ಅಮೆರಿಕದಲ್ಲಿ ವಿಮಾನಯಾನ ಅಸ್ತವ್ಯಸ್ತ: ರವಿವಾರವೂ ಸಾವಿರಾರು ವಿಮಾನಗಳ ಹಾರಾಟ ರದ್ದು

ವಾಷಿಂಗ್ಟನ್: ಅಮೆರಿಕದಾದ್ಯಂತ ವಿಮಾನಯಾನ ಸೇವೆಯಲ್ಲಿನ ಅಡಚಣೆ ರವಿವಾರವೂ ಮುಂದುವರಿಯುವ ಸಾಧ್ಯತೆಯಿದೆ. ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್(FAA)ನ ವಾಯು ಸಂಚಾರ ನಿಯಂತ್ರಣ ಸಂವಹನ ವ್ಯವಸ್ಥೆಯಲ್ಲಿನ ತಾಂತ್ರಿಕ ದೋಷದಿಂದಾಗಿ ಸಾವಿರಾರು ವಿಮಾನಗಳ ಹಾರಾಟ ರದ್ದಾಗಿದ್ದು, ಹಲವು ವಿಮಾನಗಳು ವಿಳಂಬಗೊಂಡಿವೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.

FAA ಮುಖ್ಯಸ್ಥ ಬ್ರಿಯಾನ್ ಬೆಡ್‌ಫೋರ್ಡ್ ಶನಿವಾರ ಮಾತನಾಡಿ, ಕಾರ್ಯಾಚರಣೆಯನ್ನು ಸ್ಥಿರಗೊಳಿಸಲು ಮತ್ತು ತಾಂತ್ರಿಕ ಸಮಸ್ಯೆಗಳನ್ನು ಪರಿಹರಿಸಲು ಕ್ರಮ ಕೈಗೊಳ್ಳಲಾಗುತ್ತಿದೆ. ಆದರೆ ವಿಮಾನಗಳ ವೇಳಾಪಟ್ಟಿ ರವಿವಾರ ತಡರಾತ್ರಿಯವರೆಗೂ ಸಹಜ ಸ್ಥಿತಿಗೆ ಮರಳುವ ಸಾಧ್ಯತೆಯಿಲ್ಲ ಎಂದು ತಿಳಿಸಿದರು.

ಫ್ಲೈಟ್‌ಅವೇರ್ ವೆಬ್‌ಸೈಟ್ ಪ್ರಕಾರ, ಶನಿವಾರ ಸಂಜೆ 6.45ರ ವೇಳೆಗೆ ಅಮೆರಿಕದಾದ್ಯಂತ 6,150ಕ್ಕೂ ಹೆಚ್ಚು ವಿಮಾನಗಳ ಹಾರಾಟ ರದ್ದಾಗಿದ್ದು, 7,300ಕ್ಕೂ ಹೆಚ್ಚು ವಿಮಾನಗಳು ವಿಳಂಬಗೊಂಡಿದ್ದವು. ಶುಕ್ರವಾರ ಪರಿಸ್ಥಿತಿ ಇನ್ನಷ್ಟು ಹದಗೆಟ್ಟಿದ್ದು, ಸುಮಾರು 9,200 ವಿಮಾನಗಳ ಹಾರಾಟ ರದ್ದಾಗಿದ್ದರೆ, 7,500 ವಿಮಾನಗಳು ವಿಳಂಬಗೊಂಡಿದ್ದವು. ರವಿವಾರದ ವೇಳಾಪಟ್ಟಿಯಲ್ಲಿದ್ದ 530ಕ್ಕೂ ಹೆಚ್ಚು ವಿಮಾನಗಳ ಹಾರಾಟವನ್ನೂ ಶನಿವಾರ ಸಂಜೆಯ ವೇಳೆಗೆ ರದ್ದುಗೊಳಿಸಲಾಗಿತ್ತು.

ವಿಮಾನಯಾನ ವ್ಯವಸ್ಥೆಯನ್ನು ಸ್ಥಿರಗೊಳಿಸಲಾಗಿದ್ದು, ರವಿವಾರ ತಡರಾತ್ರಿಯ ವೇಳೆಗೆ ಬಹುತೇಕ ಕಾರ್ಯಾಚರಣೆಗಳು ಸಹಜ ಸ್ಥಿತಿಗೆ ಮರಳಲಿವೆ ಎಂದು ಬೆಡ್‌ಫೋರ್ಡ್ ಪ್ರಯಾಣಿಕರಲ್ಲಿ ಕ್ಷಮೆಯಾಚಿಸಿದರು.

ನಿರಂತರ ಅಡಚಣೆಯಿಂದಾಗಿ ಸಾವಿರಾರು ಪ್ರಯಾಣಿಕರು ವಿಮಾನ ನಿಲ್ದಾಣಗಳಲ್ಲಿ ಸಿಲುಕಿಕೊಂಡಿದ್ದಾರೆ. ರದ್ದಾದ ವಿಮಾನಗಳ ಕಾರ್ಯಾಚರಣೆಯನ್ನು ಪುನರಾರಂಭಿಸುವುದರ ಜೊತೆಗೆ ಪೈಲಟ್‌ ಗಳು ಮತ್ತು ಇತರ ಸಿಬ್ಬಂದಿಯನ್ನು ಮತ್ತೆ ನಿಯೋಜಿಸುವ ಸವಾಲನ್ನು ವಿಮಾನಯಾನ ಸಂಸ್ಥೆಗಳು ಎದುರಿಸುತ್ತಿವೆ.

ಐದು ಗಂಟೆಗಳ ಕಾಲ ವಿಮಾನ ಹಾರಾಟ ಸ್ಥಗಿತ :

FAA ಶುಕ್ರವಾರ ರಾಷ್ಟ್ರವ್ಯಾಪಿ ವಿಮಾನ ಹಾರಾಟ ಸ್ಥಗಿತಗೊಳಿಸಲು ಆದೇಶಿಸಿದ ಬಳಿಕ ಬಿಕ್ಕಟ್ಟು ಆರಂಭವಾಗಿತ್ತು. ಸುಮಾರು ಐದು ಗಂಟೆಗಳ ಕಾಲ ಬಹುತೇಕ ಎಲ್ಲ ನಿರ್ಗಮನ ವಿಮಾನಗಳ ಹಾರಾಟವನ್ನು ಸ್ಥಗಿತಗೊಳಿಸಲಾಗಿತ್ತು. 2001ರ ಸೆಪ್ಟೆಂಬರ್ 11ರ ದಾಳಿಯ ಬಳಿಕ ಅಮೆರಿಕದಾದ್ಯಂತ ವಿಮಾನಯಾನ ಸೇವೆ ಇಷ್ಟು ದೀರ್ಘಕಾಲ ಸ್ಥಗಿತಗೊಂಡಿರಲಿಲ್ಲ. ಅಮೆರಿಕದ ವಾಯುಯಾನ ಇತಿಹಾಸದಲ್ಲಿನ ಅತ್ಯಂತ ಕರಾಳ ದಿನಗಳ ಪೈಕಿ ಇದೂ ಒಂದಾಗಿದೆ.

ಸೈಬರ್ ದಾಳಿಯಿಂದ ಈ ಅಡಚಣೆ ಉಂಟಾಗಿದೆಯೇ ಎಂಬ ಬಗ್ಗೆ ಆರಂಭದಲ್ಲಿ ಅಧಿಕಾರಿಗಳು ಪರಿಶೀಲನೆ ನಡೆಸಿದ್ದರು. ಈ ಹಿನ್ನೆಲೆಯಲ್ಲಿ ಶ್ವೇತಭವನದ ಪರಿಸ್ಥಿತಿ ಕೊಠಡಿಯಲ್ಲಿ ತುರ್ತು ಸಭೆಯನ್ನೂ ನಡೆಸಲಾಗಿತ್ತು.

ಆದರೆ, FAAಗೆ ಗುತ್ತಿಗೆ ಸೇವೆ ಒದಗಿಸುವ L3Harris ಕಂಪೆನಿಯು ಕೇಂದ್ರವೊಂದರಲ್ಲಿ ಹೊಸ ರೂಟರ್ ಅಳವಡಿಸಿದ್ದರಿಂದ ಸಮಸ್ಯೆ ಉಂಟಾಗಿದೆ ಎಂದು ಸಾರಿಗೆ ಕಾರ್ಯದರ್ಶಿ ಸೀನ್ ಡಫಿ ತಿಳಿಸಿದ್ದಾರೆ.

ರೂಟರ್ ಅಳವಡಿಸುವ ಸಂದರ್ಭದಲ್ಲಿ ಮಾನವ ದೋಷದಿಂದ ಸಮಸ್ಯೆ ಉಂಟಾಗಿದೆಯೇ ಅಥವಾ ದೋಷಪೂರಿತ ಉಪಕರಣ ಅಳವಡಿಸಲಾಗಿದೆಯೇ ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ ಎಂದು ಅವರು ಹೇಳಿದ್ದಾರೆ.

ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿದ್ದು, FAA ನಡೆಸುತ್ತಿರುವ ತನಿಖೆಗೆ ಸಹಕರಿಸುತ್ತಿರುವುದಾಗಿ L3Harris ಹೇಳಿದೆ.

ರೂಟರ್‌ ನಲ್ಲಿನ ದೋಷದಿಂದಾಗಿ ಇತರ ಸಂವಹನ ಕೇಂದ್ರಗಳಲ್ಲಿ ದತ್ತಾಂಶದ ಒತ್ತಡ ಹೆಚ್ಚಾಗಿ, ವಾಯು ಸಂಚಾರ ನಿಯಂತ್ರಕರು ಬಳಸುವ ರಾಡಾರ್ ಮತ್ತು ಸಂವಹನ ವ್ಯವಸ್ಥೆಗಳ ಕಾರ್ಯಾಚರಣೆಗೆ ಅಡ್ಡಿಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪ್ರತಿ ನಾಲ್ಕರಿಂದ ಐದು ಸೆಕೆಂಡುಗಳಿಗೆ 1,000ಕ್ಕೂ ಹೆಚ್ಚು ಸಂಪರ್ಕ ಪ್ರಯತ್ನಗಳು ವ್ಯವಸ್ಥೆಯ ಮೇಲೆ ಒತ್ತಡ ಹೇರುತ್ತಿದ್ದವು. ಇದರಿಂದ ವಿಮಾನಗಳೊಂದಿಗಿನ ಸಂವಹನಕ್ಕೆ ತೊಂದರೆಯಾಗಿದ್ದು, ರಾಡಾರ್ ವ್ಯವಸ್ಥೆಯಲ್ಲೂ ಅಡಚಣೆ ಉಂಟಾಗಿದೆ ಎಂದು ಡಫಿ ತಿಳಿಸಿದ್ದಾರೆ.

FAAಯ 22 ಮಾರ್ಗಮಧ್ಯದ ವಾಯು ಸಂಚಾರ ನಿಯಂತ್ರಣ ಕೇಂದ್ರಗಳ ಪೈಕಿ 17 ಕೇಂದ್ರಗಳ ಮೇಲೆ ಈ ಸಮಸ್ಯೆ ಪರಿಣಾಮ ಬೀರಿತ್ತು. ವಿಮಾನಗಳು ಪ್ರಯಾಣದ ಮಧ್ಯದ ಹಂತದಲ್ಲಿರುವಾಗ ಅವುಗಳ ಸಂಚಾರವನ್ನು ಈ ಕೇಂದ್ರಗಳು ನಿರ್ವಹಿಸುತ್ತವೆ.

ಯಾವುದೇ ಕೇಂದ್ರವು ತನ್ನ ಎಲ್ಲ ಸಂವಹನ ಸಾಮರ್ಥ್ಯಗಳನ್ನು ಕಳೆದುಕೊಳ್ಳಬಹುದು ಎನ್ನುವ ಮುನ್ನೆಚ್ಚರಿಕೆ ಕ್ರಮವಾಗಿ ವಿಮಾನಗಳ ಹಾರಾಟ ಸ್ಥಗಿತಗೊಳಿಸುವ ನಿರ್ಧಾರ ಕೈಗೊಳ್ಳಲಾಗಿತ್ತು ಎಂದು ಬೆಡ್‌ಫೋರ್ಡ್ ಹೇಳಿದ್ದಾರೆ. ಆದರೆ, ಯಾವುದೇ ಕೇಂದ್ರವು ಸಂಪೂರ್ಣವಾಗಿ ಸೇವೆ ಕಳೆದುಕೊಂಡಿರಲಿಲ್ಲ.

ಇನ್ನೂ ಯಾವುದಾದರೂ ಅಪಾಯ ಉಳಿದಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು L3Harris ಕಂಪೆನಿಯೊಂದಿಗೆ ಹೆಚ್ಚುವರಿ ಪರೀಕ್ಷೆಗಳನ್ನು ನಡೆಸಲಾಗುತ್ತಿದೆ ಎಂದು FAA ತಿಳಿಸಿದೆ.

ಸಾವಿರಾರು ವಿಮಾನಗಳ ಹಾರಾಟ ರದ್ದು :

ತಾಂತ್ರಿಕ ಸಮಸ್ಯೆಯಿಂದ ಚೇತರಿಸಿಕೊಳ್ಳಲು ಸಮಯ ಬೇಕಾಗಿರುವುದರಿಂದ ಪ್ರಮುಖ ಅಮೆರಿಕದ ವಿಮಾನಯಾನ ಸಂಸ್ಥೆಗಳು ಶನಿವಾರವೂ ವ್ಯಾಪಕ ಪ್ರಮಾಣದಲ್ಲಿ ವಿಮಾನಗಳ ಹಾರಾಟ ರದ್ದುಗೊಳಿಸಿದವು.

ಡೆಲ್ಟಾ ಏರ್‌ಲೈನ್ಸ್, ಯುನೈಟೆಡ್ ಏರ್‌ಲೈನ್ಸ್ ಮತ್ತು ಅಮೆರಿಕನ್ ಏರ್‌ಲೈನ್ಸ್ ತಮ್ಮ ನಿಗದಿತ ವಿಮಾನಗಳ ಪೈಕಿ ಸುಮಾರು ಕಾಲು ಭಾಗದಷ್ಟು ವಿಮಾನಗಳನ್ನು ರದ್ದುಗೊಳಿಸಿದ್ದವು. ಜೆಟ್‌ಬ್ಲೂ ವಿಮಾನಯಾನ ಸಂಸ್ಥೆಯಲ್ಲಿ ರದ್ದತಿ ಪ್ರಮಾಣ ಸುಮಾರು ಶೇ.45ರಷ್ಟಿತ್ತು ಎಂದು ಫ್ಲೈಟ್‌ಅವೇರ್ ತಿಳಿಸಿದೆ.

ವಿಮಾನಯಾನ ಸಂಸ್ಥೆಗಳು ಪ್ರಯಾಣಿಕರಿಗೆ ವಿಶೇಷ ವಿನಾಯಿತಿ ನೀಡಿದ್ದು, ಹೆಚ್ಚುವರಿ ಶುಲ್ಕವಿಲ್ಲದೆ ತಮ್ಮ ಪ್ರಯಾಣವನ್ನು ಮುಂದಿನ ದಿನಗಳಿಗೆ ಮರುನಿಗದಿಪಡಿಸಿಕೊಳ್ಳಲು ಅವಕಾಶ ಕಲ್ಪಿಸಿವೆ.

ಶುಕ್ರವಾರ ಸಂಜೆ FAA ರಾಷ್ಟ್ರವ್ಯಾಪಿ ವಿಮಾನ ಹಾರಾಟ ಸ್ಥಗಿತದ ಆದೇಶವನ್ನು ಹಿಂಪಡೆದಿದ್ದರೂ, ವಿಮಾನಗಳು, ಪೈಲಟ್‌ ಗಳು ಮತ್ತು ಇತರ ಸಿಬ್ಬಂದಿಯನ್ನು ಮತ್ತೆ ನಿಯೋಜಿಸುವ ಪ್ರಕ್ರಿಯೆಯಿಂದಾಗಿ ಅಡಚಣೆ ಮುಂದುವರಿದಿದೆ.

ಶನಿವಾರ ನಡೆಯಬೇಕಿದ್ದ ಪಂದ್ಯಗಳಲ್ಲಿ ಪಾಲ್ಗೊಳ್ಳಲು ಪ್ರಯಾಣಿಸುತ್ತಿದ್ದ ಕಾಲೇಜು ಫುಟ್‌ಬಾಲ್ ತಂಡಗಳ ಮೇಲೂ ಈ ಬಿಕ್ಕಟ್ಟು ಪರಿಣಾಮ ಬೀರಿದೆ. ಕೆಲವು ತಂಡಗಳು ಶುಕ್ರವಾರವೇ ಪ್ರಯಾಣದ ವೇಳೆ ಸಿಲುಕಿಕೊಂಡಿದ್ದವು.

ವಾಯು ಸಂಚಾರ ವ್ಯವಸ್ಥೆ ಆಧುನೀಕರಣಕ್ಕೆ ಶತಕೋಟಿ ಡಾಲರ್ ಬೇಡಿಕೆ :

ಹಳೆಯ ತಂತ್ರಜ್ಞಾನ, ಉಪಕರಣಗಳು ಮತ್ತು ಸಂವಹನ ವ್ಯವಸ್ಥೆಗಳ ವೈಫಲ್ಯಗಳ ಜೊತೆಗೆ ಸಾವಿರಾರು ವಾಯು ಸಂಚಾರ ನಿಯಂತ್ರಕರ ಕೊರತೆಯಿಂದಾಗಿ ಅಮೆರಿಕದ ವಾಯು ಸಂಚಾರ ನಿಯಂತ್ರಣ ವ್ಯವಸ್ಥೆ ತೀವ್ರ ಒತ್ತಡ ಎದುರಿಸುತ್ತಿದೆ. ಇತ್ತೀಚಿನ ತಾಂತ್ರಿಕ ವೈಫಲ್ಯವು ವ್ಯವಸ್ಥೆಯ ಸ್ಥಿತಿಗತಿಯ ಕುರಿತು ಮತ್ತೊಮ್ಮೆ ಕಳವಳ ಮೂಡಿಸಿದೆ.

ವಾಯು ಸಂಚಾರ ವ್ಯವಸ್ಥೆಯನ್ನು ಆಧುನೀಕರಿಸಲು ಸಾರಿಗೆ ಕಾರ್ಯದರ್ಶಿ ಡಫಿ 50 ಶತಕೋಟಿ ಡಾಲರ್ ಅನುದಾನ ಕೋರಿದ್ದಾರೆ. ಈ ಹಿಂದೆ ಅವರು 30 ಶತಕೋಟಿ ಡಾಲರ್ ಅನುದಾನಕ್ಕೆ ಮನವಿ ಮಾಡಿದ್ದರು. ಕಳೆದ ವರ್ಷ ಕಾಂಗ್ರೆಸ್ ಆಧುನೀಕರಣ ಕಾರ್ಯಗಳಿಗಾಗಿ 12.5 ಶತಕೋಟಿ ಡಾಲರ್ ಅನುದಾನಕ್ಕೆ ಅನುಮೋದನೆ ನೀಡಿತ್ತು.

ಈ ವರ್ಷ ವಾಯು ಸಂಚಾರ ಮೂಲಸೌಕರ್ಯಕ್ಕೆ ಹೆಚ್ಚುವರಿ ಅನುದಾನ ನೀಡುವುದನ್ನು ಬೆಂಬಲಿಸುವುದಾಗಿ ಹೌಸ್ ಸ್ಪೀಕರ್ ಮೈಕ್ ಜಾನ್ಸನ್ ಶನಿವಾರ ತಿಳಿಸಿದ್ದಾರೆ.

ಮುಂದಿನ ವರ್ಷ ಹೌಸ್ ಸಾರಿಗೆ ಮತ್ತು ಮೂಲಸೌಕರ್ಯ ಸಮಿತಿ ಹಾಗೂ ಅದರ ವಾಯುಯಾನ ಉಪಸಮಿತಿಯ ನೇತೃತ್ವ ವಹಿಸಲಿರುವ ಡೆಮಾಕ್ರಟಿಕ್ ಪಕ್ಷದ ಸಂಸದರಾದ ರಿಕ್ ಲಾರ್ಸೆನ್ ಮತ್ತು ಆಂಡ್ರೆ ಕಾರ್ಸನ್, ಈ ಅಡಚಣೆಯ ಕುರಿತು ವಿಚಾರಣೆ ನಡೆಸುವುದಾಗಿ ಹೇಳಿದ್ದಾರೆ.

ಇದೇ ವೇಳೆ, ಈಗಾಗಲೇ ಅನುಮೋದನೆಗೊಂಡಿರುವ ಆಧುನೀಕರಣ ಯೋಜನೆಯಡಿ ಹಣ ಬಳಕೆಯ ವೇಗದ ಬಗ್ಗೆಯೂ ಅವರು ಪ್ರಶ್ನಿಸಿದ್ದಾರೆ. ಸಾರಿಗೆ ಇಲಾಖೆಯು 4.3 ಶತಕೋಟಿ ಡಾಲರ್ ಮೌಲ್ಯದ ಒಪ್ಪಂದಗಳನ್ನು ನೀಡಿದ್ದರೂ, ಕಳೆದ ವರ್ಷ ಕಾಂಗ್ರೆಸ್ ಅನುಮೋದಿಸಿದ 12.5 ಶತಕೋಟಿ ಡಾಲರ್ ಅನುದಾನದಲ್ಲಿ ಕೇವಲ ಒಂದು ಶತಕೋಟಿ ಡಾಲರ್ ಮಾತ್ರ ವೆಚ್ಚ ಮಾಡಿದೆ ಎಂದು ಅವರು ತಿಳಿಸಿದ್ದಾರೆ.