ವಾಯುವ್ಯ ಚೀನಾದಲ್ಲಿ ದಿಢೀರ್ ಪ್ರವಾಹ: ಪ್ರವಾಸಿ ತಾಣದಲ್ಲಿ 10 ಮಂದಿ ಮೃತ್ಯು; 23 ಮಂದಿಗೆ ಗಾಯ

ಡಿಂಗ್ಸಿ (ಚೀನಾ), ಜು. 26: ವಾಯುವ್ಯ ಚೀನಾದ ಗನ್ಸು ಪ್ರಾಂತ್ಯದ ಡಿಂಗ್ಸಿ ನಗರದ ವೆಯಿಯುವಾನ್ ಪ್ರದೇಶದಲ್ಲಿರುವ ಶುವಾಂಗ್ಶಿಮೆನ್ ಪ್ರವಾಸಿ ತಾಣದಲ್ಲಿ ದಿಢೀರ್ ಪ್ರವಾಹ ಸಂಭವಿಸಿ 10 ಮಂದಿ ಮೃತಪಟ್ಟಿದ್ದು, 23 ಮಂದಿ ಗಾಯಗೊಂಡಿದ್ದಾರೆ ಎಂದು ಚೀನಾದ ಸರ್ಕಾರಿ ಸುದ್ದಿ ಸಂಸ್ಥೆ CCTV ವರದಿ ಮಾಡಿದೆ.

ಬೆಟ್ಟದ ಪ್ರದೇಶದಲ್ಲಿ ಅಲ್ಪಾವಧಿಯಲ್ಲಿ ಸುರಿದ ಧಾರಾಕಾರ ಮಳೆಯಿಂದಾಗಿ ದಿಢೀರ್ ಪ್ರವಾಹ ಉಂಟಾಗಿ, ಪ್ರವಾಸಿ ತಾಣದಲ್ಲಿದ್ದ ಹಲವಾರು ಪ್ರವಾಸಿಗರು ಸಿಲುಕಿಕೊಂಡರು. ಗಾಯಗೊಂಡ 23 ಮಂದಿಯನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಪ್ರವಾಹದಲ್ಲಿ ಸಿಲುಕಿದ್ದ 174 ಮಂದಿಯನ್ನು ರಕ್ಷಣಾ ಸಿಬ್ಬಂದಿ ಸುರಕ್ಷಿತವಾಗಿ ರಕ್ಷಿಸಿದ್ದಾರೆ ಎಂದು CCTV ತಿಳಿಸಿದೆ.

ಇದಕ್ಕೂ ಮುನ್ನ, ವಾಯುವ್ಯ ಚೀನಾದ ರಾಜಧಾನಿ ಬೀಜಿಂಗ್‌ನಿಂದ ಸುಮಾರು 1,200 ಕಿಲೋಮೀಟರ್ ದೂರದಲ್ಲಿರುವ ದಕ್ಷಿಣ ಗನ್ಸುವಿನ ಗುಡ್ಡಗಾಡು ಹಾಗೂ ಕಡಿದಾದ ಪ್ರದೇಶದಲ್ಲಿರುವ ಶುವಾಂಗ್ಶಿಮೆನ್ ಪ್ರವಾಸಿ ತಾಣದಲ್ಲಿ ದಿಢೀರ್ ಪ್ರವಾಹ ಸಂಭವಿಸಿರುವುದಾಗಿ CCTV ವರದಿ ಮಾಡಿತ್ತು.

ಗನ್ಸು ಪ್ರಾಂತ್ಯದ ಈ ಪ್ರವಾಸಿ ತಾಣವು ಬೇಸಿಗೆ ಕಾಲದಲ್ಲಿ ಹೆಚ್ಚಿನ ಸಂಖ್ಯೆಯ ಪ್ರವಾಸಿಗರನ್ನು ಆಕರ್ಷಿಸುವ ಜನಪ್ರಿಯ ತಾಣವಾಗಿದೆ. ನೈಸರ್ಗಿಕ ಕಲ್ಲಿನ ಕಮಾನುಗಳು, ಆಲ್ಪೈನ್ ಹುಲ್ಲುಗಾವಲುಗಳು ಹಾಗೂ ಬೆಟ್ಟದ ಝರಿಗಳಿಗೆ ಶುವಾಂಗ್ಶಿಮೆನ್ ಹೆಸರುವಾಸಿಯಾಗಿದೆ. ಇದರಿಂದಾಗಿ ಪ್ರತಿ ವರ್ಷ ಸಾವಿರಾರು ಮಂದಿ ಈ ಪ್ರದೇಶಕ್ಕೆ ಭೇಟಿ ನೀಡುತ್ತಾರೆ.