ಚೀನಾ: ವೀಸಾ ನಿಯಮ ಸರಳಗೊಳಿಸಲು ನಿರ್ಧಾರ

ಬೀಜಿಂಗ್, ಆ.4: ಕೆಲವು ವಿದೇಶೀಯರಿಗೆ ಆಗಮನದ ಬಳಿಕ ವೀಸಾಗಳನ್ನು ಪಡೆಯಲು ಮತ್ತು ಗ್ರಾಮೀಣ ನಿವಾಸಿಗಳು ಸುಲಭವಾಗಿ ನಗರದಲ್ಲಿ ನೆಲೆಸಲು ಅವಕಾಶ ಮಾಡಿಕೊಡಲು ವೀಸಾ ನಿಯಮಾವಳಿಗಳನ್ನು ಸರಳಗೊಳಿಸಲು ನಿರ್ಧರಿಸಲಾಗಿದೆ ಎಂದು ಚೀನಾ ಘೋಷಿಸಿದೆ.

ಆರ್ಥಿಕತೆಗೆ ಉತ್ತೇಜನ ನೀಡುವ ಕ್ರಮ ಇದಾಗಿದೆ. ಈ ಸಡಿಲಿಕೆಯು `ಜನತೆ, ವಾಹನಗಳು, ಮಾಹಿತಿ ಮತ್ತು ಡೇಟಾದ' ಮುಕ್ತ ಚಲನೆಯನ್ನು ಉತ್ತೇಜಿಸುವ ಗುರಿಯನ್ನು ಹೊಂದಿದೆ ಎಂದು ಚೀನಾದ ಸಾರ್ವಜನಿಕ ಭದ್ರತಾ ಇಲಾಖೆ ಹೇಳಿದೆ. ಬಳಕೆ ಪ್ರಮಾಣದ ಕುಸಿತ, ರಿಯಲ್ ಎಸ್ಟೇಟ್ ವಲಯದ ಬಿಕ್ಕಟ್ಟಿನಿಂದಾಗಿ ಚೀನಾದ ಕೊರೊನೋತ್ತರ ಚೇತರಿಕೆ ಪ್ರಕ್ರಿಯೆ ಇತ್ತೀಚಿನ ತಿಂಗಳಲ್ಲಿ ನಿಧಾನಗತಿಗೆ ತಿರುಗಿದೆ.

ಈ ಆರ್ಥಿಕ ವರ್ಷದ ಎರಡನೇ ತ್ರೈಮಾಸಿಕದಲ್ಲಿ ಜಿಡಿಪಿ ಬೆಳವಣಿಗೆ ದರ ಕೇವಲ 0.08%ದಷ್ಟು ಹೆಚ್ಚಿದ್ದರೆ ಯುವಜನರ ನಿರುದ್ಯೋಗ ಪ್ರಮಾಣ ದಾಖಲೆಯ 20%ಕ್ಕೆ ಏರಿಕೆಯಾಗಿದೆ. ಈ ಹಿನ್ನೆಲೆಯಲ್ಲಿ ವಿದೇಶದ ಉದ್ಯಮಿಗಳಿಗೆ ಹೊಸ ವೀಸಾ ನೀತಿ ಸೇರಿದಂತೆ 26 ಹೊಸ ಉಪಕ್ರಮಗಳನ್ನು ಇಲಾಖೆ ಘೋಷಿಸಿದೆ. ವ್ಯಾಪಾರ ಮಾತುಕತೆ, ಪ್ರದರ್ಶನ, ವಿಚಾರ ಸಂಕಿರಣ ಅಥವಾ ಹೂಡಿಕೆಗಾಗಿ ಚೀನಾಕ್ಕೆ ಆಗಮಿಸುವವರು ಸೂಕ್ತ ದಾಖಲೆ ಒದಗಿಸಿದರೆ `ವೀಸಾ ಆನ್ ಅರೈವಲ್'(ಆಗಮನದ ಬಳಿಕ ವೀಸಾ ಪಡೆಯುವ ವ್ಯವಸ್ಥೆ)ಗೆ ಅರ್ಹರಾಗುತ್ತಾರೆ.

ಈ ಹಿಂದೆ ಚೀನಾಕ್ಕೆ ಭೇಟಿ ನೀಡುವವರು ತಾವು ಪ್ರಯಾಣ ಆರಂಭಿಸುವ ದೇಶದಲ್ಲಿರುವ ಚೀನಾದ ರಾಯಭಾರಿ ಕಚೇರಿಗೆ ವೀಸಾ ಕೋರಿ ಅರ್ಜಿ ಸಲ್ಲಿಸಬೇಕಿತ್ತು.

ಇದರ ಜತೆಗೆ, ಚೀನೀ ಜನರನ್ನು ದಶಕಗಳಿಂದ `ನಗರ' ಮತ್ತು `ಗ್ರಾಮೀಣ' ಎಂದು ವರ್ಗೀಕರಿಸಲಾದ ವಿವಾದಾತ್ಮಕ ಶಾಶ್ವತ ನಿವಾಸ ವ್ಯವಸ್ಥೆಯಲ್ಲಿ ಮತ್ತಷ್ಟು ಸಡಿಲಿಕೆಯನ್ನು ಪ್ರಕಟಿಸಲಾಗಿದ್ದು ಚೀನಾ ಪ್ರಜೆಗಳು ದೇಶದಾದ್ಯಂತ ಯಾವುದೇ ಪ್ರದೇಶದಲ್ಲಿ ನೆಲೆಸಲು, ವಾಸಿಸಲು ಮತ್ತು ಕೆಲಸ ಮಾಡಲು ಅವಕಾಶ ಮಾಡಿಕೊಡಲಾಗಿದೆ.

ಆದರೆ, ನಿವಾಸ ವ್ಯವಸ್ಥೆಯಡಿ ಅವರ ಹೆಸರನ್ನು ಹುಟ್ಟಿದ ಸ್ಥಳದಲ್ಲೇ ನೋಂದಾಯಿಸಿರುವುದರಿಂದ ಆ ಸ್ಥಳದಲ್ಲಿ ಮಾತ್ರ ಅವರು ಆರೋಗ್ಯ ವಿಮೆ, ಶಿಕ್ಷಣ ಮುಂತಾದ ಕೆಲವು ಸರಕಾರಿ ಸೌಲಭ್ಯಗಳನ್ನು ಪಡೆಯಬಹುದಾಗಿದೆ.