ವಿಮೆ ಮೊತ್ತ ಪಡೆಯಲು ನಕಲಿ ಅಪಘಾತ ಸೃಷ್ಟಿಸಿದ 5 ಮಂದಿ ಬಂಧನ

ನ್ಯೂಯಾರ್ಕ್: ಅಪಘಾತ ನಡೆಸಿ ಪರಾರಿ(ಹಿಟ್ ಆ್ಯಂಡ್ ರನ್)ಯಾದ ಬಗ್ಗೆ ನಕಲಿ ಅಪಘಾತ ಘಟನೆ ಸೃಷ್ಟಿಸಿ ವಿಮೆ ಮೊತ್ತ ಪಡೆಯಲು ಪ್ರಯತ್ನಿಸಿದ ಪ್ರಕರಣಕ್ಕೆ ಸಂಬಂಧಿಸಿ ಅಮೆರಿಕದ ಕ್ಯಾಲಿಫೋರ್ನಿಯಾ ಪೊಲೀಸರು 5 ಮಂದಿಯನ್ನು ಬಂಧಿಸಿರುವುದಾಗಿ ವರದಿಯಾಗಿದೆ.

2021ರಲ್ಲಿ ಒಂಟಾರಿಯೊ ನಗರದಲ್ಲಿ ಪ್ರಕರಣ ನಡೆದಿತ್ತು. ತನ್ನ ಕಾರಿಗೆ ಅಪರಿಚಿತ ವ್ಯಕ್ತಿಗಳ ಕಾರು ಡಿಕ್ಕಿಯಾಗಿ ಪರಾರಿಯಾಗಿದೆ ಎಂದು ಹೇಳಿಕೊಂಡು 30,000 ಡಾಲರ್ ವಾಹನ ವಿಮೆ ಮೊತ್ತಕ್ಕೆ ವ್ಯಕ್ತಿಯೊಬ್ಬ ಅರ್ಜಿ ಸಲ್ಲಿಸಿದ್ದ. ಅಪಘಾತ ಪ್ರಕರಣ ದಾಖಲಿಸಿಕೊಂಡು ಪೊಲೀಸರು ತನಿಖೆ ನಡೆಸಿದ್ದು ಅಪಘಾತ ನಡೆದ ಸ್ಥಳದಲ್ಲಿದ್ದ ಮನೆಯೊಂದರ ಸಿಸಿ ಕ್ಯಾಮೆರಾದಲ್ಲಿ ಮಹಿಳೆಯೊಬ್ಬಳು ತನ್ನ ಕಾರನ್ನು ರಸ್ತೆ ಮಧ್ಯ ನಿಲ್ಲಿಸಿ ಹೋಗಿರುವುದು, ಬಳಿಕ ವೇಗವಾಗಿ ಬಂದ ಮತ್ತೊಂದು ಕಾರು ಅದಕ್ಕೆ ಡಿಕ್ಕಿ ಹೊಡೆದು ಪರಾರಿಯಾಗಿರುವುದು ಬೆಳಕಿಗೆ ಬಂದಿತ್ತು. ಪ್ರಕರಣಕ್ಕೆ ಸಂಬಂಧಿಸಿ ಮಹಿಳೆ ಸೇರಿದಂತೆ 5 ಮಂದಿಯನ್ನು ಪೊಲೀಸರು ಬಂಧಿಸಿ ಪ್ರಕರಣ ದಾಖಲಿಸಿದ್ದಾರೆ.