ಬ್ರಿಟನ್‍ನ ಹೊಸ ಅಕ್ರಮ ವಲಸೆ ಕಾಯ್ದೆಯಡಿ ಭಾರತೀಯ ಪ್ರಜೆ ವಿರುದ್ಧ ಆರೋಪ ದಾಖಲು

ಲಂಡನ್: ಬ್ರಿಟನ್‍ನ ಹೊಸ ಅಕ್ರಮ ವಲಸೆ ತಡೆ ಕಾಯ್ದೆಯಡಿ ಅಪರಾಧ ಆರೋಪ ಎದುರಿಸುತ್ತಿರುವ ಮೊದಲ ವ್ಯಕ್ತಿ ಭಾರತೀಯ ಪ್ರಜೆಯೊಬ್ಬರಾಗಿದ್ದಾರೆ.

ವೆಸ್ಟ್ ಮಿಡ್‍ಲ್ಯಾಂಡ್ಸ್‍ನ ಸ್ಮೆತ್‍ವಿಕ್‍ನಲ್ಲಿ ವಾಸಿಸುತ್ತಿರುವ 24 ವರ್ಷದ ಹೇಮ್ ರಾಜ್ ಎಂಬುವವರು, ಬ್ರಿಟನ್‍ಗೆ ಅಕ್ರಮ ವಲಸೆಯನ್ನು ಉತ್ತೇಜಿಸುವ ಆನ್‍ಲೈನ್ ವಿಷಯಗಳನ್ನು ರಚಿಸಿದ ಆರೋಪವನ್ನು ಎದುರಿಸುತ್ತಿದ್ದಾರೆ. ಈ ಅಪರಾಧವು ಗಡಿ ಭದ್ರತೆ ಮತ್ತು ವಲಸೆ ಕಾಯ್ದೆ 2025ರ ಸೆಕ್ಷನ್ 17ರ ಅಡಿಯಲ್ಲಿ ಬರುತ್ತದೆ ಎಂದು ಬಿಬಿಸಿ ವರದಿ ಮಾಡಿದೆ.

ಅಕ್ರಮ ವಲಸೆ ಸೇವೆಗಳನ್ನು ಉತ್ತೇಜಿಸುವ ಉದ್ದೇಶದಿಂದ ಇಂಟರ್ನೆಟ್‍ನಲ್ಲಿ ಯಾವುದೇ ಮಾಹಿತಿಯನ್ನು ಪ್ರಕಟಿಸುವುದನ್ನು ಇದು ಅಪರಾಧವೆಂದು ಪರಿಗಣಿಸುತ್ತದೆ. ಈ ಅಪರಾಧ ಸಾಬೀತಾದರೆ ಐದು ವರ್ಷಗಳವರೆಗೆ ಜೈಲು ಶಿಕ್ಷೆ, ದಂಡ ಅಥವಾ ಎರಡನ್ನೂ ವಿಧಿಸಬಹುದಾಗಿದೆ.