಿದೆ ಎಂದು ಆರೋಪಿಸಿದರು.

ಆಕ್ರಮಿತ ಪ್ರದೇಶಗಳಲ್ಲಿರುವ ಅಕ್ರಮ ಇಸ್ರೇಲಿ ವಸತಿ ನೆಲೆಗಳಿಂದ ಬರುವ ಸರಕುಗಳನ್ನು ಬ್ರಿಟನ್ ಗೆ ಆಮದು ಮಾಡಿಕೊಳ್ಳುವುದನ್ನು ನಿಷೇಧಿಸಲಾಗುವುದು ಎಂದು ಅವರು ಘೋಷಿಸಿದರು.

‘ನಮ್ಮ ಅಂಗಡಿಗಳು ಮತ್ತು ಸೂಪರ್ ಮಾರ್ಕೆಟ್ ಗಳಲ್ಲಿ ಇಸ್ರೇಲ್ ವಸತಿ ನೆಲೆಗಳಿಂದ ಬರುವ ಉತ್ಪನ್ನಗಳನ್ನು ಮಾರಾಟ ಮಾಡುವ ಮೂಲಕ ನಾವು ಆಕ್ರಮಣವನ್ನು ಬೆಂಬಲಿಸಬೇಕು ಎಂದು ಬ್ರಿಟಿಷ್ ಜನರು ಬಯಸುತ್ತಾರೆ ಎಂದು ನಾನು ನಂಬುವುದಿಲ್ಲ’ ಎಂದು ಹೊಸ ಪ್ರಧಾನಿ ಆಂಡಿ ಬರ್ನ್ಹ್ಯಾಮ್ ಅವರ ಸಮ್ಮುಖದಲ್ಲಿ ಮಿಲಿಬ್ಯಾಂಡ್ ಸಂಸತ್ತಿನಲ್ಲಿ ಹೇಳಿದರು.

ವಸತಿ ನೆಲೆಗಳ ವಿಸ್ತರಣೆಗೆ ನಿರ್ಮಾಣ, ಮೂಲಸೌಕರ್ಯ, ಹಣಕಾಸು ಮತ್ತು ರಿಯಲ್ ಎಸ್ಟೇಟ್ ಸೇವೆಗಳನ್ನು ಒದಗಿಸುವ ನಿರ್ದಿಷ್ಟ ಕಂಪೆನಿಗಳು ಮತ್ತು ವ್ಯಕ್ತಿಗಳ ವಿರುದ್ಧವೂ ಬ್ರಿಟನ್ ಕ್ರಮ ಕೈಗೊಳ್ಳಲಿದೆ ಎಂದು ಅವರು ಹೇಳಿದರು.

ಫ್ರಾನ್ಸ್ ಕೂಡ ಆಕ್ರಮಿತ ಪ್ರದೇಶಗಳಲ್ಲಿರುವ ಇಸ್ರೇಲಿ ವಸತಿ ನೆಲೆಗಳೊಂದಿಗೆ ವ್ಯಾಪಾರವನ್ನು ನಿಲ್ಲಿಸಲಿದೆ ಎಂದು ಫ್ರೆಂಚ್ ವಿದೇಶಾಂಗ ಸಚಿವ ಜೀನ್–ನೋಯೆಲ್ ಬ್ಯಾರಟ್ ಎಕ್ಸ್ ನಲ್ಲಿ ತಿಳಿಸಿದ್ದಾರೆ.

►ಅಮೆರಿಕದ ವಿರೋಧ

ಬ್ರಿಟನ್ ನ ನಿರ್ಧಾರವನ್ನು ಇಸ್ರೇಲ್ ನಲ್ಲಿರುವ ಅಮೆರಿಕದ ರಾಯಭಾರಿ ಮೈಕ್ ಹಕಬೀ ಟೀಕಿಸಿದ್ದಾರೆ.

‘ಇದು ಇಸ್ರೇಲ್ ಸರ್ಕಾರದ ವಿರುದ್ಧದ ತಾರತಮ್ಯದಂತೆ ಕಾಣುತ್ತದೆ. ಇದು ಯಹೂದಿ ಜನರ ವಿರುದ್ಧದ ತಾರತಮ್ಯ’ ಎಂದು ಅವರು ಮಂಗಳವಾರ ಬಿಬಿಸಿ ರೇಡಿಯೊಗೆ ಹೇಳಿದ್ದಾರೆ.

ಮಿಲಿಬ್ಯಾಂಡ್ ಯಹೂದಿ ವಲಸಿಗರ ಪುತ್ರರಾಗಿದ್ದಾರೆ.

ಇಡೀ ಪಶ್ಚಿಮ ದಂಡೆಯನ್ನು ಇಸ್ರೇಲ್ ಗೆ ಸೇರಿಸಿಕೊಳ್ಳಬೇಕು ಎಂದು ಪ್ರತಿಪಾದಿಸುವ ತೀವ್ರ ಬಲಪಂಥೀಯ ಪಕ್ಷದ ನಾಯಕ ಹಾಗೂ ಇಸ್ರೇಲ್ ಹಣಕಾಸು ಸಚಿವ ಬೆಜಲೆಲ್ ಸ್ಮೋಟ್ರಿಚ್, ಇಸ್ರೇಲ್ನಲ್ಲಿರುವ ಬ್ರಿಟನ್ ರಾಯಭಾರಿಯನ್ನು ಹೊರಹಾಕಬೇಕು ಎಂದು ಆಗ್ರಹಿಸಿದ್ದಾರೆ.

ಅಂತರರಾಷ್ಟ್ರೀಯ ಒತ್ತಡ ಹೆಚ್ಚಾದರೂ ಅಕ್ರಮ ವಸತಿ ನೆಲೆಗಳನ್ನು ನಿರ್ಮಿಸುವುದನ್ನು ಮುಂದುವರಿಸುವುದಾಗಿ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಹೇಳಿದ್ದಾರೆ. ಪಶ್ಚಿಮ ದಂಡೆಗೆ ವಸಾಹತುಗಾರರು ದೊಡ್ಡ ಸಂಖ್ಯೆಯಲ್ಲಿ ಬರುವುದನ್ನು ಬೆಂಬಲಿಸುವುದಾಗಿಯೂ ಅವರು ತಿಳಿಸಿದ್ದಾರೆ.

ಇತ್ತೀಚಿನ ವಾರಗಳಲ್ಲಿ ಪಶ್ಚಿಮ ದಂಡೆಯಲ್ಲಿ ವಸಾಹತುಗಾರರು ನಡೆಸಿದ ಕೆಲವು ಹಿಂಸಾಚಾರ ಘಟನೆಗಳನ್ನು ನೆತನ್ಯಾಹು ಖಂಡಿಸಿದ್ದಾರೆ. ಅಮೆರಿಕದ ರಾಯಭಾರಿ ಹಕಬೀ ಕೂಡ ಈ ಘಟನೆಗಳ ಬಗ್ಗೆ ತೀವ್ರ ಟೀಕೆ ಮಾಡಿದ್ದಾರೆ. ಯುರೋಪಿನ ಹಲವು ರಾಜಧಾನಿಗಳಲ್ಲಿಯೂ ಇಸ್ರೇಲ್ ವಿರುದ್ಧದ ಟೀಕೆ ಹೆಚ್ಚಾಗಿದೆ.

►ಬ್ರಿಟನ್ ನ ನಿಲುವಿನಲ್ಲಿ ಬದಲಾವಣೆ

ಕೀರ್ ಸ್ಟಾರ್ಮರ್ ರಾಜೀನಾಮೆ ನೀಡಿದ ಬಳಿಕ ಜುಲೈನಲ್ಲಿ ಆಂಡಿ ಬರ್ನ್ಹ್ಯಾಮ್ ಬ್ರಿಟನ್ ಪ್ರಧಾನಿಯಾದರು. ಅವರ ನೇತೃತ್ವದ ಸರ್ಕಾರ ಇಸ್ರೇಲ್ ವಿಚಾರದಲ್ಲಿ ಹಿಂದಿನ ಸರ್ಕಾರಕ್ಕಿಂತ ಕಠಿಣ ನಿಲುವು ತಳೆಯುತ್ತಿರುವುದನ್ನು ಹೊಸ ಕ್ರಮ ತೋರಿಸುತ್ತದೆ.

2023ರ ಅಕ್ಟೋಬರ್ 7ರಂದು ಹಮಾಸ್ ದಾಳಿ ನಡೆಸಿದ ಬಳಿಕ ಇಸ್ರೇಲ್ ಗಾಝಾದ ಮೇಲೆ ನಿರಂತರ ದಾಳಿ ನಡೆಸುತ್ತಿದೆ. ಈ ದಾಳಿಯಲ್ಲಿ ಗಾಝಾದ ಬಹುಭಾಗ ಧ್ವಂಸಗೊಂಡಿದ್ದು, ಇಸ್ರೇಲ್ ವಿರುದ್ಧ ಅಂತರರಾಷ್ಟ್ರೀಯ ಮಟ್ಟದಲ್ಲಿ ತೀವ್ರ ಟೀಕೆ ವ್ಯಕ್ತವಾಗಿದೆ.

ಇಸ್ರೇಲ್ ವಿಚಾರದಲ್ಲಿ ಸ್ಟಾರ್ಮರ್ ತುಂಬಾ ಮೃದು ನಿಲುವು ಹೊಂದಿದ್ದರು ಎಂದು ಬರ್ನ್ಹ್ಯಾಮ್ ಆರೋಪಿಸಿದ್ದರು.

ಆದರೆ ಸ್ಟಾರ್ಮರ್ ಸರ್ಕಾರವೂ ಜೂನ್ ನಲ್ಲಿ ವಸಾಹತುಗಾರರ ಹಿಂಸಾಚಾರಕ್ಕೆ ಸಂಬಂಧಿಸಿದಂತೆ ಆರು ಸಂಸ್ಥೆಗಳು ಮತ್ತು ಒಬ್ಬ ವ್ಯಕ್ತಿಯ ವಿರುದ್ಧ ನಿರ್ಬಂಧ ವಿಧಿಸಿತ್ತು. ವಸಾಹತುಗಾರರ ಹಿಂಸಾಚಾರಕ್ಕೆ ಹಣಕಾಸು ಒದಗಿಸುವುದು, ಅದಕ್ಕೆ ನೆರವು ನೀಡುವುದು ಮತ್ತು ಅದರಲ್ಲಿ ಭಾಗಿಯಾಗಿರುವುದು ಆ ವ್ಯಕ್ತಿಯ ಮೇಲಿನ ಆರೋಪವಾಗಿತ್ತು.

ಸ್ಟಾರ್ಮರ್ ಸರ್ಕಾರವು ಕಳೆದ ವರ್ಷ ಫೆಲೆಸ್ತೀನ್ ರಾಜ್ಯವನ್ನು ಅಧಿಕೃತವಾಗಿ ಗುರುತಿಸಿತ್ತು.

►ಪಶ್ಚಿಮ ದಂಡೆಯ ಪರಿಸ್ಥಿತಿ

ಪಶ್ಚಿಮ ದಂಡೆಯಲ್ಲಿ ಸುಮಾರು 30 ಲಕ್ಷ ಫೆಲೆಸ್ತೀನಿನ ಜನರು ವಾಸಿಸುತ್ತಿದ್ದಾರೆ. ಇದೇ ಪ್ರದೇಶದಲ್ಲಿರುವ ಅಕ್ರಮ ಇಸ್ರೇಲಿ ವಸತಿ ನೆಲೆಗಳಲ್ಲಿ 5 ಲಕ್ಷಕ್ಕೂ ಹೆಚ್ಚು ಇಸ್ರೇಲಿಗಳು ವಾಸಿಸುತ್ತಿದ್ದಾರೆ.

ಫೆಲೆಸ್ತೀನಿನ ಆರೋಗ್ಯ ಸಚಿವಾಲಯದ ದತ್ತಾಂಶವನ್ನು ಆಧರಿಸಿ ಎಎಫ್ಪಿ ನಡೆಸಿದ ಲೆಕ್ಕಾಚಾರದ ಪ್ರಕಾರ, ಗಾಝಾ ಯುದ್ಧ ಆರಂಭವಾದ ಬಳಿಕ ಪಶ್ಚಿಮ ದಂಡೆಯಲ್ಲಿ ಇಸ್ರೇಲಿ ಪಡೆಗಳು ಅಥವಾ ವಸಾಹತುಗಾರರ ದಾಳಿಯಲ್ಲಿ ಕನಿಷ್ಠ 1,105 ಫೆಲೆಸ್ತೀನಿನ ಜನರು ಮೃತಪಟ್ಟಿದ್ದಾರೆ.

ಹಲವು ವರ್ಷಗಳಿಂದ ಸ್ಥಗಿತಗೊಂಡಿದ್ದ E1 ವಸತಿ ಯೋಜನೆಗೆ ಇಸ್ರೇಲ್ ಕಳೆದ ವರ್ಷ ಅನುಮೋದನೆ ನೀಡಿತ್ತು. ಈ ಯೋಜನೆಯಡಿ ಪಶ್ಚಿಮ ದಂಡೆಯಲ್ಲಿ 1,200 ವಸತಿ ಘಟಕಗಳನ್ನು ನಿರ್ಮಿಸಲು ಉದ್ದೇಶಿಸಲಾಗಿದೆ.

ಈ ಯೋಜನೆ ಪೂರ್ಣಗೊಂಡರೆ ಇಸ್ರೇಲ್ ಸ್ವಾಧೀನಪಡಿಸಿಕೊಂಡಿರುವ ಪೂರ್ವ ಜೆರುಸಲೇಂ ಮತ್ತು ಉಳಿದ ಆಕ್ರಮಿತ ಪಶ್ಚಿಮ ದಂಡೆಯ ನಡುವಿನ ಸಂಪರ್ಕ ಮತ್ತಷ್ಟು ಕಡಿಮೆಯಾಗಲಿದೆ.

►ವ್ಯಾಪಾರದ ಪ್ರಮಾಣ

ಬ್ರಿಟನ್ ಸರ್ಕಾರದ ಪ್ರಕಾರ, 2025ರಲ್ಲಿ ಬ್ರಿಟನ್ ಮತ್ತು ಆಕ್ರಮಿತ ಫೆಲೆಸ್ತೀನಿನ ಪ್ರದೇಶಗಳ ನಡುವಿನ ವ್ಯಾಪಾರದ ಮೌಲ್ಯ ಸುಮಾರು 3.8 ಕೋಟಿ ಪೌಂಡ್ (5.1 ಕೋಟಿ ಡಾಲರ್) ಆಗಿತ್ತು.

ಹೀಗಾಗಿ, ಬ್ರಿಟನ್ನ ಹೊಸ ನಿರ್ಬಂಧದಿಂದ ದೊಡ್ಡ ಆರ್ಥಿಕ ಪರಿಣಾಮ ಉಂಟಾಗುವುದಕ್ಕಿಂತ ಅದು ಸಾಂಕೇತಿಕ ಕ್ರಮವಾಗಿರಬಹುದು ಎಂದು ವಿಮರ್ಶಕರು ಹೇಳಿದ್ದಾರೆ.

ಆದರೆ ಪಶ್ಚಿಮ ದಂಡೆಯಿಂದ ಬರುವ ಸರಕುಗಳನ್ನು ಇಸ್ರೇಲ್ನ ಉಳಿದ ಭಾಗಗಳಿಂದ ಪ್ರತ್ಯೇಕಿಸುವುದು ಪ್ರಾಯೋಗಿಕವಾಗಿ ಕಷ್ಟಕರವಾಗಲಿದೆ ಎಂದು ನಿರ್ಬಂಧವನ್ನು ವಿರೋಧಿಸುವವರು ಹೇಳಿದ್ದಾರೆ.