ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಸುಧಾರಣೆಗೆ ಆಂಟೋನಿಯೊ ಗುಟೆರಸ್ ಒತ್ತಾಯ

ನ್ಯೂಯಾರ್ಕ್: ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆಂಟೋನಿಯೊ ಗುಟೆರಸ್ ಅವರು ಮಂಗಳವಾರ ಉನ್ನತ ಮಟ್ಟದ ವಿಶ್ವಸಂಸ್ಥೆಯ ಮಹಾಸಭೆಯ ಅಧಿವೇಶನದಲ್ಲಿ ತಮ್ಮ ಕೊನೆಯ ಭಾಷಣವನ್ನು ಮಾಡಿದರು. ಈ ವೇಳೆ, ಭದ್ರತಾ ಮಂಡಳಿಯು ಇಂದಿನ ಜಗತ್ತನ್ನು ಪ್ರತಿಬಿಂಬಿಸುವಂತಿರಬೇಕು ಮತ್ತು ಪ್ರಸ್ತುತ ಭೂ-ರಾಜಕೀಯ ಸವಾಲುಗಳನ್ನು ಎದುರಿಸಲು ಅಗತ್ಯವಿರುವ ಸಿಂಧುತ್ವ ಹಾಗೂ ಪರಿಣಾಮಕಾರಿತ್ವವನ್ನು ಹೊಂದಿರಬೇಕು ಎಂದು ಹೇಳುವ ಮೂಲಕ ಭದ್ರತಾ ಮಂಡಳಿಯಲ್ಲಿ ಸುಧಾರಣೆಗೆ ಆಗ್ರಹಿಸಿದ್ದಾರೆ.

ಮಹಾಸಭೆಯ 81ನೇ ಅಧಿವೇಶನದ ಸಾಮಾನ್ಯ ಸಭೆಯ ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದ ಗುಟೆರಸ್, 15 ಸದಸ್ಯರ ಈ ಸಂಸ್ಥೆಯಲ್ಲಿ ಬದಲಾವಣೆ ತರಲು ಕರೆ ನೀಡಿದರು. ವಿಶ್ವಸಂಸ್ಥೆಯ ಮುಖ್ಯಸ್ಥರಾಗಿ ಅವರ ಎರಡನೇ ಐದು ವರ್ಷಗಳ ಅವಧಿಯು ಡಿಸೆಂಬರ್ 2026ರಲ್ಲಿ ಮುಕ್ತಾಯಗೊಳ್ಳಲಿದ್ದು, ಪ್ರಧಾನ ಕಾರ್ಯದರ್ಶಿಯಾಗಿ ಇದು ಅವರ ಕೊನೆಯ ಉನ್ನತ ಮಟ್ಟದ ಕಾರ್ಯಕ್ರಮವಾಗಿದೆ.

ಇಂದಿನ ಸವಾಲುಗಳು ಬಯಸುವ ಸಿಂಧುತ್ವ ಮತ್ತು ಪರಿಣಾಮಕಾರಿತ್ವದೊಂದಿಗೆ ಇಂದಿನ ಜಗತ್ತನ್ನು ಪ್ರತಿಬಿಂಬಿಸುವಂತೆ ನಾವು ಭದ್ರತಾ ಮಂಡಳಿಯನ್ನು ಸುಧಾರಿಸಬೇಕು. 2ನೇ ಮಹಾಯುದ್ಧದ ನಂತರ ಭದ್ರತಾ ಮಂಡಳಿಯನ್ನು ವಿನ್ಯಾಸಗೊಳಿಸಲಾಗಿತ್ತು. ಆದರೆ ಅಂದಿನಿಂದ ಜಗತ್ತು ಮೂಲಭೂತವಾಗಿ ಬದಲಾಗಿದೆ. ಆದರೆ ಈ ಬದಲಾವಣೆಯು ಭದ್ರತಾ ಮಂಡಳಿಯಲ್ಲಿ ಪ್ರತಿಫಲಿಸುತ್ತಿಲ್ಲ. ಇದಕ್ಕೆ ಆಫ್ರಿಕಾ `ಅತ್ಯಂತ ಬೆರಗುಗೊಳಿಸುವ ಉದಾಹರಣೆ'ಯಾಗಿದೆ. ವಿಶ್ವಸಂಸ್ಥೆಯನ್ನು ಸ್ಥಾಪಿಸಿದಾಗ, ಆಫ್ರಿಕಾದ ಬಹುಪಾಲು ಭಾಗವು ಇನ್ನೂ ವಸಾಹತುಶಾಹಿ ಆಡಳಿತದ ಅಡಿಯಲ್ಲೇ ಇತ್ತು. ಈಗಲೂ ಆಫ್ರಿಕಾಕ್ಕೆ ಭದ್ರತಾ ಮಂಡಳಿಯಲ್ಲಿ ಯಾವುದೇ ಕಾಯಂ ಸ್ಥಾನವಿಲ್ಲ. ಶಾಶ್ವತ ಆಫ್ರಿಕನ್ ಪ್ರಾತಿನಿಧ್ಯವಿಲ್ಲದ 21 ನೇ ಶತಮಾನದ ಭದ್ರತಾ ಮಂಡಳಿ ಸಮರ್ಥನೀಯವಲ್ಲ. ಇದು ಬದಲಾಗಲೇಬೇಕು' ಎಂದು ಅವರು ಹೇಳಿದರು.

ತಮ್ಮ ಸುಮಾರು 35 ನಿಮಿಷಗಳ ಭಾಷಣದ ನಂತರ, ಗುಟೆರಸ್ ವೇದಿಕೆಯಿಂದ ನಿರ್ಗಮಿಸುತ್ತಿದ್ದಂತೆ ವಿಶ್ವ ನಾಯಕರು, ವಿದೇಶಾಂಗ ಸಚಿವರು, ರಾಯಭಾರಿಗಳು, ರಾಜತಾಂತ್ರಿಕರು ಮತ್ತು ವಿಶ್ವಸಂಸ್ಥೆಯ ಹಿರಿಯ ಅಧಿಕಾರಿಗಳಿಂದ ಎದ್ದು ನಿಂತು ಗೌರವದ ಚಪ್ಪಾಳೆ ಪಡೆದರು.