Bangladesh | ಒಂದೇ ಕುಟುಂಬದ ನಾಲ್ವರು ಮೃತಪಟ್ಟ ಸ್ಥಿತಿಯಲ್ಲಿ ಪತ್ತೆ
ಢಾಕಾ: ಬಾಂಗ್ಲಾದೇಶದ ರಂಗ್ಪುರ ನಗರದಲ್ಲಿ ನಿವೃತ್ತ ಶಾಲಾ ಶಿಕ್ಷಕ ಹಾಗೂ ಅವರ 12 ವರ್ಷದ ಮಗ ಸೇರಿದಂತೆ ಒಂದೇ ಕುಟುಂಬದ ನಾಲ್ವರು ತಮ್ಮ ಬೀಗ ಹಾಕಿದ್ದ ನಿವಾಸದಲ್ಲಿ ಶಂಕಾಸ್ಪದ ರೀತಿಯಲ್ಲಿ ಶವವಾಗಿ ಪತ್ತೆಯಾಗಿದ್ದು, ಪೊಲೀಸರು ತನಿಖೆ ಆರಂಭಿಸಿದ್ದಾರೆ.
ಮೃತರನ್ನು ರಂಗ್ಪುರ ಜಿಲ್ಲಾ ಶಾಲೆಯ ನಿವೃತ್ತ ಶಿಕ್ಷಕ ಗಣಪತಿ ಚಕ್ರವರ್ತಿ, ಅವರ ಪತ್ನಿ ಪ್ರೀತಿಲತಾ ಚಕ್ರವರ್ತಿ, ಮಗಳು ಆಗಮಿ ಚಕ್ರವರ್ತಿ (23 ವರ್ಷ) ಮತ್ತು ಮಗ ಪ್ರಿಯಮ್ ಚಕ್ರವರ್ತಿ(12 ವರ್ಷ) ಎಂದು ಗುರುತಿಸಲಾಗಿದೆ. ಗಣಪತಿ ಮತ್ತು ಪ್ರಿಯಮ್ ಅವರ ಕುತ್ತಿಗೆಗೆ ಹಗ್ಗ ಅಥವಾ ಸ್ಕಾರ್ಫ್ ಸುತ್ತಿರುವುದು ಕಂಡುಬಂದಿದ್ದು, ಅವರನ್ನು ಉಸಿರುಗಟ್ಟಿಸಿ ಹತ್ಯೆ ಮಾಡಿರಬಹುದು ಎಂಬ ಅನುಮಾನ ಮೂಡಿದೆ.
ಪ್ರೀತಿಲತಾ ಮತ್ತು ಆಗಮಿ ಅವರ ದೇಹದ ಮೇಲೆ ತೀವ್ರ ಹಲ್ಲೆಯ ಕುರುಹುಗಳು ಪತ್ತೆಯಾಗಿವೆ ಎಂದು ಮೂಲಗಳು ತಿಳಿಸಿವೆ. ಪ್ರೀತಿಲತಾ ಅವರ ಕಿರಿಯ ಸಹೋದರಿ ಪೂಜಾ ಚಕ್ರವರ್ತಿ ಅವರು ಗುರುವಾರ ಮಧ್ಯಾಹ್ನ ಕೊನೆಯದಾಗಿ ತಮ್ಮ ಸಹೋದರಿಯೊಂದಿಗೆ ಮಾತನಾಡಿದ್ದಾಗಿ ತಿಳಿಸಿದ್ದಾರೆ. ಕುಟುಂಬಸ್ಥರು ಬಳಸುತ್ತಿದ್ದ ನಾಲ್ಕೂ ಮೊಬೈಲ್ ಫೋನ್ಗಳು ಗುರುವಾರ ರಾತ್ರಿಯಿಂದ ಬಂದ್ ಆಗಿದ್ದವು.
ಕುಟುಂಬದವರನ್ನು ಸಂಪರ್ಕಿಸಲು ವಿಫಲವಾದ ನಂತರ ಶನಿವಾರ ರಾತ್ರಿ ಸಂಬಂಧಿಕರು ದಾಸಪಾರ ನಿವಾಸಕ್ಕೆ ತೆರಳಿದ್ದರು. ಮುಖ್ಯ ಗೇಟ್ಗೆ ಬೀಗ ಹಾಕಲಾಗಿತ್ತು ಮತ್ತು ಮನೆಯ ಒಳಗಿನ ದೀಪಗಳನ್ನು ಆರಿಸಲಾಗಿತ್ತು. ಪೊಲೀಸರು ಬೀಗ ಒಡೆದು ಒಳಗೆ ಪ್ರವೇಶಿಸಿದಾಗ ನಾಲ್ವರ ಮೃತದೇಹ ಪತ್ತೆಯಾಗಿವೆ ಎಂದು ವರದಿಯಾಗಿದೆ.
